1. Ninga mwene Davidi, athu amodha enikohesa ddi?

ATENIHU nnofuna okanna egumi yapama ni yamurenddele. Kavo onadhiveliwa okala othuwathuwene. Mbwenye malabo mamodha, nnofwanyiwa dhithu dhinanithuwa-thuwiha. Bumwahaya malabo mamodha iyo podi wikoha ninga mwene Davidi amukonhe Yehova egi: ‘Othuwathuwa ni wukuuwa ginnimina mmurimani mwaga onamale alini?’ — Sal. 13:2.

2. Yohudhera ela nnaasuze ddi?

² Mowukuula elabo ela kadhinandeya ohuthuwa-thuwa, mbwenye iyo podi osugweraga. Ohudhera wula, nnere woona dhithu dhinanthuwa-thuwiha. Namala nnere woona, dhithu tanu nammodha dhinanikavihere okala opwaseyene naafwanyiwaga makathamiho.

3. Dhithu baani dhinanifwanya? Ki nnowanda osugwera?

³ Dhithu dhimodha dhinanthuwa-thuwiha kannanda osugwera. Motajhiha, kannanda okoddiha ogwela wa dhithu ninga dhoojha, dhowara ni nyumba dhowalugari yaka dhatedhene. Teto kannanda osugwera malabo akwihu oskola obe omabasani enanthukuleliwa werana dhithu dhabure. Elabo nnakalihu kannanda okoddiha wihina wahikale opanga. Peeno makathamiho ala ehikalawo mwaha  athu owinjhiva kinawiwelela malagano amBibliyani. Saddana, mulugu a dhithu ndha, ohunona wi ‘dhothuwathuwiha dha mwilaboni’ dhinere wahiha athu amodha omulabela Yehova. (Mat. 13:22; 1 João 5:19) Kannanganyedha wihina elabo ela ehidhala dhithu dhothuwa-thuwiha!

4. Naafwanyiwaga dhithu dhorusa nikalege avi?

⁴ Naafwanyiwaga dhithu dhinanukuuliha iyo podi othabwa othuwathuwa. Motajhiha, iyo podi othuwathuwa mwaha wa ohukanna korowa yowisapelena. Woova wihina oredda onihihe wapara mabasa obe oniyeleliha ganyo. Teto werana ethu yabure ni omuukula Mulugu podi onithuwa-thuwiha. Mohulegela Saddana anere wathukulela ale enamukavihera wihina erijhe nlogo na Mulugu, iyo podi othuwathuwa mwaha wa ohunona ethu yowera mudhidhi yoyo. ‘Iyo podi wikohaga akala sabure dhithu ndha onithuwa-thuwihaga.’

5. Yesu afuna awoge ddi ni madhu ala owi: “Kamwithuwathuwelege”?

⁵ Iyo nihinona madhu awogile Yesu ni anamahara aye egi: ‘Kamwithuwathuwelege.’ (Mat. 6:25) Yesu afuna awoge wihina nihithuwa-thuwelege ethu sithu? Naari! Kale wahikala adhaari a Yehova yafwanyiwa dhithu dhothuwathuwiha, naari dhigari ndo Yehova kasukumme. * (1 Reis 19:4; Sal. 6:3) Mbwenye, vala Yesu era onlibiha. Oliye kanafuna wihina dhithu dha mwigumini dhithabwege onithuwa-thuwiha ofiyedha wasukuma mabasa nnamparelihu Mulugu. Ki enaanikavihere osugwera othuwathuwa ddi? — Osugwe kwaduru “ Makalelo owerana”.

6. Ninga munawogela Filipenses 4:6, 7, enanimaalihe ddi?

⁶ (1) Va labo olobelege dila dhowinjhivadhene. Wathabwa othuwathuwa olobele olobaga nikavihero na Yehova. (1 Ped. 5:7) Oliye anere wuvaha ‘murenddele wa Mulugu, onakwaranya dhithu dhatedhene [dha athu]’. (Omwileri Filipenses 4:6, 7.) Yehova anere onimaaliha alabihedhaga muzimu wotxena. — Gál. 5:22.

