OHUDHERA 15
Nnahudhera ddi ni matikiniho a Yesu?
‘Oliye aheedda murudda dhaatedhene eragana opama ni avulumusaga’ — ATOS 10:38.
JHIBO 13 Kiristu yotajhiha yehu
DHITHU NNAAHUDHERIHU a
1. Yesu awerilena wuuvi matikiniho aye oobajha?
KABIHA wubuwela nigaali yaka ya 29 M.W, Yesu abajhagawene wapara mabasa aye olaleye. Vano, Yesu naamaye Mariya, vanodha ni anamahara aye, enowithaniwa wihina yawoone matelo enafuna weriwana elabo yoOkana. Enakala omadhelo nduwa, elabo wibaliwe Yesu, oNazare. Woona wihina Mariya ahandana ni emudhi yanamatelana ale, oliye dawakela aleddo yadha vamathangani vale. Mbwenye mudhidhi mathanga yeddaga enokumelelavo makathamiho yafuna ototela manyazo emudhi ya anamatelana ni aliba otelaya — Vinyuya omala. b Podi wera mwaha yahidha athu owinjhiva yahajhehedhiwa. Mwaha wa yeyo, Mariya othamagela wili Yesu ni owoga egi: ‘Aliwa kinna vinyu.’ (João 2:1-3) Ethu baani Yesu enriye? Oliye onowerana ethu yotikiniha, wodhela wasaddula manjhe wihina akale vinyu. — João 2:9, 10.
2-3. a) Matikiniho baani awerilena Yesu? b) Ohudhera wula nnasunze ddi?
2 Ala, yaali matikiniho obajha Yesu awereliyena agaali velabini ya vati. c Oliye ahilabihedha kopolo aniyena wihina awerena matikiniho ni wakaviherana athu owinjhiva. Motajhiha, Yesu ahavaha yoojha athu owakwana 5 000, mwamakalelo otikiniha. Vasogolova, epaddi emodhene Yesu wavaha yoojha athu owakwana 4 000. Yahakontariwe ahiyana ni ahima, podi weera numerona nere okwaranya 27 000. (Mat. 14:15-21; 15:32-38) Dhipaddi dhabiilidhene, Yesu ahavulumusa aredda owinjhiva. (Mat. 14:14; 15:30, 31) Kubuwela makalelo athu yahagalanliwa, wodhela ovulumusiwa ni ovahiwa yoojha mwamakalelo otikiniha ni Yesu!
3 Iyo podi ohudhera dhithu dhowinjhiva ni matikiniho awerilena Yesu. Ohudhera wuula nnere waasunza matikiniho ohiyana-iyana awerilena Yesu enaalibihe nroromelo nehu. Amala, nnere woona makalelo nnadihu otajhiha wiyeviha ni thagaraga onihile Yesu mudhidhi aweragana matikiniho.
NNAHUDHERA DDI NI YEHOVA VAMODHA NI YESU?
4. Nahudheraga matikiniho awerilena Yesu nnahudhera wodhela aani?
4 Matikiniho awerilena Yesu enonihudhiha dhithu dhathima, ohiya baahi wodhela Yesu, mbwenye wodhela Yehova. Mwaha, Yehova danvaha kopolo yowawerana matikiniho ale. Atos 10:38 anihina: ‘Mulugu amutikiteriye [Yesu] ni Muzimu wotxena ni kopolo, oliye aheeda murudda dhaatedhene eragana opama ni avulumusaga aatene yonihiwa goyi ni Ddiyabo, mwaha Mulugu aali ni oliye.’ Kuddiwale wihina dhaatedhene Yesu awogiliye ni eriliyena — enavolowelavo matikiniho, — oliye atajhina mohihiyedhedha makalelo owubuwela ni thagaraga anna babe. (João 14:9) Kasugwa dhithu tharu nnahowelihu ohudhera ni matikiniho a Yesu.
