1. Yampadduwele ddibila ddi nuumala ovuruwana mwaha wa musonkano wa yaka ya 1935?

DDIBILA dhaala abaddiziwaga yaka ya 1926 anna yaka 18. Makolo aye yaali Anamahudhera Bibliya, mudhidhi yole Anamona a Yehova yanoniwe ninga Anamahudhera Bibliya. Aliwa wahudhiha aniwa araru aanalobwana ni aniwa abili anahiyana omulabela Yehova ni omutajhiha Yesu. Mudhidhi yole Anamahudhera Bibliya owinjhiva yoojha ekathe ni yomung’wa vinyu, bumwahaya muzombwe ole oojha ekathe ni oomung’wa vinyu. Nuvuruwana mwaha wawoga wodhela ‘muthithi munlubale’ mubuwelo waye osadduwa. Mwaha ola waawogiwe yaka ya 1935 ni ddibila Joseph Rutherford vaari va musonkano o Washington, D.C., elabo ya ESTADU UNIDU. Anamahudhera Bibliya esuze ddi vamusonkanoni vale?

2. Ebaribari baani awogile ddibila Rutherford awogaga mwaha waye?

² Vaari va mwaha waye, ddibila Rutherford ahitapulela madhu ala owi ‘muthithi munlubale’ (Versão Rei Jaime) enafwanyeya va Apocalipse 7:9. Addibila amudhidhi yole yubuwela wi ‘muthithi munlubale’ ‘nikuru naathu’ enaya odhulu. Amulabihedhaga Bibliya ddibila Rutherford wawonelihamo wi athu ala kiyasakuliwe wihina edhowe odhulu, mbwenye muthithi ola munlubale mambila mamodha * a  Yesu enaavuluwe mudhidhi wa ‘ohoseya winlubale’ wi ekalege elabo exa ni mukalakala. (Apo. 7:14) Yesu ohuwoga egi: ‘Ehikalawo mambila mamodha ehili a nikola nenna, ni alaya ginere wadhana teto enerege ovuruwana ndhu naga, ginere wataganyihedha ekale nikuru nimodhave, namakukulaya anakale mmodhave.’ (João 10:16) Mambila ala mamodha enagiwana Anamona a Yehova ororomeleya enna ejhehedhelo yokala elabo yavati nimukalakala. (Mat. 25:31-33, 46) Nnafuna noone makalelo yohudhiha ela esaddunliwa mubuwelo wa Anamona a Yehova owinjhiva, vamodha ni muzombwe ole awogiwe omabajho. — Sal. 97:11; Pro. 4:18.

3-4. Athu yonelemo ddi va musonkanoni wa 1935, ki mwahaya bwaddi?

³ Mudhidhi wohagalasa wa musonkano ole waali namawoga mwaha awongeye egi: “Ginafuna athu atene enna ejhehedhelo yokala mwilaboni yavati yimele?” Ninga awogile muthu aarivo, athu owakwana 20 000 owinjhiva yaarivo wimela. Ddibila Rutherford wera: “Ola muthithi munlubale!” Nuwindo ale yaarivo yahithabwa vanlubale. Ale yimenle woona wi kiyanna ejhehedhelo yodhowa odhulu. Yahinona wihina kiyathikitheliwe ni muzimu wotxena. Mmangwananimwa athu owakwana 840 obaddiziwa, owinjhiva yanna ejhehedhelo yokala mwilaboni yavati.

⁴ Mwaha ole nuumala owogiwa ddibila awogiwe ddima yobajha vamodha ni matxikwi ni matxikwi aathu ohiya ojha ekathe ni omung’wa vinyu mudhidhi wa wubuwela okwa wa Yesu. Owinjhiva yanna mubuwelo mmodhave awonge ddibila dhaala egi: “Dila yogomihera ojha ekaathe ni ong’wa vinyu yaali yaka ya 1935, miyo woona wi Yehova kagivanhe ejhehedhelo yodhowa odhulu. Ejhehedhelo yaga yaali yokala elabo yavati ni okavihera wihina elabo ekale parayizu.” (Rom. 8:16, 17; 2 Cor. 1:21, 22) Okuma mudhidhi yole ofiyedha peeno, muthithi munlubale onna wunnuwa ni enna wakavihera makiristawu ehanle. *

