Dhikalelo dhapama enatapulela dhithu nnarumedhihu dhineddiha egumi yehu. Motajhiha, we onowilibihera wihina okale muthu ororomeleya. Bumwahaya podi wera onowahudhiha anawo okala oororomeleya.

Dhikalelo dhapama enovolowelavo emuthu yapama. Motajhiha, muthu anna emuthu yapama onoviheyana mabasa, dapama ni kaniwubuwela yeka. Enokweya okanna dhikalelo ndha muthu akala muzombwe.

BIBLIYA ANAWOGA EGI: ‘Omulele mwaana mudila anahoweliye weeddamo, naarive aguluvale kanahiye weeddamo.’ — Provérbios 22:6.

Mudhidhi ola wa tekonolojiya okanna ekalelo yapama ethu yofuneya. Mayi dhaala anithaniwa Karyn onowoga egi: “Kadda telefoni, kadda mudhidhi, dhinofwanyeya dhithu dhonyakavala. Anamwani ehu podi okala ni iyo, mbwenye nihinonaga wihina enona dhithu dhonyakavala!”

BIBLIYA ANAWOGA EGI: ‘Athu owithwelavo . . . Ehikanna ekalelo yopendda wi enone ohiyaniha ethu yapama ni yabure.’ — Hebreus 5:14.

Okanna emuthu yapama sofuneya. Motajhiha muthu apama ohukanna makalelo apama ninga owoga egi, “kawerena” ni “ginotamalela.” Teto enovolowelavo wooniha wihina onowapwatha athu amodha, eli ethu yorusa mwilaboni muna athu enathabwiwa ovaha thima telefoni wahiya athu.

BIBLIYA ANAWOGA EGI: ‘Teto, dhatedhene munafuninyu wi athu yuwerelegeni, muwerelege aliwa.’ — Lucas 6:31.

Wonihege pamadhene monelo wawo wodhela ogonihana. Motajhiha, ninga dhinawoga muselu dhinasayeliwa, ababi yaawaddelaga aniwa wihina ogonihana muhunatelane yothega, podi wera anamwani enere ohara yolaga eyo.

YOLUBA: Wegi omuhudhihe mwanawo makalelo apama, wabihege ovuruwana muselu wa notisiya obe yopadduwa emodha. Notisiyaya aamuwogaga muthu ampile muthu mmodha mwaha okanna nsakulo, podi owoga ni mwanawo wegi: “Ethu yabure wawona athu yawerelaga amodha obure ndo mwaha wa ntxiga. Athu enaanda addi werana ethu ninga yeyo?”

“Muzombwe aahinona ethu yabure obe yapama, enakale yoorusa osakula akala anerena ethu yapama obe yabure.” — Brandon.

Wahudhihe anawo okanna ekalelo yapama. Anamwani ang’ono podi ohudhera wera “kamwerena,” “ginotamalela” ni wathuwathuwela athu amodha. Livuru dhaala nnawoga wodhela walela anamwani a nnihina: “Sapama anamwani enonege wi enowerela epaddi ya ethu yunlubale — emudhi, oskola, ni vamuruddani. Yanona ndo, enere wakweyela weragana dhithu dhapama, ohiya wiyubuwela aliwa baahi.”

YOLUBA: Wasayele mwanamabasa a vaade wihina anawo yaparege. Ndo, aliwa enere ohudhera wi ethu yapama wawerela athu amodha dhithu dhapama.

“Anihu yalemela wapara mabasa egaali ahimeene, yakanna murala wewene kinasegedheye. Mwaha aliwa enere olemela wapara mabasa.” — Tara.