1. Nimakalelo baani Matewuji oonihiliye wihina ahikanna ebaribari wodhela ejhehedho yovenyihiwa muukwani?

 MWAANA dhaala anithaniwa Matewuji, ohukanna oredda munlubale wamuthukulele woperariwa dila dhowinjhivadhene. Nlabo dhaala aliwa yeera omwasistiri porogarama a JW Broadcasting^®. Vano porogarama ole ajaaga omala, aliwa woona jhibo yawoniha addibila yawakelaga athu enavenyihiwe muukwani mwilaboni exa. b Porogarama ole numala, Matewuji wahiddela makolo aye ni owoga egi: “Papa, mama, muhoona? Naarive gikwe ginere ovenyihiwa muukwani. Kamuthuwathuwe, mugijhehege baahi.” Munowanda wonelamo makalelo yaali makolo ala, nuwona wihina ejhehedho yovenyihiwa wanookwa yaali yeebaribari mwigumini mwa mwaniwa?

2-3. Nimakalelo baani wubuwela wodhela ejhehedho yovenyihiwa wanookwa winanikaviheriwa?

² Ejhehedho yovenyihiwa wanookwa ethu nnahowelihu wubuwelaga kadda labo. (João 5:28, 29) Mwahaya bwaddi? Mwaha kannonne nlabo nnadhihu nikale aredda obe omuyelela mmudhihu mukwani. (Ecl. 9:11; Tia. 4:13, 14) Ejhehedho ninnihuna yovenyihiwa muukwani, podi onivaha kopolo nnahowelihu wihina nande owanana makathamiho ayo yanifwanya. (1 Tes. 4:13) Bibiliya ononroromeliha wihina Yehova, babihu oodhulu, ohuninona ni ononidhivela vanlubale. (Luc. 12:7) Mwebaribarene oliye ohuninona ni kinamuruse onihogolosela okalawo ni dhikalelo dhimodhave nannihuna nahinathi okwa. Yehova ononidhivela vanlubale, mwaha wa odhivela waye ohunivaha ofuru wokalawo ni mukalakala. Bumwahaya naarive nikwe oliye anere onivenyiha muukwani.

³ Ohudhera wula nnere woona vobajha, mwahaya bwaddi nigahowela ororomela mpaganyo wovenyihiwa mukwani. Namala  nnere woona yopadduwa ya mBibiliyani enaalibihe nroromelo nehu. Yopadduwa ya si yela enafwanyeya va musolo wa wohudhera ela, enihina: ‘Murogoliyo anere ovenyihiwa muukwani.’ (João 11:23) Omagomihedhowa, nnere woona nimakalelo baani ejhehedho yovenyihiwa muukwani enaakaliwa yeebaribari mwigumini mwehu!

4. Wihina nroromele mpaganyo, ebaribari baani nnahowelihu okanna? Owoge yotajhiha.

⁴ Wihina niroromele mpaganyo, nnohowela okanna ebaribari wi muthuya apaganye ohukanna kopolo ni efunelo yowakwanihedha ele apagannyiye. Motajhiha, kubuwela nyumbawo egamonthe mwaha wa nipevo ninlubale, we woonelamo wi enohoweleya owomihedhiwa. Vano mukwawo uwaddamenle owoga ni we egi: “Ginere wukavihera owomihedha nyumba yawo.” Eyo enatonyihedha wi mukwawo oyo ohukanna efunelo yowukavihera. Akala mukwawo oyo namamaga a nyumba ni ohukanna dhipano dhomagana nyumba, we onere ororomela wi oliye ohukanna kopolo yowakwanihedha mpaganyo waye. Bumwahaya, onere ororomela wi anere omaga. Nnohowela okanna nroromelo nimodhave wodhela mpaganyo wa Mulugu wowavenyiha anookwa? Oliye ohukanna kopolo ni efunelo yowakwanihedha mpaganyo ola?

5-6. Mwahaya bwaddi nihanganyedhaga wihina Yehova ohukanna efunelo yowavenyiha anookwa?

