OHUDHERA 21
JHIBO 107 Yehova yotajhiha yapama ya odhivela
Onande aavi onfwanya muthu oofwanelela wihina mutelane?
“Baani anande ofwanya muhiyana athotho? Oliye dathima vanlubale opitha korayis.” — PRO. 31:10.
DHITHU NNAADHUDHERIHU
Nnere wawoona malagano a mBibliyani enakavihere ale enafuna otela obe oteliwa onfwanya muthu oofwanelela ni makalelo addibila ammulogoni enafuniwa wakavihera addiye enafuna otela obe oteliwa.
1-2. (a) Makiristawu eli addiye enahowela yere ddi yahinathi obajha omwenddi? (b) Omwenddi winatapulela ddi? (Osugwe “Wonelamo.”)
WE ONOFUNA otela obe oteliwa? Ebaribari wihina egi muthu akale oohagalala kanahowela otela obe oteliwa. Naarive dhigaali ndo, addibila ni arogola owinjhiva eli addiye enofuna vanlubale onfwanya muthu oofwanelela wihina etelane. Mbwenye wahinathi obajha omwenddi, onohowela okala owiwegeredhene epaddi yomuzimuni, yomubuweloni ni yomwilini. a (1 Kor. 7:36) Wiwegeredha ni makalelo yala, podi wera onere wanda okanna matelo ohagalasa.
2 Ebaribariya sowihina kahi yokweya onfwanya muthu oofwanela wi mutelane. (Pro. 31:10) Teto naarive oganfwanyile muthuya ni ofunaga omunona pama, kahi yokweya wambela omwenddi. b Ohudhera wula nnere woona ddiniyani enafuna wakavihera makiristawu eli addiye onfwanya muthu oofwanelela wihina yambele omwenddi. Ohiya eyo, nnere woona makalelo addibila ammulogoni enafuniwa wakavihera addiye enafuna otela obe oteliwa.
DDINIYANI ENUKAVIHERE ONFWANYA MUTHU OOFWANELELA WI MUTELANE?
3. Ddiniyani mukiristawu ali muddiye anahoweliye onona ahinathi obajha omwenddi?
3 Akala we onofuna otela obe oteliwa, sathima vanlubale ohunambele omwenddi, c onona dhikalelo baani onafuniwe wi mamuno obe mwadhiyo akanne. Mwaha wahinona dhikalelo onafuniwe, we podi omuyelela muthu aakale mwadhiyo obe mamuno apama, obe onere obajha omwenddi ni muthu ohufwanelela. Mbwenye kudduwale wi mwenddawo anohowela okala mukiristawu oobaddiziwa. (1 Kor. 7:39) Eyo kinatapulela wi muthu di muthu abaddiziwe anofwanelela okala mamuno obe mwadhiyo. Bumwahaya wikohe: “Dholuba baani ginnimina? Dhikalelo baani dhathima ginafunimi wi mwadhaaga obe mamunaga akanne? Dhithu ginajhehimi wi ginere okanna gatela obe gateliwa, dhinere wereya mwebaribarene obe ginothabwiha?”
4. Dhithu baani athu amodha enalobiwa yalobelaga?
4 Akala we onofuna otela obe oteliwa, mwebaribarene ohulobela wodhela muselu oyo. (Fil. 4:6) Ebaribari wi Yehova kanapaganya wuvaha muthu oofwanelela wi mutelane. Mbwenye oliye anonisamalela epaddi yomubuweloni ni anonivaha ele nnahowelihu teto anere wukavihera onfwanya muthu oofwanelela. Bumwahaya omwaddelege Yehova dhithu onafuniwe ni onubuweliwe. (Sal. 62:8) Olobele olobaga wi okale muthu oovilela ni athotho. (Tiya. 1:5) John, d ddibila dhaala ali muddiye anakala wEstadu Unidu anowoga dhithu analobiye aalobelaga: “Miyo ginomwaddela Yehova dhikalelo ginafunimi wi muthu anafuna okala mwadhaaga akanne, teto ginomuloba Yehova wi agikavihere okanna dhikalelo dhinagithukulele okala mulobwana apama.” Tanya, murogola dhaala anakala oSri Lanka, anowoga egi: “Wula gimusayelaga muthu anafuna ogitela, ginomuloba Yehova wi gikale oororomeleya, oohagalala ni okanna monelo wapama.” Naarive ehoweleyaga ojheha mudhidhi wowinjhivene wi onfwanye muthu oofwanelela, Yehova anopaganya odhowagave anisamalelaga epaddi yomwilini ni yomubuweloni.— Sal. 55:22.
5. Dhithu baani dhaavahe ofuru addibila ni arogola eli addiye onfwanya muthu oofwanelela anamudhivela Yehova? (1 Korintiyu 15:58) (Osugwe fotu.)
