1-2. Dhithu baani dhinanthukulela wooniha odhivela ohunamala mmodha ni mukwaye?

IYO NIHIKANNA dhithu dhinanthukulela wooniha odhivela ohunamala mmodha ni mukwaye. Dhithu ndha siivi? Kasugwa madhu a Provérbios, makalelo enaakuliwa nikoho nna, Provérbios anihina: ‘Odidele woniha odhivela ohunamala ni okale ororomeleya.  . . . Wera ndo, onere okanna enonelo ni onere okala oofuneya vamentoni va Mulugu ni vaathu.’ ‘Ole anakalela ntidi wogowa ni odhivela ohunamala onofwanya egumi.’​—Pro. 3:3, 4; 11:17; 21:21.

² Yolebela ela esorihiwe, enowoga dhithu tharu enanithukulela woniha odhivela ohunamala. Yobajha, nooniha odhivela ohunamala nnere okala oofuneya vamentoni va Mulugu. Yanabili, wooniha odhivela ohunamala enonikavihera iyo nannya. Motajhiha, nnokanna wandana woliba naamodha. Yanatharu, nakanna odhivela ohunamala, nnere wawakela mareeliho osogolo eri egumi yohimala. Mwebaribarene nihikanna dhithu dhathima dhinanthukulela ohuddiwala yowubusera ya Yehova, enihina: ‘Mweeddihanege mmodha ni mukwaye ni odhivela wahinamala vamodha ni thagaraga.’​—Zac. 7:9.

3. Yohudhera ela nnawakule makoho baani?

³ Ohudhera wula nnere woona dhowakula dha makoho mannayi. Makohoya baala: Nnamoonihe aani odhivela ohunamala? Nnahudhera ddi ni livuru na Ruti wodhela wooniha odhivela ohunamala? Malabo yala a peeno nnoonihe addi odhivela ohunamala? Athu enooniha odhivela ohunamala enawakela mareeliho baani?

4. Nnamuthajhihe addi Yehova wooniha odhivela ohunamala? (Marcos 10:29, 30)

⁴ Ninga nonilihu ohudhera ovinre, Yehova onowawoniha odhivela ohunamala athu ale enamudhivela ni enamulabela. (Dan. 9:4) Iyo nnafuna ‘nimutajhihege Mulugu, ninga ahima anaadhiveliye.’ (Efésios 5:1) Mowindo, nunnuwihe odhivela ninihunna naaddibila ni arogola oomuzimuni, ni nikanne wandana woliba naaliwa.​—Omwileri Marcos 10:29, 30.

5-6. Mowiwana ni yotajhiha ela, athu yiwaga ororomeleya enubuwela ddi?

⁵ Mwebaribarene, noonelamo pamadhene odhivela ohunamala enatapuleliwa, nnere wanda wawoniha addibilihu. Wihina nunnuwihe enonelo ninihunna wodhela odhivela ohunamala, kabeni noone makalelo enaliganiwa ni ororomeleya. Sugwa yotajhiha enaharela.

 ⁶ Muthu alambe empereza yaka dhowinjhivadhene, athu enamoona ninga namalaba oororomeleya. Mbwenye, podi wera yaka dhatedhene dhendha, oliye kamunonne diretori a emperezaya. Teto, podi wera malamuloya newene emperezaya kinamudhivela. Mbwenye, enamuhagalasa fuumwakela oyitavaaye kadda mweri. Oliye anere odidelave olaba wewule ofiyera oreforimari, obe ofiyera woona mabasa mamodha anakelegiye korowa dhowinjhiva.

7-8. a) Ethu baani enamuthukulela muthu wooniha odhivela ohunamala? b) Mwahaya bwaddi nigafunaga ohudhera livuru na Ruti?

⁷ Ohukalavo ohiya orivo wodhela ororomeleya owogiwe  ddima 6 ni odhivela ohunamala. MBibliyani, ethu yaathukulela adhaari a Mulugu wooniha odhivela ohunamala ddi? Ale yooniha odhivela ohunamala kere owaddihedhiwa, mbwenye yerana ni murima wewa wamutene. Kasugwa yotajhiha ya mwene Davidi. Murima waye wahimuthukulela wooniha odhivela ohunamala ni mukwaye Jonata. Teto Davidi odidelave wooniha odhivela ohunamala ni mwanaye Jonata, Mefibozeti.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Iyo podi ohudhera wodhela odhivela ohunamala ni thalako dhinafwanyeya mBibliyani livuru na Ruti. Dhithu baani nnahudherihu wodhela odhivela ohunamala naathu enasorihiwa livuru na Ruti? Ki dhohudhera ndha, nnaparihedhe addi mabasa mmulogoni? *