⁵ Yehova ohukanna efunelo yowavenyiha athu muukwani? Hee ohukanna. Wihina onihe eyo, Yehova wavethela anamaleba Bibiliya oleba wodhela mpaganyo ola, wihina onere wakwanela osogolo. (Isa. 26:19; Ose. 13:14; Apo. 20:11-13) Teto Yehova apaganya werana ethu-sithu, oliye onowakwanihedha mohihiyedhedha. (Jos. 23:14) Mwebaribarene, Yehova onojheha nuuthaba wavenyiha anookwa. Nnonne aavi wi eyo enere opadduwa?

⁶ Motajhiha, kasugwa alembe Jo. Oliye ahikanna ebaribari wi naarive ahere akwa, Yehova eere onvenyiha mukwani wihina ahogolowele okalawo. (Jó 14:14, 15) Yehova ohukanna munukwela wa adhaari aye aatene ekwile. Oliye onojheha nuuthaba wavenyiha adhaari aye aatene ni egumi ya murenddele. Mbwenye ki muthithi waathu ekwile ehimunonne Yehova? Mulugu ehu odhivela onofuna wavenyiha. (Atos 24:15) Yehova onofuna wi emunone ni yakeele egumi yohimala mwilaboni yavati. (João 3:16) Eyo enowoniha wihina Yehova ohukanna efunelo yowavenyiha anookwa.

7-8. Mwahaya bwaddi nigahowela okanna ebaribari wi Yehova ohukanna kopolo yowavenyiha anookwa?

⁷ Yehova ohukanna kopolo yowavenyiha anookwa? Hee ohukanna! Teto, oliye ‘dakopolo dhatedhene.’ (Apo. 1:8) Oliye ohukanna kopolo dhomugujhula mwiddani di mwiddani, ni okwawa. (1 Cor. 15:26) Onona eyo, enontodola ni enonivaha kopolo. Kasugwa yotajhiha ya murogola Emma Arnold. Oliye ni emudhi yaye, yahifwanyiwa makathamiho yehile nroromelo newa mudhidhi wa koddo yanabili, ni ahayelela mukwani amudhaaye adhiveliye okampu nazista. Wihina amutodole mwanaye, murogola Emma owoga egi: “Akala athu ekwile kinadha ehogolowela okalawo, eyo enatapulela wi okwa ohukanna kopolo omukwaranya Mulugu, ethu yahinadha ekala ebaribari.” Mwebaribarene kavo ethu enna kopolo omukwaranya Yehova Mulugu ehu akopolo dhatedhene! Woona wi oliye di mpaddusi eegumi, oliye ohukanna kopolo yowahogolosela egumi ale ekwile.

⁸ Nihikanna ethu emodha enanthukulela orumedha wi Yehova anere wavenyiha anookwa: Mubuwelo waye kunna manddile. Kabiha wubuwela, oliye onowubuwela ndina na kadda thendderi. (Isa. 40:26) Ohiya eyo, Yehova onowawubuwela athu aatene ekwile. (Jó 14:13; Luc. 20:37, 38) Wa Yehova ethu yokweya wubuwela dhikalelo dha ale enaavenyihiwe muukwani, ninga makalelo dhaali kove dhewa, dhowera  dhewa, dhaatedhene dhaapadduwele mwigumi mwewa ni mubuwelo wewa.

9. Mwahaya bwaddi ogaroromela mpaganyo wa Yehova wovenyihiwa anookwa?

⁹ Mohanganyedha, nnohowela ororomela mpaganyo wa Yehova wowavenyiha anookwa, mwaha nihinona wi oliye ohukanna efunelo ni kopolo yowakwanihedha mpaganyo ola. Mbwenye nihikanna dhithu dhimodha dhinanthukulela ororomela mpaganyo wa Mulugu wovenyihiwa wanookwa: Kale Yehova ahavenyiha anookwa. Yehova ahavaha kopolo adhaari ohiyana-iyana ninga Yesu wihina yavenyihena anookwa. Vano nnere woona ovenyihiwa wanookwa erilena Yesu, onafwanyeya va João kapitulu 11.

