1. Nawonege aavi malobelo?

 MPADDUSI odhulu ni a elabo yavati ohunivaha mukono munlubale​—onfiyedha oliye ni nlobelo. Iyo podi onfugulela Yehova murima wehu wamutene ni nlobelo ni ewogelo nnafunihu, naarive nihirajhihile omwaddela mudhidhi nnafunihu olobela. Nikanne ebaribari wihina Babihu odhulu anere onivuruwana, naarive nilobelaga nigaali ospitale nibulelaga obe nigaali mukambura, oliye anere onivuruwana. Nnomutamalela vanlubale Yehova mwaha mukono oyo wolobela.

2. Davidi oniha aavi wihina oovaha thima vanlubale gari yoolobela?

² Mwene Davidi ovaha thima mukono ola wolobela. Oliye ahilobela wa Yehova egi: ‘Malobelo aaga ekale ninga mukutho wopaha vamento veenyu.’ (Sal. 141:1, 2) Malabo a Davidi insensu yalabihedhiwa naanamakutha mutempulu yopwasedhiwa wegeredhiwa. (Êx. 30:34, 35) Makalelo ayo yegeredhiwa insensu yomubusedha Davidi wihina ohowela wasayela madhu ofwanelela alobelaga. Ni iyowa nnafuna nimutajhihege Davidi, Nnafuna wihina malobelo ehu emuhagalasege Yehova.

3. Nanfiyedhaga Yehova ni nlobelo nikalege aavi, ki mwahaya bwaddi?

³ Nalobelaga wa Yehova nonihege nriho. Karajhiha wubuwela dhithu dhotikiniha onihiwe Izayiya, Ezekiyeli, Daniyeli vamodha ni Juwawu. Dhithu dhonihiwiwa kadhali dhimodhave mbwenye museluya wowiwanana. Dhowooniha dhatedhene dhamooniha Yehova ninga mwene munlubale. Izayiya ‘ahimoona Yehova  agakiratile vampaddoni va omwene odhulu.’ (Isa. 6:1-3) Vano Ezekiyeli amoonile Yehova agakiratile mukaroni mwaaye odhulu amoneeliwaga ni waara winlubale . . . ‘waarawa waligana ni wa muzirilimbo.’ (Eze. 1:26-28) Daniyeli amoonile Yehova agabamle dhowara dhoweela, vano va mpaddoniva vikumaga nlumi na mootho. (Dan. 7:9, 10) Vano Juwawu amoonile Yehova agakiratile vampaddoni vaye agapeeliwe ni muzirilimbo wa kore ya esmeralda. (Apo. 4:2-4) Dhowooniha ndha dhinonubusedha wihina Yehova da kopolo ni dowaara. Bumwahaya nigavaha thima vanlubale gari ninnihuna yoolobela wa oliye. Mbwenye nalobelaga nnafuna nlobelege ni nriho. Ki vano nalobelaga nsorihege dhithu baani?

4. Nnahudhera ddi ni madhu oobajha asorihile Yesu enafwanyeya va Mateus 6:9, 10?

⁴ Omwileri Mateus 6:9, 10. Mwaha awogile Yesu Vamwangoni va Olivera Yesu ahahudhiha anamahara aye wihina elobelege mwamakalelo enamuhagalasa Mulugu. Yesu abanjhe osoriha dhithu dhobajha ofuneya. Motajhiha, vobajha Yesu asorihe wihina ndina na Mulugu neelihiwe, omwene waye odhe. Omwene oyo buyoyo onatolose amwiddani aatene a Mulugu ni onaadhena mareeliho mwilaboni yatene ya vati. Nasorihaga dhithu ndha Yesu anihiyedhiye nnooniha wihina efunelo ya Mulugu sofuneya mwigumi mwehu.