7. Ethu baani enahoweleya wubuwela nalobelaga?

⁷ Walobelaga, omwaddelege dhithu dhatedhene Yehova. Owogege ethu enuthuwa-thuwiha. Omwaaddele makathamiho awo ni makalelo enapathiwa egumi yawo. Makathamiho awo yakanna murombwe, omulobe Yehova wihina ukavihere onona ethu onahoweliwe werana, ni okanna owedha wa olabihedha mabasa ele enukavihere. Akala kunande wamariha makathamiho awo, omulobe Yehova wihina ukavihere ohuthabwa othuwathuwa. Namwaddela Yehova makathamiho ehu, nnowanda woona makalelo Yehova anakuliye. Yehova ahaakula malobelo awo mowaguva, kuselele. Ethu anafuna Yehova kahi omwaddelave ethu enuthuwa-thuwiha, mbwenye anafuna wihina odidele olobela.— Luc. 11:8-10.

8. Nalobelaga niwogege ddi?

⁸ Wanvokedhaga Yehova mutholo wawo, omutamalelege. Naari nifwanyiwaga makathamiho, sapama wubuwelaga dhithu dhapama ninnihuna. Wathabwa wukuuwa newene ohunona ethu yowoga wubuwele wi Yehova onowawakula malobelo okweya ninga: ‘Kamwerena gikavihereni!’ — 2 Cró. 18:31; Rom. 8:26.

9. Obareleya wa ebaribari nnaafwanye wani?

 ⁹ (2) Kuroromele thotho dhawo, mbwenye dha Yehova. Mudhidhi wa namavuhulela Izayiya nlogo na o Juda nanna othusiwa naakudda Siriya. Aliwa ofwanyiwa woova winlubale ofiyedha oloba nikavihero naakudda Ejipitu. (Isa. 30:1, 2) Yehova wawaddela wihina waroromela akudda Ejipisiyu were wadhelana makathamiho. (Isa. 30:7, 12, 13) Wodhela namavuhulela Izayiya, Yehova owoga ni nlogo na o Juda wego yafwanyiwawo obareleya wa ebaribari. Oliye waroromeliha egi: ‘Kopolo dhenyu dhinadha mwaha okala omaleya ni ogiroromela [miyo].’ — Isa. 30:15b.

10. Dhithu baani dhinanthukulele wooniha wihina nnomuroromela Yehova?

¹⁰ Nnonihe avi wi nnomuroromela Yehova? Kubuwela dhotajhiha ndha: Wubuwele ogithaneliwe ganyo ya korowa dhowinjhiva, mbwenye enothabwa ojha mudhidhi wawo ni kunna mudhidhi wowerana dhithu dha omuzimuni. Obe omubuwele mukwawo omabasani anuufuna, mbwenye kabaddiziwe newene kanamulabela Yehova. Obe mmudhi onamudhiveliwe wera: “Peeno omuthome muthu onathabwiwe omudhivela, akala dimiyo obe Mulugu awo.” Dhapadduwa dhithu ninga dhendha, enorusa othomawa, mbwenye Yehova anere wuvaha dhoholela onahoweliwe. (Mat. 6:33; 10:37; 1 Cor. 7:39) Ki vano: onere omuroromela Yehova ni ohara dhoholela dhaye?

