1. Makoho baani nnawerihuna?

WUBUWELA dhithu dhinapadduwe osogolo​—ogujhuliwa wa dhigereja dhowoota, orijhiwa ni Goge ni Magoge, ni koddo ya Armajedo, onodheliwa woova? Podi wera onowikoha: ‘Miyo ginere okalave oororomeleya dhithu ndha dhaapadduwaga?’ Akala onorajhihaga wikoha ndala, madhu awogile Yesu muwari mwa musolo ola, enere wukavihera. Yesu wawaddela anamahara aye egi: ‘Kamuthuwathuwe mmurimani mweenyu. Mmuroromele Mulugu.’ (João 14:1) Nroromelo nehu nakala nooliba, dhithu dhinadha osogolo kadhinaanithuse.

2. Nnande addi olibiha nroromelo nehu, ki nnahudhere ddi muwari mwa musolo ola?

² Ethu enaalibihe nroromelo nehu wa dhithu dhinafuna opadduwa osogolo, fuhudhera dhithu dhineha nroromelo nehu peeno. Nubuwela makalelo nnawanihuna dhithu dhineha nroromelo nehu peeno, nnowonelamo epaddi baani enafwanelela olibiha nroromelo nehu. Nagonjhiha yoweha, nroromelo nehu nnooliba. Eyo podi onikavihera ovilelana dhoweha dhinafuna wereya osogolo. Musolo ola nnere ohudheravo dhithu nayi, dhaafwanye anamahara a Yesu dhawooninhe wi aliwa yofwanelela wenjhedhedha nroromelo newa. Vasogolova nnere woona dhithu dholigana dhinafuna onifwanya peeno, ni makalelo dhinafuniiwa onegeredha wa dhopadduwa dhinadha osogolo.

3. Mowiwana ni Mateus 6:30, 33, muthoma baani Yesu asorihiliye wodhela nroromelo?

³ Sapama musolo wa vaade waja makalelo ojhiha murala waye, mburo vokala mwariye nanaye. Mbwenye mudhidhi yola worusa nilihu peeno, eyo kahi ethu yokweya. Malabo mamodha nnowiwa wi addibilihu ehiyelela ganyu yewa, naarive yilibiheraga kinanda wafwanya mabasa mamodha. Addibila  amodha ehakoodda mabasa ehiniwanana ni malamulo a Yehova. Dhithu dhendha nsorihilihu, nnofwanelela omuroromela Yehova wi anere waja makalelo wihina naande osapela emudhiihu. Yesu ohutonyihedha eyo awogaga mwaha waye vamwangoni. (Omwileri Mateus 6:30, 33.) Nakanna ebaribari wi Yehova kanadha anisukuma, nnathabwa othuwathuwela mabasa oOmwene baahi. Noonaga wi Yehova anokabelela epaddi yehu yomwiilini, finamoonihu Yehova okala vakukuvene ni iyo, teto nroromelo nehu nnothabwa oliba.

4-5. Ekavihere murala ola ovugulela othuwathuwa wewa wowaja yojha ddiniyani?

⁴ Kasugwa makalelo Yehova aakaviheriye emudhi yo Venezuela, yathabwa okubanya mwaha makalelo oofwanya yojha. Emudhi ya Castro yaroromelesa mundda yanniwana wihina yande wijhiha. Vano ambava dhala yanna futhi wawaka mwana mundda yaroromeliiwa ni wawigarawo murudda yole yakalesiwa. Babiwa anithaniwa Miguel onosoriha egi: “Peeno negi naande wijhiha nnaroromela mwana mundda nibolinhehu. Vati vasa, ginomuloba Yehova wihina anivahe yojha ya kadda labo.” Murala ola onna woona goyi, mbwenye aliwa ehikanna nroromelo wihina Babihu oodhivela anere wakabelela, mwaha wa yeyo enowanda woona mutugumano dhatedhene ni enowapara mabasa oolaleya. Aliwa enoweeka Omwene wa Mulugu mburo wobajha, teto Yehova onowavaha dhatedhene enahoweliwa.