9. Mwahaya bwaddi Nowemi adhe erege Yehova ohugirugunuwela?

⁹ Nilerigi livuru na Ruti, nnofwanya thalako ya Nowemi, nzaliyaye Ruti, ni mulobwana mmodha ithaniwa Bowaji amoova Mulugu, aari mmudhi a mamune Nowemi. Mwaha wa dala yaari wiZarayeli, Nowemi, mamune vamodha naaniwa abili otamela oMowabe. Egari wewule, mamune Nowemi okwa, vano aniwa otela, mbwenye nuuvira mudhidhi vang’ono naaliwaya okwa. (Rute 1:3-5; 2:1) Makathamiho yaale, yahimukula vanlubale Nowemi. Mwaha wa yeyo oliye wubuwelaga wi Yehova ahimusukuma. Kaasugwe madhu awonge Nowemi wodhela Mulugu: ‘Nlada na Yehova nihigirugunuwela.’ ‘Mwaha ole anna Kopolo dhatedhene ohutotela makathamiho egumaaga.’ Oliye wenjhedhedha egi: ‘Yehova ohugirugunuwela, Akopolo dhatedhene ohugitotela makathamiho.’​—Rute 1:13, 20, 21.

10. Yehova awonemo avi madhu a Nowemi?

¹⁰ Ki Yehova awonemo avi madhu a Nowemi? Oliye kamunyanyuwele, mwaha makathamiho yanfwanye bamweriha Nowemi owoga  madhu yala. Ohiya omunyanyuwela, Yehova omweddela thagaraga. Yehova ohunona wi ‘makathamiho podi omuthukulela muthu athotho okalaga ninga ere osavuwa.’ (Ecl. 7:7) Naari dhigari ndo, Nowemi ohowela nikavihero wihina oonelemo wi Yehova kaamusukume. Ki Mulugu aamukavihere avi? (1 Sam. 2:8) Oliye omulabihera Ruti wihina amoonihe odhivela ohunamala Nowemi. Mwamakalelo apama, Ruti omukavihera nzaliyaye okanna ohagalala ni ovenya epaddi yomuzimuni. Nnahudhera ddi ni yotajhiha ya Ruti?

11. Mwahaya bwaddi addibila ni arogola egaaja wakavihera yaale eri ookwerebeyene?

¹¹ Odhivela ohunamala, winonthukulela wakavihera ale enafwanyiwa makathamiho. Ndala ninga Ruti aariye ni Nowemi, addibila ni arogola oodhivela peeno, enojha mudhidhi naaddibila amodha ammulogoni eri owukuwene obe ookwerebeyene. Aliwa enowadhivela addibila ni arogola, enojhehera nuuthaba wihina yaakavihere mwa dhatedhene dhinaahalela. (Pro. 12:25; 24:10) Eyo enowiwanana ni madhu asorihe murumiwi Pawulo enihina: ‘Mwatodole aliba wukuuwa, mwaalibihe aliba okwerebeya, mweregena ni murima wokurumuwa.’​—1 Tes. 5:14.

12. Makalelo apama oomukavihera ddibila obe murogola akwerebeye baavi?

¹² Malabo mamodha makalelo oomukavihera ddibila obe murogola ari ookwerebeyene, fumpasedha onvuruwana ni omooniha wi nnomudhivela. Makalelo ala apama owakavihera mambila athima a Yehova, oliye onowawona. (Sal. 41:1) Provérbios 19:17 anihina: ‘Ole anamukavihera muthu oohawa anamboliha Yehova, mwaha wa yeyo, Yehova anere omureeliha.’

