1-2. a) Mwahaya bwaddi anamatelana axa egahowela omuroromela Yehova? (Salmos 37:3, 4) b) Ohudhera wula nnaasuze ddi?

WE onafuna otele obe otenle ovanene? Mwebaribarene onofuna ojhavo egumi ogaari ni muthu yole onamudhiveliwe. Mwebaribarene otela wihikanna makathamiho eewene. Ale etenle ovanene podi othoma dhithu dhathima. Makalelo enawaniwana makathamiho ala, ni dhothoma enniwana podi ovolowela ohagalala egumi yewa yatene. Mulobwana ni muhiyana yamuroromelaga Yehova, aliwa enothoma dhithu dhapama, matelo ewa enooliba teto enothabwa ohagalala. Mbwenye anamatelana ehinapwatha mubuwelo wa Mulugu, mohanganyedha enere okanna makathamiho muwari mwaha matelo ni kinahagalalege. — Omwileri Salmos 37:3, 4.

² Ohudhera wula wegeredhiwe mwaha ale etenle ovanene. Mbwenye enere wasoriha makathamiho enaafwanya anamatelana atene. Ohudhera wula onere owoga ethu nnahudherihu ni alobwana ni ahiyana akale. Dhotajhiha ndha, dhinere onihudhiha dhithu nnahowelihu oparihedha mabasa mwigumini mwehu, ni muwari mwa matelo. Vadhuluva, nnere ohudhera dhopadduwa dha anamatelana oovanene.

3-4. Makathamiho baani anamatelana axa enafwanyiwiwa?

³ Athu amodha podi wambela watujela anamatelana axa ni mweddelo oniithaniwa, egumi yapama. Motajhiha, ababi obe amudhiwa amodha podi wambela wakongomedha wihina yaabale ahima ehinathi. Obe podi wera akwiwa obe amudhiwa  enna efunelo yapama, podi wakongomedha anamatelana axa wihina egule nyumba ni edhalihemo dhoreela, wihina dhewa dhaweddelege pama.

⁴ Yahikala pasope, anamatelana axa podi okanna mangawu owinjhiva. Vowindo, mulobwana ni muhiyana podi wambela wiipa ni mabasa wihina yalive mangawu. Obe podi ohukanna mudhidhi wihina ekanne ohudhera wavayekiwa, ohudhera weemudhi ni wapara mabasa oolaleya. Malabo mamodha podi wambela ojhomba omutugumanoni, yaparaga mabasa wihina ekanne korowa dhowinjhiva obe ehigariwe vamabasani. Yeraga ndo, enaapadduwe ddi? Aliwa enere oyelela ofuru owawenjhedhedha mabasiwa omparela Yehova.

5. Yotajhiha ya Klaus ni Marisa enanihudhiha ddi?

⁵ Dhopadduwa dhimodha dhinowoniha wihina neeka mburo wobajha korowa ni dhoreela mwigumini mwehu, kannahagalala. Kasugwa yereye ni anamatelana Klaus ni Marisa ehudheriwa wodhela muselu yola. * Omambelelowene wa matelo ewa, aabilene yolaba nduwa nantero wihina ekanne egumi yapama. Mbwenye nuumala mwana mudhidhi, aliwa wonelamo wihina kiyahagalala. Klaus onowoga: “Iyo nahikanna dhatedhene nahowelihu, mbwenye kananna dholuba dhomuzimuni. Mwebaribarene, egumi yehu yahimala odhaaleliwa makathamiho ni kanoona oriya.” Podi wera ni weya onowonelamo wihina ohela mburo wobajha korowa ni dhoreela mwigumini mwawo, kawinadhana ohagalala webaribari. Akala enupadduwela siyeyo kuwukuwe. Kasugwa dhotajhiha dhaathu amodha dhinukavihere. Vobajha, nnafuna noone mulobwana anahudhera ddi ni yotajhiha ya mwene Jeyozafa.

6. Nuufwanyiwa makathamiho manlubale, Mwene Jeyozafa aaparihedhe addi mabasa yolaga ya Provérbios 3:5, 6?

⁶ Alobwana ootela, malabo mamodha mutholo dhenyu dhinowupinyaminyani? Akala enupadduwelani siyeyo, kasugwani yopadduwa ya Mwene Jeyozafa. Mwaha wokala mwene, Jeyozafa ahikanna mutholo wosamalela epaddi yomwilini ya nlogo natene! Oliye andile avi osamalela pama mutholo ola? Jeyozafa aherana dhatedhene andiye wihina abarele nlogo. Oliye omaga txinga dhowinjhiva sidadi yo Juda, ni otugumana nikuru naatoropa owakwana 1.160.000. (2 Cró. 17:12-19) Vasogolova, Jeyozafa ahifwanyiwa makathamiho manlubale. Nikuru naatoropa naakudda Amonita ni aMowabita, naalobwana yadhele omwangoni wo Seyiri, opangana wihina yawane nuliye. Yeekaga vangovini egumi ya Jeyozafa, yamudhaaye ni ya nlogo natene. (2 Cró. 20:1, 2) Jeyozafa enre ddi? Oliye oloba nikavihero ni kopolo dha Yehova. Eyo enowiwanana ni yolaga enafwanyeya va Provérbios 3:5, 6. (Omwileri.) Nlobelo na Jeyozafa nnafwanyeya va 2 Crónicas 20:5-12, nnotonyihedha makalelo oliye amuroromeliye babe  oodhulu. Yehova aakunle avi nlobelo na Jeyozafa?

