1. Mwahaya bwaddi nigavaha dhowakula mmutugumanoni?

 MWAHAYA bwaddi nigadhowa omutugumanoni? Ethu enlubaleya fumuthithimiha Yehova. (Sal. 26:12; 111:1) Teto, kanajhomba omutugumani wihina nilibihane mmodha ni mukwaye mudhidhi yola worusa nnakalihu. (1 Tes. 5:11) Bumwahaya navenyihaga moono wihina naakule, ninna werana dhithu ndha biili.

2. Nakala omutugumanoni, dhipaddi baani ninnihuna ofuru wowakula?

² Sumana dhatedhene iyo nihikanna ofuru wovaha dhowakula mmutugumanoni. Motajhiha, omakuthulo wa sumana iyo podi ovaha dhowakula dhehu mudhidhi wa ohudhera wa Namasugwera. Mutugumano wa vaari va sumana iyo podi ovaha dhowakula dhehu epaddi ya Dhoviteya dhomuzimuni, Ohudhera wa Bibliya wa mulogo ni dhipaddi dhimodha.

3. Makathamiho baani enanifwanye, ki madhu enafwanyeya va Hebreus 10:24, 25 enaanikavihere aavi?

³ Iyo aatene nnofuna omuthithimiha Yehova ni walibiha athu amodha. Mbwenye nafunaga ovaha dhowakula, iyo podi obajhaga woova. Noovaga ovenyiha moono wihina naakule obe iyo podi ofunaga ovaha dhowakula dhehu dila dhowinjhivadhene, mbwenye kannatonyiwa ninga mwafunelihu. Nnawanena aavi makathamiho ala? Iyo podi ofwanya yowakulaya vakartani Pawulo alebenliye akudda Eberewu. Awogaga wodhela thima yowoona mutugumano, Pawulo wera aliwa yofwanelela ‘olibihana mmodha ni  mukwaye.’(Omwileri Hebreus 10:24, 25.) Vano, noonelamo wihina dhowakula dhehu dhokweya dhinowalibiha amodha, nnokanna efunelo yovaha dhowakula. Teto naarive nahitonyiwaga ninga mwafunelihu, nnohagalala nawonaga addibila amodha evahaga dhowakula dhewa dila dhowinjhivadhene. — 1 Ped. 3:8.

4. Dhithu baani tharu nnafunihu woonihu ohudhera wula?

⁴ Ohudhera wula nnere woona makalelo oolibihana mmodha ni mukwaye nakala mulogo dhing’ono, mwahinafwanyeya addibila owinjhiva enavaha dhowakula. Teto, nnere woona makalelo oolibihana mmodha ni mukwaye nakala mulogo dhinlubale munafwanyeya addibila owinjhiva enavenyiha moono wihina evahe dhowakula. Vuharela, nnere woona makalelo oovaha dhowakula dhinalibihe addibilihu.

5. Nnaalibihe aavi amodha akala mulogo wehu mung’ono?

⁵ Mulogo dhing’ono obe nikuru, kamunafwanyeya addibila owinjhiva enavaha dhowakula. Malabo mamodha, ddibila aneddiha epaddi anojheha mwanamudhidhi wihina afwanyeye ddibila anafuna ovaha yowakula. Mwaha wa yeyo mutugumano dhinolegela, teto kadhinalibiha. Enahoweleya were ddi? Ovenyihege moono dila dhowinjhivadhene. Nimakalelo yala, onere wakavihera amodha ofunaga ovaha dhowakula.

6-7. Enaanikavihere ddi ohoova nafunaga ovaha dhowaakula dhehu?

⁶ Ki akala onowoova ovaha yowakula mmutugumanoni? Athu amodha enowoova wakula. Mbwenye wihina wande wakavihera addibila ni arogola, ononamo aavi osayela owanana ekalelo yowoova ovaha yowakula? Onande aavi werana eyo?

⁷ We podi wileri muselu dhinakumela mu Namasugwerani. b Motajhiha, ethu yobajha fuwiwegeredha pamadhene. (Pro. 21:5) Wahudhera pama museluya, enere okweya ovaha yowakula. Ethu emodha fuvaha dhowakula dhokwiva. (Pro. 15:23; 17:27) Wavahaga yowakula yookwiva, kunathabwege woova. Addibila enonelamo yowakula yookwiva, enna madhu okweya wawonelamo, ohiya yowakula yolapa enna monelo wohiyana-iyana. Wavahaga yowakula yookwiva ni madhu awo, onowoniha wihina ohegeredha pama ni ohonelamo museluya.

