OHUDHERA 20
JHIBO 67 “Nilaleye muthenga”
Odhowegeve waaparaga mabasa oolaleya mwaha wa odhivela!
“Muthenga wapama, bunaakale woobajha olaleyiwa malogo aamatene.” — MAR. 13:10.
DHITHU NNAAHUDHERIHU
Nnere woona makalelo odhivela onanthukuleliwa olaleya nuuviheya.
1. Dhithu baani nihudherihu va mutugumanoni wa vayakani wa 2023?
VA MUTUGUMANONI wa vayakani wa 2023, a nahihagalala vanlubale nuwawakela masadduwo ni monelo muxa wodhela dhithu nnarumedhihu, teto nahakela dhovuwiha dhohagalasa wodhela mabasa ehu oolaleya. Motajhiha, yahiwogiwa wihina podi wera athu amodha enere othoma omulabela Yehova Babiloniya Munlubale amala ogujhuliwa. Teto naahaddeliwa wi okuma mweri wa Novembro yaka ya 2023, yere okalawo masadduwo wodhela makalelo owapeleka mawora. Ki vano, nerege masadduwo ala enooniha wi mabasa oolaleya kinna thima ni kinahoweleya wapara nuuviheya? Naari, kahi yeyo!
2. Mwaha bwaddi kadda labo nnavira mabasa ehu oolaleya enothabwa okala owaguveya? (Marku 13:10)
2 Kadda labo nnavira, mabasa ehu oolaleya enothabwa okala owaguveya. Mwaha wa ddi? Mwaha mudhidhiya onna ogwaddeya. Kasugwa ethu Yesu awogiliye wodhela mabasa oolaleya malabo ookuthula. (Omwileri Marku 13:10.) Va Matewuji 24:14 Yesu ahiwoga wi muthenga ola wapama wa Omwene weere olaleyiwa elabo yatene yavati wihina athu aatene yiiwe, “windo omakuthulo wifiye.” (Mat. 24:14) Madhu owi “omakuthulo” enatapulela omakuthulo wa elabo ela yabure enasugweriwa ni Saddana. Yehova ohumala othoma “labo ni maworaya” anafuniye ogujhula elabo ela yabure. (Mat. 24:36; 25:13; Dho. 1:7) Kadda labo nnavira, ninna waddamela omakuthulo. (Rom. 13:11) Bumwahaya, wula njhehaga nlabo nna ofiya, nnohowela odidela wapara mabasa oolaleya nuuviheya.
3. Mwahaya bwaddi nigalaleya muthenga dhapama?
3 Nawubuwelaga mabasa oolaleya, nnohowela wikoha: Mwahaya bwaddi nigalaleya muthenga dhapama? Yowakula yokweya sowihina, nnalaleya mwaha wa odhivela. Iyo nnalaleya mwaha nnodhivela muthenga dhapama, mwaha wadhivela athu, teto yathimaya mwaha odhivela ninnihuna ni Yehova vamodha ni ndina naaye. Vano kabeni nipwasedhe ohudhera dhithu ndha dhinanthukulela olaleya.
IYO NNALALEYA MWAHA NNODHIVELA MUTHENGA DHAPAMA
4. Nnakala aavi naakela muthenga wohagalasa?
4 Onowubuwela makalelo waliwe nuwakela muthenga wohagalasa? Ninga, obaliwa wa mwaana obe nuwafwanya mabasa wasayeliwe vanlubale. Podi wera wahithabwa ohagalala ni wofuna wawaddela amudhawo vamodha ni akwawo muthenga ola wohagalasa. Nerege yahupadduwela ethu emodhave nuwiwa muthenga dhapama dhOmwene wa Mulugu, dhili dhatima opitha muthenga bu muthenga?
5. Nlabo noobajha nuwiwa wodhela ebaribari enafwanyeya mBibiliyani, waali aavi? (Osugwe fotu.)
5 Kabiha wubuwela makalelo waliwe nuwiwa wodhela ebaribari enafwanyeya mBibiliyani. We wahihudhera wi Yehova anowuudhivela vanlubale ni anafuna wi we okale epaddi ya emudhi yaye enamulabela, teto wahihudhera wi Yehova anopaganya omariha goyi ni wavenyiha amudhawo ni akwawo ekwile. Ndha si dhithu vang’no ohudhenriwe. (Mar. 10:29, 30; Juwa. 5:28, 29; Rom. 8:38, 39; Ovuhu. 21:3, 4) We wahihagalala vanlubale nuuhudhera dhithu ndha. (Luk. 24:32) Teto dhithu wahudheriwe dhahudhivela vanlubale ofiyedha ofunaga wawaddela athu amodha! — Omuliganihe ni Jeremias 20:9.
