1. Okwerebeya onanipatha addi?

MALABO amatene nnofwanyiwa makathamiho ni nnowerana ele nnandihu wihina niwanena makathamihoya. Kunoonelamo wihina nahikwerebeya nnowanda owanana pamadhene makathamiho ala? Bumwahaya noonege okwerebeya ninga muleddo ahinanihagalasa, aniya nroromelo oliba murima ni ohagalala wehu. Provérbios 24:10 vamodha nnota enawoga: ‘Wakwerebeya mudhidhi woorusa, kopolo dhawo dhinere witheya.’ Mwebaribarene, wukuuwa podi witha kopolo nnahowelihu wihina nigonjhihena makathamiho amwegumini mwehu.

2. Dhithu baani dhinanikwerebeyiha, nnaasuze ddi muwari mwa yohudhera ela?

² Dhithu dhowinjhiva podi onikwerebeyiha. Dhimodha kannanda woona, ninga ohulogomana, oviriganiha obe makathamiho a mmwiilini. Dhimodha nnowanda woona, ninga ohakela mutholo nnahowelihu mu nikuruni na Yehova obe olaleya murudda anamwinjhi ehinafuniwa ovuruwana. Yohudhera ela nnere woona dhithu nnahowelihu werana wihina nigonjhihe okwerebeya.

3. Enaanikavihere ddi woona ohulogomana wehu ni makalelo apama?

³ Nasugwaga ohulogomana wehu ni oviriganiha wehu sokweya okakathuwa. Iyo podi wubuwela wihina mwaha dhothega dhehu Yehova kananihiye ovolowa elabo exa. Mubuwelo ola, podi okala wowopiha. Ki noonege addi ohulogomana wehu? Bibliya anawoga egi, mohiyana ni Yesu ‘[athu] atene ehithega.’ (Rom. 3:23) Mbwenye Mwinya a  Bibliya kanasayela dhoviriganiha wa athu amodha. Oliye babi odhivela ni onofuna onikavihera. Yehova doovilela. Oliye anowoona wilibihera wehu wihina nigonjhihe dhoviriganiha dhehu ni okanna monelo wapama wodhela iyo. Mudhidhi watene Yehova onofuna onikavihera. — Rom. 7:18, 19.

4-5. Ninga munawogela 1 João 3:19, 20, mwahaya bwaddi arogola ala edhe wukuuwa ohagonjhihege?

⁴ Sugwa dhotajhiha dha Debora ni Maria. * Agali mwana, Debora oonyoziwa vanlubale ni amudhaaye. Newene katamaleliwa. Bumwahaya, wiwonaga ninga muthu ohufwanelela. Aviriganiha vang’ono, iwona okala ohufwanelela. Maria ahikanna makathamiho mamodhave. Amudhaaye yomunyoza. Mwaha wa yeyo, oliye owanana mubuwelo wabure. Naari agabaddiziwe, oliye ubuwela wi kafwanelela okala namona a Yehova.

⁵ Naari arogola ala efwanyiwaga makathamiho, kiselele omulabela Yehova. Mwaha wa ddi? Ethu modha yakavihere waali olobela wa Yehova ni onvokedha mutholo dhewa. (Sal. 55:22) Aliwa wonelamo wihina Babihu odhulu ohunona wi dhithu dhinanifwanya mwigumini mwehu ni wihina okanna mubuwelo wabure winonukula. Mbwenye oliye onosugwa dhithu dhapama ninnihuna mmurimani — dhikalelo nahinandihu woona. — Omwileri 1 João 3:19, 20.

