OHUDHERA 18
JHIBO 1 Dhikalelo dha Yehova
Omuroromele ‘Namatoriha eelabo yatene’ athagaraga!
‘Namatoriha eelabo yatene kanalabihedhe wogowa waye?’ — GÉN. 18:25.
DHITHU NNAAHUDHERIHU
Nnere wonelamo pama thagaraga ni wogowa wa Yehova wodhela ovenyihiwa waathu ohogowa.
1. Ethu baani yathima Yehova aamuhudhihiliye Abarawu?
AMULABIHEDHAGA mungero, Yehova owoga ni Abarawu wi eere ogujhula luwani yoSodoma ni Gomora. Abarawu nuuwiwa ele Yehova aawogiliye, othuwathuwa vanlubale. Vano oliye omukoha Yehova egi: ‘Munere watolosa athu apama ni abure? . . . Namatoriha eelabo yatene kanalabihedhe wogowa waye?’ Nuuvilela Yehova omuhudhiha Abarawu ethu yathima enanlibiha ni iyoya peeno: Mulugu kanadha aagujhula athu apama. — Gén. 18:23,33.
2. Ddiniyani enanivaha ebaribari wi Yehova aatorihaga athu anolabihedha wogowa waye vamodha ni thagaraga?
2 Ddiniyani enanivaha ebaribari wi Yehova aatorihaga athu anolabihedha wogowa waye vamodha ni thagaraga? Ethu enanivaha ebaribari sowihina ‘Yehova anasugwa murima’ dhaathu. (1 Sam. 16:7) Mwebaribareene Oliye ohunona dhili ‘mmurimani mwaathu aatene.’ (1 Reis 8:39; 1 Cró. 28:9) Ela ethu yootikiniha. Iyo kannanda wonelamo pamadhene makalelo Yehova anaatorihiye athu. Bumwahaya, murumiwi Pawulo ahivetheliwa oleba wodhela Yehova egi: “Makalelo aye ootoriha bootikiniha!”— Rom. 11:33.
3-4. Naarive niganonne wi Yehova aatorihaga athu anolabihedha wogowa ni thagaraga dhaye, iyo podi okanna makoho baani, ki dhithu baani nnafunihu woona muwari mwa ohudhera wula? (Juwawu 5:28, 29)
3 Naarive niganonne wi Yehova aatorihaga athu anolabihedha wogowa ni thagaraga dhaye, ndala ninga Abarawu malabo mamodha iyo podi wikoha: “Athu egujhuliwe luwani yoSodoma ni Gomora enere ovenyihiwa muukwani? Nerege amodha waathu yaale egujhuliwe oSodoma ni Gomora enokosa epaddi yaathu ohogowa enafuna ovenyihiwa muukwani?” — Dho. 24:15.
4 Vobajha, nnere woona ethu baani ninonnihu wodhela ovenyihiwa muukwani. Ovaneneve, nihakela monelo muxa wodhela “ovenyihiwa wa egumi” ni “ovenyihiwa wotorihiwa.” a (Omwileri Juwawu 5:28, 29.) Monelo ola muxa ohunthukulela wawerana masadduwo mamodha wodhela dhithu nnarumedhihu. Muwari mwa ohudhera wula ni onaharela, nnere woona monelo ola muxa wodhela makalelo ootoriha owogowa a Yehova. Vobajha, nnere woona dhithu baani nihinonnihu, voharela nnere woona dhithu baani nnonnihu.
DHITHU NIHINONNIHU
5. Kale malivuru ehu yawoga ddi wodhela athu egujhuliwe oSodoma ni oGomora?
5 Kale, malivuru ehu yowoga ethu yaapadduwele athu Yehova awoniye ninga ohogowa. Iyo nawogesa wihina athu egujhuliwe oSodoma ni oGomora, kiyadhe evenyihiwa muukwani. Mbwenye, nuuhudhera pamadhene muselu ola, teto nuwawerana malobelo owinjhiva, iyo wonelamo wi kaninna ebaribari wodhela muselu ola. Mwaha wa ddi?
