Othapanya webaribari winakala we vamodha ni anawo mwathapanyaga wodhela mubuwelo dhenyu ni dhofuna dhenyu.

Othapanya ni azombwe kinakweya. Mudhidhi wa mundduli “onakala ninga di we weddiha egumi ya mwanawo,” ninga nnawoga livuru Decifrando o Código. a “Vano mwanawo anajheha owogege oliye avuruwanaga, podi dhutakalelaga.” Mbwenye bumudhidhi yoyo mwanawo anafuniye othapanya opitha yaka dha mundduli!

Osayele olemelela mudhidhi wa anawo. Podi eyo etapulelaga othapanyaga naliwa mahiyu.

“Mwaha otakaleliwa we podi oxixa owoga wegi: ‘Mudhidhiya buyola onafuniwe othapanya ni miyo? Labo naatene naari vamodha!’ Yere okala yapama otakaleliwa mudhidhi anihu yaafunaga othapanya ni iyo? Yofuna yaababi sowi aniwa ethapanyege naliwa, kahiyo?” — Lisa.

“Miyo kaginadhiveliwa ogona erulo. Mbwenye mudhidhi gasayelimi wihina githapanye naanaga noothapanya ni makalelo ohagalala.” — Herbert.

BIBLIYA ANAWOGA EGI: ‘Kadda muthu kasayelege opama waye, mbwenye asayelege opama wa mukwaye.’ — 1 Coríntios 10:24.

Mwathapanyaga kuwubuwelege ethu emodhaya. Babi dhaala ohuwoga egi: “Malabo mamodha anaga yathapanyaga ni miyo, ginubuwela dhithu dhimodhadhene. Aliwa enowoona akala ginowavuruwana obe naari!”

Akala we onoligana ni babi ole awogiwe, omuthimihe TV, telefoni obe tableti. Opwasedhe ovuruwana ethu anawoga mwanawo. Woonihe wihina onowonelamo ethu enampadduwela mwanawo naarive akala dhithu dhinahoweliye kadhindhuwanyeya.

“Sapama anihu woonaga wi yubuwelo dhewa ethu yofuneya mwigumi mwehu. Aliwa yoona wi kannapwatha dhofuna dhewa enere wasayela athu amodha wihina ethapanyegena.” — Maranda.

“Kuwaguve onyanyuwa naarive dhithu anawogiye dhihudhivelaga.” — Anthony.

BIBLIYA ANAWOGA EGI: ‘Mpwasedhege pamadhene ovuruwana.’ — Lucas 8:18.

Opathe mudhidhi waredhaga. Malabo owinjhiva azombwe enowakweyela othapanya ni makolwiwa yaredhaga.

“Nadhowaga mburo mmodhaya ni karo nnosayela makalelo wihina nthapanye. Mwaha anaga okala epaddi yaga mukaroni, nnothapanya ni makalelo apama ohiya nakala kove ni kove.” — Nicole.

Podi opatha mudhidhi woojha wihina muthapanye.

“Mahiyu najhaga, nnopatha mudhidhi yola wihina niwoge ethu empadduwele kadda muthu podi okala yabure obe yapama. Eyo enonikavihera okala owiwanana ni enonivaha ebaribari wihina kinahoweleya wawanana makathamiho yekihu.” — Robin.

BIBLIYA ANAWOGA EGI: ‘Kadda muthu aaguvelege wiwa, mbwenye kaaguvelege owoga.’ — Tiago 1:19.