Athu oororomeleya enowawiwelela malamulo, enowakwaneliha mpaganyo dhewa ni enowoga ebaribari. Bumwahaya athu yala enowathukulela makolo ewa, akwiwa ni patarawu ewa waroromelaga.

Ebaribari sowihina, woniha wi ori muthu oororomeleya, onerege okanna ofuru.

“Makalelo apama owathukulela makolo awo wuroromelaga, fuwoniha wi ori oororomeleya, ohiya aliwa yakala vevo baahi.” — Sarahi.

BIBLIYA ANAWOGA EGI: ‘Mudidele wipendda wi moone emuthu yenyu.’ — 2 Coríntios 13:5.

Wafunaga wi athu yuroromelege obe ehogolowele wuroromela werena dhithu dhinaharela.

Owoga ebaribari. Ethu enamariha ororomeleya fuwota. Mbwenye wawogaga ebaribari mudhidhi wamutene, thabwa-thabwa waviriganiha athu enere othabwa wuroromela.

“Dhithu dheddaga pama enokweya owoga ebaribari. Owoga ebaribari naarive akala ethuya enere otakaliha emuthu yawo sapama, mwaha enere wathukulela athu amodha wuroromelaga.” — Caiman.

BIBLIYA ANAWOGA EGI: ‘Nnofuna werana dhatedhene nuuroromeleya.’ — Hebreus 13:18.

Okale oororomeleya. Yahikoheriwa athu enaasayela anamalaba elabo yo Estadu Unidu. Mowiwanana ni 78% aathu yakohedhiwe, “muwari mwa dhikalelo tharu dhinlubale dhinahoweleya wihina muthu asakuliwe ninga namalaba, furoromeleya.” Wunnuwa onere woona wihina ohudhera okala oororomeleya ogari muzombwe ethu yapama.

“Makolwaga enowoona akala ginororomeleya ni gaaparaga mabasa avaade naarive aliwa ehigirumile. Gakalaga ororomeleya, aliwa enothabwa ogiroromela.” — Sarah.

BIBLIYA ANAWOGA EGI: ‘Gikanna ebaribari wi onere werana ginalobimi, bumwahaya gulebelaga karta nna, mwaha gihinona wi onere werana ni ndhedha gihulombimi.’ — Filémon 21.

Okale oovilela. Muzombwe unnuwaga aatene enowoona. Mbwenye onohoweleya mudhidhi wi athu yoone wi muzombwe ole dororomeleya.

“Makolo awo kinuroromele mwaha wokala oororomeleya dila modha baahi. Mbwenye wakalagave oororomeleya aliwa enerege wuroromela.” — Brandon.

BIBLIYA ANAWOGA EGI: ‘Musayelege okala . . . oovilela.’ — Colossenses 3:12.