6. Owoge dhopadduwa dhaathu ohogowa etorihiwe ni Yehova. Ki dhithu baani nihinonnihu wodhela dhopadduwa ndha?
6 Dihikalawo dhithu dhowinjhiva dhinanithukulela wonelamo wi kanninna ebaribari, wodhela makalelo Yehova anafuniye watoriha athu ohogowa. Motajhiha, kabiha wubuwela makalelo Yehova aatorihiliye athu ohogowa mudhidhi wa kale. Dila yobajha, mudhidhi wa mutokora malabo a Nowe, dila yanabili, mudhidhi yaagujhuliwe malogo ale 7, yakala elabo yothomeliwa ni dila yanatharu, anyakoddo ale owakwana 185 000 owAsiriya yapiwe ni mungero a Yehova emahiyu emodha baahi. (Gén. 7:23; Deut. 7:1, 3; Isa. 37:36, 37) Vano we podi wikoha: Nerege athu ale ohogowa yaagujhuliwe ni Yehova, ehigujhuliwa ni mukalala obe kinnawene ejhehedhelo yovenyihiwa muukwani? Nerege Bibiliya anowoga dhithu dhaatedhene dhinanthukulela okanna ebaribari wi aliwa kinaavenyihiwe? Naari. Mwahaya bwaddi nigawogaga ndo?
7. Ddiniyani nihinonnihu wodhela athu egujhuliwe mudhidhi wa mutokora ni athu abure yakala oKanaa? (Osugwe yavakapani.)
7 Dhopadduwa ndha noonilihu, iyo kannonne makalelo Yehova amutorihiliye kadda muthu, newene kannonne akala athu ale egujhuliwe yahikanna ofuru wohudhera wodhela Yehova ni othwaruwa mwaha wa dhoothega dhewa. Yopadduwa ya mBibiliyani enawoga wodhela mudhidhi wa mutokora enihina: ‘Nowe aali namalaleya a muselu dhowogowa.’ (2 Ped. 2:5) Mbwenye Bibiliya kanawoga wi mudhidhi Nowe asasanyaga mwanddeya ole munlubale, oliye ahimulaleya kadda muthu akalawo mudhidhi yole, siithu emodhave yapadduwile ni athu ale abure yakala elabo yothomeliwa. Iyo kannonne akala aatene yahikanna ofuru wohudhera wodhela Yehova ni othwaruwa mwaha wa dhoothega dhewa.
Nowe ni amudhaaye esasanyaga mwanddeya munlubale. Kannonne akala Nowe ahimulaleya kadda muthu akalawo mudhidhi yoole, mutokora ohunafiye (Osugwe ddima 7)
8. Ddiniyani nihinonnihu wodhela athu ooSodoma ni Gomora?
8 Ki owoga wodhela athu yakala luwani yoSodoma ni Gomora? Lo aali muthu owogowa akala vaari va athu yaale abure. Nerege Lo ahanda omulaleya kadda muthu akala luwani dhendhe? Naari. Ebaribari wi athu ala yowerana dhithu dhowinjhiva dhabure. Mbwenye nerege kadda muthu wa aliwa ahinona ohiyaniha ethu yabure ni yapama? Podi wera naari. Kudduwale wihina nikuru na alobwana yakala luwani yeele, yahixixa wagoniha aleddo yadhile vaade va Lo. Bibiliya anihina nikuru nne na alobwana yahikalavo ‘azombwe ni anakalaba.’ (Gén. 19:4; 2 Ped. 2:7) Nerege iyo podi owoga ni ebaribari wi Mulugu ehu athagaraga, ohuthoma wi kananvenyihe newene muthu mmodha wa athu yaale yakala luwani ndhe? Naari, iyo kannonne. Mwaha wi Yehova ahiwoga ni Abarawu wihina luwani ndhe kawali newene muthu mmodha owogowa. (Gén. 18:32) Eyo enowoniha wihina athu ala yaali ohogowa, bumwahaya Yehova adhe athomege waagujhula. Mbwenye nerege iyo podi owoga ni ebaribari yaatene wi kaavo newene muthu mmodha anavenyihiwe mudhidhi “yavenyihiwaga athu ohogowa?” Naari iyo kannonne!