5 Bibiliya anonikongomedha “oviheyana wapara mabasa a Nabwiya.” (Omwileri 1 Korintiyu 15:58.) Wathabwaga oviheyana mabasa a Yehova ni ojha mudhidhi ni addibila vamodha ni arogola, onere okanna ofuru wowanona athu amodha eli addiye enna yoluba emodhave onniwena yomulabela Yehova. Teto wilibihedhaga werana ele onandiwe wi omuhagalase Yehova, we onere othabwa ohagalala.
Wathabwaga oviheyana mabasa a Yehova ni ojha mudhidhi ni addibila vamodha ni arogola, onere okanna ofuru wowanona athu amodha eli addiye enafuna otela obe oteliwa (Osugwe ddima 5)
6. Ddiniyani makiristawu eli addiye enahoweliwa wubuwela mudhidhi yamusayelaga muthu wi etelane?
6 Mbwenye onohowela okala pasope, kuwenye wi muselu ola wotela okale wathima vanlubale mwigumini mwawo. (Fil. 1:10) Mwaha wihina wegi okale oohagalala, kunahowela okala muddiye obe naari otela obe oteliwa, mbwenye ohagalala weebaribari onadha mwaha wandana wawo onniwena ni Yehova. (Mat. 5:3) Mwaha okala muddiye we onere okanna ofuru wowawenjhedhedha mabasa awo onampareliwe Yehova. (1 Kor. 7:32, 33) Bumwahaya olabihedhe pama mudhidhi wawo. Jessica, murogola dhaala anakala wEstadu Unidu ateliwe ahalaga vang’ono wi akanne yaka 40 anowoga egi: “Gihinathi oteliwa, gahilibihedha vanlubale oviheyana mabasa oolaleya, teto eyo yahigikavihera okala oohagalalene naarive gihinfwanyile muthu oogitela.”
OPATHE MUDHIDHI WI OMUNONE PAMA MUTHUYA
7. Mwahaya bwaddi ekala yathotho omunona pamadhene muthuya ohunathi omwaddela wi ononfuna? (Provérbios 13:16)
7 Ki akala ohumala onfwanya muthu onanfuniwe? Nerege onohowela waguvela omwaddela wi ononfuna? Bibiliya anihina, muthu athotho anorajhiha wubuwela ahinathi owoga. (Omwileri Provérbios 13:16.) Bumwahaya, yere okala yathotho omunona pamadhene muthuya ohunathi omwaddela wi ononfuna. Ddibila dhaala anithaniwa Aschwin anakala elabo yoHolanda anowoga egi: “We podi onfunaga muthu peeno, mbwenye mohulegela efunelo ele wanniwena ni muthu ole emale. Bumwahaya we wapatha mudhidhi wihina omunone muthuya, enere okala yapama, mwaha kunaambele omwenddi ohunathi wubuwela pama.” Ohiya eyo, wapatha mudhidhi wihina omunone muthuya, podi wera onere woona wihina oliye kanna dhikalelo onafuniwe.
8. Ddibila obe murogola ali muddiye anaande aavi omusugwa obe omunona pamadhene muthu, wula oliyeya ahinonaga? (Osugwe fotu.)
8 Onande aavi omusugwa obe omunona pamadhene muthu, wula oliyeya ahinonaga? We podi werana eyo mwakala mmutugumanoni obe muthuya akala naakwaye. Mudhidhi ninga yoyo, onere okanna ofuru wowona ekalelo yaye, akala dowithwelavo epaddi yomuzimuni obe naari ni makalelo aneriyena dhithudha. We podi wikoha: “Akwayeya baani? Anathapanyesa wodhela ddi?” (Luk. 6:45) “Dholuba dhehu dhimodhave?” We podi othapanya ni anamaholela mulogo aye obe ni addibila amodha owithwelavo epaddi yomuzimuni emunonne pamadhene muthuya. (Pro. 20:18) Teto we podi wakoha athu amodha wodhela mweddelo waye. (Rute 2:11) Mbwenye wamusugwaga obe wamunonaga muthuya, onohowela okala pasope wi ohuthabwege omusugwa mudhidhi waatene. Teto kuthabwege ovolowela muselu dha mwigumi mwaaye.
Wahinathi omwaddela muthuya wi ononfuna, yere okala yathotho omunona pamadhene muthuya, mbwenye oliyeya ahinonaga (Osugwe ddima 7-8)
9. Ebaribari baani onahoweliwe okanna ohunathi omwaddela muthu wi ononfuna?
9 Ki vano mudhidhi mungasi onahoweliwe omala omusugwaga obe omunonaga muthu ohunathi omwaddela wi ononfuna? Waguvela omwaddela, oliye podi wubuwela wi oli muthu amarulu. (Pro. 29:20) Mbwenye wathabwa olegela, oliye podi wubuwelaga wi kunonne ethu onafuniwe, thabwathabwa akala oliyeya ohoona wi ononfuna. (Ecl. 11:4) Kuddiwale wi kinahoweleya okanna ebaribari, akala onere otelana ni muthuya mudhidhi ohunathi odhowa omuwogana, mbwenye we onohowela okanna ebaribari wi oli owiwegeredhene wihina otele obe oteliwe ni wihina muthuya podi wera ohukanna dhikalelo onafuniwe.