5. Yamuthukulela Yesu wawerana matikiniho ddi? (Matewuji 20:30-34)
5 Yobajha, Yesu ni Yehova enonidhivela vanlubale. Yesu agali velaboni ya vati, oliye ahoniha wihina owadhivela vanlubale athu, wodhela wawerana matikiho wihina awobole mugoyini. Nlabo dhaala alobwana abiili ohona, oloba wi Yesu aakavihere. (Omwileri Matewuji 20:30-34.) Yesu ‘waweddela thagaraga’ alobwana ale, bumwahaya adhe aavulumusege. Versu ela ni eGerego, madhu owi ‘waweddela thagaraga’, enagana thagaraga dhinadhela vati va murima, dhinamuthukulela muthu okala owukuwene. Si thagaraga dhendha, dhinathukulela wooniha odhivela, dhaamuthukulele Yesu wavaha yoojha aredda ni wavulumusa aliba maranya. (Mat. 15:32; Mar. 1:41) Bumwahaya, kananganyedhe wihina Yehova, Mulugu a ‘thagaraga’ ni mwanaye Yesu, enonidhivela vanlubale ni enowukuwa yanonaga nifwanyiwaga makathamiho. (Luc. 1:78; 1 Ped. 5:7) Nihikanna ebaribari wihina Yehova ni mwanaye Yesu, enoofuna vanlubale wamariha makathamiho enanifwanya!
6. Yehova anvahile kopolo mwanaye Yesu kiristu wihina erena ddi?
6 Yanabili, Mulugu ohuvaha kopolo Yesu wihina amarihe makathamiho aatene amwilaboni. Matikiniho aweriliyena, enowoniha wihina Yesu ohukanna kopolo yowamariha makathamiho aamatene nahinadhihu wamariha yekihu. Motajhiha, oliye ohukanna kopolo yonobola muuthegani ni makathamiho amatene enanitoteliwa, ninga oredda ni okwa. (Mat. 9:1-6; Rom. 5:12, 18, 19) Matikiniho aweriliyena, enowoniha wihina Yesu ohukanna owedha womariha dhiredda dhatedhene ni wowavenyiha anookwa. (Mat. 4:23; João 11:43, 44) Teto, ohukanna kopolo wosugera nipevo ninlubale ni ohukanna kopolo yowawobola athu enonihiwa goyi ni muzimu dhotakala. (Mar. 4:37-39; Luc. 8:2) Nnohagalala vanlubale onona wi Yehova, ohunvaha kopolo dhatedhene ndha mwanaye Yesu Kiristu.
7-8. a) Matikiniho awerilena Yesu enanroromeliha ddi? b) Matikiniho baani onajhehiwe wawona mwilaboni exa?
7 Yanatharu, nnohowela ororomela wihina Omwene wa Mulugu onere wadhana mareeliho owinjhiva mwilaboni ya vati. Matikiniho awerilena Yesu agaali mwilaboni ya vati, nifwanafwaniho wa dhithu anafuniye wera abajha othonga mumweneni mwa Mulugu. Kaasugwe mareeliho nnafunihu wawakela Yesu abajha othonga elabo ya vati. Nnere okanna egumi yapama, mwaha Yesu anere omariha dhiredda dhatedhene dhinatatamulela makathamiho athu aatene. (Isa. 33:24; 35:5, 6; Apo. 21:3, 4) Kaavo anakannege ddala newene ofwanyiwa ngovi. (Isa. 25:6; Mar. 4:41) Nnere ohagalala vanlubale wawakela athu naadhivelihu ni nayelelihu muukwaani (João 5:28, 29) Matikiniho baani onaajhehiwe ni murimawo wamuteene wawona mwilaboni exa?
8 Yesu owoniha wiyeviha ni thagaraga, aweragana matikiniho — teto iyo nnohowela otajhiha dhikalelo dhendha. Nnere woona dhotajhiha biili. Nnabajha ni mathanga yeriwena elabo yo Kana.
