1. Yehova onanikongomedha wera ddi?

YEHOVA onovaha thima odhivela ohunamala. (Ose. 6:6) Simodhave anajheheriye wa adharaaye. Wodhela namavuhulela Mikeya, Mulugu osoriha egihina: ‘odhivelege odhivela ohunamala.’ (Miq 6:8, nota.) Mbwenye nihinathi wera ndo, kabeni noone odhivela ohunamala ddi?

2. Dhikalelo dhimodha dha odhivela ohunamala siivi?

² Odhivela ohunamala ddi? Madhu owi odhivela ohunamala enofwanyeya dila dhowakwana 230 mBibliyani Tradução do Novo Mundo da Bíblia Sagrada. Madhu ala enatapulela ddi? Mowiwanana ni Glossário de Termos Bíbllicos anafwanyeya mu Tradução do Novo Mundo, enaagiwana odhivela woolibela, wohugawanyeyamo, wororomeleya ni wavati vamurima. Malabo mamodha enolabiheriwa yaafunaga owoga odhivela anna Mulugu naathu, obe odhivela enna athu mmodha ni mukwaye. Yehova tajhiha yapama yamuthu anafuna wooniha odhivela ohunamala. Yohudhera ela nnere woona makalelo Yehova anonihiye odhivela waye naathu. Teto ohudhera onaharela, nnere woona makalelo nnafunihu omutajhiha Yehova ni wooniha odhivela mmodha ni mukwaye.

3. Yehova amwaddele ddi Moses woodhela oliye?

³ Nuuvira mwana mudhidhi, amwaana Ezarayeli nukuma Wijipitu, Yehova omwaddela Moses ndina ni dhikalelo dhaye. Oliye wera: ‘Yehova Yehova, Mulugu athagaraga ni oohaguva onyanyuwa, oojheha ni anna odhivela ohunamala ni eebaribari, anawooniha anamwinjhi odhivela ohunamala, analevelela dhothega ni dhoviriganiha.’ (Êx. 34:6, 7) Ni madhu yala owoma woodhela dhikalelo dhaye, Yehova omoniha Moses ekalelo  yaye yathima woodhela odhivela waye ohunamala. Ekalelo baani?

4-5. a) Yehova awonge ddi woodhela oliyene? b) Makoho baani nnafunihu wawakula?

⁴ Yehova kere omwaddelave baahi wihina ohukanna odhivela ohunamala, mbwenye wera oliye dithanbwe okanna ‘odhivela ohunamala.’ Madhu ala enofwanyeya dila tanu nammodha mBibliyani. (Núm. 14:18; Nee. 9:17; Sal. 86:15; 103:8; Joel 2:13; Jon. 4:2) Dholebela ndha dhawogaga wihina ohuthabwa okanna odhivela ohunamala, dhinamwagana Yehova baahi omwihiya muthu. Enohagalasa onona wihina mwinyene Yehova ohenya wi mBibliyani muwogiwe woodhela odhivela ohunamala. * Odhivela ohunamala fwathima vamentoni vaye. Bumwahaya Davidi adhe alebege egi: ‘Oo! Yehova, odhivela weenyu ohunamala boofuneya. Ahima aathu enaathawele murunti wa mampelo enyu.’ (Sal. 36:5, 7) Davidi ootamalela odhivela wula ohunamala wa Mulugu, ki iyo nnowerana emodhave?

⁵ Wihina noonelemo pama odhivela ohunamala wa Mulugu onatapulela ddi, kabeni nrajhihe wawakula makoho ala menli: Yehova anamoniha aani odhivela ohunamala? Nnande addi wajhavo mareeliho a odhivela ohunamala a Yehova?

6. Yehova anamoniha aani odhivela ohunamala?

⁶ Yehova anamoniha aani odhivela ohunamala? Bibliya anihina iyo naathu nnowanda odhivela dhithu dhowinjhiva, ninga “olima”, “vinyu ni makura”, “osumululiwa”, “enonelo”, ni dhithu dhimodha. (2 Cró. 26:10; Pro. 12:1; 21:17; 29:3) Naarive dhigari ndo, kannanda woniha odhivela ohunamala ni dhithu ndha. Mbwenye yakala athu, nnowanda wawoniha odhivela ohunamala. Odhivela wula ohunamala, Yehova kanamoniha muthu bure-bure, mbwenye anawooniha ale enna wandana wapama nuliye. Mulugu ehu anowoniha odhivela waye ohunamala, ale eri akwaye. Yehova ohukanna mwahaya agoonihaga odhivela ohunamala ni adhaari aye, ni kanadha aaddiwala.

