OHUDHERA 19
JHIBO 22 Omwene weenyu odhe!
Ddiniyani nnonnihu wodhela makalelo Yehova anafuniye waatoriha athu osogolo?
‘Yehova . . . kanafuna wi muthu di muthu agujhuliwe.’ — 2 PED. 3:9.
DHITHU NNAAHUDHERIHU
Nnere olibiha ebaribari ninnihuna wihina osogolo, Yehova anere waatoriha athu mwamakalelo apama ni owogowa.
1. Mwahaya bwaddi nigawogaga wi nnakalawo mudhidhi wohagalasa vanlubale?
IYO nnakalawo mudhidhi wohagalasa vanlubale! Kadda labo nnavira, iyo nnowoona dhovuhulela dha mBibiliyani dhakwanelaga. Motajhiha, nnomoona ‘mwene oonorti’ ni ‘mwene oosuli’ ewanelaga othonga elabo. (Dan. 11:40, nota.) Ohiya eyo, nnowoona muthenga wapama wOmwene wa Mulugu, olaleyiwaga mwamakalelo ootikiniha, nahinoonigihu. Teto matxikwi ni matxikwi aathu enna osakula omulabela Yehova. (Isa. 60:22; Mat. 24:14) Nahidduwalaga wi ninna wakela “yoojha [yomuzimini] mudhidhi wofwanelela.” — Mat. 24:45-47.
2. Ebaribari baani nnahowelihu okanna, ki ethu baani yathima nnahowelihu wubuwela?
2 Yehova anonikavihera vang’ono vang’ono wonelamo dhithu dhathima dhinafuna opadduwa mohilegela. (Pro. 4:18; Dan. 2:28) Iyo podi okanna ebaribari wi mahoso manlubale yabajha, nnere onona ethu nnahowelihu werana wi nikale oororomeleya wa Yehova ni owiwanana. Mbwenye sathima wubuwela wi dhihikalawo dhithu nihinonnihu dhinafuna opadduwa osogolo. Ohudhera wula nnere woona masadduwo maxa wodhela dhithu nnarumedhihu. Namala nnere ovirisedha dhithu nnonnihu dhinafuna opadduwa osogolo ni makalelo Yehova anafuniye werana dhithudha.
DHITHU NIHINONNIHU
3. Ddiniyani narumedhihu kale wodhela ethu yafuna opadduwa mahoso manlubale yabajha, ki ethu baani yanithukulela owoga ndo?
3 Kale nawoga wihina mahoso manlubale yabajha, kaavo aakanne ofuru wosakula omulabela Yehova ni ovuluwa mudhidhi wa koddo ya Armajedo. Ethu yanithukulela owoga ndo, sowihina nubuwela wi dhithu dhaatedhene dhaapadduwile mudhidhi wa mutokora malabo a Nowe, dhaali nladdaniho wa ndhe dhinafuna opadduwa osogolo. Motajhiha, noorumedha wihina ndala ninga kaavo andile ovolowa mmwanddeyani Yehova numala ofuga musiwoya, nimakalelo mamodhave, mahoso manlubale yabajha, kaavo aakanne ofuru womulabela Yehova ni ovuluwa. — Mat. 24:37-39.
4. Mwahaya bwaddi kannawoga wi dhithu dhaatedhene dhaapadduwile malabo a Nowe, dhere okanna yowakwanela osogolo? Owogemo.
4 Nerege yere okala yapama owoga wi kadda ethu epadduwile mudhidhi wa mutokora, ehikanna yotapulela wa dhithu dhinafuna opadduwa osogolo? Yowakulaya sowihina naari. Mwaha Bibiliya kanawoga. a Ebaribari wi Yesu ohuliganiha “malabo a Nowe” ni mudhidhi ola nnakalihu. Mbwenye oliye kawogile wi dhithu dhaapadduwile mudhidhi wa Nowe ninga ofugiwa wa musiwo wa mwanddeya were okanna wakwanela wewa osogolo. Mbwenye iyo podi ohudhera dhithu dhowinjhiva ni yopadduwa ya Nowe vamodha ni dhithu dhaapadduwile mudhidhi wa mutokora.
5. (a) Nowe oonihile aavi wi ahikanna nroromelo? (Eberewu 11:7; 1 Peduru 3:20) (b) Nimakalelo baani mabasa oolaleya nnaaparihu peeno enaliganiwa ni a Nowe?
