1. Dhithu baani ohudheriwe nubajha omuhudhera Bibiliya?

 ONOWUBUWELA mudhidhi obajhagawene omuhudhera Bibiliya? Podi wera wahitikina vanlubale nunona wihina Mulugu ohukanna ndina. Obe wahihagalala vanlubale nunona wihina Mulugu kanatoriha athu othukuthani wa mootho. Teto wahihagalala nuuhudhera wihina onere ohogolowela wawona amudhawo ekwile ni okala vamodha naaliwa mparayizu.

2. Ohiya ohudherave ebaribari ya mBibiliyani, epaddi baani yamwigumini mwawo wandiliwe osaddula? (Efésios 5:1, 2)

² Mudhidhi omuhudheraga Bibiliya, odhivela wanniwena ni Yehova wambela wenjhedhedheya. Odhivela wula wahuthukulela oparihedha mabasa ndhe wahudheriwe. Mwaha wa yeyo wambela werana dhothoma dhapama mowiwanana ni ndhe wahudheriwe mBibiliyani. Ohufiyedha osaddula dhikalelo dhawo mwaha efunelo yawo yaali omuhagalasa Yehova. Teto ndala ninga mwaana anamutajhihiye baabe oodhivela, we wanna omutajhiha Baabo oodhulu. — Omwileri Efésios 5:1, 2.

3. Makoho baani nnahowelihu wawerana?

³ Wikohe: ‘Gerege odhivela waaga ni Yehova wili wolibeene mohiyana ni mudhidhi gibajhagawene omuhudhera Bibiliya? Makalelo aaga owubuwela ni owerana dhithudha enoligana ni mubuwelo wa Yehova vano gimanlimi obaddiziwa? Gerege ginowoniha wi ginowadhivela addibila?’ Akala “odhivela wanniwena kale” ohuvuguwa, kuwukuwe. Yahipadduwa emodhave ni makiristawu oobajha. Yesu kasukumme ni kanadha anisukuma. (Apo. 2:4, 7) Oliye ohunona wihina iyo podi ovenyihedha odhivela nannihuna nibajhagawene ohudhera ebaribari.

4. Ohudhera wula nnaasuze ddi?

⁴ Ohudhera wula nnere woona makalelo owenjhedhedha  odhivela ninnihuna ni Yehova vamodha ni athu amodha. Teto nnere woona mareeliho nnawakelihu nadidela wenjhedhedha odhivela ninnihuna ni Yehova modha ni addibila.

5-6. Makathamiho baani yanfwanye murumiwi Pawulo mudhidhi aaparaga mabasa oolaleya, ki yamuthukulele ddi odhowagave amulabelaga Yehova?

⁵ Murumiwi Pawulo ohagalala mwaha omulabela Yehova, naarive ehili ethu yokweya. Murumiwi Pawulo ohowela weedda olenddo dholapela teto mudhidhi yole kiyaali yokweya werana eyo. Eeddaga olenddo, murumiwi Pawulo ‘ahifwanyiwa woopiha wa otekuma wa manjhe’ ni ‘osegedhiwa naambava.’ (2 Cor. 11:23-27) Malabo mamodha addibila amodha kiyavaha thima wilibihedha wa Pawulo.— 2 Cor. 10:10; Fil. 4:15.

⁶ Ethu baani yamukavihere Pawulo odhowagave amulabelaga Yehova? Pawulo ahihudhera dhikalelo dha Yehova wodhela omwileri Bibiliya ni dhithu dhampadduwela mwigumi mwaaye. Pawulo ahifiyedha woona wihina Yehova oomudhivela. (Rom. 8:38, 39; Efé. 2:4, 5) Mwaha wa yeyo, odhivela aanniyena ni Yehova wahenjhedhedheya. Murumiwi Pawulo ahooniha odhivela waye ni Yehova wodhela ‘walabela ni ohihiya walabela oweela.’ — Heb. 6:10.