10. Muthenga baani akenle Yesu, ki oliye erile ddi? (João 11:1-3)

¹⁰ Omwileri João 11:1-3. Kabeni nihogolowele omagomihedho wa yaka ya 33 M.W, murudda dhaala withaniwa Betaniya. Yesu ahikanna akwaye apama murudda yole — Lazaro ni arogoliye abiili, Marta ni Mariya. (Luc. 10:38-42) Mbwenye Lazaro okala muredda ni arogoliye obajha omuthuwathuwela. Mwaha wa yeyo, aliwa omuruma muthu wihina adhowe epaddi emodha wahoweleya weedda malabo menddi wihina amwadele Yesu wi Lazaro muredda. (João 10:40) Yowukulihaya sowihina Lazaro akwile mudhidhi Yesu aaddeliwaga muthenga ole. Mbwenye, naarive aganonne wi mukwaye ohukwa Yesu ahijheha ovira malabo menddi ahinadhowe oBetaniya. Teto, Yesu afiile oBetaniya egamanle malabo mannayi Lazaro agaali mmahame. Mwahaya bwaddi Yesu adhe ahiyege ovira malabo mannayi? Mwaha ohiya omukaviherave mukwaye, Yesu afuna erena ethu yamuthithimihe Yehova Mulugu. — João 11:4, 6, 11, 17.

11. Yopadduwa ya Lazaro enanihudhiha ddi wodhela wandana?

¹¹ Yopadduwa ela enonihudhiha wodhela wandana. Kabiha wubuwela. Marta ni Mariya nuumuruma muthu wihina amwaddele Yesu wi mukwaye Lazaro muredda, kahi wihina aliwa yafuna wi Yesu adhowe oBetaniya, aliwa yafuna baahi wi Yesu anone wihina mukwaye Lazaro muredda. (João 11:3) Naarive agaali wolapela, Yesu ahafune eere onvenyiha Lazaro. Mbwenye, Yesu othoma odhowa oBetaniya wihina akale ni Marta ni Mariya. We ohukanna mukwawo anadhiveliwa wukavihera naarive ohumulobile nikavihero? Podi wera, we onomuroromela wi mukwawo oyo anere wukavihera ‘wafwanyiwa makathamiho.’ (Pro. 17:17) Ninga Yesu, Iyo podi okala athu owandaneyana! Vano, nnere ohogolowela yopadduwa ya Lazaro wihina noone yapadduwile vasogolova.

12. Yesu ampaganyile ddi Marta, ki mwahaya bwaddi Marta ohowela ororomela mpaganyo ola? (João 11:23-26)

¹² Omwileri João 11:23-26. Vano Marta nunona wi Yesu ohufiya oBetaniya, oliye othamaga wihina agumane ni Yesu. Marta owoga egi: ‘Nabuya mwahere mukala wewuno, murogolaga kaakwe.’ (João 11:21) Ebaribari wi Yesu ahafune eere onvulumusa Lazaro, mbwenye oliye  afuna erena ethu yootikiniha. Oliye ompaganya egi: ‘Murogoliyo anere ovenyihiwa muukwani.’ Oliye omwaddela ethu emodha yamuthukulele Marta ororomela mpaganyo ola. Yesu owoga egi: ‘Miyo gili egumi ni ovenyihiwa.’ Hee, Yesu ahivahiwa kopolo ni Mulugu wihina aavenyihena anookwa. Motajhiha, Yesu ahavenyiha athu abili mwamakalelo ohiyana: namwali mmodha eraga okwawene ni muzombwe dhaala, nlabo nenne aakwilegiye. (Luc. 7:11-15; 8:49-55) Mbwenye ki Lazaro? Yahimala malabo mannayi ni mwiili waye wahibajha ovudda. Yesu, eere wanda onvenyiha mukwani?