5 Nowe nuwiwa ndhe Yehova awogiliye wodhela mutokora, oliye ahoniha wi ahikanna nroromelo wodhela osasanya mwanddeya. (Omwileri Eberewu 11:7; 1 Peduru 3:20.) Nimakalelo mamodhave, athu yavuruwana muthenga wapama wOmwene, enohowela oparihedha mabasa dhithu enahudheriwa. (Dho. 3:17-20) Murumiwi Peduru ahimwithana Nowe ninga ‘namalaleya a muselu dhowogowa.’ (2 Ped. 2:5) Ninga noonilihu ohudhera ovirile, iyo kannonne akala mwebaribarene Nowe ahanda waalaleya athu aatene a mudhidhi yole. Peeno iyo nnowalaleya athu owinjhiva wapela elabo yaatene, teto nnowerana eyo nuuviheya. Mbwenye naarive nilibihedhaga vanlubale, iyo kannande waalaleya athu aatene omakuthulo wahinathi ofiya. Mwahaya bwaddi nigawoga ndo?
6-7. Mwahaya bwaddi nigawoga wihina kannande waalaleya athu aatene enakala velaboni yavati omakuthulo ohunafiye?
6 Kabiha wubuwela ethu Yesu aawogiliye wodhela mabasa oolaleya. Oliye ahiwoga wi muthenga ndha dhapama dhinere “olaleyiwa elabo yatene yavati wihina athu aatene yiwe.” (Mat. 24:14) Peeno yovuhulela ela enna wakwanela mwamakalelo ootikiniha. Muthenga wOmwene onofwanyeya ni dhiwogelo dhokwaranya 1 000, teto wodhela sayiti yehu jw.org, athu owinjhiva enohudhera wodhela Yehova.
7 Naarive akala muthenga dhapama dhinna olaleyiwa dhilabo dhowinjhiva, sathima wubuwela ethu Yesu awogiliye ni anamahara aye egi: “Kamunaafiyedhe olaleya sidadi dhaatedhene,” obe nere, aliwa kayande omulaleya kadda muthu akala velaboni yavati, labo nootoriha nihinathi ofiya. (Mat. 10:23; 25:31-33) Madhu a Yesu enonipatha ni iyoya peeno, athu owinjhiva enakala mburo nahinandihu olaleya, mwaha wi mabasa ehu oolaleya enookoddihiwawo. Ohiya eyo, kadda labo enobaliwa anamwani. Iyo nnowilibihedha vanlubale wodhela werana ele nnandihu wihina naalaleye athu a ‘malogo matene, mahimo, ni adhiwogelo dhatedhene.’ (Ovuhu. 14:6) Mbwenye ebaribariya sowihina kannande walaleya athu aatene enakala velaboni yavati omakuthulo ohunafiye.
8. Nikoho baani nnakumelelavo wodhela makalelo Yehova anafuniye waatoriha athu yahinakanne ofuru wowiwa muthenga dhapama mahoso manlubale ehinafiye? (Osugwe fotu.)
8 Mbwenye nnokumelelavo nikoho nna: Ki owoga wodhela athu yahinakanne ofuru wohudhera wodhela Yehova mahoso manlubale yahinabajhe, ddiniyani enafuna wapadduwela? Ddiniyani Yehova vamodha ni Yesu enafuniwa wawerana athu yaala? (Juwa. 5:19, 22, 27; Dho. 17:31) Yolebela vikumihiwe ohudhera wula enihina: Yehova ‘kanafuna wi muthu di muthu agujhuliwe,’ Ohiya eyo, Oliye anafuna wi ‘aatene ethwaruwe.’ (2 Ped. 3:9; 1 Tim. 2:4) Sathima wubuwela wi Yehova kanathi onaddela makalelo anafuniye waatoriha athu yahinakanne ofuru wowiwa muthenga dhapama. Mbwenye sathima ohidduwala wi Yehova kanawaddihedhiwa onaddela dhithu dhaatedhene eriliyena ni anafuniye werana osogolo.
Yehova anaatorihe ni makalelo baani athu yahinakanne ofuru wowiwa muthenga dhapama mahoso manlubale yahinathi obajha? (Osugwe ddima 8) c
9. Ddiniyani Yehova anafuniye werana osogolo?
9 Wodhela Bibiliya Yehova anonaddela dhithu dhimodha anafuniye werana osogolo. Motajhiha, mBibiliyani nnofwanyamo mpaganyo wa Yehova onihina Oliye anere wavenyiha athu “ohogowa” obe neere, athu yaale yahanna ofuru wowiwa wodhela muthenga dhapama ni osaddula egumi yewa. (Dho. 24:15; Luk. 23:42, 43) Vano mwaha wa yeyo, enokumelelavo makoho mamodha athima.