5. Nalobelaga, ethu yabure osoriha dhithu nnahowelihu dha mwigumi?

⁵ Madhu oharela asorihe Yesu enowooniha wihina kahiyo ethu yabure nalobelaga oloba dhithu nnahowelihu mwigumini mwehu. Iyo podi omuloba Yehova wihina anivahe yojha ya kadda labo, anilevelele dhothega dhehu, anibarele mwa dhoweha ni anaakihedhe mmadani mwa mwiddani. (Mat. 6:11-13) Nalobelaga wa Yehova nilobaga dhithu ndha, nnowoniha wihina nnamuroromela oliye teto nnowoniha wihina nnafuna nerena dhatedhene wi nimuhagalase.

6. Nalobelaga nsorihege baahi dhithu asorihe Yesu va nlobele naaye? Kawogamo.

⁶ Yesu kaafuna wihina anamahara aye yavirisedhege madhu mamodhave enafwanyeya va nlobeloni nna. Mudhidhi mmodha  alobelaga Yesu ohusoriha dhithu dhohiyana-iyana dhaali dhathima mudhidhi yole afwanyeyiye. (Mat. 26:39, 42; João 17:1-26) Ninga oliye, nalobelaga iyo podi osorihaga ethu sithu yofuneya mwigumini mwehu. Motajhiha, nafuna othoma ethu yofuneya ya mwigumi iyo podi olobela nilobaga thotho. (Sal. 119:33, 34) Naakela mutholo muxa mmulogoni iyo podi olobela nlobaga thotho wihina nande wakwanihedha pama. (Prov. 2:6) Ababi podi walobelela aniwa teto ahima podi walobelela makolo ewa, teto iyo aatene nnohowela walobelelaga anamahudhera ehu a Bibliya vamodha naathu amodha nnafwanyihu mmabasani olaleya. Ebaribari wihina nalobelaga kanikalege olobave dhithu wa Yehova.

7. Mwahaya bwaddi nigahowela onvuwiha Yehova nalobelaga?

⁷ Nalobelaga sapama onvuwiha Yehova mmalobeloni mwehu. Kavo muthu anafwanelela ovuwihiwa ni othithimihiwa ahili Yehova. Oliye ‘dapama ni muthu olevelela.’ Yehova muthu ‘athagaraga ni anthebwa, doovilela ni ohukanna odhivela ohunamala.’ (Sal. 86:5, 15) Mwebaribarene nnofwanelela omuthithimiha Yehova mwaha wa dhikalelo dhaye dhapama ni mwaha wa dhithu dhatedhene dhapama ananereliye.

8. Dhithu baani dhinathukulela omutamalela Yehova? (Salmos 104:12-15, 24)

⁸ Ohiya onvuwiha baahi Yehova nalobelaga, nnofwanelela omutamalela mwaha wa dhithu dhatedhene ananivahiye. Iyo podi omutamalela Yehova mwaha wa dhopaddusa dhotikiniha nnonihu, mwaha wa dhoojha dhohiyana-iyana ananivahiye ni mwaha wa onivaha akwihu enanihagalasa. Babihu Yehova anonivaha dhithu ndho dhatedhene mwaha anafuna wihina nihagalalege. (Omwileri Salmos 104:12-15, 24.) Vano ethu enlubale enanithukulela omutamalela Yehova si yojha yomuzimuni ananivahiye, ni mwaha wa ejhehedhelo yohagalasa ya osogolo.

9. Enaanikavihere ddi ohuddiwala omutamalela Yehova? (1 Tessalonicenses 5:17, 18)

⁹ Malabo mamodha iyo podi oddiwala omutamalela Yehova dhithu dhapama anivahiye. Wegi ohuddiwale omutamalela Yehova  enahoweleya were ddi? We podi olebela dhithu omulobiliwe Yehova mudhidhi olobelaga vano wavira mudhidhi podi othukula dhithu walebenliwe wihina woone makalelo Yehova akunliye malobelo awo. We podi olobela wa Yehova otamalelaga nikavihero naaye. (Omwileri 1 Tessalonicenses 5:17, 18.) Karajhiha wubuwela: Muthu anitamalela mwaha wa ethu nerilihu kannahagalala?. Bumwahaya, namutamalelaga Yehova mwaha wa dhithu dhapama ananivahiye anoothabwa ohagalala. (Col. 3:15) Ethu enlubale enanithukulela omutamalela Yehova ddi?