7. Nnande addi wenjhedhedha odhivela ninnihuna ni Yehova?

⁷ Iyo podi wenjhedhedha odhivela ninnihuna ni Yehova wodhela omwileri Bibiliya nuupwaseya. Wamwilerigi Bibiliya ovede wonelamo ethu baani kadda yopadduwa enuhudhihiwa wodhela Yehova. Wamala wikohe: ‘Yopadduwa ela enoniha aavi wihina Yehova anogidhivela? Yopadduwa ela enagikavihera aavi wenjhedhedha odhivela ginnimina ni Yehova?’

8. Makalelo mamodha owenjhedhedha odhivela ninnihuna ni Yehova baavi?

⁸ Makalelo mamodha owenjhedhedha odhivela ninnihuna ni Yehova fuudhela onfugulela murima wehu ni nlobelo. (Sal. 25:4, 5) Teto Yehova anowavuruwana malobelo ehu. (1 João 3:21, 22) Murogola dhaala anakala ohAziya anithaniwa Khanh, anihina: “Omabajhowene miyo gamudhivelesa Yehova mwaha wa dhithu gahudheremi baahi, mbwenye vasogolova nuwona wihina Yehova owawakula malobelo aaga odhivela gannimina wenjhedhedheyaga. Odhivela wula wahigithukulela weragana dhithu wihina gimuhagalase.” b

9. Nnonne addi wihina Timotiyu owadhivela vanlubale addibila?

⁹ Nuuvira yakadhene murumiwi Pawulo nuukala mukiristawu, oliye omunona muzombwe dhaala apama ithaniwa Timotiyu. Timotiyu omuhdivela Yehova ni owadhivela athu amodha. Pawulo owoga naakudda Filipo egihina: ‘Kaginamona muthu mmodha anna efunelo yokavihera ninga oliye.’ (Fil. 2:20) Vala Pawulo kawoga wodhela Timotiyu okala namaholela apama obe anonne owoga pama, mbwenye Pawulo ootikina mwaha odhivela anna Timotiyu naaddibila vamodha ni arogola. Mohanganyedha addibila a mulogo aaredhela Timotiyu yohagalala yanona wihina Timotiyu eere wawaredhela. — 1 Cor. 4:17.

10. Nimakalelo baani Ana ni mamune yonihiliwa wi yowadhivela addibila?

¹⁰ Iyo nnosayela makalelo owatajhiha addibilihu. (Heb. 13:16) Kasugwa yopadduwa ya Ana asorihiwe ohudhera wivirile. Nupadduwa ngovi Ana ni mamune odhowa waredhela emudhi dhaala eli Anamoona a Yehova,  aliwa woona wihina nyumba yaaddibila ale yahigujhuwa vadhuluva. Mwaha wa yeyo guwo dhaatene dha emudhi ele dhahitakala. Ana onowoga egihina: “Iyo othukula dhowara ndhe wihina nafule nuwindo iyo wingomari ni wahogolosela. Ethu nerilihuna kiyaali enene, mbwenye ehinthukulela okanna wandana wapama ofiyedha peeno.” Odhivela anna Ana ni mamune wahathukulela wakavihera addibila.— 1 João 3:17, 18.

11. a) Athu amodha enakala aavi nawoniha wi nnowadhivela? b) Mowiwanana ni Provérbios 19:17, Yehova anakala aavi oonaga wi nnowadhivela athu amodha?