Mudhidhi nihudheraga ebaribari, iyo noofuna wawaddela athu aatene ndhe nahudherihu! (Osugwe ddima 5)
6. Ohudhenre ddi ni yopadduwa ya Ernest ni Rose?
6 Kasugwa yopadduwa ya ddibila dhaala anithaniwa Ernest, b mudhidhi aganna yaka 10 ababe okwa. Ernest anowoga egi: “Miyo gowikohesa: ‘Apapa edhowile odhulu? Gerege nlabo nimodha ginere wawoona apapa?’ Miyo gowakalela nrima anamwani amodha yanna ababiwa.” Ernest oodhowesa omahame ni ookokora vakampani va ababe ni oolobela egi: “Kamwerena Nabuya Mulugu, ginafuna ginone mburo wili apapa.” Vano nuuvira yaka 17 ababe egamanle okwa, Ernest obajha omuhudhera Bibiliya ni Anamoona a Yehova. Oliye ahihagalala vanlubale nuunona wi anookwa kinonne ethu, teto aliwa enere ovenyihiwa muukwani. (Ecl. 9:5, 10; Dho. 24:15) Vano Ernest ahifwanya dhowakula dha makoho anniyena egumaye yaatene! Ernest ahithabwa ohagalala mwaha wa dhithu ahudheriye, teto mwariye, Rose, obajha omuhudhera Bibiliya ni wambela odhiveliwa ndhe ahudheriye. Vano yaka ya 1978 aliwa obaddiziwa ni obajha othapanya naamudhiwa, akwiwa vamodha ni athu amodha wodhela dhithu ndhe dhohagalasa yahudheriwa. Yokumelelavoya sowihina, Ernest ni Rose ehakavihera athu ookwaranya 70 ohudhera ebaribari ni obaddiziwa.
7. Ddiniyani enapadduwa naadhivelaga ebaribari enafwanyeya mBibiliyani? (Lukaji 6:45)
7 Mwebaribarene naadhivelaga ebaribari enafwanyeya mBibiliyani, iyo kannanda omaalana mmurimani dhithu nnahudherihu. (Omwileri Lukaji 6:45.) Teto podi wera nnokala ninga anamahara a Yesu yawogile yegi: “Iyo kannaaselele owoga dhithu nonilihu ni niwalihu.” (Dho. 4:20) Iyo nnodhivela vanlubale ebaribari, bumwahaya nnowerana dhaatedhene nnandihu wihina naalaleye athu owinjhiva.
IYO NNALALEYA MWAHA NNOWADHIVELA ATHU
8. Ddiniyani enanthukulela walaleya athu amodha muthenga dhapama? (Osugwe kwaduru enna musolo “ Wadhivela Athu — Onere wukavihera wahudhiha athu wi ekale anamahara.”) (Osugwe fotu.)
8 Ndala ninga Yehova ni Yesu enaadhiveliwa athu, nihiyoya nnowadhivela athu. (Pro. 8:31; Juwa. 3:16) Iyo nnowaweddela thagaraga athu ‘ehimunonne Mulugu’ ni ehinna ‘ejhehedhelo.’ (Efe. 2:12) Aliwa eli ninga athu enaddadda mwaha wa makathamiho a mwigumini, vano iyo nihikanna salva vida wihina nande wavulusa aliwa, wodhela walaleya muthenga dhapama dhOmwene wa Mulugu. Odhivela ni thagaraga ninnihuna ni athu yaala, ononthukulela werana ele nnandihu wihina naalaleye muthenga dhapama. Vano athuya yavuruwana muthenga dhapama, enokanna ejhehedhelo yosogolo, enokanna egumi yohagalasa ovanene ni enokanna ofuru wowakela ‘egumi yeebaribari’ obe nere egumi yohimala mwilaboni exa. — 1 Tim. 6:19.
Odhivela ni thagaraga ononthukulela werana dhaatedhene nnandihu wihina nawaddele athu amodha muthenga dhapama (Osugwe ddima 8)
9. Muthenga baani nnalaleyihu wodhela dhithu dhinapadduwe osogolo? (Ezequiel 33:7, 8)
9 Odhivela ninnihuna naathu, ononthukulela waalaleya athu nawaddelaga wi omakuthulo wa elabo ela yabure onna waddamela. (Omwileri Ezequiel 33:7, 8.) Iyo nnowaweddela thagaraga athu aatene ni amudhihuya ehinamulabela Yehova. Athu owinjhiva ehipinyaminyeya ni mabasa a kadda labo, teto kinonne wi ehikalawo ethu enaddamela eli “mahoso manlubale ehinakalegewo wambela vipaddusiwe elabo ofiyedha peeno, newene kidha ekalagawo dila biili.” (Mat. 24:21) Iyo nnofuna wi athu enone dhithu dhinapadduwe mudhidhi oyo wotoriha wafiya, onaakale ogujhuliwa wa gereja dhaatedhene dhowoota ni ogujhuliwa wa elabo ela yabure ya Saddana va koddo ya Armajedo. (Ovuhu. 16:14, 16; 17:16, 17; 19:11, 19, 20) Iyo nnolobela nlobaga wi athu owinjhiva erumedhe muthenga dhapama ni ethome omulabela Yehova vamodha ni iyo. Mbwenye ki owoga wodhela athu amodha ni amudhihuya yahinanivuruwana nalaleyaga?