13. Mowiwanana ni João 11:32-35, Yesu nuumona Mariya naathu amodha yunlaga oliye aali aavi? (Osugwe fotu.)

¹³ Omwileri João 11:32-35. Kiwubuwele ogaali vaari va muthithi yole waathu, osugwaga dhatedhene dhapadduwa. Mariya murogola mmodha a Lazaro onogumana ni Yesu. Vano oliye onowasoriha madhu mamodhave asorihile Marta. Mariya onowoga egi: ‘Nabuya mwahere mukala wewuno, murogolaga kaakwe.’ Mariya ni Marta vamodha naathu amodha eli owukuwene. Vano Yesu obajha wunla mwaha wawona akwaye egaali owukuwene. Oliye ahinona pamadhene wi omuyelela muthu nnamudhivelihu muukwani ethu enapiha mbani. Bumwahaya Yesu anna wiwegeredha wihina erena ethu yaamalihe athu aatene yunla!

14. Makalelo aali Yesu numona Mariya unlaga, enanihudhiha ddi wodhela Yehova?

¹⁴ Makalelo aali Yesu nuumona Mariya unlaga, enonihudhiha wi Yehova, Mulugu athagaraga. Nnone aavi? Ninga nonilihu ohudhera wivinre, Yesu onotajhiha mohihiyedhedha thagaraga ni makalelo owubuwela a ababe, Yehova. (João 12:45) Vano nilerigi wi Yesu ahaweddela thagaraga akwaye ofiyedha wunla, iyo podi orumedha wi Yehova ononeddela thagaraga ni onosegedheya anonaga nunlaga mwaha omuyelela muthu muukwani. (Sal. 56:8) Wubuwela eyo, winonithukulela ofunagave wandana ni Mulugu ehu oodhivela Yehova. Kunonelamo?

15. Ninga munawogela João 11:41-44 dhithu baani dhaapadduwe Yesu nuufiya omahame waakoyiwe Lazaro. (Osugwe fotu.)

¹⁵ Omwileri João 11:41-44. Yesu nuufiya omahame wakoyiwe Lazaro, oliye oloba wihina evenyihewo nibwe naafugiwena omulagoni wa mahame. Marta wera, kinahoweleya mwaha  podi wera vano ohambela onukwa. Mbwenye Yesu omwakula egi: ‘Miyo kaguwaddele wi wahere ororomela, were woona kopolo dha Mulugu?’ (João 11:39, 40) Nuwindo, Yesu osugwa odhulu ni olobela vaari va athu. Oliye anafuna anvahe nthithimiho naatene Yehova wodhela ele enaapadduwe. Vano Yesu owoga ni ndhu nootama egi: ‘Lazaro, kakumela ode!’ Mohilegela Lazaro okumela ode. Yesu werana ethu yakala ninga yorusa wereya vamentoni va athu. — Osugwe nota nohudherana na João 11:17.

16. Nimakalelo baani livuru na João kapitulu 11 nnalibihiwa nroromelo nehu wodhela ovenyihiwa wanookwa?

¹⁶ Livuru na João kapitulu 11, nnolibiha nroromelo nehu wodhela ejhehedho ninnihuna wovenyihiwa anookwa. Nimakalelo baani? Kubuwela ethu Yesu ampaganyiliye Marta: ‘Murogoliyo anere ovenyihiwa muukwani.’ (João 11:23) Ninga baabe, Yesu ohukanna efunelo ni kopolo yowakwanihedha mpaganyo ola. Mwaha Yesu wunla, eyo enoniha wi oliye onofuna ni murimaye waatene, omariha okwa ni makathamiho enadha mwaha womuyelela muthu muukwani. Ohiya eyo, mwaha Lazaro okuma mmahame, Yesu wooniha wi ohukanna kopolo yowavenyiha anookwa. Vano kawubuwele madhu a Yesu awogiliye ni Marta egi: ‘Miyo kaguwaddele wi wahere ororomela, were woona kopolo dha Mulugu?’ (João 11:40) Iyo nihikanna dhithu dhowinjhiva dhinanithukulela ororomela wi mpaganyo wa Mulugu wodhela ovenyihiwa wanookwa, onere wereya mwebaribarene. Mbwenye, nnere ddi wihina mpaganyo ola wovenyihiwa anookwa wikala webaribari ofiyedha ohaganyedhaga?