9. Ddiniyani nihinonnihu wodhela Salomawu?
9 Bibiliya onowawoga athu owinjhiva yaali owogowa, mbwenye vasogolova okala athu ohogowa. Yopadduwa modha sa mwene Salomawu, oliye ahimunona pamadhene Yehova ni ahinona makalelo Yehova afuniye wi ebedhiwege, teto Yehova ahimureliha vanlubale. Mbwenye yowukulihaya sowihina Salomawu wambela wawebedha amulugu owoota, Yehova otakaleliwa vanlubale mwaha wa dhoothega ndhe. Ohiya eyo, dhithu Salomawu eriliyena dhahatotela makathamiho nlogo naatene muwari mwa yakadhene. Ebaribari wi Bibiliya anowoga wi Salomawu nuukwa ‘aakoyiwe mahame yaakoyiwe makolo aye,’ teto mmodha wa makolo aye, aali Davidi aali mwene oororomeleya. (1 Reis. 11:5-9, 43; 2 Reis. 23:13) Mbwenye nerege mwaha Bibiliya owoga wi Salomawu aakoyiwe ni makolo aye, eyo enoniha wihina oliye anere ovenyihiwa? Bibiliya kanavaha yowakulaya. Athu amodha podi wubuwelaga wi Salomawu anere ovenyihiwa muukwani mwaha wi Bibiliya anawoga wi “ole akwile, dhoothega dhaye dhihileveleliwa.” (Rom. 6:7) Eyo ebaribari, mbwenye eyo kinatapulela wihina athu aatene ekwile enere ovenyihiwa muukwani, teto kahi wihina mwaha muthu okwa, anere okanna ofuru wovenyihiwa muukwani. Mwaha wi ovenyihiwa muukwani nvaho wa Yehova. Teto Yehova anere wavenyiha yaale anafuniye wihina emulabelege ni mukalakala. (Jó 14:13, 14; Jo 6:44) Ki vano nerege Salomawu anere ovenyihiwa muukwani? Yehova baahi dinonne, mbwenye iyo kannonne. Ethu nnonnihu sowihina Yehova anere werana ele eli yapama ni yowogowa.
DHITHU NNONNIHU
10. Yehova anakala aavi mudhidhi aafunaga watoriha athu? (Ezequiel 33:11) (Osugwe fotu.)
10 Omwileri Ezequiel 33:11. Yehova anonaddela makalelo anakaliiye mudhidhi aafunaga watoriha athu. Murumiwi Peduru ahivetheliwa wawoga madhu mamodhave a namavuhulela Ezekiyeli, nuuleba egi: ‘Yehova . . . kanafuna wi muthu di muthu agujhuliwe.’ (2 Ped. 3:9) Madhu ala enonlibiha vanlubale. Iyo nihinona wi Yehova kanadha amugujhula muthu di muthu ni mukalakala wahilivo muladdu wapameene. Oliye ohuthabwa okanna thagaraga ni anowoniha thagaraga dhaye yahoweleyaga.
Mudhidhi wovenyihiwa wa athu ohogowa, athu aatene enere okanna ofuru wohudhera wodhela Yehova (Osugwe ddima 10)
11. Baani ahinavenyihiwe muukwani, ki ddiniyani enanthukulela owoga ndo?
11 Ddiniyani nnonnihu wodhela athu yahinavenyihiwe muukwani? Bibiliya onowawoga athu vang’ono. b Motajhiha Yesu ohuwoga wihina Judasi Iskariyoti kanaavenyihiwe muukwani. (Mar. 14:21; omusugwe João 17:12 ni nota de estudo mu Bibiliya Ezugu.) Judasi ahinona pamadhene wi amutheegela Yehova vamodha ni Yesu. (Omusugwe Marcos 3:29 ni notas de estudo mu Bibiliya Ezugu.) Teto Yesu ahiwoga wihina anamasogolela gereja kiyanna ejhehedhelo yovenyihiwa muukwani. (Mat. 23:33; Omusugwe João 19:11 ni notas de estudo madhu eni “o homem.”) Ohiya eyo murumiwi Pawulo ahiwoga wihina mapostata yahinaathwaruwe kayavenyihiwe muukwani. — Ebe. 6:4-8; 10:29.
12. Ddiniyani nnonnihu wodhela thagaraga dha Yehova? Owoge dhotajhiha.
12 Ddiniyani nnonnihu wodhela thagaraga dha Yehova? Yehova oonihile aavi wi ‘kanafuna wi muthu di muthu agujhuliwe?’ Kasugwa makalelo Yehova awonihiliye thagaraga athu amodha yerilena dhoothega dhinlubale. Motajhiha, mwene Davidi aherana dhoothega dhinlubale ninga okuma mba vamodha ni ompa muthu. Mbwenye Davidi ahithwaruwa, bumwahaya Yehova omweddela thagaraga ni omulevelela. (2 Sam. 12:1-13) Mwene Manaseji ahimuthegela vanlubale Yehova, mbwenye naarive dhigaali ndo, Yehova nuwoona wi Manaseji ohuthwaruwa ni murima waye waatene, oliye omulevelela. (2 Cró. 33:9-16) Dhopadduwa ndha dhinowoniha wi Yehova anowoniha thagaraga dhaye yahoweleyaga. Teto Oliye anere wavenyihiya muukwani athu yerilena dhoothega dhinlubale, mbwenye yonihile wi ehithwaruwa mwebaribarene.