5. Yehova anawonelamo avi ale ehiyile ojha ekathe ni omung’wa vinyu?

⁵ Yehova anawonelamo avi ale ehiyile ojha ekathe ni omung’wa vinyu nuuvira yaka ya 1935? Ki peeno muthu ali namona a Yehova obaddiziwene ahiya ojha ekathe ni omung’wa vinyu mwaha woona wi kathikitheliwe? (1 Cor. 11:28) Amodha yojha ekathe ni yomung’wa vinyu mwaha kiyanonne pama ejhehedhelo yewa. Aliwa yonelamo wi ehiviriganiha, ni ehiya ojha ekathe ni omung’wa vinyu ekalave oororomeleyene mwebaribarene Yehova anerege wawona ninga mambila mamodha. Naarive ehijhaga ekathe newene ehimung’waga vinyu enowubuwela okwa wa Yesu, mwaha wihina enomutamalela vanlubale Mulugu vamodha ni mwanaye Yesu.

6. Yesu aarumme ddi angero?

⁶ Woona wi ohoseya winlubale ohaddamela, sapama wubuwela wihina Apocalipse kapitulu 7 anowoga wodhela addibila oothikitheliwa ni muthithi munlubale wa mambila mamodha. Yowoniha ela Yesu onowaruma angero oparelave nipevo na dhipaddi nayi dha elabo. Oliye oharuma wihina kihiye opareela nipevo nna ofiyedha makiristawu oothikitheliwa eli elabo  yavati edhowe odhulu. (Apo. 7:1-4) Mwaha wa ororomeleya enowakela onamakutha ni onamathonga vamodha ni Yesu odhulu. (Apo. 20:6) Angero atene enna ojheha nuuhagalala wihina a 144 000 yawakele mareeliho ewa odhulu.

7. Ninga munawoga Apocalipse 7:9, 10, Juwawu anamona aani, eraga ddi? (Osugwe fotu yavakapani.)

⁷ Voharela Juwawu onowoona ethu yohagalasa ‘muthithi munlubale’ onavuluwe mu armajedo. Mohiyana ni a 144 000 eri mamwene ni anamakutha, muthithi ola ohuthabwa winjhiva kunakontareya. (Omwileri Apocalipse 7:9, 10.) Athu ala eli epaddi ya muthithi munlubale ewanre ‘guwo dholapa ni dhoweela’ ni enowoniha wihina ehanda okala mwilaboni ‘ehinna nihonya.’ Teto ehanda okala ororomeleya vamentoni va Mulugu ni va mwanaye Yesu. (Tia. 1:27) Aliwa enookuwa wihina ehivulusiwa mwaha ethu erilena Mulugu vamodha ni mwanaye Yesu. Mudhidhi mmodhave enowaparela makubare, eyo enowoniha wihina aliwa ehinona wi Yesu mwene amuthomme Mulugu.— Omuliganihe ni João 12:12, 13.

8. Ninga munawoga Apocalipse 7:11, 12 muthithi munlubale wathanyuwaga angero enakala avi?

⁸ Omwileri Apocalipse 7:11, 12. Muthithi munlubale wathanyuwaga emudhi ya Mulugu enakala avi? Muthithi munlubale nuthanyuwa Juwawu anowoona emudhi ya Mulugu egatugumane yohagalalene envuwihaga Mulugu. Angero odhulu enere othabwa ohagalala yonaga yowoniha ela ya Juwawu yakwanelaga, muthithi munlubale ogavuluwe muhoseyani winlubale.

9. Apocalipse 7:13-15, anoniha wi muthithi munlubale onera ddi mudhidhi yola?

⁹ Omwileri Apocalipse 7:13-15. Juwawu ohuleba egi muthithi wa mambila mamodha ‘ohufula dhowara dhewa dholapa, vano weeliha mu nikameni na nimbila.’ Eyo enatapulela wihina aliwa ehikanna mubuwelo wapama vamentoni va Yehova, teto enomuhagalasa. (Isa. 1:18) Aliwa makiristawu owivelelene ni obaddiziwa, enaroromela mukutho wa Yesu ni enna wandana wapama ni Yehova. (João 3:36; 1 Ped. 3:21) Bumwahaya aliwa podi omparela Mulugu ‘mabasa ootaleleya, mahiyu ni mutana’ mwilaboni ela yavati. Peeno aliwa eli ooviheyene yaparaga mabasa oolaleya ni ohudhiha, ehelaga mburo wobajha Omwene wa Mulugu. — Mat. 6:33; 24:14; 28:19, 20.

