OHUDHERA 29
Omukavihere Yesu mwene ehu
‘Gihivahiwa othonga watewene wodhulu ni wavati.’—MAT. 28:18.
JHIBO 13 Kiristu, yotajhiha yehu
DHITHU NNAAHUDHERIHU *
1. Efunelo ya Yehova siivi?
EFUNELO ya Mulugu so wihina muthenga dhapama dhomwene dhilaleyiwe elabo yatene. (Mar. 13:10; 1 Tim. 2:3, 4) Wa Yehova mabasa ala bathima, bumwahaya adhe amusakulege Yesu Kiristu wi asogolelege. Nihikanna ebaribari yowihina Yesu ninga mwenihu, anere wapara mabasa oolaleya ninga Yehova munafuniye omakuthulo wahinafiye.—Mat. 24:14.
2. Dhithu baani nnafunihu woona va yohudhera yela?
2 Ohudhera wula nnere woona makalelo Yesu Kiristu anamulabihedhiye ‘mudhaari oororomeleya ni athotho’ wi aavahe yojha yomuzimuni adharaaye ni wakavihera mabasa olaleya enapariwa. (Mat. 24:45) Ni nnere woona dhithu nnahowelihu werana wi nimukavihere Yesu vamodha ni mudhaari oororomeleya.
YESU ANNA WAHOLELA MABASA OOLALEYA
3. Owedha baani Yesu avahiwiye?
3 Nnakanne aavi ebaribari wi Yesu anna waholela mabasa oolaleya? Mudhidhi vang’ono Yesu ahinathi ohogolowela odhulu, oliye wathwanyuwela anamahara aye oororomeleya omwangoni wa Galileya, oliye owoga egi: ‘Gihivahiwa othonga watewene wodhulu ni wavati.’ Vasogolova oliye wera: ‘Mowindala dhowani mwahudhihe athu a malogo amatene.’ (Mat. 28:18, 19) teto owedha avahiwe Yesu enovolowelavo waholela mabasa oolaleya.
4. Mwahaya bwaddi nikannaga ebaribari yowihina Yesu dinaholela mabasa olaleya?
4 Yesu ohuniroromeliha wihina mabasa owawerana anamahudhera yere opariwa ‘elabo yatene’, ni wihina oliye akale ni anamahara aye ‘malabo amatene ofiyedha omakuthulo wa dhithu ndha.’ (Mat. 28:20) Madhu ala asorihe Yesu enowoniha wi oliye erege waholela mabasa oolaleya ofiyera malabo ehu.
5. Nnakwanelihe aavi yovuhulela ya Salmos 110:3?
5 Yesu ahikanna ebaribari yowihina malabo okuthula, yere okalawo anamalaba owinjhiva yaparege mabasa oolaleya nuviheya. Eyo ehiwogiwa va Salmos 110:3 anihina: ‘Labo anyakoddo enyu enamaruwiwa, athu enyu enerege wivelela ofuna wewa.’ Yesu ahinona wi yovuhulela ela yere wakwanela. Akala onowapara mabasa ala oolaleya onna omukavihera Yesu vamodha ni mudhaari oororomeleya ni onokosa epaddi yowakwanela ya yovuhulela ela. Mbwenye mabasa ala ehikanna makathamiho ewa.
6. Makathamiho baani enanifwanya peeno?
6 Ethu yobajha enanithuwathuwiha bi makathamiho enanifwanya mwaha oharahariwa, anyagereja ni apostata enovuwiha dhowoota wodhela mabasa nnaparihu, podi okala amudhihu akwihu omabasani obe athu nanonilihu, aliwa podi orumedha dhowoota ndho ni onitujelaga wahiya mabasa ehu. Dhilabo dhimodha amwiddani enonithusa ofiyedha wavolosiha mukambura addibilihu ni arogolihu. Iyo kannatikina dhithu ndha dhaapadduwaga mwaha Yesu ohunaddela egi: ‘Malogo matene enere wuwiddani mwaha ndina naaga.’ (Mat. 24:9) Mwebaribarene dhinapadduwa dhinowoniha wihina nihikanna nikavihero na Yehova. (Mat. 5:11, 12) Ddiyabo dinatetedha oharahariwa wula, mbwenye vamentoni va Yesu oliye kahi ethu. Nnikavihero na Yesu Kiristu muthenga dhomwene dhinna olaleyiwa elabo yatene. Nnere woona dhithu dhimodha dhinoniha.