YOPADDUWA ENANIHUDHIHA WODHELA WIYEVIHA
9. Ethu baani Yesu enriyena vamathangani amatelo? (João 2:6-10)
9 Omwileri João 2:6-10. Vinyu nuumala vamathangani veriwana matelo, Yesu ahiwaddihedhiwa werana ethu-sithu? Naari. Kawo yovuhulela yawoga wi Mesiya eere wasaddula manjhe wihina ekale vinyu. Kiyubuwele makalelo wakaliwe ahere vinyu amala vamathangani vawo amatelo. Mohanganyedha, Yesu aheddela thagaraga emudhi ela thabwathabwa anamatelanaya ni kaafuna wihina efwanyiwe manyazo mwaha vinyu amale. Bumwahaya ninga nonilihu omabajho wa yohudhera ela, oliye wawerana matikiniho wodhela wasaddula malituru — owakwana 390 a manjhe — wihina ekale vinyu apama. Podi wera vinyu ole ahithabwa winjhiva wihina ole ahale ang’wiwe mathanga ale yamala obe agulihiwe wihina ekaviheriwena anamatelana ale yahikanna korowa. Mwebaribarene anamatelana ale yahitamalela wodhela nikavihero avahile Yesu.
Omutajhihe Yesu wodhela ohithukula ndhithu oneriwena ni ononiliwe (Osugwe ddima 10 ni 11) e
10. Dhopadduwa baani dhathima nnafwanyihu va João kapitulu 2? (Osugwe fotu.)
10 Kasugwa dhopadduwa dha thima dhinafwanyeya va João kapitulu 2. We uhanda wonelamo wi adhalihe muno ndhe dha manjhe kaali Yesu? Ohiya withithimiha, Yesu waruma anamahara aye wihina edhalihe muno ndhe manjhe. (Versu 6 ni 7) Nuwasaddula manjhe wi ekale vinyu, Yesu kamuthukule vinyuya wihina anvahe namasogolela a mathanga ale, mbwenye oliye aalombe adharaaye wihina emudhowena. (Versu 8) Teto Yesu kaathukule kopo amurugwana vinyu nuwindo awoga egi: ‘Mmulawihe vinyu ola gimanlimi omusasanya.’
11. Nnahudhera ddi ni matikiniho a Yesu?
11 Nnahudhera ddi ni matikiniho a Yesu wodhela wasaddula manjhe wihina ekale vinyu? Nnahudhera wihina nnohowela okala owiyeviha. Yesu kiithukula mwaha wawerana matikiniho; Ebaribariya sowi, oliye kaniithukulege mwaha wawerana matikiniho. Mbwenye oliye aali owiyeviha ni amuthithimiha babe Yehova. (João 5:19, 30; 8:28) Namutajhiha Yesu wodhela okala athu owiyeviha kannithukulege wodhela werana ethu-sithu. Kinapwatha mabasa baani nnamparelihu Yehova, sapama ohiwonaga ninga nili athima. Mbwenye ninvahe Yehova nthithimiho naatene. (Jer. 9:23, 24) Mwaha duliye anahowela othithimihiwa. Ahere ahikala Yehova anikavihera iyo, neere ddi? — 1 Cor. 1:26-31.
12. Makalelo mamodha otajhiha wiyeviha wa Yesu baavi? Owoge yotajhiha.
12 Kasugwa ethu emodha enaanikavihere otajhiha wiyeviha wa Yesu. Kabiha wubuwela, namaholela mulogo alabihedhaga mudhidhi waye wihina amukavihere mudhaari okavihera ali muzombwe wegeredha mwaha waye wobajha. Mwaha wa yeyo muzombwe ole onowoga mwaha waye mwamakalelo apama ofiyedha addibila aatene mmulogoni odhiveliwa. Vano mutugumano nuumala ddibila dhaala onowoga ni namaholela mulogo ole egi: ‘Peeno nahikanna mwaha wothabwa oriya, kunoonelamo?’ Namaholela mulogo ole ahafune eere owoga egi: ‘Ebaribari! Mwaha gahivira mudhidhi wowinjhivene nuliye gimuxagihaga.’ Mbwenye yere okala yapama namaholela mulogo ole owoga egi: ‘Ehe eyo ebaribari! Nimiyoya gihithabwa odhiveliwa.’ Nakala athu owiyeviha kannajhehege ovahiwa nthithimiho mwaha wawerela opama athu amodha. Wa iyo, ethu enanihagalase fuunona wihina Yehova onowoona ndhe nnawerelihu athu amodha ni onovaha thima. (Omusugwe Matewuji 6:2-4; Heb. 13:16) Mwebaribarene nnomuhagalasa Yehova, naaharaga yotajhiha yowiyeviha ya Yesu. — 1 Ped. 5:6.
