Anamwani
9: Emuthu yenyu
ENATAPULELA DDI?
Emuthu yenyu kahi ndina obe ekalelo yenyu baahi. Emuthu enovolowela mweddelo, dhithu munarumedhinyu ni dhikalelo. Emuthu enovolowela ekalelo yawo ya muwari.
EKALELE DDI YOFUNEYA?
Winona, kunahiye dhithu onarumedhiwe newene kunaahiye akwawo wusugweraga.
“Athu owinjhiva enoligana ni abuneku a muloja enawarihiwa dhowara. Enasakula dhowara kahiyo aliwa, mbwenye athu amodha dinasakula dhithu enahoweliwa owara.” — Adrian.
“Miyo gihudhera wakihedha dhithu dhapama naarive ogari mudhidhi worusa. Gihanona akwaga eebaribari mwaha mweddelo wewa ni wodhela makalelo ginakalimi gakala naaliwa.” — Courtney.
BIBLIYA ANAWOGA EGI: ‘Musukume dhego dhelabo, musaddule murima dhenyu vamodha ni mubuwelo weenyu.’ — Romanos 12:2.
KI ONERE DDI?
Onona dhithu dhapama onniwena, dhoviriganiha dhawo ni dhithu onarumedhiwe dhinere wukavihera winona ovanene ni onona muthu onafuniwe okala osogolo. Wawakula makoho enaharela enere wukavihera onona muselu ola.
Dhithu dhapama: Dhithu baani dhapama ginerimina? Dhithu ginandimi werana siivi? Motajhiha, wegi onone dhithu dhapama oneriwena we podi wikoha: ‘Ginowanda wiisugwera? Giri muthu oviheyana mabasa? Giri muthu ovaha? Gapaganya werana ethu, ginofiya mudhidhi nipaganihu?
YOLUBA: Ehurusa woona dhithu dhapama onniwena? Vano walobe makolo awo obe mukwawo onamuroromeliwe wi uwaddele dhithu dhapama oneriwena.
BIBLIYA ANAWOGA EGI: ‘Kadda muthu asugwerege dhowera dhaye, ndo anere okanna ethu enamuhagalasa yeka, ohiya wiliganiha ni athu amodha.’ — Gálatas 6:4.
Dhoviriganiha dhawo: Dhithu baani ginahowelimi owomihedha mwigumini mwaaga? Dhoweha baani gihinandimi ogonjhiha? Epaddi baani yamwigumini mwaaga ginahowelimi owomihedha?
BIBLIYA ANAWOGA EGI: ‘Nawoga negi: “Kaninna yothega,” nnowileketha teto ebaribari kiri mwa iyo.’ — 1 João 1:8.
Dhithu ginarumedhimi: Moonelo waga ethu yapama ni yabure siivi? Mwahaya bwaddi ngoona ndala? Ginorumedha wi Mulugu ohukalawo? Enagivaha ebaribari wi oliye ohukalawo ddi? Ethu ginonimi okala yabure ddi ni mwahaya bwaddi? Ethu baani ginarumedhimi wi enere opadduwa osogolo?
BIBLIYA ANAWOGA EGI: ‘Mubuwelo onere wukoya, opendda winere wubarela.’ — Provérbios 2:11.