7. Yehova awonihe addi odhivela waye athu aatene a elabo yavati?

⁷ Yehova ohoniha odhivela waye naathu atene eelabo yavati. Yesu ahiwoga ni mulobwana dhaala ithaniwa Nikodemu egi: ‘Mwaha Mulugu ohudhivela vanlubale elabo, omuleva mwanaye mmodha, wi athu aatene enaamuroromele yahitolosiwe, mbwenye ekanne egumi yohimala.’ — João 3:1, 16; Mat. 5:44, 45.

8-9. a) Mwahaya bwaddi Yehova agawonihaga odhivela ohunamala adhaari aye? b) Voharela nnahudhere ddi?

 ⁸ Ninga niwogilihu mundduli, Yehova onowawoniha odhivela ohunamala ale enna wandana wapama nuliye, obe ni adhaari aye. Eyo enowiwanana ni madhu aasorihe mwene Davidi vamodha ni namavuhulela Daniyeli. Motajhiha, Davidi ohusoriha egi: ‘Mudidele woniha odhivela ohunamala wa yaale yunnonenni.’ ‘Odhivela ohunamala wa Yehova bwamalabo amatene, waale enamova.’ Nuwindo Daniyeli wera: ‘Oo Yehova, Mulugu eebaribari . . . anawooniha odhivela ohunamala waale enamudhivela ni enakoya malamulo aye.’ (Sal. 36:10; 103:17; Dan. 9:4) Mowiwanana ni dholebela ndha, Yehova onowoniha odhivela waye ohunamala ni adhaari aye, mwaha aliwa ehimunona, enomova, enomudhivela ni enowawiwelela malamulo aye. Odhivela ohunamala ekalelo Yehova anawonihiye adharaaye baahi, mwaha enomwebedha ni ebaribari.

⁹ Nihinambele omulabela Yehova, oliye oononiha odhivela wimodhave anawonihiye athu atene. (Sal. 104:14) Mbwenye, iyo nubajha omulabela Yehova, oliye wambela ononiha odhivela waye ohunamala. Bumwahaya Yehova agaaroromeliha adhaari aye egi: ‘Odhivela waaga ohunamala onere okalave ni we.’ (Isa. 54:10) Davidi oorumedha wihina madhu ala beebaribari. Siyeyo yamuthukulele wasoriha madhu ala enihina: ‘Yehova anere omweddiha muthu oororomeleya ni makalelo apama.’ (Sal. 4:3) Woona wi Yehova ananeddiha ni makalelo avayekiwa, eyo enanthukulele wera ddi? Salmista ohuleba egi: ‘Muthu athotho anere opendda dhithu dhendha, ni anere osugwera pama dhowera dha Yehova, dhinoniha odhivela waye ohunamala.’ (Sal. 107:43) Ni yolaga yela Bibliya anasorihiye, nnafuna nawone makalelo mararu adhaari a Yehova enajhiwavo mareeliho, mwaha wa odhivela ohunamala wa Mulugu.

10. Mareeliho baani nnawakelihu mwaha onona wi odhivela wa Mulugu bwamalabo amatene?

¹⁰ Odhivela ohunamala wa Mulugu, fwamalabo amatene. Ekalelo ela yathima ya odhivela ohunamala, enowogiwa va Salmos 136  dila dhowakwana 26. Versu yobajha enihina: ‘Mmutamelele Yehova, mwaha oliye dapama, odhivela waye ohunamala bwamalabo amatene.’ (Sal. 136:1) Versikulu 2 ni 26 ehikalavo madhu enihina: ‘Mwaha odhivela waye ohunamala bwamalabo amatene.’ Nilerigi versikulu dhimodha dha Salmo, nnotikina makalelo oohiyana Yehova ananonihiye odhivela waye ohunamala. Teto, oliye kanadha ahiya werana ndo. Madhu ala owi ‘odhivela waye ohunamala bwamalabo amatene’, makalelo oonroromeliha wihina odhivela ohunamala wa Mulugu ni adhaari aye, kunadha osadduwa. Yehova kanaanyanyala adhaari aye, mbwenye oliye onowandana naaliwa ni onowakabelela, thabwathabwa mudhidhi worusa. Ki mareeliho baani nnawakelihu? Onona wi Yehova onofuna wandana ni iyo, enonivaha ohagalala ni kopolo nnahowelihu wihina naawanena makathamiho enanifwanya. Teto nihiselele weedda dila enanthukulele wakela egumi.​—Omwileri Salmos 31:7.