YOPADDUWA ENANIHUDHIHA WODHELA THAGARAGA
13. Ethu baani Yesu anooniye mudhidhi afiyaga sidadi yoNayim, ki anera ddi? (Lucas 7:11-15)
13 Omwileri Lucas 7:11-15. Mudhidhi aparaga mabasa aye olaleya, Yesu aheedda olenddo ofiya elabo yoNayim. Sidadi ela yakala oGalileya waddamela oSunem, wengo namavuhulela Elizewu anvenyihiliiye mwaana a maamukwele dhaala, yaka 900 mundduli. (2 Reis 4:32-37) Vano, kabiha wubuwela: Yesu aaddamelaga sidadi dhaala, vano woona muthithi waathu egathukunle muruthu edhowagana omahame. Yopadduwa ela sodahinya murima, mwaha maamukwele ahimuyelela mwanaye mmodha anniyena. Mbwenye maamukwele ole kali yeka. Vamodha nuliye muthithi waathu yanna onvelela. Vano Yesu wimesa muthithi ole waathu ni werana ethu maamukwele ole ahadhiye addiwala egumi yaye yaatene — Yesu onvenyiha mwaana a maamukwele ole! Wula ovenyihiwa wobajha wa ovenyihiwa miraru dhinafwanyeya muwari mwa malivuru a envajelyu.
Omutajhihe Yesu wodhela wawoniha thagaraga ale yayelele amudhiwa mukwani (Osugwe ddima 14-16)
14. Dhopadduwa baani dhotikiniha nnafwanyihu livuru na Lucas kapitulu 7? (Osugwe fotu.)
14 Kasugwa dhopadduwa dhimodha dhotikiniha dhinafwanyeya livuru na Lucas kapitulu 7. Onowanda wonelamo wihina Yesu ‘ahimoona’ maamukwele ole nuwindo oliye ‘omweddela thagaraga?’ (Versu 13) Podi wera, Yesu ahimoona maamukwele ole unlaga wula aharaga muruthu wa mwanaye. Bumwahaya, Yesu adhe athabwege omweddela thagaraga. Mbwenye, Yesu kere omweddela thagaraga muhiyana ole baahi, oliye oomukubanyedha. Yesu owoga ni oliye ni ndhu nootoddola egi: ‘Kamala.’ Nuwindo, oliye oveda makalelo omukavihera. Oliye onvenyiha muzombwe ole ni ‘wavahedhela amaye.’ — Versu 14, 15.
15. Nnahudhera ddi ni matikiniho a Yesu?
15 Matikiniho ala awenrena Yesu enanihudhiha ddi? Nnahudhera wihina nnohowela wawoniha athagaraga ale emuyelele mmudhiwa muukwani. Ebaribari wihina kaninna owedha woonvenyiha muthu muukwani, mbwenye ninga Yesu, nawoona athu ninga yaala nnohowela waweddela thagaraga. Iyo podi owoga obe werana ethu-sithu enaamukavihere obe enaamutodole. d (Pro. 17:17; 2 Cor. 1:3, 4; 1 Ped. 3:8) Naarive madhuya egaali okweya obe dhithu vang’ono, podi wakavihera.
16. Ninga enoniha fotu, onahudhera ddi ni yopadduwa ya mayi amuyelele mwanaye mukwani?
16 Kasugwa yopadduwa ela. Yaka dhowinjhivane mundduli, nlabo dhaala addibila yibaga omutugumanoni, murogola dhaala wonelamo wihina mayi dhaala anna wunla. Jhibo yiibiwa yawoga wodhela ovenyihiwa mukwani. Mayi ole, eere omuyelela mwanaye mukwani aali namwali. Mohilegela murogola ole odhowa waali mayi ole, nuwindo oliye omuhiddela ni aliwa wiibaga vamodha. Mayi ole, onowoga egi: “Miyo wonelamo wihina addibila naarogola enogidhivela vanlubale.” Mayi ole, ahihagalala vanlubale wodhela odhowa omutugumanoni. Oliye onowogave egi: “Nikavihero nnahowelihu, nnafwanyeya onyumbani yOmwene.” Iyo, nnohowela okanna ebaribari wihina Yehova onowoona ni onovaha thima nawonihaga thagaraga ale yayelele amudhiwa mukwani, mwaha aliwa eli ‘ookwerebeyene.’ Naarive nawerelaga dhithu dhokweya. — Sal. 34:18.