7. Dhithu baani dhinoniha wihina Apocalipse 14:6, 7 anna wakwanela?
7 Woona wihina elabo yatene dhinowogiwa dhiwogelo dhowinjhiva, walaleya athu elabo yatene podi okala makathamiho, Yesu ahiwoga wihina malabo ehu muthenga womwene werege olaleyiwa elabo yatene naarive nifwanyiwaga makathamiho. (Omwileri Apocalipse 14:6, 7.) Dhithu ndha dhinakwanela aavi? Peeno mabasa olaleya enopariwa dhilabo dhowinjhiva ni dhiwogelo dhohiyana-iyana. Motajhiha mu sayitini mwehu athu eelabo yatene podi wawileri malivuru ehu ni dhiwogelo dhowakwana 1000! Peeno livuru nnalabihedhihu wihina naahudhihena athu Bibliya thi Ofwanye egumi yohagalasa ya malabo amatene! Nnoofwanyeya ni dhiwogelo dhowakwana 700! Ohiya yeyove dhihikalawo vidiyu dhinakavihera aliba ohiwa, ni Ebrayili dhinakavihera aliba ohona. Athu a dhiwogelo dhatene enna ohudhera, enna owoga ‘ewogelo yoweela’ obe enna ohudhera ebaribari ya mbibiliyani. (Zac. 8:23; Sof. 3:9) Iyo nihikanna oneti wowoona dhovuhulela ndha dhakwanelaga, dhatene ndha dhinna wakwanela nnikavihero na mwene ehu Yesu Kiristu.
8. Mareeliho baani enadhana mabasa ala oolaleya?
8 Peeno athu owakwana 8 000 000 ni dhilabo dhowakwana 240 enna okala epaddi ya nikuru na Yehova, teto peeno athu owinjhiva enna obaddiziwa! Mbwenye naarive egaali athu owinjhiva, eyo kahiyo ethu enakweya, yathimaya enahagalasa ‘si emuthu exa athu ala enakanniwana’, ni madhu mamodha ehikanna dhikalelo dhapama dhomuzimuni. (Col. 3:8-10) Athu owinjhiva ehihiya okala anamararuwa, oowali ni aansakulo. Yovuhulela ya Isaías 2:4 enna wakwanela, nlogo na Yehova kannahudhera koddo, nilibiheraga owara emuthu exa nnowaddiginya athu murima wihina etugumanege ni mulogo wa Yehova ni nnowoniha wi nnamuhara mwene ehu Yesu Kiristu. (João 13:35; 1 Ped. 2:12) Dhithu ndha kadhinapadduwa ni kopolo dhehu mbwenye Yesu dinanivaha kopolo.
YESU OHUMUSAKULA MUDHAARI
9. Mowiwanana ni Mateus 24:45-47, ethu baani awonge Yesu yereye malabo okuthula?
9 Omwileri Mateus 24:45-47. Yesu ahiwoga wihina malabo okuthula eere omuthoma ‘mudhaari orolomeleya ni athotho’ wihina avahege nikuru na Yehova yojha yomuzimuni, kannanganyedha wihina mudhaari ola onolaba vanlubale wihina anivahe yojha yomuzimuni. Teto siyeyo enapadduwa peeno, mwenihu Yesu onolabihedha nikuru ning’ono na addibila oothikitheriwa wihina enivahe ‘yojha yomuzimuni mudhidhi wofwanelela.’ Ni dhikalawo dhithu dhimodha dhathima, alobwana ala kiniwona ninga annya anroromelo naaddibila. (2 Cor. 1:24) ohiya eyo aliwa ehinona wi Yesu kiristu di mwene anaholela nlogo na Yehova. — Isa. 55:4.