⁵ Mudhidhi yola worusa, Miguel ni mwariye, Yurai, enathabwa osugwera makalelo Yehova anaakabeleliye. Malabo mamodha Yehova onowalabihedha addibila ammulogoni, wihina ekabelele murala ola dhithu dhinahoweliwa, obe omukavihera Miguel ofwanya mwana mabasa anahoweliye. Malabo mamodha, Yehova anokabelela murala ola wodhela nikuru nnakavihera yapadduwa ngovi negeredhiwe ni Beteli. Yehova kanasukumege murala wa Castro. Ninga mareelihoya, murala ola nroromelo newa ninna wunnuwa. Aliwa nuwoga wi yahikaviheriwa ni Yehova, mwaniwa apogoya anithaniwa Yoselin, wera: “Sohagalasa woona nlada na Yehova ni mentwihu. Miyo ginamoona ninga mukwaga ni gihikanna ebaribari wi kanadha ahiya ogikavihera.” Oliye wenjhedhedhave egi: “Dhoweha dhatedhene dhanifwanye, dhihinegeredha wodhela dhoweha dhinadha osogolo.”

6. Naarive wahinna korowa, onande addi olibiha nroromelo nawo?

⁶ We onofwanyiwa makathamiho mwaha ohukanna korowa? Mwebaribarene mudhidhi yola kahi mudhidhi wokweya. Naarive dhithudha dhirusaga, opathe mudhidhi yola wihina olibihe nroromelo nawo. Olobele wa Yehova, ni wawileri madhu aasorihe Yesu va Mateus 6:25-34, windo, wawubuwele pamadhene. Wubuwele dhotajhiha dha adhaari a peeno, dhinoniha wi Yehova anowakabelela ale enavihedhiwa ni mabasaaye. (1 Cor. 15:58) Eyo enere olibiha nroromelo nawo wi, mowindala ninga Babihu oodhulu aakaviheriye athu amodha yahanna korowa, ni weya anere wukavihera. Yehova ohunona onahoweliwe, teto oliye ohunona makaleloya owukabelela. We woona nlada na Yehova mwigumini mwawo, nroromelo nawo nnerege oliba, teto eyo enere wuwegeredha dhoweha dhinadha osogolo.​—Hab. 3:17, 18.

7. Mowiwanana ni Mateus 8:23-26, ‘nipevo ninlubale’ neehile addi nroromelo naanamahara a Yesu?

⁷ Yesu ni anamaharaye egari muulenddoni ni mwanddeya, mohujhehera ofwanyiwa nipevo ninlubale. Yesu olabihedha yopadduwa yele wihina aakavihere woona wi yohowela nroromelo. (Omwileri Mateus 8:23-26.) Nipevo wambela othabwa, vano manjhe ovolowa mmwanddeyani. Mbwenye Yesu kathuwathuwe, ogonagave. Mbwenye anamahara a Yesu mwaha woova, aliwa onvenyiha ni omuloba wihina aavuluse. Yesu wasumulula mwamakalelo apama egi: ‘Alobwana nyu ooyeva nroromelo, munathabwela ddi woova?’ Anamahara a Yesu yohowela woonelamo wi Yehova, kiyamuruse ombarela Yesu ni aatene yaale yaali vamodha nuliye. Nnahudheravo ethu baani? Nroromelo nooliba podi onikavihera nafwanyiwa ‘nipevo ninlubale’, ni dhithu dhimodha dhinanipadduwela mwigumini mwehu.

8-9. Ethu baani yehile nroromelo na Anel, ki yamukavihere ddi?

⁸ Kasugwa empadduwele murogola dhala muddiye, anithaniwa Anel anakala oPorto Rico. Yoweha ela yinlubale yahilibiha nroromelo naaye. Nipevo naaye ninlubale naari nowooneya ni mento. Dhatedhe ndho dhaambele yaka ya 2017, nipevo ninlubale niithaniwa Maria ogujhula nyumba ya Anel. Teto mwaha wa nipevo nenna, Anel wayelela mabasaaye. Oliye anosoriha egi: “Malabo yaale oorusa yaagifwanye, miyo othuwathuwa. Mbwenye miyo ohudhera omuroromela Yehova, vano galobelaga wa oliye, okwerebeya ni othuwathuwa waaga woovuguwa.”