7. Yehova akunle avi nlobelo na Jeyozafa?

⁷ Yehova omulabihedha muLevita ithaniwa Jaziyeli wihina awoge ni Jeyozafa. Yehova wera: ‘Mwiwegeredhe, mwimele txithi ni moone Yehova uuvulusagani.’ (2 Cró. 20:13-17) Dholaga aavahiwe Jeyozafa wihina awanena koddo, kadhali dholaga bure-bure. Teto, dholagadha kadhadhele wa muthu bure-bure, mbwenye dhadhile wa mwinyene Yehova. Amuroromelaga Mulugu ni murima wamutene, Jeyozafa wiwelela dholaga avahiwiye. Oliye vamodha ni nlogo nudhowa ogumana ni amwiddani, oliye kaasogolihe atoropa aye akopolo, mbwenye aasogolihe anamiba yahanna futhi. Teto, Yehova kaamukuule Jeyozafa, oliye wagonjhiha amwiddani aye. — 2 Cró. 20:18-23.

8. Alobwana ootela enahudhera ddi ni yotajhiha ya Jeyozafa?

⁸ Alobwana ootela, nyu podi ohudhera vanlubale ni Jeyozafa. Nyu muri musolo wa vaade veenyu. Bumwahaya, munolaba vanlubale wihina mwabarele ni mwakavihere. Mwaafwanyiwaga makathamiho, podi wera munokala nuwubuwela wotxokotxela yekinyu muladduya. Mbwenye kamuroromelege kopolo dhenyu. Ohiya eyo, mulobelege wa Yehova mwakala yekinyu, mbwenye mulobelege naamwarinyu ni murima wamutene. Musayelege dhoholela dha Yehova mBibliyani, ni mmalivuruni a nikuru naaye. Ohiya eyo, mparihedhege mabasa dholaga munafwanyinyu. Amodha podi ohurumedhaga ni dhothoma mufwanyinyu mBibliyani, ofiyera owoga wihina muhusavuwa. Podi wambela owoga wi, korowa ni dhorela biri makalelo apama oobarela emudhi. Mbwenye wubuwele yotajhiha ya Jeyozafa. Oliye ahimuroromela Yehova, ni werana mwamakalelo owoneya. Yehova kaamusukumme mulobwana ole oororomeleya, ni, kanadha uusukuma we. (Sal. 37:28; Heb. 13:5) Ethu emodha enafuna werana anamatelana, wihina ekanne ohagalala webaribari ddiniyani?

9. Nnone ddi wodhela namavuhulela Izayiya ni mwariye?

⁹ Namavuhulela Izayiya vamodha ni mwariye, mabasa a Yehova yaali athima mwigumini mwewa. Izayiya ari namavuhulela, teto podi wera mwariyeya mabasaye anniyena yaali mamodhave, woona wi mBibliya oliye anithaniwa ‘namavuhulela.’ (Isa. 8:1-4) Eyo enowoniha wihina anamatelana ala, efunelo yewa yaali omulabela Yehova. Aliwa yotajhiha yapama yaanamatelana amalabo yala a peeno!

10. Ohudhera dhovuhulela dha mBibliyani dhinaakavihere addi anamatelana?

¹⁰ Anamatelana a peeno podi omutajhiha namavuhulela Izayiya ni mwariye, wodhela werana dhatedhene enandiwa mmabasani a Yehova. Aliwa podi olibiha nroromelo newa ni Yehova, wodhela ohudhera dhovuhulela dha mBibliyani vamodha, ni woona makalelo dhinaakwaneliwa. * (Tito 1:2) Sapama wubuwelela makalelo ookavihera wakwanela wa dhovuhulela dhimodha. Motajhiha, aliwa podi okavihera yovuhulela ya Yesu, enawoga wodhela olaleya muthenga muxa, omakuthulo wahinafiye. (Mat. 24:14) Anamatelana yaapwasedhaga ohudhera dhovuhulela dha mBibliyani, ni yakanna ebaribari wi dhihakwanela, kinanganyedha othoma omulabela Yehova.