8. Yehova anona aavi wilibihedha wehu?

⁸ Ki akala nihixixa dholaga ndha mbwenye nnowovave ovaha dhowakula? Okanne ebaribari wihina Yehova anovaha thima wilibihedha wawo wihina werena ele onandiwe. (Luc. 21:1-4) Wilibihedha kinatapulela werana ndhe nihinandihu. (Fil. 4:5) Werena yoluba onandiwe wakwanihedha ni olobele wa Yehova omulobaga murima wopwaseya. Yoluba yobajha podi okala ovaha yowakula yookwiva.

9. Makathamiho baani enakumelela mulogo wakala munlubale?

⁹ Wakala mulogo muli anamalaleya owinjhiva, podi ofwanyiwa makathamiho mamodha. Podi wera addibila owinjhiva enovenyiha moono wihina yakule mwaha wayeyo  kunatonyiwa wihina wakule. Motajhiha, murogola dhaala anithaniwa Danielle, odhiveliwa ovaha dhowakula mmutugumanoni. c Monelo waye wakula mmutugumanoni onokosa epaddi ya omwebedha Yehova, makalelo owalibiha amodha ni olibiha nroromelo naaye wodhela ndhe Bibiliya anahudhihiye. Vano oliye nutamela mulogo mmodha munlubale katonyiwa dila dhowinjhivadhene teto malabo mamodha kandawene ovaha yowakula. Oliye anowoga egihina: “Gootakaleliwa vanlubale, wakala ninga ginayelela mutholo. Waviraga mudhidhi, we podi wubuwela wihina ddibila aneddiha epaddiya anerana yapudhave.”

10. Nnere aavi wihina nande wakula omutugumanoni?

¹⁰ Onofwanyiwaga makathamiho ninga a Danielle? Akala oni hee, we podi ofunaga oselela ovaha dhowakula dhawo ni okalaga wavuruwanave addibila yavahaga dhowakula dhewa. Mbwenye kuselele ovaha dhowakula dhawo. Ki enahoweleya were ddi? Kadda mutugumano wegeredhege dhowakula dhohiyana-iyana. Akala kuthonyiwe omabajho wa ohudhera, enere okanna ofuru wovaha dhowakula. Wegeredhaga ohudhera wa Namasugwera wubuwele makalelo kadda ddima eniwananiwa ni musoloya. Nimakalelo yala onere wanda ovaha dhowakula dhapama. Ohiya eyo we podi wiwegeredha wihina waakule ddima dhinawoga wodhela muselu dhorusa otapulela. (1 Cor. 2:10) Mwaha waddi? Mwaha addibila podi ohuvenyiha moono ddima yeyo. Naarive oparihedhaga mabasa dholaga ndha dhatedhene mbwenye ohutonyiwa wihina waakule onere ddi? We podi othapanya ni ddibila aneddihe epaddi yele wegi, nafiya ddima ngana ginafuna gaakule.

11. Filipenses 2:4 ananikongomedha werana ddi?

¹¹ Omwileri Filipenses 2:4. Murumiwi Pawulo ohakongomedha makiristawu osogolihaga dhofuna dhaathu amodha. Nnaparihedhe aavi mabasa yolaga ela nakala omutugumanoni? Wodhela ohuddiwala wi amodha enofuna ovaha dhowakula dhewa.

12. Makalelo mamodha owalibiha addibilihu mmutugumanoni baavi? (Osugwe fotu.)

 ¹² Wathapanyaga naakwawo onakalela owogave ohavahaga ofuru wi akwawo ewoge? Naari! We onofuna wihina naliwaya evahe moonelo wewa. Nimakalelo mamodhave, iyo nnafuna wihina addibila owinjhiva evahege dhowakula dhewa yakala mmutugumanoni. Mwebaribarene makalelo owalibiha addibila fuwavaha ofuru wowoniha nroromelo newa wodhela ovaha dhowakula mmutugumanoni. (1 Cor. 10:24) Vano kabeni noone makalelo owavaha ofuru oyo.

13. Nere ddi wihina athu amodha evahe dhowakula dhewa?

¹³ Makalelo obajha fuvaha dhowakula dhokwiva, ndo athu amodha enere okanna ofuru wowakula. Anamaholela mulogo naaddibila eli mwibaribarini muwari mwa yakadhene ekale tajhiha yapama. Mudhidhi wavahaga dhowakula dhokwiva, kusorihe pontu dhowinjhiva mudhidhi mmodhave. Wakula ddima yatene, athu amodha kinande ovaha dhowakula dhewa. Motajhiha, muwari mwa ddima ela munofwanyeya dholaga biili: ovaha dhowakula dhokwiva ni ohusoriha ponto dhowinjhiva mudhidhi mmodhave. Wakala obajha otonyiwa ddima ela, ononamo aavi osoriha yolaga modha?