17. Dhithu baani nnahowelihu wubuwela nilerigi dhopadduwa dha mBibiliyani wodhela ovenyihiwa wanookwa?

¹⁷ Wilerigi, ovede mudhidhi wihina opendde ovenyihiwa wanookwa wereye kale. Mbibiliyani dhihikalamo dhopadduwa tanu natharu (8) dhaathu evenyihiwe wihina ekale mwilaboni yavati. c Ononamo aavi oveda mudhidhi  wi ohudhere nupwaseya dhopadduwa ndha? Wapenddaga, kuddiwale wi athu ala yahikalawo — alobwana, ahiyana ni ahima. Bumwahaya wilerigi, osayelege ohudhera ethu-sithu. Wubuwelege makalelo kadda ovenyihiwa winaniroromelihiwa wi Mulugu ohukanna kopolo ni efunelo yowahogolosela egumi ale ekwile. Thabwa-thabwa osayelege mudhidhi wihina opendde wodhela ovenyihiwa wathima — wa Yesu. Ovenyihiwa wa Yesu wahoniwa naathu owinjhiva teto winolibiha nroromelo nehu. Kuddiwale. — 1 Cor. 15:3-6, 20-22.

18. Onande addi opurelamo jhibo dhinawoga wodhela ovenyihiwa wanookwa? (Osugwe nota.)

¹⁸ Ovuruwanege jhibo dha nikuru nehu dhinawoga wodhela ovenyihiwa wanookwa. d (Efé. 5:19) Jhibo ndha, dhinolibiha nroromelo nehu wodhela ejhehedho ninnihuna yamurenddele. Nerana ndo, ejhehedho yovenyihiwa muukwani enere okala yeebaribari mwigumini mwehu. Wavuruwanaga osayelege wiba wekawo. Va ohudhera weenyu weemudhi nyu podi osayela ohudhera kadda madhu a jhibo. Mwamala we podi wilibihedha okoya mmurimani mwawo. Nimakalelo yaala, wafwanyiwa ngovi yuthukulele oyelela egumawo obe omuyelela muthu onamudhiveliwe, muzimu wa Yehova onere wuwubusedha jhibo ndha, ndo onere okanna kopolo ni onere otodoleya mwaha wa jhibo ndha.

19. Dhithu baani nnahowelihu wubuwela wodhela ovenyihiwa wanookwa? (Osugwe kwaduru “ Ethu baani onafuniwe wakoha aliwa?”)

¹⁹ Olabihedhe mubuwelo wawo. Yehova ohunivaha ekalelo yowubuwela mparayizu. Murogola dhaala anihina: “Miyo gihimala mudhidhi wowinjhivene giwubuwelaga ngaali mwilaboni exa, enakala ninga ginna woona onukwela wa folori dhixa mparayizu.” Kabiha wubuwela makalelo enakaliwa yohagalasa wanona alobwana ni ahiyana ororomeleya a mudhidhi wa kale. Wafune omunone aani? Ethu baani wafuniwe wakoha? Kubuwela makalelo enakaliwa yohagalasa ogumana ni amudhawo ni akwawo wayeleliwe muukwani. Kabiha wubuwela nlabo noobajha munagumaninyu — ethu baani onafuniwe wera? Podi wera onere omukubarela, teto mohanganyedha onere wunla mwaha ohagalala.

20. Onafuna othome wera ddi?

²⁰ Iyo nnotamalela wodhela ejhehedho anivahile Yehova yowavenyiha anookwa! Nihikanna ebaribari wihina Yehova enere wakwanihedha mpaganyo ola, mwaha oliye ohukanna efunelo ni kopolo yowakwanihedha. Bumwahaya nnafuna nithome olibiha nroromelo nehu wodhela ejhehedho ela yohagalasa. Ndo, nnere olibiha wandana wehu ni Yehova. Mulugu ananipaganya aatene wa iyo egi: ‘Ole onamudhiveliwe anere ovenya muukwani.’