10. Mwahaya bwaddi nnohowela wawaddela athu mowaguva, dhithu dhinafuna opadduwa osogolo?
10 Ninga noonilihu ohudhera ovirile, podi wera athu enamoone Babiloniya Munlubale agujhuliwaga, enere wambela okanna nroromelo ni Yehova wi evulusiwe. Akala dhinereye ndo, sathima vanlubale wawaddela athu dhithu dhinapadduwe osogolo. Kabiha wubuwela, athu enande wubuwela baahi dhithu nawaddenlihu, nilibihedha wawaddela ovanene. (Omuliganihe ni Ezequiel 33:33.) Podi wera wubuwela dhithu nawaddenlihu kale, enere wathukulela othoma omulabela Yehova vamodha ni iyo vati vahinase. Ndala ninga namasugwera a kambura akala oFilipu aabajhile ororomela muthenga dhapama, numala woona “oddiginyeya weelabo winlubale,” podi wera ale ehinanivuruwana peeno, enere osaddula murima wewa mwaha woona ogujhuliwa wa Babiloniya Munlubale onapadduwe morurumusa.— Dho. 16:25-34.
IYO NNALALEYA MWAHA WA ODHIVELA NINNIHUNA NI YEHOVA VAMODHA NI NDINA NAAYE
11. Nimakalelo baani nnanvahihu Yehova nthithimiho, nriho ni kopolo? (Ovuhulela 4:11) (Osugwe fotu.)
11 Ethu enlubale enanthukulela olaleya muthenga dhapama fudhivela ninnihuna ni Yehova vamodha ni ndina naaye noweela. Teto mabasa oolaleya, makalelo apama oomuthithimiha Mulugu ehu nnamudhivelihu, Yehova. (Omwileri Ovuhulela 4:11.) Iyo nnorumedha ni murima wehu waatene madhu enasorihiwa ni dhopaddusa dhakopolo dhinafwanyeya odhulu dhinanvuwiha Yehova yegi: Yehova, Mulugu ehu, nyu difwanelele wakela nthithimiho, orihiwa ni kopolo wa aatene yale eli oororomeleya wa nyu. Iyo nnomuthithimiha ni nnomuriha Yehova nawaddelaga athu ebaribari enooniha wi oliye ‘ohupaddusa dhego dhatedhene’ ni wihina iyo niliwo mwaha Oliye onipaddusa. Teto iyo nnonvaha Yehova kopolo dhehu wodhela olabihedha mudhidhi wehu, dhokanna dhehu, vamodha ni kopolo dhehu dhaatedhene wihina naapare mabasa oolaleya mowiwanana ni ele nnandihu. (Mat. 6:33; Luk. 13:24; Kol. 3:23) Mogwaddela ethu enanithukulela waalaleya athu, fudhivela ninnihuna ni Yehova, teto mwaha nnafuna nawaddele athu ndina na Yehova ni dhikalelo dhaye.
Iyo nnonvaha Yehova kopolo dhehu wodhela olabihedha mudhidhi wehu, dhokanna dhehu, vamodha ni kopolo dhehu dhaatedhene wihina naapare mabasa oolaleya, mowiwanana ni ele nnandihu (Osugwe ddima 11)
12. Ni makalelo baani nnatxenihihu ndina na Yehova nakala mmabasani oolaleya?
12 Odhivela ninnihuna ni Yehova winonthukulela ofuna otxeniha ndina naaye. (Mat. 6:9) Eyo enatapulela wi nnafuna nawaddele athu wihina dhithu dhaatedhene anawoga Saddana wodhela Yehova sowoota. (Gén. 3:1-5; Jó 2:4; Juwa. 8:44) Iyo naaparaga mabasa oolaleya, nnafuna wi athu enna efunelo, emunone pamadhene Yehova vamodha ni dhikalelo dhaye dhapama. Teto nnofuna wi athu enoone wi ekalelo yinlubale ya Yehova fuudhivela, makalelo aye oothonga bapama ni bowogowa, Omwene waye onere omariha mohilegela goyi yaatene ni onere odhana murenddele veelaboni yaatene yavati. (Sal. 37:10, 11, 29; 1 Juwa. 4:8) Nawogaga ebaribari wodhela Yehova, ninna otxeniha ndina naaye. Teto naalaleyaga nnohagalala mwaha ninna wakwanihedha mutholo wehu wokala Anamoona a Yehova. Mwahaya bwaddi nigawogaga ndo?