⁹ Anel onowubuwela ethu emodha yamukavihere malabo yaale oorusa, wiwelela. Oliye anihina: “Ohara dhoholela dha nikuru nehu, dhihigikavihera okala oopwaaseya. Miyo gihoona nlada na Yehova wodhela addibila. Aliwa yoogilibiha ni yogivaha dhatedhe gahowelimi wihina gikalewo.” Anel onowenjhedha egi: “Yehova ogivaha okunamo okwaranya gaamulombimi. Mwaha wa yeyo, nroromelo naaga oliba vanlubale.”

10. Wafwanyiwaga nipevo ninlubale enahoweleya were ddi?

¹⁰ We ohufwanyiwa “nipevo ninlubale”? Podi wera onna woona goyi mwaha wa ngovi obe ori ookwerebeyene ni kunna yowera mwaha oredda wowopiha wufwannye. Podi wera malabo mamodha onakala oothuwathuwene, naarive dhigari ndo kuwenye othuwathuwa wula wuhihe omuroromela Yehova. OKanne elamalelo yoolobela ni murima wamutene wa Yehova. Olibihe nroromelo nawo woodhela wubuwela makalelo Yehova ukaviheriye malabo amundduli. (Sal. 77:11, 12) Okanne ebaribari wihina Yehova kanadha usukuma, newene peeno newene osogolo.

11. Ekalele ddi yapama wawiwelela ale ethomiwe wihina eniholelege?

¹¹ Enaanikavihere ovilelana dhoweha ddi? Yotajhiha  ya Anel, ehinakavihera onona mwahaya bwaddi sapama okala athu owiwelela. Ohudhere waroromela ale Yehova ni Yesu enaroromeliwa. Malabo mamodha alobwana ala ethomiwe podi onivaha dhoholela dhinakala ninga kadhinna mabasa. Mbwenye Yehova onowareliha athu owiwelela woodhela Bibliya ni dhopadduwa dhamwigumini dhaaddibila amodha, nnohudhera wihina wiwelela winovulusa dhigumi. (Êx. 14:1-4; 2 Crô. 20:17) Wubuwelege dhotajhiha ndha. Werana ndo winere wukavihera ohara dhoholela dha Yehova woodhela nikuru naaye peeno ni osogolo. (Heb. 13:17) Ohiya eyo winere wukavihera oliba murima wihina wande ogonjhiha dhoweha dhinadha osogolo.​—Pro. 3:25.

12. Nladdaniho nnafwanyeya va Lucas 18:1-8 nnanikavihera addi woona wiwanana orivo okanna nroromelo ni ovilelana goyi?

¹² Yesu kanganyedha wihina nlabo nimodha obure onere weha nroromelo naanamahara aye. Vano wihina evilelena obure oyo, oliye osoriha nladdaniho nnafwanyeya livuru na Lucas. Vanladdanihoni vala, Yesu onomusoriha maamukwele adhonwe omuloba namatoriha dhaala wihina amuwogele pama muladdwaye. Maamukwele ole ahikanna ebaribari wihina gamukalela ntidi namatoriha ola, anere ogivuruwana. Teto siyeyo yereye. Iyo kananganyedha wihina Yehova kanaligana nnamatoriha ole amusorihe Yesu munladdanihoni. Bumwahaya Yesu adhe awogege egihina: ‘Ni makalelo yala, Mulugu kanenye wihina athwaaye aasakuliye enamuloba mutana ni mahiyu yeddihiwe nuupama?’ (Omwileri Lucas 18:1-8.) Nuwindo Yesu wenjhedhedhave egi: ‘Mowindala mwaana muthu afiya, nerege anere ofwanya nroromelo ninga nenna elabo ela yavati?’ Nnahudheravo ddi? Nnahudheravo wihina, noonaga wihina nnofwanyiwa makathamiho, nnofwanelela okanna nroromelo nooliba ninga na maamukwele ole amusorihe Yesu. Iyo podi woona nannya wihina nihikanna nroromelo nooliba, akala nihinona ojhedhiha teto akala nili athu oovilela. Nroromelo nowi ndo podi onikavihera omuroromela Yehova wihina naarive verege olegela oliye anere onikavihera. Vadhuluva kanaanganyedhege wihina olobela wihikanna kopolo. Malabo mamodha malobelo ehu enowakuliwa ni makalelo ootikiniha.