10. Makoho mamodha enakumelelavo baavi?
10 Nerege athu aatene enaakwe mudhidhi wa mahoso manlubale, kinavenyihiwe muukwani? Bibiliya anawoga wi athu yaale enamurugunuwele Yehova, enere ogujhuliwa va koddo ya Armajedo, teto kinakanne oneti wovenyihiwa muukwani. (2 Tes. 1:6-10) Mbwenye athu amodhaya podi wera enere okwa mudhidhi wa mahoso manlubale mwaha wa dhithu dhohiyanahiyana, ninga: Oredda, wuluvala, ng’ovi, obe opiwa ni athu amodha. Ddiniyani enafuna wapadduwela athu yaala? (Ecl. 9:11; Zac. 14:13) Nerege amodha wa athu yaala enere ovenyihiwa vamodha ni athu “ohogowa” enaavenyihiwe mwilaboni exa? Iyo kannonne yowakulaya.
DHITHU NNONNIHU
11. Mudhidhi wa koddo ya Armajedo, athu enaatorihiwe wodhela werana ddi?
11 Iyo nihinona dhithu dhimodha dhinafuna opadduwa osogolo. Motajhiha, iyo nihinona wi mudhidhi wa koddo ya Armajedo, athu enere otorihiwa wodhela makalelo yaweddihiwa addibile a Kiristu, obe nere, addibila ni arogola oothikitheliwa. (Mat. 25:40) Ale enaatorihiwe ninga mambila, biyaale yakavihenre makiristawu oothikitheliwa. Teto iyo nihinona wi addibila amodha oothikitheliwa enakale velaboni yavati mahoso manlubale yabajha, ni enathukuleliwe odhulu ehalaga neena wihina koddo ya Armajedo yambele. Woona wihina ofiyedha mudhidhi yoyo addibila amodha oothikitheliwa enakale velaboni yavati, podi wera athu enna efunelo, enere okanna ofuru wowakavihera aliwa ni mabasa enapariwa. (Mat. 25:31, 32; Ovuhu. 12:17) Mwahaya bwaddi sathima onona wodhela muselu ola?
12-13. Podi wera athu amodha enaathome werana ddi, yamoona ‘Babiloniya Munlubale’ agagujhuliwe? (Osugwe fotu.)
12 Mahoso manlubale yabajha, podi wera athu amodha yonile ogujhuliwa wa ‘Babiloniya Munlubale’ enere wubuwela wi Anamoona a Yehova yowogesa wi ele yere opadduwa. Nerege mwaha wa yeyo athu amodha enerege ofuna ohudhera wodhela Yehova ni osakula omulabela? — Ovuhu. 17:5; Eze. 33:33.
13 Akala athu amodha enere othoma omulabela Yehova, eyo kinantikinihe, mwaha wi ethu ninga yela yahipadduwa Wijipitu mudhidhi wa Moyizeji. Mudhidhi amwaana Ezarayeli ekumaga Wijipitu, ‘athu owinjhiva yahali amwaana Ezarayeli yahahara.’ Podi wera athu amodha yabanjhe omuroromela Yehova nuwoona wi mulili ndhe kumi Moyizeji aawogiliye dhahipadduwa. (Êxo. 12:38) Vano ethu ninga yela yapadduwa mudhidhi Babiloniya Munlubale agujhuliwa, nnere otakaleliwa ni wubuwela wihina aliwa kinafwanelela okala ni iyo? Naari kannatakaleliwe! Mwaha iyo nnafuna nikale ninga Babihu Yehova ali ‘Mulugu athagaraga ni oohaguvela onyanyuwa, oojheha, anna odhivela ohunamala ni eebaribari.’ b — Êxo. 34:6.
Podi wera athu amodha enafuna woona ogujhuliwa wa ‘Babiloniya Munlubale’ enere wubuwela wi Anamoona a Yehova yowogesa wi ele yere opadduwa (Osugwe ddima 12-13) d
14-15. Wihina muthu aakele egumi yohimala, enakale mwaha wa mudhidhi anafuniye okwa obe mwaha wa murudda anakaliiye? Owogemo. (Salmo 33:4, 5)
14 Malabo mamodha, nnowawiwesa addibila ewogaga yegi: “Yere okala yapama ahere mmudhaaga ahili Namoona a Yehova akwa ovanene mahoso manlubale ehinabajhe, mwaha yereya ndo, anere okanna ofuru wovenyihiwa muukwani.” Kahi yabure wawoga madhu ala mwaha wi enoniha wi nnowathuwathuwela amudhihu. Mbwenye nnohowela wubuwela wi muthu kanaakele egumi yohimala mwaha wa mudhidhi anafuniye okwa. Yehova Namatoriha oologomana, teto dhothoma dhaye sapama ni sowogowa. (Omwileri Salmo 33:4, 5.) Bumwahaya iyo podi okanna ebaribari wi: ‘Namatoriha eelabo yatene’ anere werana ele eli yapama. — Gén. 18:25.