13. Mwahaya bwaddi nigera yothoma ya Ruti, odhivela ohunamala? (Osugwe fotu yavakapani.)

¹³ Nuumala ohudhera ethu empadduwele Nowemi, nuumuyelela mamune ni anaaye abili, nihoona odhivela ohunamala onatapuleliwa. Nowemi nunona wihina ‘Yehova ahambela okavihera nlogo naaye wodhela wavaha pawu,’ oliye ohogolowa vaade. (Rute 1:6) Anzaliyaye aabilene wambela omuhara. Ethaananaga mudila, Nowemi wawaddela dila tharu wihina ehogolowele oMowabe. Voharela, epadduwe ddi? Bibliya onihina: ‘Orpa ombejari nzaliyaye vano oliye odhowaga. Mbwenye Ruti omuwadelela nzaliyaye.’ (Rute 1:7-14) Nuuthoma ohogolowela mundduli, Orpa ahara dholaga dha Nowemi eragana ele ajheheriye. Mbwenye mubuwelo wa Ruti wahihiyana ni mubuwelo wa mukwaye. Nuliyeya ahikanna ofuru wohogolowa mundduli, mbwenye mwaha odhivela ohunamala, omuwadelela Nowemi wihina amukaviherege ethu siithu ahoweliye. (Rute 1:16, 17) Ruti ahithoma ohala ni Nowemi, kerilena mwaha wi afuna ahale baahi, mbwenye oofuna ohala nuliye. Yothoma ya Ruti, enrena  nuudhivela webaribari ohunamala. Nnahudhera ddi ni yopadduwa ela?

14. a) Peeno addibila ni arogola enathoma wera ddi? b) Mowiwana ni Hebreus 13:16, makalelo baani enamuhagalasa Mulugu?

¹⁴ Odhivela ohunamala onowerana ele nahajhehedhihu. Ninga kale, peeno addibila ni arogola owinjhiva, enowawoniha odhivela ohunamala amodha, naaleya ehinawonigiwa. Motajhiha, aliwa yiiwa wi addibila amodha ehipadduweliwa ngovi, enothamagelawo mohilegela odhowa wakavihera. Ddibila ammulogoni aafwanyiwaga makathamiho, kunavira mudhidhi wowinjhiva ehimwanje wihina emukavihere ethu siithu anahoweliye. Ninga makiristawu oMasidoniya ansaka noobajha, addibila ni arogola enowakavihera amodha okunamo. Aliwa enowerana kukuthu wihina evahe ‘yele enniwana’ wihina yakavihere addibiliwa oohawa. (2 Cor. 8:3) Yehova anohagalala vanlubale oonaga ekalelo yela yokaviherana!​—Omwileri Hebreus 13:16.

15-16. Ruti oonihe addi wi ari muthu antidi?

¹⁵ Iyo podi ohudhera dhithu dhowinjhiva wodhela makalelo Ruti amukaviheriye Nowemi. Kabeni noone makalelo amukaviheriye.

¹⁶ Okanne ntidi. Ruti nuuthoma onvelela nzaliyaye oJuda, vobajhavene Nowemi ahikoodda wi Ruti amuhare, mbwenye Ruti omukalelave ntidi. Ki yapadduwe ddi osogolowa? ‘Nowemi nuwoona wihina Ruti ahimuwadelela wi amuharege, omwihiya omuwadda.’—Rute 1:15-18.

17. Enaanikavihere ddi okala antidi?

¹⁷ Oparihedha mabasa: Wihina naakavihere athu ekwerebeyile, enohoweleya wavilelana ni wakalela ntidi. Murogola anahowela nikavihero, omambelelo oliye podi okoodda. * Nari dhigari ndo, odhivela ohunamala ninihunna nuliye winere onthukulela omukalela ntidi. (Gál. 6:2) Ethu nnafunihu funirumedha wandana nuliye, ni onenya wihina nimukavihere mudhidhi yole akwerebeyiye.

18. Ethu yamukwerebeyiha Ruti ddiniyani?

¹⁸ Kulibegena epaddawo baahi. Nowemi ni Ruti nufiya oBele, oliye wagumanana amwanddamanaaye akale. Oliye wera: ‘Miyo gidhowaga gahikanna dhatedhene, mbwenye Yehova agihogolose gihinna ethu.’ (Rute 1:21) Kubuwela makalelo Ruti ariye, nuwawiwa madhu ala asorihe Nowemi! Ruti ahilibihera wihina amukavihere Nowemi. Aliwa yahunla vamodha, otodolona, ni weedda olenddo vamodha. Naarive nnikavihero akenliye, Nowemi osoriha egi: ‘Yehova agihogolose gihinna ethu.’ Madhu ala a Nowemi enowoneyiha wi oliye kaavahile thima nikavihero na Ruti. Ruti nuwawiwa madhu yala, podi wera ahikwerebeya. Naarive dhigari ndo, oliye ahikalave ni Nowemi.

19. Enaanikavihere ddi odidela okalave ni muthu ari ookwerebeyene?

¹⁹ Oparihedha mabasa: Peeno murogola anafwanyiwa makathamiho podi wawoga madhu enakwerebeyiha naarive niilibiheraga wi nimukavihere. Mbwenye kannapwatha anawogiye. Naari dhigari ndo, nnodidela okalave ni murogola yola ni nnomuloba Yehova wihina anikavihere ofwanya makalelo apama oomutodola murogolaya.​—Pro. 17:17.