OHUDHERA WEGEREDHIWE WIHINA OLIBIHE NROROMELO NAAWO
17. Ohudhera wula nisunzile ddi?
17 Iyo podi olibihiwa nahudheraga matikiniho a Yesu enafwanyeya mmalivuruni a envajelyu. Mwaha enonihudhiha wihina Yehova vamodha ni mwanaye Yesu enonidhivela ni enonikavihera wonelamo wi Yesu ohukanna kopolo yowamariha makathamiho amatene enanifwanya. Teto, enonivaha ebaribari wihina mpaganyo dhatedhene erilena Yehova dhinere wakwanela mohilegela, Omwene wa Mulugu wabajha othonga velaboni ya vati. Nahudheraga dhopadduwa ndha, nnohowela opendda makalelo otajhiha dhikalelo dha Yesu. Ononamo aavi wegeredhaga ohudhera wawo wa vayeka obe va ohudhera weenyu weemudhi, wahudhera matikiniho mamodha awerilena Yesu? Wone dhithu baani dhixa onahudheriwe ni othapanye ni athu amodha wodhela dhithu ndha ohudheriwe. Kubuwela ohagalala onakanniwe mwaha othapanya ni athu owinjhiva. — Rom. 1:11, 12.
18. Ohudhera winaharela makoho baani enakuliwe?
18 Ahalaga nenaa wihina aamarihe mabasa aye olaleya, Yesu wawerana matikiniho anatharu ni ogomihedha enafwanyeya mBibiliyani, yaali onvenyiha Lazaro mukwani. Oliye onvenyiha mukwaye athabwiye omudhivela, mbwenye makalelo anvenyihiliye yahihiyana ni makalelo avenyihiliye athu amodha. Nnahudhera ddi ni matikiniho ala? Nnande addi olibiha nroromelo nehu wodhela ovenyihiwa wanookwa? Makoho ala eneere wakuliwa ohudhera winaharela.
JHIBO 20 Yehova ohunivaha mwanaye
a Yesu omaaliha nipevo ninlubale, wavulumusa aredda ni wavenyiha anookwa. Mwebaribarene, ethu yohagalasa wahudhera matikiniho awerilena Yesu! Mwaha dhopadduwa ndha, kadhilebeliwe wihina dhinitikinihe baahi, mbwenye wihina dhinihudhihe. Bumwahaya, nnere wawoona matikiniho awerilena Yesu ni dhithu enanihudhihiwa wodhela Yehova ni Yesu ni makalelo matikiniho ala enalibihiwa nroromelo nehu ni woona dhikalelo baani nnahowelihu okanna.
b Namahudhera dhaala aBibiliya onowoga egi: “Mudhidhi wa kale, wawakela aleddo yali ethu yowela. Mwaha akala onafuna wawakele aleddo ni murimawo waamutene, thabwathabwa yakala vamatelo, yohoweleya okalavo dhithu dhoowinjhiva.”
c Malivuru mannayi a envajelyu, enihina Yesu uhawerana matikiniho okwaranya 30. Iyo nihinona wihina Yesu uhawerana matikiho owinjhiva, okwaranya numero nenna, mwaha Bibiliya kanaawoga kadda matikiniho Yesu aweriyena murudda dhatedhene aviriyemo. Motajhiha, nlabo dhaala ‘athu aatene a mucidadi’ odha vali Yesu, ‘vano, Yesu wavulumusa athu aatene yafwanyiwa dhiredda dhohiyana-iyana.’ — Mar. 1:32-34.
d Wihina onone dhithu dhimodha wodhela makalelo owoga obe owerana wihina natodole ale yayelele amudhiwa mukwani, osugwe ohudhera onna musolo “Console os enlutados, assim como Jesus fez” va Sentinela a 1 a novembro a 2010.
e FOTU ELI: Yesu asugwaga anamatelana axa, wula athu amodha emung’waga vinyu apama amusasanyiliye.