10. Onere ddi wanona wi ohukalawo muthu anuufuna mbwenye we kunanfuna?
10 Ki vano wanona wi ohukala muthu anuufuna? Akala we kunanfuna, enohoweleya wooniha pamadhene eyo. Kayakale yapama weragana dhithu dhaamuthukulele muthuya wubuwela wi ononfuna wula ononaga wi kunanfuna. — 1 Kor. 10:24; Efe. 4:25.
11. Walobiwa ni ddibila obe murogola ali muddiye wihina onvedele muthu, ddiniyani onahoweliwe wubuwelaga?
11 Dhilabo dhimodha, ababi obe athu amodha eli apogo ehikanna mutholo womusayela muthu wi atelane ni mmudhiwa ali muddiye. Teto murudda dhimodha amudhi obe akwaye a muthu ali muddiye enomusayela muthu, yindo werana dhaatedhene enandiwa wihina aabilene egumane ni enonane wi epangane akala enere otelana obe naari. Akala we ohulobiwa wihina omukavihere ddibila obe murogola ali muddiye omusayela muthu anafuniye otelana, onohowela onona pamadhene dhikalelo kadda muthu wa aliwa anafuniye wi mamune obe mwadhiye akanne. Vano wamala onfwanya muthu oofwanelela, wilibihedhe onona pamadhene mweddelo waye, dhikalelo dhaye, teto enlubaleya akala dowithwelavo epaddi yomuzimuni obe naari. Kuddiwale wi okanna wandana wapama ni Yehova ethu yathima vanlubale opitha korowa, ohudhera wa vadhulu obe okala muthu ooreela. Teto kudduwale wi ddibila obe murogola ole ulobile wi onvedele muthu, dinna mutholo wosakula akala anere otelana obe naari ni muthu omusayenliwe. — Gal. 6:5.
MAKALELO OOBAJHA OMWENDDI
12. Onande aavi omwaddela muthu wihina ononfuna?
12 Akala onofuna obajha omwenddi, onere ddi wihina omwaaddele muthuya onanfuniwe? e We podi opangana ni oliye wi mugumane mburo wili athu obe othapanya nuliye olabihedhaga telefoni. Omwaaddele pamadhene ethu onafuniwe ni oliye. (1 Kor. 14:9) Yahowelaga onvahe mudhidhi wihina ubuwele ahinathi wuwakula. (Pro. 15:28) Vano akala muthuya kanafuna kumuwaddihedhe, oriihe yothoma yaye.
13. Onere ddi muthu awoga wi anowufuna? (Kolosense 4:6)
13 Ki muthu uwaaddela wi anowufuna? Mwebaribarene muthu oyo ohilibihedha vanlubale wihina uwaddele wi anowufuna, bumwahaya omwakule mwamakalelo apama ni anriho. (Omwileri Kolosense 4:6.) Akala onohowela mudhidhi wihina omwakule, omwaaddele muthuya. Mbwenye kulegele omwakula. (Pro. 13:12) Akala kunanfuna muthuya, owoge ni makalelo apama ni mowoneleyamo. Kasugwa makalelo ddibila dhaala anithaniwa Hans, anakala elabo yo Awustriya amwakunliye murogola dhaala anfuna, oliye anowoga egi: “Miyo gahimwaddela yothoma yaaga mwamakalelo owoneleyamo, mbwenye ni nriho. Teto gahimwakula mowaguva wihina oliye anubuwelege wihina ginonfuna. Ohiya eyo, numala omukodda gahilibihedha oherana dhithu dhaamuthukulele oliye wubuwelaga wi ginonfuna.” Vano akala we ononfuna muthuya, owoge dhithu dhili mmurimani mwawo ni makalelo munafuninyu weddiha omwenddi weenyu. Dhithu we onafuniwe, podi ohiyana ni ndhe anubuwela muthu mmodhaya, eyo podi opadduwa mwaha makalelo aleliwe kadda muthu obe mwaha wa dhithu dhimodha.
ADDIBILA AMMULOGONI ENAKAVIHERE AAVI ALE ELI ADDIYE?
