Mulobwana ni muhiyana yalebiha matelo ewa, enawona matelo ewa ninga ethu ya mukala-kala. Anamatelana ayo enakala obareleyene, enororomela wihina kadda muthu anerege oriha mpaganyo eriliyena naarive efwanyiwaga makathamiho.

Anamatelana amodha enoodidela okala vamodha mwaha amudhiwa obe athu amodha wawaddihedhaga. Mbwenye sapama mulobwana vamodha ni muhiyana etelane ekale vamodha mwaha wa odhivela ni orihana.

BIBLIYA ANAWOGA EGI: ‘Mulobwana kamuhiye mwariye.’ — 1 Coríntios 7:11.

“Wilibiheraga wihina matelo awo yeeddege pama, kunanyanyuwege bure-bure, newene kunalegelege oddiwala ni olevelela. Kunawonege makathamiho enufwanyani mwigumini mweenyu ninga ethu yomariha matelo enyu.” — Micah.

Anamatelana ehilebinhe matelo ewa, yakumeleliwa makathamiho enubuwela ayi: ‘Ginona wi kanipadduseliwe mmodha nimukwaye’ yindo osayelaga makalelo okweya owamariha matelo.

“Athu amodha enatelana enonaga wi yakumelela makathamiho enere omwalana. Vano muthu atela ubuwelaga wihina ohukalawo omwalana mateloya kinalegela.” — Jean.

WIMELE WUBUWELE

Mudhidhi wokangana . . . 

• Onogirati sisee wubuwelaga, egithukulele ddi otelana ni muthu ola?

• Onowubuwela ogatelane ni muthu mmodhaya?

• Onowoga wegi “baahi” obe “ginaya gamusayele muthu mmodhaya anagiriha”?

Akala onowakula wegi hee nikoho nimodha, obe amatene enohoweleya walibiha matelo awo.

MUTHAPANYEGE

• Mpaganyo nerilihuna wowihina nnakale vamodha ofiyedha okwa onna oridha? Akala yowakula sowi hee, musayele ethu enathukulela mpaganyo weenyu oridha.

• Enahoweleya ddi wihina mpaganyo weenyu wamatelo odhowegeve olibaga?

DHOLUBA

• Malabo mamodha omulebelege mwariyo obe mamuno mensaje enoniha wi onomudhivela.

• Okalena fotu yaye mburo onapariwe mabasa, ndo onowoniha wihina onoriha mpaganyo ole mwerilinyuna.

• Malabo amatene omuligarelege mwariyo obe mamuno. Weregena ndo wakala omabasani obe wakala mburo mmodha wolapela ni mwariyo obe ni mamuno.

BIBLIYA ANAWOGA EGI: ‘Emagile Mulugu, muthu katapule.’ — Matewuji 19:6.