11. Ethu baani Pirisila ni Akila yandiliwa werana, ki mwahaya bwaddi?

¹¹ Anamatela axa podi ohudhera ni yotajhiha ya Pirisila ni Akila. Aliwa yaali maJudewu, mbwenye yakala elabo yoRoma. Aliwa yahihudhera muthenga dhixa wodhela Yesu, nuwindo okala makiristawu. Mohanganyedha, yodhiveliwa mweddelo yathukunliwa. Mbwenye egumiwa yahisadduwa mohujhehera, musadoro Kalawudiyu nuuruma wi aJudewu etamewo elabo yoRoma. Kasugwa eyo yatapulela ddi mwigumini mwa Akila ni Pirisila. Aliwa otama mburo yalemeliwa pama, ofwanya mburo muxa ni wakunga malondda oosasanya tenda. Mburo muxa yafiyiliwa, oKorinto, Akila ni Pirisila yahiitaganyihedha ni mulogo wa murudda yole. Aliwa olabaga vamodha ni murumiwi Pawulo wihina yaalibihe addibila. Vasogolova, aliwa otamela sidadi emodha wahoweleya anamalaleya. (Atos 18:18-21; Rom. 16:3-5) Mwebaribarene egumiwa yaari yopinyaminyeya, mbwenye yahikanna mareeliho owinjhiva. Podi wera ohunona thalako ya Akila ni Pirisila, mbwenye onorajhihaga wimela wubuwela mwahaya bwaddi edhe yeregena ndo? Naarive aliwa egumiwa esadduwaga mwamakalelo oohiyana-hiyana, aliwa ohela oMwene wa Mulugu mburo wobajha.

12. Mwahaya bwaddi egafwanelela anamatelana okanna dholuba dhomuzimuni?

¹² Peeno anamatela podi omutajhiha Pirisila ni Akila, wodhela weka oMwene wa Mulugu mburo wobajha. Mudhidhi wapama anamatela enahoweliwa othapanyedha wodhela muselu yola, bu mudhidhi yole egaari mumweenddini. Sapama anamatelana othoma vamodha dholuba enafuniwa wakwaneliha. Teto, eyo enere wakavihera woona nlada na Yehova mwigumini mwewa. (Ecl. 4:9, 12) Kasugwa yotajhiha ya Russell ni Elizabeth. Russell onihina: “Mudhidhi nigaari omwenddene, noothapanyedha pamadhene wodhela dholuba dhehu dhomuzimuni.” Elizabeth onihina: “Iyo noothapanya ndo, wihina osogolo nakanna dhothoma, dhosakula dhehu dhihinikoddihe wakwaneliha dholuba dhehu.” Dhothoma dha Russell ni Elizabeth,  dhahawenya wihina etamelewo elabo yo Micronésia, wahoweleya anamalaleya.

13. Mowiwana ni Salmos 28:7, mareeliho baani enakumelela naamuroromelaga Yehova?

¹³ Ninga Russell ni Elizabeth, anamatelana owinjhiva ehithoma okanna egumi yojajala wihina yande wapara mabasa oolaleya ni oohudhiha. Anamatela yakanna dholuba wihina yawenjhedhedhe mabasiwa omparela Yehova, ni yalabaga vamodha wihina yakwanihe dholuba dhewa, mareelihoya bohagalasa. Mulobwana ni mwariye podi woona makalelo Yehova anasamaleliye. Mareelihoya bowi, nroromelo newa ni Yehova nnerege wenjhedhedheya, teto enere okanna ohagalala webaribari.—Omwileri Salmos 28:7.

14. Murumiwi Peduru ni mwariye, yoonihe addi wi yororomela mpaganyo onafwanyeya va Mateus 6:25, 31-34?

¹⁴ Anamatela podi ohudhera ni yotajhiha ya murumiwi Peduru ni mwariye. Muwari mwa yaka modha ni mweri mitanu nammodha, eraga ogumanawene dila yobajha ni Yesu, Peduru oofwanelela werana yothoma yathima. Peduru mabasaaye yaari oguliha oba dhamezesiye. Vano Yesu omwithana wihina yeeddege vamodha mudhidhi wamutene. Ela kiyari yothoma yokweya mwigumini mwa Peduru, oliye oofwanelela wubuwelela makalelo aajhihigiye murala waye. (Lucas 5:1-11) Mbwenye oliye othoma omuhara Yesu mmabasani oolaleya. Ela yaari yothoma yathotho. Nnorumedha wihina mwariye Peduru ahimukavihera ethu athomiliye. Bibliya anihina Yesu nuvenyihiwa, Peduru ni mwariye yahilaba vamodha mudhidhi owinjhivene. (1 Cor. 9:5) Mohanganyedha, mwaha mweddelo wapama wa mwariye, Peduru ahanda wavaha dholaga dhapama alobwana ootela naamwariwaya, ni mubuwelo ohumunyemelaga. (1 Ped. 3:1-7) Yehova ahipaganya wasamalela ale eneeka mburo wobajha omwene wa Mulugu. Mwebaribarene Peduru ni mwariye yahaaroromela madhu yala.​—Omwileri Mateus 6:25, 31-34.