10. Mowiwanana ni fotu, livuru baani ononiwe nuukavihere ohudhera ebaribari?
10 Obajha yaka ya 1919 mudhaari ororomeleya ni athotho anna wegeredha dhoojha wi akavihere athu enna efunelo yohudhera ebaribari wodhela Yehova. Yaka ya 1921 okumihiwa livuru Arpa de Deus nakavihere athu owinjhiva ohudhera ebaribari ya mBibliyani, nuuvira mudhidhi yahisasanyiwa malivuru mamodha. Livuru baani nuukavihere omunona Yehova? Naali livuru “Seja Deus Verdadeiro”, Averdade Que Conduz A Vida Eterna, Poderá Viver Para Sempre na Terra, Conhecimento Que Conduz A Vida Eterna, Bibliya onahudhiha ddi? Você Pode Entender a Bíblia, obe livuru nnalabihedhihu Ofwanye egumi yohagalasa ya malabo amatene! Malivuru matene ala ehinikavihera wahudhiha ebaribari athu aatene, ni kadda livuru nowakavihera athu mudhidhi yafwanyeyiwa.
11. Ekalele ddi yapama odhowagave nijhihagave epaddi yomuzimuni?
11 Kahiyo yalave eli axa mwibaribarini enahowela yojha yomuzimuni, iyo aatene nnohowela. Murumiwi Pawulo ohuleba: ‘dhoojha dhomuzimuni, dhinajhiwa naathu owithwelavo omuzimuni.’ Pawulo owoga wihina dhithu nnahudherihu mBibiliyani dhinonikavihera ‘wixagiha ofiyedha ohiyaniha ethu yapama ni yabure.’ (Heb. 5:14) Werana efunelo ya Yehova peeno kahiyo ethu yokweya, mwaha obure waathu onna othabwa. Mbwenye Yesu ononisamalela ni ononivaha yojha yomuzimuni enanikavihera okanna nroromelo nooliba. Oliye onomulabihedha mudhaari oororomeleya wi egeredhe yojha yomuzimuni, ni ononivaha dhoojha dhinakumela mBibiliyani.
12. Nnaamutajhihe addi Yesu wodhela othithimiha ndina na Mulugu?
12 Iyo nnohara yotajhiha ya Yesu, ni nnovaha Yehova nthithimiho nnafwaneleliye. (João 17:6, 26) Motajhiha, Yaka ya 1931 ninga nnawogela livuru na Isaías 43:10-12 iyo obajha ononiwa ninga Anamoona a Yehova, nerilena ndo mwaha nnafuna ninoniwe ni ndina na Yehova ni nnafuna nimuthithimihe oliye. Obajha mweri wa Outubro wa yaka yele, ndina na Mulugu nnoofwanyeya vakapani a Namasugwera. Ohiya eyo anyagereja enovenyihamo ndina na Mulugu mBibiliyani mwewa. Tradução do Novo Mundo da Bíblia Sagrada onolabihedha ndina na Mulugu mburo dhatedhene nafwanyeyesa ndina na Mulugu vobajhavene.
YESU OHAWEGEREDHA ANAMAHARA AYE
13. Enurolomeliha wihina Yesu anomulabihedha mudhaari oororomeleya ni athotho peeno ddi? (João 6:68)
13 Yesu onomulabihera ‘mudhaari oororomeleya ni athotho’ wihina egeredhe nikuru nihinaligana ni nikuru nimodha na velaboni ya vati, nnavuwiha webedha webaribari. Ononamo aavi okala epaddi ya nikuru nna? Podi wera onowawubuwela madhu a Peduru amukohiliye Yesu, enihina: ‘Nabuya nnadhowe wuuvi? Nyu dinna muthenga dha egumi yohimala.’ (João 6:68) Yesu onolabihedha nikuru wihina enivahe yojha yomuzimuni ni onixagihe mmabasani oolaleya muthenga dhapama. Ohiya yeyove ononikavihera owara ‘emuthu exa’ni omuhagalasa Yehova. Onowubuwelela makalelo wakaliwe wahere wahikala epaddi ya nikuru na Yehova. —Efé. 4:24.