¹¹ Nakala athu apama ni nawonihaga odhivela athu amodha aliwa podi wonaga wihina nnowilibihedha omutajhiha Yehova. Podi wera iyo kannoona makalelo addibila enavahiwa thima opama wehu. Murogola Khanh, asorihiwe mundduli, onowawubuwela nuuhagalala ale emukavihere. Oliye onowoga egihina: “Ginowatamalela vanlubale arogola yagithukulela mmabasani oolaleya. Aliwa yoogidhela vaade, yogithukula wihina nalanxare namala yogihogolosa vaade nubareleya. Vano ginowonelamo wihina gowavaha mabasa. Mbwenye aliwa yerana dhatedhene nuudhivela.” Ebaribari wihina kahi athu aatene enanitamalela mwaha wa dhithu dhapama nnawerelihu. Khanh anowoga wodhela ale emukavihere egi: “Miyo goofuna watamalela athu aatene egikavihere, mbwenye kaginonne winakaliwa. Mbwenye Yehova ohunona, bumwahaya ginoolobela wa Yehova gilobaga wihina awerele dhatedhene gihinandimi wawerela.” Yehova onoopwasedha osugwa dhatedhene nnerihuna wihina nawonihe athu opama naarive dhigaali dhing’ono. Yehova onowoona dhithu dhatedhene nnerihuna ni anere onreeliha. — Omwileri Provérbios 19:17.

12. Addibila enande addi woniha odhivela mmulogoni? (Osugwe fotu.)

 ¹² Akala oli ddibila, onande addi wawoniha odhivela athu amodha ni wakavihera? Muzombwe dhaala anithaniwa Jordan omukoha namaholela mulogo makalelo owawoniha odhivela addibila mmulogoni. Namaholela mulogo ole omutamalela mwaha wilibihedha waye ni onvaha dholaga dhamukavihere oliye werana dhithu dhowinjhiva wihina akaviherena addibila. Motajhiha, oliye omukongomedha Jordan ofiya mambeseene omutugumanoni. Ohiya eyenove, oliye ohowela ovaha dhowakula mmutugumanoni, okuma mmalaleyelo naaddibila a nikuru naye ni osayela makalelo owakavihera addibila. Jordan ohara yolaga ya namaholela mulogo ole, mwaha wa yeyo ohiya okannave dhikalelo dhixa oliye wenjhedhedha odhivela anniyena naaddibila amodha. Jordan ohudhera wihina, kinahoweleya ojheha okala mudhaari ookavihera wihina nibajhe wakavihera athu amodha, mbwenye nathomeliwa okala mudhaari ookavihera nnohowela odhowagave naakaviheraga addibila. — 1 Tim. 3:8-10, 13.

13. Nimakalelo baani odhivela wimuthukuleliwa ddibila Christian ohogolowela okala namaholela mulogo?

¹³ Ki akala kale waali namaholela mulogo obe mudhaari okavihera? Yehova kanadduwala mabasa aamatene wapariliwe ni odhivela wanniwena wuthukulele wapara mabasa ala. (1 Cor. 15:58) Teto oliye onowoona odhivela ononihiwe ofiyedha peeno. Ddibila dhaala anithaniwa Christian ahukuuwa vanlubale nuuhiya okala namaholela mulogo. Naarive dhigaali ndo, oliye onowoga egi: “Miyo gaherana dhatedhene gandimi wihina gimulabelegeve Yehova ni woniha odhivela ginnimina nuliye naarive ngayelele mutholo dhaaga.” Nuuvira mudhidhi, Christian ohogolowela  okala namaholela mulogo. Christian onowogave egi: “Miyo wubuwela, akala Yehova ni thagaraga dhaye onofuna wihina miyo gihogolowele okala namaholela mulogo, miyo ginere orumedha mutholo ola dila bili mwaha omudhivela Oliye ni wadhivela addibila ni arogola.”

14. Nnahudhera ddi ni yopadduwa ya Elena?

¹⁴ Adhaari a Yehova enowadhivela amwanddamaniwa. (Mat. 22:37-39) Motajhiha, murogola dhaala anithaniwa Elena, anakala oJeyorjiya anowoga egihina: “Omabajhowene ethu yagithukulela olaleya waali odhivela gannimina ni Yehova. Vano odhivela wula wambeliwa wenjhedhedheya, odhivela gannimina naathu obajha wenjhedhedheya. Miyo gapwasedha osugwa makathamiho yanfwanya kadda muthu ni gosayela muselu wadahinye murima dhewa. Makalelo ala owubuwela yogithukulela okanna efunelo yowakavihera athu.” — Rom. 10:13-15.