14. Nubuwelege ddi mudhidhi navenyihaga moono? (Osugwe fotu.)

¹⁴ Wubuwele pama wahinavenyihe moono. Wavenyiha moono dila dhowinjhivadhene podi omuthukulela nameddiha epaddi ele wutonyaga weyeneve baahi, naarive egaaliwo addibila ehandile wakula. Eyo podi wathukulela addibila amodha ohufunaga ovenyiha moono. — Ecl. 3:7.

15. a) Nikalege aavi ddibila aneddiha epaddi ahinitonya wihina nakule? b) Anameddiha dhipaddi enonihe aavi wi enowapwatha addibila aatene? (Osugwe Kaxa “ Akala di we aneddiha epaddiya”.)

¹⁵ Addibila owinjhiva yavenyihaga moono, podi okala yorusa ovaha dhowakula dhehu  ninga mwafunelihu. Malabo mamodha nameeddiha epaddi ele kanande onitoonya newene dila modha. Eyo podi onuukula. Mbwenye kanitakaleliwe mwaha ohutonyiwa nubuwelaga wihina ddibila ole anikoyenle ntxiga. — Ecl. 7:9.

16. Nnalibihe aavi ale enavaha dhowakula dhewa?

¹⁶ Wahanda wakula ninga mwafuneliwe, ononamo aavi opwasedha ovuruwana dhowakula dhaaddibila amodha windo watamalele mutugumano dhamala? Addibila podi okala olibenene mwaha watamalela mwamakalelo mamodhave walibihiwe ni dhowakula dhawo. (Pro. 10:21) Otamalela makalelo olibihana mmodha ni mukwaye.

17. a) Ababi enakavihere aavi aniwa ovaha dhowakula mowiwanana ni yaka enniwana? b) Mowiwanana ni vidiyu dhithu baani nayi muthu anahoweliye werana egeredhaga dhowakula? (Osugwe nota.)

¹⁷ Makalelo mamodha olibihana mmutugumanoni baavi? Akala ohukanna ahima, wakavihere wegeredha dhowakula dhiniwanana ni yaka enniwana. (Mat. 21:16) Malabo mamodha, podi ohudhera muselu dhinawoga wodhela makathamiho a vamuralani obe muselu dhinawoga wodhela ogonihana. Naarive dhigaali ndo, podi wera onere ofwanyavo ddima modha obe biili anawo enafwaneleliwa wakula. Teto omukavihere  mwanawo wonelamo wihina malabo mamodha avenyiha moono kanatonyiwe. Werana ndo, mwanawo avenyiha moono vano atonyiwa muthu mmodhaya wihina aakule oliye kanatakaleliwe. — 1 Tim. 6:18. d

18. Nnere ddi wihina nihithabwege owoga wodhela iyo naakulaga? (Provérbios 27:2)

¹⁸ Aatene iyo podi wegeredha dhowakula dholibiha dhinanvuwiha Yehova ni dhinaalibiha addibilihu. (Pro. 25:11) Malabo mamodha naakulaga iyo podi owoga dhopadduwa dha mwigumini mwehu. Mbwenye nnohowela okala pasope wihina nnathabwe owoga wodhela iyo. (Omwileri Provérbios 27:2; 2 Cor. 10:18) Ohiya eyo, dhowakula dhehu dhithabwege owoga wodhela Yehova, madhu aye vamodha ni nlogo naaye. (Apo. 4:11) Ebaribari wihina akala nikohona nnanikongomedha owoga dhopadduwa dha mwigumini mwehu, nnere owoga dhopadduwadha. Nnere woona yotajhiha ddima enaharela.

19. a) Enapadduwa ddi naasogolihaga dhofuna dhaathu amodha? (Romanos 1:11, 12) b) Mwahaya bwaddi ogadhiveliwa ovaha dhowakula mmutugumanoni?

¹⁹ Ebaribari wihina kawo malamulo enawoga wodhela ovaha dhowakula, mbwenye nnohowela wilibihedha wihina nalibihe addibilihu ni dhowakula dhehu. Makalelo owalibiha addibilihu fuwilibihedha wakula dila dhowinjhivadhene nakala omutugumanoni. Makalelo mamodha fuhagalala nakanna ofuru wowakula, ni ohagalala addibilihu yanda ovaha dhowakula dhewa. Naasogolihaga dhofuna dhaathu amodha omutugumanoni nnowanda ‘olibihana mmodha ni mukwaye.’ — Omwileri Romanos 1:11, 12.