Olevelela enatapulela odduwala ethu anerele muthu mmodhaya obe awogiliye ni ohukoya ntxiga. Mbwenye eyo kinatapulela wi muthu anowisinjhedha okalaga ninga kipadduwe ethu obe wonihaga wihina ele erilena muthu ole kahiyo ethu yabure.

BIBLIYA ANAWOGA EGI: ‘Mudhowegenave nvilelanaga mmodha ni mukwaye mulevelelanaga mmodha ni mukwaye mohihiyedhedha, naari akala muthuya ohukanna mwaha wi amusumele mukwaye.’ — Colossenses 3:13.

“Wamudhivelaga muthu kunasugwa dhoviriganiha dhaye baahi, mbwenye nnowilibihedha omoona muthu ole iwomihedhaga.” — Aaron.

Okweya ntxiga podi onitotela makathamiho mmwiilini ni mmubuweloni. Teto podi ogujhula matelo awo.

“Labo nimodha mamunaga ogiloba wihina gimulevelele ethu eriliyena yagipile mbani. Kiyari yokweya omulevelela, mbwenye gahimulevelela. Enagitakalela fuhimulevelela mowaguva. Nahitakaleliwa mmodha ni mukwaye vihiri muladdu.” — Julia.

WIMELE WUBUWELE

Dila yoharela mamuno obe mwariyo anawukuliye wikohe:

• ‘Ginothabwa waguva onyanyuwa?’

• ‘Yereyile ethu yinlubalene? Enohoweleya olobiwa nlevelelo obe yere okala yapama odduwala?’

MUTHAPANYEGE

• Malabo mamodha, enamala malabo mangasi nihiwogihanaga mmodha ni mukwaye?

• Yofwanelela werana ddi, wihina nilevelelane mowaguva?

DHOLUBA

• Wuukuliwa kuwubuwele wihina mwariyo obe mamuno erena pudhave.

• Osayele makalelo olevelela. Wubuwele ‘wi iyo aatene nnokwakwathuwa dila dhowinjhivadhene.’ — Tiago 3:2.

“Enokweya olevelela akala aateninyu muhuviriganiha. Mbwenye malabo mamodha akala muthu mmodha diviriganihe enorusa olevelela. Omulevelela muthu enohowela wiyeviha.” — Kimberly.

BIBLIYA ANAWOGA EGI: ‘Othapanyedhe mowaguva dhoviriganiha dhawo.’ — Matewuji 5:25.