13. (a) Mwahaya bwaddi Yehova adhe aweddelege thagaraga aNinivita? (b) Yesu aawogile ddi wodhela aNinivita?
13 Iyo nihinona wi Yehova ahaweddela thagaraga athu yakala luwani yoNinive. Yehova ahiwoga ni Jonasi egi: ‘Gihoona dhithu dhabure eneriwana.’ Mbwenye aliwa nuuthwaruwa mwaha wa dhoothega dhewa, Yehova waalevelela. Yehova ahoniha thagaraga ompitha Jonasi, teto ahimubusedha thagaraga dhaye namavuhulela Jonasi aali ootakaleliwene ni aNinivita ale ‘yahanonne ohiyaniha ethu yapama ni yabure.’ (Jonas 1:1, 2; 3:10; 4:9-11) Nuuvira yaka dhowinjhiva, Yesu olabihedha yopadduwa ya Jonasi wihina ahudhihe wodhela wogowa ni thagaraga dha Yehova. Yesu owoga wi athu ooNinive yaathwaruwile, enere “ovenya wi etorihiwe.”— Mat. 12:41.
14. Ni makalelo baani aNinivita enafuniwa “ovenyihiwa wi etorihiwe?”
14 Mudhidhi baani “wotoriha” aNinivita enafuniwa “ovenyihiwa?” Yesu ahiwoga wi winere okalawo ‘ovenyihiwa wa otorihiwa.’ (Juwa. 5:29) Yesu awoga wodhela ovenyihiwa onafuna wereya muwari mwa Onamathonga wa Yaka Txikwi, mudhidhi “athu owogowa ni athu ohogowa” enafuniwa ovenyihiwa. (Dho. 24:15) Mbwenye athu oohogowa enere “ovenyihiwa wi etorihiwe.” Eyo enatapulela wi Yehova ni Yesu enerege wasugwa athu yala akala enerege wiwelela ni oparihedha mabasa dhithu enafuniwa ohudhera. Vano muNinivita avenyihiwe muukwani akoodda omwebedha Yehova mwamakalelo Oliye anafuniye, Yehova kanenye wi oliye akalegewove. (Isa. 65:20) Mbwenye aatene yaale enaathome omwebedha Yehova, enere okanna ofuru wokalawo ni mukalakala! — Dan. 12:2.
15. (a) Ddiniyani enanthukulela owoga wi podi wera athu yakala luwani yoSodoma ni Gomora enere ovenyihiwa muukwani? (b) Nnande aavi wonelamo yolebela ya Judasi 7? (Osugwe kwaduru enna musolo “Madhu a Judasi enatapulela ddi?”)
15 Mudhidhi Yesu awogaga wodhela athu oSodoma ni Gomora, oliye ahiwoga wi ‘Labo Notoriha’ nnere okala nookweya wa aliwa ohiya wa athu yaakoddile ovuruwana muthenga anniyena. (Mat. 10:14, 15; 11:23, 24; Luk. 10:12) Ethu baani Yesu afuniye owoga? Podi wera amodha yubuwela wi Yesu eere othabwiha ndhe awogiye. Mbwenye ethu Yesu afuniye wihina aliwa enone kahi yeela yubuweliwa. Karajhiha wubuwela, Yesu nuwoga wi aNinivita yeere “ovenya wi etorihiwe” oliye kawoga ninga nladdaniho, mbwenye awoga ethu yafuna opadduwa osogolo. Ni makalelo mamodhave, enakala ninga Yesu nuwoga wodhela athu oSodoma ni oGomora wodhela ‘Labo Notoriha,’ Yesu kawoga ninga nladdaniho. Podi wera ela enooniha wi aNinivita ni athu yakala oSodoma ni Gomora enere ovenyihiwa ‘Labo Notoriha.’ Teto sotikiniha onona wi Yesu ahiwoga wi were okalawo “ovenyihiwa wa otorihiwa” wa athu “yerilena dhithu dhabure.” (Juwa. 5:29) Athu yakala oSodoma ni Gomora yaherana dhotheega dhinlubale ndala ninga ANinivita. Mbwenye aNinivita yahikanna ofuru wothwaruwa. Bumwahaya podi wera athu yakala oSodoma ni Gomora enere ovenyihiwa muukwani. Podi wera amodha wa aliwa enere ovenyihiwa, teto iyo nnere okanna gaari yowahudhiha wodhela Yehova ni Yesu!