15-16. Ninga enoniha fotu, dhithu baani dhapama dhinaanipadduwele nawonihaga athu amodha odhivela?

¹⁵ Nawonihaga odhivela addibilihu, aliwa enokavihereya. Mutipa wa Koronaviru nubajha, ddibila dhaala anithaniwa Paolo vamodha ni mwadhiye yahanda wakavihera arogola owinjhiva eli anakalaba olabihedha telefoni wihina yande olaleya. Murogola dhaala anna makathamiho owinjhiva ahanda ohudhera makalelo oolabihedha telefonaaye wihina alaleye. Oliye kaanda olabihedha telefoni wihina  awithane amudhaaye wi yoone Wubuwela okwa wa Yesu. Amudhaaye owakwana 60 yahifiyedha woona muthupo Wowubuwela okwa wa Yesu elabihedhaga vidiyu konferensiya! Odhivela oonihile Paolo ni mwadhiye wahimuthukulela murogola ola okavihereya. Vasogolova, murogola ole omulebela Paolo egihina: “Nnowutamalelani mwaha wakavihera anakalaba ammulogoni. Miyo kagidha giddiwala makalelo Yehova oonihiliye wihina ononisamalela ni wilibihedha watene mwerilinyuna.”

¹⁶ Dhopadduwa ninga ndha dhahimuhudhiha dhithu dhowinjhiva Paolo. Oliye ohuhudhera wihina odhivela ethu yathima okwaranya enonelo obe onona werana dhithu dhowinjhiva. Oliye onowoga egihina: “Miyo galaba ninga nameeddela mulogo. Peeno, ginowonelamo wihina naarive addibila yahubuwelaga mwaha dhaaga, aliwa kinadduwala dhithu dhatedhene gerilimina wihina gakavihere.”

17. Baani anapurelemo mwaha iyo woniha odhivela?

¹⁷ Nawonihaga odhivela athu amodha ni iyoya nnopurelamo vanlubale mwamakalelo ootikiniha. Jonathan, anakala elabo yo Nova Zelandiya ohonelamo eyo. Nlabo dhaala Sabadu nduwa nigaali noowalanene, oliye omoona piyonero dhaala alaleyaga yekaye. Vano Jonathan othoma olaba ni piyonero ole maSabadu aamatene ni mutana. Oliye kubuwela dhithu dhapama aapureliyemo mwaha omukavihera piyonero ole. Jonathan onowoga egi: “Mudhidhi yole miyo kagadhiveliwa olaleya. Mbwenye nuwona makalelo ahudhiha pama piyonero ole ni dhokumeleladha, miyo obajha wadhivela mabasa oolaleya. Ohiya eyenove, miyo okanna mukwaaga apama agikavihere wunnuwelavo epaddi yomuzimuni, wadhivela mabasa oolaleya ni okanna wandana wapama ni Yehova.”

18. Yehova anafuna wihina nerege ddi?

¹⁸ Yehova anafuna wihina aatene iyo nenjhedhedhe odhivela ninnihuna nuliye vamodha naathu amodha. Ninga nonilihu muwari mwa yohudhera ela, iyo podi olibiha odhivela ninnihuna ni Yehova namwilerigi Bibiliya, naapenddaga ni nalobelaga wa oliye. Iyo podi wenjhedhedha odhivela ninnihuna naaddibila vamodha ni arogola wodhela werana dhithu wihina nakavihere. Nenjhedhedha odhivela wehu, nnothabwa omwaddamela Yehova vamodha ni emudhi yehu yomuzimuni eli addibila. Teto wandana ninnihuna ni Yehova vamodha ni addibila onokala wa mukalakala!