13. Olobela okavihere addi murala woonihiwa goyi?

¹³ Kasugwa yotajhiha ya murogola Vero, anakala oRepublica Democratica de Congo. Vero vamodha ni mwanaye a yaka 15, yahifiyedha othawa murudda wakalesiwa mwaha wapulusiya, yafiyilewo yasayelaga athu enaguliha murombwe dhoviriganiha ogogo. Ethawaga, wagumanana apulusiya ale mudila ni wathuusa wihina nnowupani. Nuwindo, Vero nuwambela wunla, mwaneya oxixa ommaliwa wula alobelaga ni akuwihaga, avirisedhaga dila dhowinjhivadhene ndina na Yehova. Nuumala olobela, komandanti aapulusiya ole omukoha egi: “We mwaana we, usuzihe olobela ndo baani?” Oliye omwakula wera “Amama bigisuzihe, elabihedhaga nlobelo nnafwanyeya va Mateus 6:9-13.”  Nuwindo komandanti ole wera, “Namwali, we naababo podi othukula dilinyu mudhowege ni murenddele, Yehova Mulugu eenyu ubareleni.

14. Dhithu baani dhinehe nroromelo nehu, ki enaanikavihere ovilela ddiniyani?

¹⁴ Dhopadduwa ninga ndha dhinonihudhiha ohupwaza olobela. Ki malobelo awo yahakuliwaga mowaguva obe mwamakalelo ootikiniha? Ninga maamukwele asorihiwe munladdanihoni mwa Yesu, odideleve olobela. Okanne ebaribari wihina Yehova kanadha usukuma, naarive ovire mudhidhi wowinjhivene, Yehova anere wawakula malobelo awo. Okalele ntidi olebela, olobaga muzimu wotxena wa Yehova. (Efé. 4:13) Okanne ebaribari wihina mohulegela, onere wawakela mareeliho owinjhiva a Yehova enudduwalihe goyi yatene woniliwe. Waavilelagana makathamiho nuuroromeleya, we onere okala oliba ni owiwegeredhene woodhela dhithu dhimodha dhinafuna weha nroromelo nehu osogolo.​—1 Ped. 1:6, 7.

15. Mowiwanana ni yolebela ya Mateus 17:19, 20, makathamiho baani yaafwannye anamahara a Yesu?

¹⁵ Yesu ahahudhiha anamahara aye wihina nroromelo nere wukavihera wagonjhiha makathamiho. (Omwileri Mateus 17:19, 20.) Dila dhowinjhivadhene anamahara a Yesu yahanda wawigara ademoniyu, mbwenye dila dhimodha newene kiyandile wawigara. Mwahaya bwaddi? Yesu wera aliwa yohowelave wenjhedhedha nroromelo newa. Nuwindo oliye wera anamahara ale yahakanne nroromelo ninlubale, yere wanda otamiha mwango obe nere wagonjhiha makathamiho naarive yere othabwa winjhiva. Nihiyoya malabo yala a peeno, nnofwanyiwa makathamiho manlubale enanrusa wagonjhiha.

16. Nroromelo nimukavihere addi Gedi, naarive agamuyelele mamune?

¹⁶ Kasugwa empadduwele murogola dhaala anakala oGwatemala, anithaniwa Gedi. Mamune Gedi apiwe ahogolowaga omutugumanoni. Nroromelo nimukavihere addi murogola ola, wawanana makathamiho owindala? Oliye onosoriha egi: “Ethu egikavihere, funvokedha mutholo waaga Yehova, geera ndo finakannimina murenddele. Miyo gihoona nlada na Yehova makalelo nigikaviheriwa woodhela amudhaga ni akwaaga ammulogoni. Wavihedhiwana mabasa a Yehova, siithu emodha egikavihere ovugulela wunlana emaamukwele. Teto okalawo dila modha kadda labo futhambwe ogikavihera ohukubanya dhithu dhinafuna wereya osogolo. Dhatedhene ndha dhigipadduwele nuuvira, gihudhera wihina naarive yerege odha makathamiho oorusa osogolo, miyo ginere wanda wagonjhiha nnikavihero na Yehova, na Yesu vamodha nnikuru naaye.”