16. Yehova anaalabihedhe ddi mudhidhi aavenyihaga athu muukwani? (Jeremias 17:10)
16 Omwileri Jeremias 17:10. Yolebela ela enonikavihera woonelamo pama ele nnonnihu: Yehova ‘anoopendda murima ni mubuwelo dhavati vamurima.’ Mwebaribareene Yehova abajha waavenyiha athu muukwani, anere ‘omuhogolosela kadda muthu mowiwanana ni dhowera dhaye.’ Yehova anere olabihedha wogowa waye mudhidhi anafuniye wavenyiha athu muukwani. Mbwenye yahoweleyaga, anere wooniha thagaraga dhaye. Bumwahaya kannafuna owoga wi muthu kanaavenyihiwe muukwani, wula Bibiliya ahiwogile ethu wodhela muthu yoyo!
‘NAMATORIHA EELABO YAATENE’ ANERE OLABIHEDHA “WOGOWA WAYE”
17. Osogolo enaapadduwe ddi ni athu ekwile?
17 Okuma mudhidhi Saddana, Adawu ni Eva yamurugunuwenliwa Yehova, matxikwi ni matxikwi athu enna okwa ofiyedha peeno. Mwiddani ehu okwa, anna wamala athu! (1 Kor. 15:26) Ki vano, enaapadduwe ddi ni athu aatene ekwile? Nikuru ning’ono naathu oororomeleya owakwana 144 000, enere ovenyihiwa wihina yakele egumi yohimala odhulu. (Ovuhu. 14:1) Teto matxikwi ni matxikwi aathu oororomeleya yamulabela Yehova ekwile kale, enere ohogolowela okalawo mudhidhi yavenyihiwaga athu apama. Vano yadidela okala oororomeleya wa Yehova mudhidhi wa Onamathonga wa Yaka Txikwi wa Yesu ni mudhidhi wa wehiwa wogomihedha, enerege okalawo ni mukalakala mwilaboni yavati. (Dan. 12:13; Ebe. 12:1) Mudhidhi yoyo, “athu abure” ni ale ekwile yahimunonne Yehova, enere ovahiwa ofuru wosaddula egumiwa wihina ekale adhaari oororomeleya a Yehova. (Luk. 23:42, 43) Mbwenye athu amodha yerilena dhoothega dhinlubale ni yathomile omurugunuwela Yehova yapudhave, kinavenyihiwe muukwani. — Luk. 12:4, 5.
18-19. (a) Ethu baani nahinahowelihu wanganyedha wodhela makalelo Yehova anafuniye waatoriha ale ekwile? (Isaías 55:8, 9) (b) Ohudhera onaharela nnawakule makoho baani?
18 Iyo podi okanna ebaribari wi makalelo a Yehova watoriha athu bapama. Abarawu ahonelamo wi Yehova, Mulugu ologomana, athotho, athagaraga ni ‘Namatoriha eelabo yatene.’ Teto Yehova ohumuxagiha mwanaye Yesu ni ohunvaha mutholo wowatoriha athu. (Juwa. 5:22) Mwaha wa yeyo, Yehova ni mwanaye Yesu ehinona ethu kadda muthu ali mwilaboni yavati anubuweliye ni makathamiho enanfwanya. (Mat. 9:4) Bumwahaya yamutorihaga kadda muthu, aliwa enamutorihe “nuwogowa!”
19 Kuwanganyedhege wi Yehova anere werana dhothoma dhapama. Woona wi iyo nili athu ohulogomana kannanda waatoriha athu amodha mwamakalelo owogowa, mbwenye Yehova anowanda werana eyo! (Omwileri Isaías 55:8, 9.) Bumwahaya nnafuna nihiye dhaatedhene mmadani mwa Yehova ni mwa mwanaye Yesu Kiristu, ali mwene anatajhiha pamadhene thagaraga ni wogowa wa Ababe. (Isa. 11:3, 4) Ki owoga wodhela otoriha Yehova anafuniye werana muwari mwa mahoso manlubale? Ethu baani nnonnihu? Ki ethu baani nihinonnihu? Ohudhera onaharela nnere woona dhowakula dha makoho ala.
JHIBO 57 Walaleyege athu atene
a Omusugwe Namasugwera a Setembro a 2022 epaddi 14-19.
b Wodhela Adawu, Eva ni Kayini, omusugwe Namasugwera a 1 a Janeiro a 2013 epaddi 12, nota.