14. Nnande aavi wakavihera ale eli addiye wodhela makalelo ehu oowoga?
14 Nnande aavi wakavihera ale eli addiye ni enafuna otela obe oteliwa? Makalelo apama owakavihera fuudhela okala pasope ni ndhe nnawogihu. (Efe. 4:29) Iyo podi wikoha: “Ginowerana masika yathukulele ale eli addiye wubuwelaga otela? Gamoona ddibila ni murogola ali muddiye ethapanyaga, ginubuwela wihina aliwa enofunana?” (1 Tim. 5:13) Ohiya eyo, kannafuna wi addibila ni arogola eli addiye yubuwelege wi kahi yapama okala muddiye. Ddibila Hans asorihiwe mundduli anowoga egi: “Addibila amodha enogikohesa yegi: ‘Ohunatelela ddi? We ohumala wunnuwa.’ Madhu ninga yala kinaahagalasa ale eli addiye ni enowathukulela wubuwelaga otela mwaha owaddihedhiwa.” Ohiya wawaddihedha addibila ele addiye otela, sapama wathethela mwaha aliwa othoma okala addiye! — 1 Tes. 5:11.
15. (a) Ohunathi omukavihera ddibila obe murogola ali muddiye ddiniyani onahoweliwe wubuwela mowiwana ni Romanu 15:2? (b) Dhithu baani dhudhivele nvidiyuni woniliwe? (Osugwe fotu.)
15 Ki akala onubuwela wi ddibila ni murogola eli addiye yere ofwanelelana yahatelane? Nnohowela wubuwela ele anawoga Bibiliya wodhela oriha mubuwelo wa athu amodha. (Omwileri Romanu 15:2.) Addibila ni arogola owinjhiva eli addiye kinadhiveliwa wonihiwa muthu wi enonane, bumwahaya nnohowela oriha mubuwelo wewa. (2 Tes. 3:11) Teto ehikalawo addibila ni arogola eli addiye enafuna nikavihero wihina enfwanye muthu enafuniwa otelana, mbwenye akala kanlobiwe nikavihero, kayakale yapama onvedela muthu wi etelane. f (Pro. 3:27) Addiye amodha enadhiveliwa otonyihedhiwa muthu mwamakalelo yahajhehedhiwa. Murogola dhaala anithaniwa Lydia, ali muddiye anakala wAlemanya, anowoga egi: “We podi omwithana ddibila ni murogola eli addiye wihina ekale mburo vili addibila ni arogola owinjhiva yaredhaga. Ethu onahoweliwe werana, fusayela makalelo wihina aliwa egumane, windo ohiye dhaatedhene mmadani mwewa.”
Mburo vili addibila ni arogola owinjhiva, podi wavaha ofuru ale eli addiye omunona muthu oofwanelela otelana (Osugwe ddima 15)
16. Ethu baani addibila ni arogola eli addiye yahinahoweliwa oddiwala?
16 Aatene iyo podi okanna egumi yohagalasa naarive akala nihitela obe nili addiye! (Sal. 128:1) Bumwahaya akala onofuna otela, mbwenye kunanfwanye muthu oofwanelela, odhowegeve waaparaga mabasa a Yehova nuuviheya. Murogola dhaala anithaniwa Sin Yi anakala elabo yo Makawu, anowoga egi: “Naliganiha mudhidhi onafuniwe okala ni mamuno obe ni mwadhiyo mparayizu, mudhidhi onamaliwe ogaali muddiye mwilaboni muna kahithu. Ki vano akala ohufwanya muthu ofwanelela ni ohambela omwenddi? Ohudhera onaharela nnere woona makalelo ookanna omwenddi onamuthithimiha Yehova ni onuukavihere werana yothoma yapama.
JHIBO 137 Ahiyana ororomeleya
a Wihina onone akala oli owiwegeredhene wi oteliwe obe otele, omusugwe artigu anna musolo Namorar – Parte 1: Estou preparado para namorar?” mu jw.org.
b WONELAMO: Ohudhera wula ni onaharela madhu owi omwenddi, enagiwana mudhidhi mulobwana ni muhiyana enasayeliwa wihina enonane pama ni ethome akala enere otelana obe naari. Omwenddi obe ovevana onambela mulobwana ni muhiyana enonihiwa wi enofunana. Omwenddi ola onodhowave onfiyedha mudhidhi enathomiwa otelana obe naari.
c Ddima dhinaharela, nnere owoga wodhela omwenddi, mbwenye nnathabwe owoga wodhela addibila. Naarive dhigaali ndo, malaganoya enowapatha arogola.
d Mandina mamodha ehisadduliwa.
e Dhilabo dhimodha alobwana binakala oobajha owoga ni ahiyana. Mbwenye murogola podi okala oobajha owoga ni mulobwana. (Rute 3:1-13) Wihina onone dhithu dhimodha, omusugwe artigu anna musolo “Os Jovens Perguntam . . . Como contar-lhe tudo o que sinto por ele?” mu Despertai! a 22 a Outubro a 2004.