10. Ebaribari baani onna muthithi munlubale, ki mpaganyo baani enooniwa wakwanelaga?

¹⁰ Muthithi munlubale onavuluwe muhoseyani winlubale ohukanna ebaribari wihina Mulugu anerege wasamalelave, “oliye ohupaganya wi anerege walamulela.” Mpaganyo yajhehedha mambila mamodha vano onere wakwanela: ‘Oliye onere wavuda mitoridhiwa dhatedhene mwintonimwiwa, kawindha wikala okwa, kutho, wibulela, naari widdela.’ — Apo. 21:3, 4.

11-12. a) Ninga munawogela Apocalipse 7:16, 17, mareeliho baani onaakele muthithi munlubale? b) Mambila mamodha enere ddi okwa wa Yesu, ki mwahaya bwaddi?

¹¹ Omwileri Apocalipse 7:16, 17. Mudhidhi yola Anamona a Yehova owinjhiva enofwanyiwa dala mwaha wa koddo ni dhithu dhimodha dhinapadduwa mwilaboni. Amodha eli mukambura mwaha wa nroromelo newa. Mbwenye muthithi munlubale onohagalala mwaha onona wihina onere ovuluwa mudhidhi dhithu dhabure dhagujhuliwaga ni enere wakela dhoojha dhowinjhiva dhomwilini ni dhomuzimuni. Elabo ela ya Saddana yatolosiwaga muthithi munlubale onere obareliwa Yehova anyanyuwa,  vano ohoseya winlubale wamala Yesu anere wathukula mambila mamodha wi adhowena ‘yang’we manjhe apama egumi yohimala.’ Vano kabiha wimela wikohe: Ejhehedhelo baani yohagalasa onna muthithi munlubale. Vaari va matxikwi ni matxikwi aathu ekanlewo aliwa kidha ekwa!— João 11:26.

¹² Mambila mamodha enomutamalela vanlubale Yehova ni Yesu! Mwaha wavaha ejhehedhelo ela yohagalasa. Ebaribari wi aliwa kisakuliwe wi yakalege odhulu, mbwenye eyo kahi ethu enaweriha okala athima vamentoni va Yehova. Makiristawu oothikitheliwa vamodha ni mambila mamodha enonvuwiha Yehova vamodha ni mwanaye Yesu. Makalelo owoniha wihina enowerana yeyo fuwubuwela okwa wa Yesu labona nafiya.

13-14. Mwahaya bwaddi egahoweleya wihina nubuwelege okwa wa Yesu?

¹³ Ebaribari sowi, muwari mwa athu owakwana 1000 enadhowa wubuwela okwa wa Yesu mmodha baahi dinajha ekathe ni dinamung’wa vinyu. Eyo enatapulela wihina mulogo dhowinjhiva kaamo athu enajha ekathe ni enamung’wa vinyu. Matxikwi ni matxikwi aathu enadhowa wubuwela okwa wa Yesu owinjhiva enna ejhehedhelo yokala mwilaboni yavati. Ki enathukulela athu ala odhowa wubuwela okwa wa Yesu ddi? Emodhave enapadduwa muthu adhowaga okazamentoni wa mukwaye. Ale enayawo enafuna yawonihe wi enowadhivela ni wi eli epaddi ya anamatelana ale. Emodhave, ale enadhowa wubuwela okwa wa Yesu enafuna yonihe wi enomudhivela Yesu ni makiristawu oothikitheliwa, ni wi eli epaddi yewa. Teto enafuna yonihe wi enoovaha thima mukutho wa Yesu Kiristu, onavaha gari yokanna egumi yohimala mwilaboni yavati.

¹⁴ Ethu emodha enaathukulela mambila mamodha wubuwela okwa wa Yesu, fumwiwelela. Agaali ni anamahudhera aye labo noobajha wubuwela okwa waye, oliye aharuma egi: ‘Mudidele werana ndala mugubuwelaga miyo.’ (1 Cor. 11:23-26) Bumwahaya makiristawu oothikitheliwa egaali elabo yavati mambila mamodha enere odidela wubuwela okwa wa Yesu. Teto enere  odidela wawithana athu amodha wihina yubuwele labo nna ninlubale.

