Mwebaribarene, kahi yeyo versikulu ela enafuniwa osoriha. Vala “omora” enagiwana ofwanyiwa makathamiho dila dhowinjhivadhene, “ovenya,” enagiwana wagonjhiha makathamihoya.

Woone mubuwelo wa madhu ala: Kuwipite ninga muthu abure, vaade va muthu owogowa; ohigujhule mburo vinagoniye. Mwaha, naarive muthu owogowa amoraga dila tanu nabili anere ovenya, mbwenye athu abure enere okwakwathuwa mwaha wa makathamiho. Mwiddani awo amora kuhagalale, oliye akwakwathuwa, kuthabe. — Pro. 24:15-17.

Amodha enubuwela wi versikulu ela 16 enawagana athu enathega yindo esinyuwa. Anamasogolela abili agereja obritaniku ehileba yegi “anamalaleya ovanene ni a yaka mundduli, enatapulela yolebela ela ni makalelo yala.” Anamaholela ala wera makalelo ala otapulela yolebela ela yere wathukulela athu wubuwela wihina “muthu owogowa podi omora . . . obe werana dhothega dhinlubale dila dhowinjhivadhene, vano atwaruwa, podi ovenya amudhivelege Mulugu ni akalena wandana wapama ni oliye.” Mubuwelo ola podi wathukulela athu omorela muthegani. Podi omuthukulela muthu wubuwela wihina naari athegaga dila dhowinjhivadhene Mulugu anere omulevelela.

Mbwenye versikulu ela 16 kinagana yeyo.

Madhu eli versikulu 16 ni 17 ni ebarayiko enatapuleliwa ninga “omora” podi olabihedhiwa mwa makalelo owinjhiva. Podi olabihedhiwa ninga omora — motajhiha ng’ombe podi omora mudila, muthu podi omora vadhulu va nyumba obe nibwe podi omorela vati. (Deut. 22:4, 8; Amós 9:9) Teto madhu ala podi olabihedhiwa ninga nladdaniho, motajhiha versikulu ela: “Yehova anomweddiha muthu anadhivela dila dhaye. Naari agamonre, kanakale vevo, mwaha Yehova anopareela nlada naye.” — Sal. 37:23, 24; Pro. 11:5; 13:17; 17:20.

Woone ethu anawoga purusori a universitariyu a teyolojiya pastorale Edward Plumptre: “Madhu owi [“omora”] ni ebarayiku kinalabihedhiwa ninga omorela muthegani.” Bumwahaya anamahudhera amodha enatapulela ayi madhu ala a versu 16: “Sa ebewene othabusa nlogo na Mulugu, mwaha nnerege okalawove, mbwenye athu abure enere orimela!”

Ndala, Provérbios 24:16 kanagana werana yothega obe “omorela” mu yothegani. Mbwenye anagana ofwanyiwa makathamiho obe yoweha dila dhowinjhivadhene. Elabo ela yabure, muthu owogowa podi ofwanyiwa makathamiho mwigumini obe mamodha. Oliye podi oharahariwa ni anamathonga. Mbwenye anofwanelela okanna ebaribari wi Mulugu anere omukavihera wihina dhaye dhimweddelege pama. Wikohe: ‘Makathamiho baani gawonilimi enafwanya adhari a Yehova mbwenye dhewa dhaweddelega pama?’ Mwahaya bwaddi? Mwaha nihikanna ebaribari wi ‘Yehova anowakavihera ale enamora ni onowavenyiha ale enakwakwathuwa.’ — Sal. 41:1-3; 145:14-19.

“Muthu owogowa” kanahagalala athu amodha yafwanyiwaga makathamiho. Mbwenye, oliye anoliba mwaha onona wi “dhatedhene dhinere waweddela pama ale enamova Mulugu ebaribari, mwaha enomwiwelela.” — Ecl. 8:11-13; Jó 31:3-6; Sal. 27:5, 6.