10. Ninga munawogela 1 Pedro 2:21, dhithu baani dhinanthukulela omutamalela Yehova mwaha omuruma mwanaye mwilaboni ya vati?

¹⁰ Omwileri 1 Pedro 2:21. Nnomutamalela vanlubale Yehova mwaha omuruma mwanaye wihina adhe anihudhihe ebaribari. Mwebaribarene, nahudheraga wodhela egumi ya Yesu nnohudhera dhithu dhowinjhiva wodhela oliye ni makalelo omuhagalasa. Naroromelaga mukutho wa Yesu, iyo podi okanna wandana wapama ni Yehova ni okanna murenddele Nuliye. — Rom. 5:1.

11. Mwahaya bwaddi nigalobela wa Yehova mwa ndina na Yesu?

¹¹ Nnomutamalela vanlubale Yehova mwaha weenya wihina ninfiyedhege ni nlobelo wodhela mwanaye Yesu Kiristu. Amulabihedhaga mwanaye Yesu, Yehova anonivaha dhithu nnalobihu. Yehova anovuruwana ni anowawakula malobelo eneriwana mwa ndina na Yesu Kiristu. Siyeyo asorihe Yesu egi: ‘Dhithu dhatedhene munalobinyu mwa ndina naaga ginere wuvahani, ginere weeriha wihina babi avuwihiwe wodhela mwa ndina na Mwaana.’— João 14:13, 14.

12. Ethu emodha enanthukulela omutamalela mwaha omuruma mwanaye mwilaboni ya vati ddi?

¹² Yehova analevelela dhothega dhehu mwaha wa mukutho wa mwanaye Yesu Kiristu. Bibliya anihina Yesu: ‘dinamakutha ehu munlubale akiratile mono woojha wa Mpaddo Womwene Wodhulu.’ (Heb. 8:1) Yesu ‘dinanikavihera onfiyedha Babe.’ (1 João 2:1) Iyo nnomutamalela vanlubale Yehova mwaha onivaha Namakutha Munlubale anonelamo ohulogomana wehu ni oviriganiha wehu ni ‘ananikavihera onfiyedha babihu.’ (Rom. 8:34; Heb. 4:15) Mwaha okala athu othega kanande ofiyedha Yehova nihikaviheriwe ni mukutho wa Yesu Kiristu. Mohanganyedha mukutho wa Yesu nvaho munlubale Yehova anivahiliye, owoga ebaribari iyo kannande otamalela mwaha wa mukono ola munlubale — mukutho wa Yesu.

13. Omahiyu Yesu ahinakwe onihile aavi wihina owathuwathuwela anamahara aye?

¹³ Omahiyu Yesu ahinakwe, oliye ahaloba Ababe wihina ‘yasugwerege anamahara aye mwaha wa mbure.’ (João 17:15) Ndo Yesu ahoniha wihina owadhivela anamahara aye! Naarive anonaga wihina eere ofwanyiwa dhoweha dhinlubale ahoniha wihina owathuwathuwela anamahara aye.

14. Nnonihe aavi wihina nnowadhivela addibilihu naarogolihu?

¹⁴ Ninga Yesu, iyo kanniwubuwela yekihu mudhidhi nalobelaga. Bumwahaya malabo amatene nigaalobelela addibilihu vamodha naarogolihu. Neragana ndo ninna wiwelela nlamulo na Yesu nnawoga wi nidhivelanege mmodha ni mukwaye, teto nnomoniha Yehova wi nnowadhivela vanlubale addibilihu. (João 13:34) Nalobelelaga addibilihu kannajhela mudhidhihu ebewene. Bibliya anihina:  ‘malobelo athu apama ehikanna kopolo.’— Tia. 5:16.