13. Mwahaya bwaddi withaniwa Anamoona a Yehova oneti winlubale? (Isaías 43:10-12)
13 Yehova ohunisakula wi nikale “anamoona” aye. (Omwileri Isaías 43:10-12.) Yaka dhamundduli, karta dhaala na Nikuru Nolamulela nawoga negi: “Oneti munlubale aatene iyo ninnihuna fuwithaniwa Namoona a Yehova.” c Mwahaya bwaddi nigawoga ndo? Kubuwela yoladdaniha ela: Ahere we ofuna omusakula muthu wi akale namoona awo otiribunale, mwebaribarene were omusakula muthu onamuroromeliwe ni anoniwe ninga muthu apama ni oororomeleya. Siyeyo Yehova eriliyena, mwaha onisakula ninga anamoona aye enowoniha wi Oliye ohunnona pama ni anororomela wi nnere wanda wawaddela athu wihina oliyeene baahi dili Mulugu eebaribari. Mwebaribarene okala namoona a Mulugu ehu Yehova oneti winlubale ninnihuna, bumwahaya nnafuna nipathe ofuru waatene nnakannihuna wi nawaddele athu amodha ndina na Yehova ni wihina dhithu dhaatedhene dhinawogiwa wodhela oliye sowoota. Neragana eyo, nnowawoniha athu aatene wi mwebaribarene nili Anamoona a Yehova! — Sal. 83:18; Rom. 10:13-15.
IYO NNERE ODIDELA OLALEYA OFIYEDHA OMAKUTHULO
14. Dhithu baani dhohagalasa dhinapadduwe osogolo?
14 Nubuwelaga wodhela dhithu dhinapadduwe osogolo, nnohagalala vanlubale! Nnojheha wihina ni mareeliho a Yehova, athu owinjhiva enere orumedha ebaribari mahoso manlubale yahinathi obajha. Teto nnohagalala mwaha onona wi mudhidhi wa mahoso manlubale, podi wera athu amodha enere othoma okala epaddi ya nikuru nehu ni ebajhe onvuwiha Yehova vamodha ni iyo! — Dho 13:48.
15-16. Ddiniyani nnafunihu odidela werana, ki ofiyedha alini?
15 Wula nijheehaga mudhidhi oyo wohagalasa ofiya, nihikanna oneti wowapara mabasa yahinadha ehogoloweliwa opariwa, eli mabasa oolaleya muthenga dhapama dhOmwene wa Mulugu velaboni yaatene yavati. Mudhidhi mmodhave nnohowela odhowagave nawaddelaga athu wodhela dhithu dhinapadduwe osogolo. Aliwa enohowela onona wi omakuthulo wa elabo ela yabure wihaddamela. Vano mudhidhi yoyo wafiya, aliwa enere wonelamo wi muthenga nalaleyihu wadhela wa Yehova Mulugu.— Eze. 38:23.
16 Ki vano ddiniyani aatene iyo nnafunihu othoma werana? Iyo aatene nnafuna nididele olaleya mwaha wa odhivela. Odhivela ninnihuna ni muthenga dhapama, odhivela ninnihuna naathu, teto enlubaleya mwaha wa odhivela ninnihuna ni Yehova vamodha ni ndina naaye. Bumwahaya nnafuna nididele olaleya nuuviheya ni mowaguveya, ofiyedha labo Yehova anafuniye owoga egi: “Mmaale olaleya!”
JHIBO 54 “Dila siila”
a Mutugumano wa vayakani, weriwena nlabo na 7 a Outubro yaka ya 2023, Onyumbani ya Musonkano ya Anamoona a Yehova yo Newburgh elabo yo Nova York wEstadu Unidu. Mutugumano ola waatene, wahivokiwa vasogolova mu porogarama a JW Broadcasting®, epaddi yoobajha yavokiwe mweri wa Novembro yaka ya 2023, vano epaddi yanabili mweri wa Janeiro yaka ya 2024.
b Omusugwe artigu anna musolo “A Bíblia Muda a Vida das Pessoas — Fiquei impressionado com as respostas da Bíblia”, mu A Sentinela a 1º a Fevereiro a 2015.