11. Mowiwanana ni Salmos 86:5, ethu baani enamuthukulela Yehova olevelela?

¹¹ Odhivela ohunamala wa Mulugu ononithukulela okala athu oolevelela. Yehova onomoona muthu athwaruwa vano anofiyedha ohiya yothega eriliyena. Yapadduwa ndo, odhivela ohunamala wa Yehova onomuthukulela omulevelela muthuya. Davidi ohuwoga egi: ‘Oliye kananeddiha mowiwanana ni dhothega dhehu, newene kananihogolosela dhoviriganiha dhimodhave nnafwanelelihu.’ (Sal. 103:8-11) Davidi ahawona ni mento aye, makathamiho anakanna muthu mubuwelo waamunyemelaga. Mbwenye oliye ahikanna ebaribari wihina Yehova ‘dowaguva olevelela.’ Enamuthukulela Yehova olevelela ddi? Yowakulaya enafwanyeya va Salmos 86:5. (Omwileri.) Siyeyo Davidi awongeye mudhidhi alobelaga. Yehova onolevelela, mwaha odhivela waye ohunamala naathu ale enamuloba nikurumuwelo, ohuthabwa wunnuwa.

12-13. Enaanikavihere ddi nakala owukuwene mwaha wa dhothega nerilihuna kale?

¹² Nathega enofwanelela wikubanyedha—​mwaha wikubanyedha ngo podi onthukulela othwaruwa​—ni waja makalelo ootonyihedha wihina nihisinyuwa. Mbwenye, adhaari amodha a Yehova enomala mudhidhi wowinjhivene  yikubanyedhaga, mwaha wayothega yeriliwana kale. Aliwa enubuwela wihina yothega yeriliwana, Yehova kanadha aalevelela naarive egamanle othwaruwa. Onorajhihaga okala ndo? Akala siyeyo, okanne ebaribari wihina Yehova anofuna woniha odhivela waye ohunamala ni adhaari aye.

¹³ Mareeliho baani nnawakelihu: Naarive nihilogomane, iyo podi omulabelaga Yehova ni mubuwelo wapama. Eyo enowandeya mwaha ‘nikame na mwaanaye Yesu, nnotxeniha dhothega dhatedhene.’ (1 João 1:7) Akala ohuukuwa mwaha yothega weriliwena, kuwanganyedhe wihina Yehova onofuna wulevelela ni kanadha akoodda. Kasugwa makalelo Davidi aladdanihiye odhivela ohunamala ni olevelela. Oliye ohuleba egi: ‘Ndo ninga odhulu wilapeliwa ni elabo yavati, odhivela waye anniyena naale enamova ohunnuwa. Ndo ninga omadhelo nduwa ni omayelo nduwa wilapeliwana, oliye onohiya wolapela dhothega dhehu.’ (Sal. 103:11, 12) Eyo enowoneya wihina Yehova onofuna ‘onlevelela ni murima wamutene.’​—Isa. 55:7.

14. Davidi aladdanihe ninddi makalelo odhivela ohunamala wa Yehova onanibareliwa?

¹⁴ Odhivela ohunamala wa Mulugu onoonibarela epaddi yomuzimuni. Davidi ahilobela wa Yehova egihina: ‘Nyu muli nikungu naaga nothawelawo, munere ogibarela gasegedheya, munere ogirijhana ohagalala ni ginere okuwa mwaha wogivulusa. . . . Ole anamuroromela Yehova, odhivela waye wahinamala onomurijha.’ (Sal. 32:7, 10) Mudhidhi wa kale, sidadi dhakala muwari mwa txinga dholapa dhaabarela nlogo woodhela amwiddaniwa. Ni makalelo mamodhave, odhivela ohunamala wa Yehova ori ninga txinga enanibarela woodhela ethu-sithu yaafiyedhe ononga wandana wehu nuliye. Ohiya eyo, odhivela ohunamala wa Yehova ononthukulela onfiyedha oliye.​—Jer. 31:3.