15. Mwahaya bwaddi addibilihu egahowela malobelo ehu?

¹⁵ Addibilihu enowahowela malobelo ehu mwaha enofwanyiwa makathamiho manlubale. Iyo podi omuloba Yehova wihina akavihere owanana oredda, ng’ovi, koddo oharahariwa ni makathamiho mamodha. Teto iyo podi walobelelaga addibila enakavihera addibila amodha enahowela nikavihero. Akala ohumunona ddibila anafwanyiwa makathamiho ninga yala, kiyawomele owogaga ndina naaye walobelaga? Iyo nnowoniha wihina nnothabwa wadhivela addibilihu naamulobaga Yehova wihina akavihere.

16. Mwahaya bwaddi nigahowela wasamalela addibila ale enasamalela mulogo?

¹⁶ Anamaholela mulogo ni adhaari okavihera enohagalala vanlubale nalobelelaga mwaha malobelo ehu enothabwa wakavihera. Murumiwi Pawulo ahaloba addibila wihina emulobelelege. Oliye ohuleba egi: ‘Mugilobelelege ni miyoya wihina givahiwe madhu gafunaga owoga wihina gande owoga dhoviteya dhotaleleya dha muthenga wapama.’ (Efé. 6:19) Moligana ni malabo a Pawulo peeno wihikala addibila enilibihedha vanlubale wihina esamalele mulogo. Nalobelaga wa Yehova wihina akavihere addibila ayo nnowoniha wi nnowadhivela.

17-18. Mudhidhi baani nnaalobiwihu wi nilobele, ki ethu baani yofwanelela wubuwela?

¹⁷ Malabo mamodha iyo podi olobiwa wihina nlobele vanamwinjhini. Motajhiha, murogola anamuhudhiha namahudhera aye podi omuloba murogola ananvelela wihina alobele. Akala murogola oyo kamunonne namahudheraya yere owomela erena nlobelo nogomihedha, mwamakalelo yayo murogola ole anere woona dhithu dhinamuhalela namahudhera ole indo podi osoriha.

¹⁸ Vano alobiwa ddibila wihina alobele mmutugumanoni obe mutugumano wa mmalaleyelo sapama wubuwela mutoma wa mutugumanoya. Nalobelaga kannapatha mudhidhi yoyo wihina nivahe dholaga obe nivuwihe muselu. Mmutugumanoni mwehu mutala mitanu  sa jhibo ni nlobelo. Mbwenye ddibila anakanna nlobelo noobajha kinahoweleya ‘olapiha nlobelo’.—Mat. 6:7.

19. Woona wihina nlabo notoriha na Yehova ninna waddamela enaanikavihere ddi okala owiwegeredhene?

¹⁹ Nnohowela oviheyana malobelo mwaha nlabo notoriha na Yehova ninna waddamela. Bumwahaya Yesu adhe awogege egi: ‘Mukale mento, muhuselele olobela wihina muvuluwe mwadhatedhene dhinafuna opadduwa, ni mwande wimela vamentoni va Mwaana Muthu.’ (Luc. 21:36) Nalobelaga malabo matene nroromelo nehu nnere oliba teto nnakale owiwegeredhene wi niwanena dhithu dhorusa dhinadha osogolo.

20. Nimakalelo baani malobelo ehu enaliganiwa ni mukutho wompahela Yehova?

²⁰ Dhithu baani nihudherihu peeno? Nihoona wihina malobelo nvaho munlubale. Teto nihoona wihina dhithu dhofwanelela oromolaga mmalobeloni ehu dhiwananege ni efunelo ya Yehova. Teto nihoona wihina sapama otamalela mukutho wa Yesu ni otamalelaga mwaha oliye okala mwene ehu. Nihoona wihina ethu enlubale walobelelaga addibilihu naarogolihu nihidduwalaga oromola dhithu nnahowelihu dhomwilini ni dhomuzimuni. Mohanganyedha nnovaha thima vanlubale oneti ninnihuna wolobela, bumwahaya nofuna wawubuwelaga pamadhene madhu nnafunihu walabihedhaga nalobelaga wa Yehova. Nimakalelo yala malobelo ehu enakale ninga mukutho wopaha nnavahihu Yehova — ‘onamuhagalasa.’—Prov. 15:8.