6. Muthu amorela mmurakoni anonamo avi?

⁶ Podi wihina muthu anna owana wi agonjhihe elemelelo yonyakavala. Malabo mamodha anowukuwa vanlubale amorela murako yoyo. Kahi yabure okanna mubuwelo ola nathega. (2 Cor. 7:10) Mbwenye kanthabwege withoriha, nubuwelaga: ‘Miyo kagili ethu, Yehova kadha agilevelela.’ Mubuwelo oyo kahi wa mwibaribarini, teto podi onihiha omulabela Yehova. Wubuwele wihina nihoona va Provérbios 24:10 — nakwerebeya kopolo dhehu dhinere witheya. Mbwenye, othapanyedhe muladdu dhawo ni Yehova; olobele wa oliye olobaga nlevelelo. (Isa. 1:18) Yehova oona wihina ohusinyuwa, anere wulevelela. Ohiya eyo, othapanye ni anamaholela mulogo. Aliwa enere wukavihera owomihedha epaddi yawo yomuzimuni. — Tia. 5:14, 15.

7. Mwahaya bwaddi kannahowela withoriha nawanaga ni dhoviriganiha dhehu?

⁷ Jean-Luc, namaholela mulogo elabo yo Fransa, anowogesa naale enawanana dhoviriganiha dhewa egi: ‘Monelo wa Yehova, bowi muthu owogowa kahi ole ahinathega,  mbwenye ole anakubanya mwaha dhothega dhaye vano osinyuwa.’ (Rom. 7:21-25) Bumwahaya kuwitorihege wawanaga ni dhoviriganiha dhawo. Wubuwele wi, mwaha ohulogomana, kaavo ali owogowa vamentoni va Yehova. Atene iyo nnohowela opama wohifwanelela wa Mulugu, oonihiliye wodhela wobola. — Efé. 1:7; 1 João 4:10.

8. Nakwerebeya ananlibiha baani?

⁸ Addibilihu amunroromeloni podi onikavihera. Nahowelaga othapanya naliwa podi onivuruwana pamadhene, teto podi onlibiha. (Pro. 12:25; 1 Tes. 5:14) Joy, murogola oNijeriya, anawanana wukuuwa anowoga egi: “Kuhukalaga addibila ni arogola gakale aani? Aliwa yowoniha wihina Yehova onovuruwana malobelo aaga. Ehigihudhiha walibiha athu amodha enna makathamiho mamodhave.” Mbwenye sapama onona wi addibilihu malabo mamodha kinnona nahowelaga olibihiwa. Bumwahaya sapama waloba nikavihero addibila owithwelavo omuzimuni.

9. Dholebela dha Salmos 41:3 ni 94:19 dhinanlibiha avi?

⁹ Olobe nikavihero na Yehova. Naafwanyiwaga makathamiho mwigumini, thabwa-thabwa oreddaya wakala wohimala enorusa okanna monelo wapama. Ebaribari wihina Yehova kanawerana matikiniho wihina anivulumuse, mbwenye oliye anonlibiha ni anonivaha kopolo nnahowelihu wi nivilele. (Omwileri Salmos 41:3; 94:19.) Motajhiha, oliye podi wadahinya murima addibila wi enikavihere ni mwana mabasa avaade. Oliye podi waweriha addibila olobela vamodha ni iyo. Malabo mamodha Yehova podi onubusedha mpaganyo dholibiha dha mBibliyani dhosogolo dhinanivaha ejhehedho yohagalasa ya egumi yologomana ni wihinakale oredda. — Rom. 15:4.

10. Mwahaya bwaddi Isang kakwerebenye numwera asidenti?

¹⁰ Isang, anakala elabo yo Nijeriya, ahimwera asidenti, vano mediku aye wera kadhe eedda. Isang anowoga: “Miyo wukuuwa vanlubale teto okwerebeya.” Mbwenye oliye ahididela okanna mubuwelo ola? Naari! Yamukavihere ddi? Isang anowoga egi: “Miyo ni mwaraga kannaselela olobela wa Mulugu ni wahudhera madhu aye. Vano noojha mudhidhi nawubuwelaga mareeliho, ninga ejhehedhelo yokala mwilaboni exa ya Mulugu.”