14. Dhoholela nnakelihu munikuruni na Yehova wodhela mutipa ola wa koronaviru dhinanibarela ni makalelo baani?
14 Yesu ononivaha dholaga nnahowelihu mudhidhi worusa, eyo enowoneya pamadhene koronaviru ola nuwambela. Naarive athu amwilaboni ehinone ethu yahoweliwa yowera, Yesu onivaha dholaga nahowelihu wodhela nikuru naaye. Iyo okongomedhiwa omuwara maskara nakala vaari vaanamwinjhi ni olapelana naathu, anamaholela mulogo wubusedhiwa wihina yaligarelege malabwene addibila ammulogoni ni osugwera dhithu dhahalela addibila epaddi yomwilini ni yomuzimuni. (Isa. 32:1, 2) Ohiya eyo nahakela dhoxagiha dhimodha ni nahilibihiwa ni muselu dhakumela Nikuru Nolamulela.
15. a) Dhoholela baani nnakelihu muwari mwa mutipa ola wodhela mutugumano ni oolaleya? b) Ki mareelihoya baavi enakumelelavo?
15 Muwari mwa mutipa yola, ni iyowa nihakela dhoholela dhawoga wodhela otugumanagave ni wapara mabasa olaleya. Vohilegela iyo wambela woona mutugumano, musonkano wa nlabo nimodha, wa malabo mararu ni vidiyu konferensiya. Vohilegela iyo obajha olaleya ni telefoni, makarta teto Yehova anna oreeliha wilibihera wula. Beteli dhowinjhiva dhinowoga wodhela wunnuwelavo wa anamalaleya muwari mwa mutipa yola, teto addibila owinjhiva ehikanna dhopadduwa dha mwigumini dhohagalasa.— Osugwe kwaduru “ Yehova anna oreeliha mabasa ehu olaleya”.
16. Ethu baani nahinanganyedhihu?
16 Amodhaya podi wubuwelaga wi nikuru na Yehova thoxaga bure muwari mwa mutipa yola. Mbwenye enowoneya pamadhene wihina nikuru nno, nnonivaha dhoholela dhofwanelela nnahowelihu. (Mat. 11:19) Mbwenye iyo nubuwela makalelo odhivela a Yesu aneddihiye nikuru naaye, kannanganyedha wihina naarive epadduwe ethu-sithu osogolo, Yehova vamodha ni Yesu enakale ni iyo. — Omwileri Hebreus 13:5, 6.
17. Ononamo aavi okanna Yesu ninga mwene?
17 Iyo nnakala ohagalalene mwaha wokanna Yesu ninga mwene ehu! Iyo nili epaddi ya nikuru nahinna nsakulo, iyo nnojhihiwa pamadhene epaddi yomuzimuni ni nnowakela dhoxagiha nnahowelihu wi napare mabasa oolaleya. Kadda muthu wa iyo onohudhihiwa okanna emuthu exa ni nnohudhera odhivelana mmodha ni mukwaye. Mohanganyedha iyo nnowithukula vanlubale mwaha okanna Yesu ninga mwene ehu!
JHIBO 16 Yehova ohumuthoma mwene muxa
^ Mbwabwadda ni mbwabwadda wa matxikwi alobwana anamwani ni ahiyana, enna wapara mabasa oolaleya, akala we oli mmodha wa aliwa, onone wihina onna olaba vamodha ni Yesu Kiristu okaviheraga mabasa oolaleya. Ohudhera wula nnere woona wihina Yesu anna wasogolela mabasa oolaleya. Opendda dhithu ndha dhinere onikavihera omulabela Yehova ni wapara mabasa enaholeliwa ni Yesu Kiristu.