15 Teto iyo podi owoga wi muthu kanaakele egumi yohimala mwaha wa murudda anakaliyewo. Yehova kanaatorihe athu ninga “mbuzi” mwaha aliwa okala murudda wahifiyilewo muthenga dhapama. (Mat. 25:46) Akala iyo nnowathuwathuwela athu yala, nihikanna ebaribari wi Yehova ali ‘Namatoriha eelabo yatene’ anoothabwa wathuwathuwela aliwa. Iyo kannone makalelo Yehova anafuniye waatoriha athu yaala mudhidhi wa mahoso manlubale. Podi wera amodha wa athu yala yamala woona dhithu dhinapadduwe mudhidhi wa mahoso manlubale, enere wambela okanna nroromelo ni Yehova ni enere othoma omulabela, mudhidhi Yehova anafuniye otxeniha ndina naye velaboni yaatene yavati. — Eze. 38:16.
Mahoso manlubale yabajha, . . . nerege athu amodha enerege ofuna ohudhera wodhela Yehova ni osakula omulabela?
16. Wodhela ohudhera wehu wa Bibiliya ddiniyani nihudherihu wodhela Yehova? (Osugwe fotu.)
16 Wodhela ohudhera wehu wa Bibiliya, iyo niihudhera wi kadda muthu wa iyo dathima vamentoni va Yehova. Oliye ohuleva egumi ya mwanaye wihina aatene iyo nikanne ofuru wowakela egumi yohimala. (Juwa. 3:16) Aatene iyo nnowanda woona wihina Yehova anonidhivela vanlubale. (Isa. 49:15) Oliye ohunona ndina na kadda muthu wa iyo. Mwaha wa Yehova onnona pamadhene, enere okala yokweya onivenyiha ni ekalelo emodhave vamodha ni mubuwelo waatene nannihuna nihinathi okwa! (Mat. 10:29-31) Mwebaribarene iyo kannanganyedha wi Babihu oodhivela Yehova anere omutoriha kadda muthu mwamakalelo owogowa, athotho ni athagaraga. — Tiya. 2:13.
Iyo kannanganyedha wi Yehova anere omutoriha kadda muthu mwamakalelo owogowa, athotho ni athagaraga (Osugwe ddima 16)
17. Ohudhera onaharela nnawakule makoho baani?
17 Woona wihina nihikanna masadduwo ala maxa, nnowonelamo wi nnohowela wapara mabasa oolaleya mowaguva. Mwahaya bwaddi nigawoga ndo? Ki ddiniyani enanthukulela wapara mabasa oolaleya nuuviheya? Ohudhera onaharela, nnere woona dhowakula dha makoho ala.
JHIBO 76 Munigwa wohagalaliha!
a Wihina wonelemo pama mwahaya bwaddi edhe yeriwegena masadduwo ala, osugwe ohudhera onna musolo “Esse é o modo aprovado por ti” mu A Sentinela a 15 a Março a 2015 epaddi 7-11.
b Babiloniya Munlubale agujhuliwa adhaari aatene a Yehova enere oharahariha, mudhidhi Gogi a Magogi anirijha. Teto aatene yaale enasakule okala epaddi ya nlogo na Yehova, enere oharahariwa.
c OTAPULELIWA WA FOTU: Fotu tharu dhinoniha dhithu dhinaathukulela athu amodha ohukanna ofuru wowiwa muthenga dhapama: (1) Muhiyana dhaala anakala elabo winakoddihiwa muthu ohiya gereja yaye, (2) anamatelana enakala elabo mabasa ehu oolaleya enakooddihiwiwa ni anamathonga, teto sowopiha muthu ohudhera ebaribari ni (3) mulobwana dhaala anakala murudda wothabwa olapa ni winarusa ofiyawo wihina olaleyiwewo muthenga dhapama.
d OTAPULELIWA WA FOTU: Namwali dhaala aasukumme ebaribari, anowubuwela ele ahudhenriye wodhela ogujhuliwa wa ‘Babiloniya Munlubale.’ Oliye anothoma omuhogolowela Yehova ni anosayela nikavihero na makolo aye. Ethu ninga yela yapadduwa osogolo nnafuna nimutajhihe Babihu Yehova ali athagaraga ni oodhivela, wodhela ohagalala ni ale enaathome omuhogolowela Yehova.