11. Yamukavihere Cindy okanna ohagalala naari agali muredda ddi?

¹¹ Cindy, anakala oMexiku, ohukanna eredda yowopiha. Andile addi ovilela? Agaali ospitale oliye othoma wihina kadda labo avahege onamona. Oliye anoleba egi: “Olaleya ohugikavihera wawubuwela amodha, ohiya wubuwelaga woperariwa ni oredda waaga. Miyo geresa ayi: Gathapanyaga ni mamediku vamodha ni mamfirimero gokohedha makalelo oli murala wewa. Nuwindo miyo okohedha mwahaya bwaddi edhe esakulege wapara mabasa ala orusa. Mwaha wa yeyo yokweya osayela muselu wothapanyedha. Owinjhiva wera aredda amodha kiyakohedha murala dhewa. Teto yogitamalela mwaha gowoniha wi ginowapwatha. Amodha ogivaha numero newa na telefoni. Naarive mudhidhi ola ogari worusa, Yehova ahigihagalasa vanlubale, vano miyo otikinaga!” — Pro. 15:15.

12-13. Athu enabulela obe enna makathamiho mwigumini enalaleya avi, ki enawakela mareeliho baani?

¹² Aredda vamodha ni ale ehinna egumi yapama  podi okwerebeya mwaha ohanda olaleya ninga mwafuneliwa. Naari dhigari ndo enofwanya makalelo olaleya. Elabo yo Estados Unidos, murogola anithaniwa Laurel ohuvira yaka 37 aganna oredda onithaniwa pulmawu a aso. Ahikanna kanseri, ohoperariwa dila dhowinjhivadhene ni ahikanna dhiredda dhimodha dha mmwiilini. Mbwenye makathamiho ala matene kimuhinhe olaleya. Oliye owalaleya mamfirimero ni amodha enalaba ospitale. Awakele mareeliho baani? Oliye ohakavihera athu owakwana 17 onona ebaribari! *

¹³ Richard, namaholela mulogo oFransa, anowaxagiha ale ehinanda ovenya vaade obe eli nyumba dhanakalaba: “Sapama wahiya malivuru mburo wowoneya. Enothukula murima wa ale enaakavihera. Werana yeyo enere walibiha addibila ehinanda olaleya.” Ohiya eyo addibilihu ehinanda ovenya vaade podi olabihedha karta obe telefoni.

14. Mwahaya bwaddi mwene Davidi agafwanelela otajhihiwa?

¹⁴ Mwaha wa yaka, makathamiho amwegumini obe dhithu dhimodha, podi oneriha ohakela mutholo wa mmulogoni obe mutholo mmodha. Akala ela enna onipadduwela, omubuwele mwene Davidi. Oliye era wunlela omaga tempulu. Vano Yehova wera aamage kahi oliye. Naari dhigarive ndo nuuvira mudhidhi, aherana dhatedhene wihina amukavihere ole athomiwe ni Mulugu wi amage tempulu. Davidi, ahipeleka nvaho wihina akaviherena omagiwa wa tempulu. Mwebaribarene, Davidi anofwanelela otajhihiwa! — 2 Sam. 7:12, 13; 1 Cró. 29:1, 3-5.

15. Hugues agonjhihe avi okwerebeya?

¹⁵ Mwaha makathamiho amwegumini, Hugues, ddibila oFransa, ohiya okala namaholela mulogo. Newene kaanda wapara mabasa a vaade. Oliye ohuleba egi: “Gibajhagawene, gokwerebeya teto goona wi kaginna mabasa. Mbwenye nuuvira mudhidhi, miyo woona wihina yaali yapama orumedha ekalelo yaga, vano wapara mabasa gandimi a Yehova yogihagalasa vanlubale. Ninga Jideyawu ni alobwanaye 300 — yaali ogomene mbwenye kiyaselele — ni miyowa kaginaaselele. Ginerege ovilelave!” — Juí. 8:4.

16. Nnahudhera ddi ni angero?

¹⁶ Angero enofwanelela otajhihiwa. Labo nimodha Yehova waloba wihina ewoge makalelo omuleketha mwene Akabe. Angero owinjhiva yahiwoga monelo wewa. Mbwenye Mulugu asakunle monelo wa mungero  mmodha, wera monelo ola ohukala. (1 Reis 22:19-22) Angero amodha kayakwerebeyile, newene kayawonge yegi: ‘Gijhele ddi mudhidhaga ebewene givahaga monelo waaga?’ Angero bowiyeviha teto enofuna onvuwiha Yehova. — Juí. 13:16-18; Apo. 19:10.