15. Yotajhiha ya Tiago ni Esther enanihudhiha ddi?

¹⁵ Akala we otenle obe oteliwe mwana yaka ndha dhivinre mundduli, onande addi wenjhedhedha efunelo yawo yowapara mabasa oolaleya? Makalelo apama fuhudhera ni anamatela amodha. Motajhiha, we podi wileri muselu dhinafwanyeya mu Sentinelani “Eles se ofereceram.” Musolo ndha dhihakavihera anamatelana oBrazil enithaniwa Tiago ni Esther, wenjhedhedha efunelo yewa yanniwana yotamela murudda wahoweleya anamalaleya. Tiago anosoriha egi: “Wileri makalelo Yehova aakaviheriye adharaaye malabo yala a peeno, ohunthukulela nihiyoya woona nlada na Yehova ni weddihiwa nuliye.” Tiago ni Esther ehitamela elabo yo Paraguai, wengo enalaba murudda weezugu obajha yaka ya 2014. Esther anosoriha egi: “Yolebela enathabwa onidhivela sa Efésios 3:20. Nihawoona madhu ala yereyaga mwigumini mwehu naaparaga mabasa a Yehova.” Karta nna, Pawulo ohuroromeliha wi Yehova ere wenjhedhedha opitha ele nnamulobihu. Madhu ala beebaribari!

16. Akala anamatelana enna wubuwelela makalelo oosongoliha dholuba dhewa dhomuzimuni, enaamulobe aani dholaga?

¹⁶ Anamatelana axa, podi okaviheriwa ni dhopadduwa dhaanamatelana amodha ehudhere omuroromela Yehova. Anamatela amodha enna wapara mabasa a mudhidhi wamutene yaka dhowinjhivadhene. Akala we onna wubuwelela dholuba dhawo, onoona  avi waloba dholaga anamatela yayo. Ala makalelo mamodha owooniha wi onomuroromela Yehova. (Pro. 22:17, 19) Anamaholela mulogo podi wakavihera anamatelana axa okanna dholuba dhomuzimuni ni wakwaneliha.

17. Empadduwele ddi Klaus ni Marisa, Ki yotajhiha ela enanihudhiha ddi?

¹⁷ Malabo mamodha naafunaga wenjhedhedha mabasa nnamparelihu Yehova, dhithudha kadhinedda ninga najheherihu. Kasugwa yotajhiha ya Klaus ni Marisa naasorihilihu omambelelo wa ohudhera wula. Nuumala yaka tharu nutelana, aliwa otamela elabo yo Finlândia wihina yakaviherege mabasa oomaga nyumba dhoMwene elabo yele. Nuwindo, aliwa waddeliwa wihina kiyalegelewo newene kiyaamalewo mweri mitanu nammodha. Omambelelowene yahukuuwa. Mbwenye dhithudha osadduwa. Aliwa withaniwa wihina yasuze ewogelo yeArabe. Peeno aliwa enohagalala yakaviheraga athu ni ewogelo yeArabe elabo emodha. Yasugwa mundduli, Marisa anosoriha egi: “kahi ethu yokweya otama murudda naalemelihu, ni omuroromela Yehova ni murima wamutene. Mbwenye ginowoona makalelo Yehova anikaviheriye mwamakalelo ohujhehera. Vano gubuwela dhatedhene dhinipadduwele, mwebaribarene nroromelo naaga nihiliba.” Dhotajhiha ndha, dhinowoniha wi wamuroromela Yehova ni murima wamutene, oliye anere wureeliha.

18. Wihina anamatela ehele mburo wobajha oMwene wa Mulugu mwigumi mwiwa enohowela yere ddi?

¹⁸ Matelo nvaho wa Yehova. (Mat. 19:5, 6) Oliye anafuna wi anamatelana ejhevo nvaho ola. (Pro. 5:18) Anamatelana axa, munorajhihaga okarati mubuwela makalelo muneeddihinyu egumi yenyu? Munowerana dhatedhene wihina mmoonihe Yehova wi munomutamalela dhatedhene anuwereliyeni ? Muthapanye ni Yehova ni nlobelo. Musayele dholaga mBibliyani dhiniwanana ni egumi yenyu. Mowindo, muparihedhe mabasa dholaga ndho dha Yehova mwigumini mweenyu. Mwerana ndo, mukanne ebaribari wi munere okanna egumi yohagalala ni ya mareeliho, mwaha ohela oMwene wa Mulugu mburo wobajha mwigumi mweenyu.