11. Dhopadduwa baani dha mBibliyani dhinanikavihera okala oomaleyene naari niharahariwaga?

¹¹ (3) Ohudhere ni dhopadduwa dhapama vamodha ni dhabure. Bibliya onosoriha dhopadduwa dhowinjhiva dhinoniha mwahaya bwaddi ekala yapama okala oopwaseya ni omuroromela Yehova. Wahudheraga dhopadduwa ndha osugwe dhithu dhakavihere adhaari a Yehova okala opwaseyene naari eharahariwaga vanlubale. Motajhiha, othonga winlubale wa aJudewu wawogiliwa wi arumiwi ehiye olaleya, aliwa kayagurumele. Nuuliba murima aliwa wera: ‘Vobajha nnamwiwelela Mulugu ninga namathonga wahiya athu.’ (At. 5:29) Naarive arumiwi egawaxuliwe, kiyagurumenle. Mwaha wa ddi? Mwaha yahinona wi Yehova ali epaddi yewa ni oohagalala mwaha wa aliwa. Bumwahaya, aliwa yahididela olaleya muthenga dhapama. (At. 5:40-42) Yotajhiha emodha sa Estevawu. Amwiddani aye efunaga ompa, Estevawu aali oomaleyene newene kathuwa-thunwe, bumwahaya ‘omentoni waye wera oligana ni wa mungero.’ (At. 6:12-15) Mwaha wa ddi? Mwaha ahikanna ebaribari wihina oomuhagalasa Yehova.

12. Ninga munawogela 1 Pedro 3:14 ni 4:14, mwahaya bwaddi nigahagalala naharahariwaga?

¹² Arumiwi yahikanna ebaribari wi Yehova aali naliwa. Mulugu ahavaha kopolo wihina yawerena matikiniho. (At. 5:12-16; 6:8) Peeno ndho kadhinapadduwa. Mbwenye wodhela madhu aye, Yehova anopaganya wi noonaga goyi mwaha wa obure, anohagalala ni makalelo ehu ni anonivaha muzimu waye wotxena. (Omwileri 1 Pedro 3:14; 4:14.) Bumwahaya kuthuwa-thuwe nithu yowera waharahariwaga. Weregena onandiwe ovanene wihina wenjhedhedhe nroromelo nawo nowihina Yehova podi wukavihera ni wuvulusa. Moligana ni anamahara, ororomele ele awogile Yesu egi: ‘Miyo ginere wuvahani madhu ni thotho, amwiddani enyu ehinandiwa ovanya, newene kinakodde.’ Teto nnowaroromela  madhu ala: ‘Mwaha wa ovilela weenyu, munere obarela egumi yenyu.’ (Luc. 21:12-19) Okanne ebaribari wihina naarive mudhaari a Yehova agakwile, oliye anowubuwela dhikalelo dhaye dhatedhene ni anere onvenyiha muukwani.

13. Nnahudhera ddi ni dhopadduwa dha ale ehihanre yolaga yokala opwaseyene ni omuroromela Yehova?

¹³ Teto iyo podi ohudhera naathu ehihanre yolaga yokala opwaseyene ni omuroromela Yehova. Ohudhera dhopadduwa ndha winere onikavihera ohumorela murako mmodhave. Motajhiha, mwene Aza abajhagawene othonga muthithi waanyakoddo odhowa owana ni nlogo na o Juda. Aza oomuroromela Yehova, vano Yehova omukavihera ogonjhiha. (2 Cró. 14:9-12) Nuuvira mudhidhi mwene Baasa owizarayeli obajha waathusa akudda Juda, naanyakoddo vang’onove. Mbwenye ohiya omuroromela Yehova, Aza wavaha korowa anyakoddo o Wasiriya wihina emukavihere. (2 Cró. 16:1-3) Ahalaga neena wihina akwe, ofwanyiwa oredda winlubale, Aza kamusayenle Yehova. — 2 Cró. 16:12.