17. Nakwerebeyaga mwaha wohakela mutholo nere ddi?

¹⁷ Ethu yapama wubuwela fuukala Namona a Yehova ni ovuwiha Omwene. Mutholo dhinovira, kahiyo mutholo dhinamweriha muthu okala muthu athima vamentoni va Yehova. Enamweriha muthu okala athima vamentoni va Yehova ni vaaddibila fuwiyeviha waye ni wihina. Bumwahaya, olobele wa Yehova wihina ukavihere okalave owiyeviha ni okala owihiha. Wawubuwele adhaari a Yehova eli mBibliyani yaali owiyeviha ni owihiha. Werena dhatedhene onandiwe wihina wakavihere addibila. — Sal. 138:6; 1 Ped. 5:5.

18-19. Akala murudda wawo kawili athu owinjhiva enna efunelo onande avi okala ohagalala?

¹⁸ Onowukuwaga mwaha murudda wawo ohukalawo athu owinjhiva ovuruwana muthenga? Obe mwaha ohafwanyamo athu mmavaade? Akala siyeyo, enukavihere ddi okanna ohagalala ni wenjhedhedha? Kwaduru “ Makalelo ofwanya ohagalala mmalaleyelo” dhihikalavo dhoxagiha dhinanikavihera. Malabo mamodha sapama okanna monelo wapama wodhela mabasa olaleya. Eyo enatapulela ddi?

¹⁹ Wubuwele wihina ethu enahoweleya fuvuwiha Omwene wa Yehova ni ndina naye. Yesu ohoniha wihina athu yahare dila ya egumi yakale vang’ono. (Mat. 7:13, 14) Nakala mmalaleyelo, nnokanna gari yolaba ni Yehova, Yesu vamodha ni angero aye. (Mat. 28:19, 20; 1 Cor. 3:9; Apo. 14:6, 7) Yehova dinasakula athu enafuna ovuruwana muthenga. (João 6:44) Muthu ahivuruwana muthenga nnalaleyihu, podi wera labo nimodha anere ovuruwana.

20. Jeremias 20:8, 9 ananikavihera avi owana ni okwerebeya?

²⁰ Iyo podi ohudhera ni ele yampadduwele Jeremiya. Oliye athomeliwe murudda wahaali athu yafuna ovuruwana. Noovira “labo nantero” athu emuteyaga ni emuruwanaga.  (Omwileri Jeremias 20:8, 9.) Oliye ofiyedha wukuuwa, wubuwelaga wahiya wapara mabasa. Mbwenye kaselenle. Mwaha wa ddi? Mwaha “madhu a Yehova” yakala ninga mootho waali mmwiilini mwa Jeremiya, oliye kaanda omala. Eyo enere opadduwa ni iyo nadhaliha murima wehu ni mubuwelo ehu Madhu a Mulugu. Eyo ethu enaathukulela omuhudhera Bibliya ni opendda dhithu nnahudherihu malabo amatene. Nera ndo, ohagalala wehu winerege othabwa, teto nnerege odhiveliwa mabasa olaleya. — Jer. 15:16.

21. Nnande addi ogonjhiha wukuuwa?

²¹ Debora, awogiwe mundduli, anowoga egi: “Wukuuwa podi okala futhi eli mmadani mwa Saddana.” Mbwenye futhi dha Saddana, kadhinapitha kopolo dha Yehova. Bumwahaya, wakwerebeya, olobe nikavihero na Yehova. Oliye anere wukavihera owanana ohogowa wawo ni dhoviriganiha dhawo. Anere wukavihera wafwanyiwaga makathamiho amwegumini. Anere wukavihera okanna monelo wapama wodhela mutholo. Teto anere wukavihera okanna monelo wapama wodhela mabasa olaleya. Enlubaleya, olobele wa Yehova ni omwaaddele dhithu dhinuthuwathuwiha. Nnikavihero na Yehova, onere wanda ogonjhiha wukuuwa!