Anamwani
11: Okala oviheya ni mabasa
ENATAPULELA DDI?
Muthu anaviheya ni mabasa kahiyo muwara. Anodhiveliwa wapara mabasa wihina isapele ni asapele athu amodhaya. Oliye anowapara mabasa naarive athu amodha yonaga wi bookaliha manyazo.
EKALELE DDI YOFUNEYA?
Mwebaribarene egumi mutholo munlubale. Mwilaboni muna athu owinjhiva ehinafuniwa wapara mabasa, olaba nuviheya ethu yapama. — Eclesiastes 3:13.
“Miyo gihoona wihina muthu aviheyagana mabasa, onakala ohagalalene ni onowithukula mwaha ndhe oneriwe. Eyo enogikavihera odhiveliwa wapara mabasa. Okala muthu oviheyana mabasa enere wukavihera okanna emuthu yapama.” — Reyon.
BIBLIYA ANAWOGA EGI: ‘Wapara mabasa nuuviheya winodhana mareeliho.’ — Provérbios 14:23.
KI ONERE DDI?
Wegi okanne monelo wapama wodhela wapara mabasa oharihe ponto dhinaharela.
Ohudhere wapara pama mabasa ni yuhagalasege. Waaparaga mabasa vaade obe oskola, waparege ni murima watene. Wahudhera wapara pama mabasa wawaguvihege obe owomihedhe makalelo owapara pama mabasa. Wanona wapara pama mabasa, enerege wudhivela.
BIBLIYA ANAWOGA EGI: ‘Ohumunona muthu anapwasedha waapara pamadhene mabasaye? Oliye anofwanelela waparela mabasa mamwene, wahiya athu bure-bure.’ — Provérbios 22:29.
Wubuwele makalelo mabasa awo enakaviheriwa athu amodha. Waaparaga pama mabasa awo, athu owinjhiva enokavihereya. Motajhiha, waaparaga pama mabasa avaade, onowavugula mabasa a emudhi yatene.
BIBLIYA ANAWOGA EGI: ‘Ovaha winothabwa ohagalasa opitha ovahiwa.’ — Atos 20:35.
Kuwaparege baahi mabasa othomeliwiwe. Kusayelege baahi wapara mabasa othomeliwiwe. Akala ohurumiwa werana ethu wilibihere wi wenjhedhedhe ethu emodha. Windo onerege wiruma ni onerege wapara mabasa onahoweliwe wapara, ohiya mwaha wi muthu mmodha durumile. — Matewuji 5:41.
BIBLIYA ANAWOGA EGI: ‘Wihina oherena opama mwaha owaddihedhiwa, mbwenye mwaha ofuna wawo.’ — Filémon 14.
Okale owezeya. Athu enaapara pama mabasa kinna owara, teto aliwa kiniipa ni mabasa. Aliwa enosayela okala owezeya, efwanyaga mudhidhi wowapara mabasa nuviheya ni mudhidhi wovuma.
BIBLIYA ANAWOGA EGI: ‘Sapama withuwa vang’ono, ohiya wiipa ni mabasa, ngo futhamagiha nipevo.’ — Eclesiastes 4:6.