15. Nnere avi wihina ninvuwihe Yehova vamodha ni Yesu mudhidhi wawubuwela okwa waye?

¹⁵ Mudhidhi wawubuwela okwa wa Yesu nnokanna gari yowiba jhibo ni olobela vamodha. Neragana ndala nnonvuwiha Yehova vamodha ni Kiristu. Mwaha wa yakela onna musolo: “Otamalela ele uwerele Mulugu vamodha ni Yesu Kiristu!” onere wenjhedhedha makalelo ehu omutamalela Yehova vamodha ni Yesu. Ekathe ni vinyu dhavirihiwaga, athu atene enakalewo enere wubuwela yotapulela ya vinyu ni ekathe — mwiili nnikame na Yesu. Teto nnere wubuwela odhivela onihe Mulugu mwaha omuleva mwanaye wi anikwele. (Mat. 20:28) Atene yale enamwiwelela babihu odhulu ni mwanaye enere wilibihera wihina yubuwele okwa wa Yesu.

16. Dhithu baani dhiniwanana wodhela makiristawu oothikitheliwa vamodha ni mambila mamodha?

¹⁶ Makiristawu oothikitheliwa ni mambila mamodha ehikanna dhithu dhowinjhiva dhiniwanana, makuru mameli bathima vamentoni va Yehova, mwaha wihina muthengo Yehova agunliyena mmodhave, egumi ya mwanaye. Ethu enahiyaniha sijhehedho enniwana baahi. Makiristawu oothikitheliwa ni mambila mamodha enofwanelela okala oororomeleya vamentoni va Yehova. (Sal. 31:23) Teto Yehova kanathabwa ovaha muzimu wotxena nikuru nimodha. Mbwenye ananvaha kadda muthu muzimu waye wotxena ninga munahoweliye.

17. Gari baani makiristawu oothikitheliwa enajhehiwa wakela?

¹⁷ Makiristawu oothikitheliwa kinabaliwana ejhehedhelo yodhowa odhulu. Yehova dinahela mmurimani mwewa ejhehedhelo ela. Aliwa enowubuwela ejhehedhelo yewa, enolobela teto murima onna wathamaga wihina yakele ejhehedhelo ela. Mbwenye aliwa kinonne mwili enawakeliwa yadhowa odhulu. (Fil. 3:20, 21; 1 João 3:2) Naari dhigari ndo, aliwa kinona mudhidhi wokala vamodha ni Yehova, Yesu vamodha ni angero. Ni kinona mudhidhi wobajha othonga vamodha ni makiristawu oothikitheliwa eli odhulu.

18. Ejhehedhelo baani mambila mamodha enajhehiwa wakela?

¹⁸ Mambila mamodha enojheha nuuhagalala okala mwilaboni yavati, ela ejhehedho yaathu aatene. (Ecl. 3:11) Aliwa enna ojheha nuuthaba mudhidhi enaasadduliwa elabo wihina ekale parayizu. Enojhehedha wihina emage nyumba dhewa, yaale  folori dhewa, ni yalelege aniwa ni egumi yologomana. (Isa. 65:21-23) Enna wunlela weedda elabo yatene — woona mwango, muhuri, ni niya — ni okanna gari yohudhera wodhela dhithu apadduse Yehova. Teto, enothabwa ohagalala yanonaga wi osogolo wandana wewa ni Yehova winerege othabwa wunnuwa.

19. Gari baani kadda muthu wa iyo anniyena mudhidhi wawubuwela okwa wa Yesu, yaka ela wubuwela okwa wa Yesu winaakale woragani?

¹⁹ Yehova onvaha kadda mudhaari aye ejhehedhelo yohagalasa ya osogolo yokalawo ni mukalakala. (Jer. 29:11) Wubuwela okwa wa Yesu ononivaha gari yomutamalela Mulugu vamodha ni Yesu mwaha wa dhatedhene yeriliwana wihina nikanne gari ela. Mohanganyedha wubuwela okwa wa Yesu labo ninlubale na makiristawu aatene ebaribari. Yaka ela wubuwela okwa wa Yesu winereye Sabadu, 27 a Março a 2021 nduwa namorelagamo. Owinjhiva enere okanna ofuru wowubuwela nlabo nna ninlubale. Amodha enere wubuwela naarive eharahariwaga. Teto amodhaya enere wubuwela okwa wula naarive egali mukambura. Mwebaribarene Yehova, Yesu, angero nlabo nenno enerege omusugwa kadda muthu obe kadda mulogo nubuwelaga okwa wa Yesu!