15. Mwahaya bwaddi odhivela ohunamala wa Yehova ogaladdanihiwa nnikungu nothawelawo obe txinga nobarela?

¹⁵ Davidi ohusoriha nladdaniho, afunaga owoga makalelo nnabareliwa nlogo na Mulugu. Oliye wera: ‘Mulugu nikungu naaga nothawelawo ginanyinddelimi, Mulugu anagoniha odhivela wahinamala.’ Nuwindo Davidi wenjhedhedha egi: ‘Oliye muthu anageeddiha ni odhivela wahinamala, yowibarelana yaaga, nikungu naaga ginanyinddelimi ni namoobola aaga, yowibarelana yaaga duule ginafwanyimiwo obareleya.’ (Sal. 59:17; 144:2) Mwahaya bwaddi Davidi adhe aladdanihege odhivela ohunamala wa Yehova nnikungu nothawelawo obe txinga? Yehova onopaganya egihina, nadidela okalave adhaari aye, oliye anere obarela wandana ninnihuna nuliye. Mpaganyo mmodhave onafwanyeya va Salmos 91. Namaleba Salmos ohuwoga egi: ‘Ginere omwaddela Yehova gegi: ‘Nyu muli nikungu ni yowibarelana yaaga.’’(Sal. 91:1-3, 9, 14) Moses ohumuladdaniha Yehova nnikungu nothawelawo. (Sal. 90:1, nota.) Mudhidhi vang’ono Moses ahinathi okwa, oliye wenjhedhedhave egihina: ‘Mulugu nikungu nothawelawo, oliye anowuthukula ni mada aye a mukalakala.’ (Deut. 33:27) Kaasugwe madhu alembiye enihina ‘oliye anowuthukula ni mada aye a mukalakala.’ Madhu yala enanihudhiha ddi woodhela Yehova?

16. Mareeliho baani menli nnawakelihu? (Sal 136:23)

¹⁶ Nathawela wa Yehova nnakala obareleyene. Naarive dhigaari ndo, malabo mamodha nnokwerebeya mwaha wokubanya wihina kaginadha gikanna ohagalala mwigumini mwaaga. Eyo yanipadduwela Yehova podi onerela ddi? (Omwileri Salmos 136:23.) Yehova onontapulela nlada naaye, onivenyiha, vano iyo wambela woona oriya. (Sal. 28:9; 94:18) Mareeliho baani nnawakelihu: Onona wihina Mulugu ononikavihera, eyo enonubusedha mareeliho  menli. Mareeliho oobajha, kannapwatha murudda baani nnakalihuwo iyo nihikanna voothawela. Mareeliho anabili, Babihu oodhulu onondhivela ni ononipwatha.

17. Mwahaya bwaddi nigaroromela wi odhivela ohunamala wa Mulugu onerege onikaviherave? (Salmos 33:18-22)

¹⁷ Ninga nonilihu mundduli, iyo kannanganyedha wihina naafwanyiwaga makathamiho, Yehova anere onivaha nikavihero nnahowelihu wihina nikaleve ororomeleya. (2 Cor. 4:7-9) Namavuhulela Jeremiya ohuwoga egi: ‘Mwaha odhivela wa Yehova kanitolosiwe, mwaha makalelo aye owoniha thagaraga kinamala.’ (Lam. 3:22) Nroromele wi odhivela ohunamala wa Yehova onerege onikaviherave, mwaha salmista ohunroromeliha egihina: ‘Mento a Yehova enowasugwera ale enamova, ale enajheha odhivela waye wahinamala.’— Omwileri Salmos 33:18-22.

18-19. a) Ethu baani nihinahowelihu oddiwala? b) Ohudhera onaharela, nnaasuze ddi?

¹⁸ Nakarati, enohoweleya nubuwelege ddi? Nihinathi wambela omulabela Yehova, oliye oononiha odhivela wimodhave anawonihiye athu atene. Mbwenye iyo nuwambela omulabela Yehova, oliye obajha ononiha odhivela waye ohunamala mwamakalelo avayekiwa. Fudhivela wewula winamuthukulela Yehova onibarela. Ohiya eyo, oliye kanadha anisukuma ni anere wakwanihedha mpaganyo dhaye dhatedhe apaganyiye. Oliye anafuna wihina dhehu dhineddelege pama! (Sal. 46:1, 2, 7) Bumwahaya kannapwatha makathamiho baani enanifwanya mwigumini mwehu, Yehova anere onivaha kopolo nnahowelihu wihina nande okala ororomeleya.

¹⁹ Yehova onowawoniha odhivela ohunamala adhaari aye. Ofiyedha vala nihoona makalelo Yehova anawonihiye adharaaye odhivela waye ohunamala. Yehova anafuna wi nihiyoya nawoonihege athu amodha odhivela ohunamala. Nnande addi werana ndo? Musolo onaharela nnere ohudhera muselu ola wathima.