20. Yanvahe kopolo Ruti wihina ande ovilelana makathamiho yaari ddi?

²⁰ Wawogege madhu enalibiha. Ruti ahimooniha odhivela ohunamala Nowemi, mbwenye vano Ruti dahowela olibihiwa.  Yehova omulabihedha Bowaji wihina amulibihe Ruti. Bowaji owoga ni Ruti egihina: ‘Yehova ureelihe mwaha dhithu dhineriwena ni okanne oliviwa wowogowa ni Yehova, Mulugu oWizarayeli, odhiliwe waaja obareleya musiddo mwa mampelo aye.’ Madhu a Bowaji yahimudahinya murima ofiyera omwakula Bowaji egi: ‘Dhenyeya, mugeddele thagaraga vamentoni veenyu nabwiyaaga, woona wi makalelo muwogilinyu ni miyo mudhaarinyu ehigitodola, podive gihilabaga vaade veenyu.’ (Rute 2:12, 13) Madhu a Bowaji yahinvaha kopolo Ruti ahoweliye wihina ande ovilelana makathamiho.

21. Ninga munawogela Isaías 32:1, 2, anamaholela mulogo eneera ddi?

²¹ Oparihedha mabasa: Ale enaatonyihera amodha odhivela ohunamala, malabo mamodha naaliwaya enohowela olibihiwa. Bowaji ahimwaddela Ruti wi opama waye wahinoniwa naathu aatene. Emodhave enapadduwa peeno, anamaholela mulogo enowawoona ni enowatamalela addibila ni arogola enaakavihera amodha. Nikavihero addibila naarogola amodha enaakeliwa, enowavaha kopolo yahoweliwa wihina evilelena makathamiho.—Omwileri Isaías 32:1, 2.

22-23. Ekalelo ya Nowemi yasadduwe avi, ki mwahaya bwaddi? (Salmos 136:23, 26)

²² Nuuvira mwana mudhidhi, Bowaji onvaha yojha Ruti ni Nowemi. (Rute 2:14-18) Ki Nowemi onnemo avi yovaha ya Bowaji? Oliye wera: ‘Yehova amureelihe, ahiselele woniha odhivela waye ohunamala naathu ookalawo, naaleya ekwile.’ (Rute 2:20a) Nvaho ola wahimuhagalasa vanlubale Nowemi! Mundduli oliye ahiwoga owukuwene egi: ‘Yehova . . . Ohugirugunuwela,’ mbwenye nuwakela nvaho ole oliye owoga nuuhagalala egi: ‘Yehova . . . kaselele woniha odhivela waye ohunamala.’  Ki vano, yamukavihere Nowemi okanna mubuwelo mmodha ddi?

²³ Vano Nowemi wambela woona nlada na Yehova mwigumini mwaaye. Yehova ahimulabihera Ruti wihina amukavihere Nowemi, mulenddoni adhowaga oJuda. (Rute 1:16) Teto, Nowemi woonave nlada na Yehova nuumona Bowaji ‘namoobola ewa’ aavahaga dhoojha nimakalelo oodhivela. * (Rute 2:19, 20b) Podi wera Nowemi ahubuwela egi: ‘Vano ginowonelamo wi Yehova kagisukumme, mudhidhi yola watene Yehova ari ni miyo!’ (Omwileri Salmos 136:23, 26.) Podi wera Nowemi aari oohagalalene mwaha omoona Ruti ni Bowaji ehimunhiye! Teto podi wera athu yala araru yahihagalala vanlubale mwaha wamareeliho yakumelelevo.

24. Mwahaya bwaddi nigafuna odidela wooniha odhivela ohunamala ni addibilihu?

²⁴ Nnahudhera di ni livuru na Ruti wodhela wooniha odhivela ohunamala? Odhivela ohunamala winonthukulela ohaasukuma addibila ni arogola enafwanyiwa makathamiho. Teto, winonthukulela werana kukuthu wihina nakavihere. Anamaholela mulogo enohowela watamalela ni walibiha addibila naarogola, enaatonyihedha amodha odhivela ohunamala. Iyo nnohagalala vanlubale nawoonaga addibila ni arogola yakwerebeye, evenyaga epaddi yomuzimuni. (Atos 20:35) Mwahaya bwaddi nigadidelaga wooniha odhivela ohunamala? Mwaha wi nnafuna nimutajhihe ni nimuhagalase Yehova, anna ‘odhivela ohunamala.’—Êxo. 34:6; Sal. 33:22.