17. Nafwanyiwa makathamiho manlubale enaligana ni mwango, enahoweleya neere ddi?

¹⁷ We onna wunlana omamukwele mwaha omuyelela muthu wamudhivelesiwe vanlubale? Akala siyeyo yupadduwele, wawaje makalelo olibiha nroromelo nawo woodhela ejhehero enadha osogolo yohogoloseliwa anokwa. Windo osayele dhopadduwa dhinasorihiwa  mBibliyani dha adhaari a Yehova amundduli, yavenyihiwe muukwani. Malabo ala, onna woona goyi mwaha otxosiwa mmudhaawo? Akala siyeyo enereya niwe, osayele muselu dhinoniha wihina makalelo oosumulula a Yehova, bapama. Makathamiho bimakathamiho enufwanye, opathe mudhidhi yoyo ninga makalelo oolibiha nroromelo nawo. Kumukuwe Yehova dhithu dhinupadduwela, onfugulela murimawo. Ohiya okalaga suthukumwee waakubanyaga makathamiho awo, waajege makalelo owaredha naaddibila vamodha ni arogola. (Pro. 18:1) Waparege mabasa enukaviherege wanda ovilela, naarive waaparaga mabasa ala wula wunlaga. (Sal. 126:5, 6) Kujhombege omutugumanoni, newene kumujhombelege omwileri Bibliya obe mabasa oolaleya. Waajheherege nuuthaba, mareeliho Yehova anafuniye onivaha osogolo. Kadda labo onoonigiwe nikavihero na Yehova, nroromelo nawo nnerege oliba.

18. Akala onowoona wihina nroromelo nawo nihimala okerekeheya, enahoweleya were ddi?

¹⁸ Akala onoona wihina dhopadduwa dhakale nindha dhinupadduwela ovanene dhinowutonyihedha wi nroromelo nawo nihimala okerekeheya, kukwerebeye. Opathe mudhidhi yola wihina olibihe nroromelo nawo. Olobe ethu emodhave yaalonbe anamahara a Yesu, yegi: ‘Nenjhedhedheni nroromelo.’ (Lucas 17:5) Ohiya eyo, kuddiwale dhotajhiha dhatedhene noonilihu muwari mwa musolo ola. Ninga Migeli ni Yurayi, kuwadduwalege makalelo amatene Yehova alabihedhiye wihina ukavihere. Ninga Vero ni Anel, okanne elamalelo yoolobela malabo amatene wa Yehova thabwathabwa wafwanyiwa mudhidhi worusa. Ninga empadduwele murogola Gedi, okanne ebaribari wihina Yehova podi walabihedha addibila ammulogoni obe akwawo wihina yukavihere. Wamuhiya Yehova wihina ukavihere, kunadha wanganyedha wihina naarive yerege odha makathamiho mamodha osogolo, oliye anere wukavihera.

19. Ethu baani Yesu ahanganyedhiye, ki we enofwanelela wahanganyedhege ddi?

¹⁹ Yesu, kenre wihina anamaharaye, kiyanna nroromelo mwadhatedhene, mbwenye oliye ahinona wihina nnikavihero na Yehova, dhewa dhere waweddela pama yafwanyiwa dhoweha osogolo. (João 14:1; 16:33) Yesu kaaganyedha wihina ohoseya winlubale wafiya, athu owinjhiva enere ovuluwa mwaha wokanna nroromelo nooliba. (Apo. 7:9, 14) Kiwe, onorajhihaga wikoha akala onere okala vamodha ni muthithi yola? Mwaha opama wohinifwanelela wa Yehova, we onere okala vamodha naaliwa. Vowindala, opathe mudhidhi yola ninnihuna, wihina olibihe nroromelo nawo!​—Heb. 10:39.