Mulobwana vamodha ni mwariye yaparaga mabasa vamodha enaligana ni pilotu vamodha ni kopilotu eri aviyawu mmodhave. Apilotu ala yaafwanyiwaga makathamiho kiniwubuwela yekiwa, mbwenye enothapanyedha makalelo owamariha makathamihoya.

BIBLIYA ANAWOGA EGI: ‘Vano kahi athu abiili, mbwenye mwiili mmodha baahi.’ — Matewuji 19:6.

“Matelo kahi ninga mabasa muthu anapariye yeka. Mulobwana ni mwariye enohowela wapara mabasa vamodha wihina ekalena matelo ohagalasa.” — Christopher.

Anamatelana ehiniwanana yafwanyiwa makathamiho, enosayela makalelo ootonya dhoviriganiha dha mukwaye ohiya osayela makalelo omariha makathamihoya. Ndo makathamiho mang’ono enowunnuwa okala manlubale.

“Wiwanana ethu yofuneya vamateloni. Miyo ni mamunaga nahiwananaga, nnakala ninga athu enakala kwartu modhave, ohiya ninga anamatelana, newene kannanda othoma dhithu dhofuneya vamodha.” — Alexandra.

WIMELE WUBUWELE

• Moonelo waaga, korowa ginakannimina ginubuwela wi ‘saaga baahi’?

• Gakala mburo wolapela ni mwaraga obe ni mamunaga finakannimina mudhidhi wovuma?

• Akala mwaraga obe mamunaga ohukanna wandana wapama ni amudhaaye, ginosayela makalelo ohuthapanya naaliwa?

MUTHAPANYEGE

• Epaddi baani ya matelo ehu nnonihihu wi nnowiwanana?

• Dhithu baani nnahowelihu owomihedha?

• Dhithu baani nnahowelihu werana wihina niwomihedhe?

DHOLUBA

• Wabihe wubuwela matelo awo ninga jogu, vano we ni mwariyo muli dhikipa dhohiyana. Osayele onona ethu enahoweleya wi muhiye okala dhikipa dhohiyana vano mukale vamodha.

• Ohiya wubuwela wegi: ‘Ginagonjhihe avi,’ wubuwele: ‘Iyo abiili nnagonjhihe aavi?’

“Kusayelege makalelo owoniha wi oherana pama obe naari. Yinlubaleya fusayela murenddele ni wiwanana vamateloni.” — Ethan.

BIBLIYA ANAWOGA EGI: ‘Kamusayelege dhofuna dhenyu baahi, mbwenye musayelege dhofuna dha athu amodha.’ — Filipenses 2:3, 4.