14. Nnahudhera ddi ni dhoviriganiha dha mwene Aza?

¹⁴ Vobajha, mwene Aza afwanyiwaga makathamiho omusayela Yehova. Nuuvira mudhidhi oliye osayelaga mwinnya makalelo omariha makathamiho aye. Onakala ninga nikavihero alonbiye waanyakoddo o Asiriya nahimukavihera, mbwenye dhithudha kadhilegenle. Wodhela namavuhulela aye, Yehova owoga ni Aza egi: ‘Woona wi mmuroromele mwene o Wasiriya, ohiya omuroromela Yehova Mulugu enyu, anyakoddo o Wasiriya ehusukumani.’ (2 Cró. 16:7) Pole-pole ni iyowa osayela wamariha makathamiho ehu nihisayenle dhoholela dha Yehova dhili mBibliyani. Naari ofunaga othoma ethu yowaguveya okale opwaseyene ni omuroromele Yehova, vano oliye anere wukavihera wihina dhawo dhuweddele pama.

15. Namwilerigi Bibliya nerege ddi?

¹⁵ (4) Okoye mmuruni dholebela dha mBibliyani. Wamwilerigi Bibliya onere ofwanya dholebela dhinawoga wodhela okala omaleya ni omuroromela Yehova. Wafwanya okoye mmuruni. Wileri ni ndhu notama obe olebela vapapelini podi wukavihera. Yehova ahimukongomedha Jozuwe wihina ilerigi Nlamulo malabo amatene. (Jos. 1:8, 9) Eyo yere omukavihera okala enonelo ni ogonjhiha woova wanfwanyege mwaha wa mutholo waye. Emodhave, dholebela dhowinjhiva dha mBibliyani podi wukavihera okala oomaleyene mudhidhi wothuwa-thuwiha ni wowopiha. — Sal. 27:1-3; Pro. 3:25, 26.

16. Mulugu onalabihedha avi mulogo wihina anikavihere okala oomaleyene ni omuroromela oliye?

¹⁶ (5) Otugumanege ni nlogo na Mulugu. Yehova anowalabihedha addibilihu wihina anikavihere okala oomaleyene ni omuroromela oliye. Mmutugumanoni, nnolibihiwa ni dhipaddi, dhowakula ni wodhela othapanya wa addibila ni arogola. (Heb. 10:24, 25) Ethu emodha enanikavihera, fuuwoga ni addibila dhithu dhinanipadduwela. “Madhu apama” amukwihu podi onikavihera owanana dhithu dhinanithuwa-thuwiha. — Pro. 12:25.

17. Ninga munawogela Hebreus 6:19, ejhehedhelo ya Omwene wa Mulugu enanikavihera addi naafwanyiwaga makathamiho?

¹⁷ (6) Olibihe ejhehedhelo yawo. Ejhehedhelo ninnihuna ya Omwene wa Mulugu ‘enaligana ni mujhila anaseyihiwana baruku mwigumini mwehu.’ Ejhehedhelo  enonikavihera naafwanyiwaga makathamiho orusa. (Omwileri Hebreus 6:19.) Bumwahaya, wubuwelege mpaganyo wa Yehova onawoga wihina osogolo kawinaakale yubuwelo dhabure. (Isa. 65:17) Wubuwele ogaali elabo exa yamurenddele, mburo wihinakale dhithu dhothuwa-thuwiha. (Miq. 4:4) Teto we podi olibiha ejhehedhelo yawo wodhela wawaddela athu amodha. Wilibihere mmabasani oolaleya. Mwamakalelo yala ‘onere okanna ejhehedhelo ya ebaribari ofiyedha omakuthulo.’ — Heb. 6:11

18. Enereye osogolo ddi, ki nnere ddi?

¹⁸ Mudhidhi dhithu ndha dhamwilaboni dhafiyaga omakuthulo , nnere ofwanyiwa makathamiho manlubale othuwa-thuwiha. Yolebela ya yaka ela 2021 podi onikavihera owanana makathamiho ala ni okala opwaseyene, nroromelaga kopolo dha Yehova ohiya dha muthu. Muwari mwa yaka ela, woonihe ni dhowera dhawo wi onororomela mpaganyo wa Yehova oni: ‘Kopolo dhenyu dhinadha mwaha okala oomaleya ni ororomela.’ — Isa. 30:15.