1. Enoniha wi murala kadhinadhivelana ddi?

BIBLIYA ahiwoga wihina malabo okuthula athu enakale ‘ohukanna odhivela,’ obe, kiyakanne odhivela enakanna athu avamuralani. (2 Tim. 3:1, 3) Peeno yovuhulela ela enna wakwanela. Motajhiha, matxikwi ni matxikwi a murala ehimwadheya mwaha wa omwalana. Anamatelana enonyanyuwelana, mwaha wa yeyo ahima enona wi kinadhiveliwa. Teto ababi ni ahima podi ohidhivelanaga. Namalaga dhaala a murala ohuwoga egi: “Ababi, ni ahima kinapwathana, mbwenye enalibihera komputadori, telefoni, tableti ni jogu. Naari ekalaga vaade vamodhave kinathapanya.”

2-3. a) Ninga munawogela Romanos 12:10, nimudhivelege aani? b) Yohudhera ela nnaasuze ddi?

² Iyo kannafuna wihina ekalelo ela yabure ya mwilaboni enivolowele. (Rom. 12:2) Ethu nnafunihu fudhivelana mmodha ni mukwaye. Kannafuna odhivela murala wehu baahi. Mbwenye, nnafuna nawonihe odhivela addibilihu a munroromeloni. (Omwileri Romanos 12:10.) Naadhivelaga addibilihu ni murima watene nnowiwanana. Wiwanana ethu yoofuneya namwebedhaga Yehova. — Miq. 2:12.

³ Enaanikavihere ddi wenjhedhedha ni wadhivela addibila ni murima watene? Kabeni none dhithu nnahudherihu ni dhotajhiha dha mBibliyani.

4. Salmos 103:8 anoniha ddi wodhela odhivela wa Yehova?

⁴ Bibliya onoononiha dhikalelo dhapama dha Yehova. Motajhiha, anowoga wi ‘Mulugu odhivela.’ (1 João 4:8) Onona eyo enonithukulela wandana ni oliye. Bibliya onowoga wi Yehova ‘ohukanna odhivela ohunamala.’ (Omwileri Salmos 103:8.) Sapama onona wihina Yehova onothabwa onidhivela!

5. Yehova anoniha avi thagaraga, ki nnaamutajhihe avi?

⁵ Salmos 103:8 analiganiha odhivela ohunamala wa Mulugu ni ekalelo emodhaya yapama — thagaraga. (Êxo. 34:6) Makalelo Yehova anonihiye thagaraga fulevelela dhothega dhehu. (Sal. 51:1) Bibliya anawoga wi thagaraga kahi olevelelave. Thagaraga sithu enamuthukulela muthu omukavihera mukwaye aafwanyiwaga makathamiho. Yehova anofuna onikavihera vanlubale ompitha mayi anamulela mwanaye. (Isa. 49:15) Naafwanyiwaga makathamiho, thagaraga dhinamuthukulela Yehova onikavihera. (Sal. 37:39; 1 Cor. 10:13) Ebaribari wi nnowoniha thagaraga nalevelelaga addibilihu ni murima watene. (Efé. 4:32) Mbwenye makalelo manlubale owoniha thagaraga fuwakavihera addibilihu yaafwanyiwaga makathamiho. Odhivela wanithukulelaga wooniha thagaraga, nnowoniha wihina nnomutajhiha Yehova, ali ntxela na nthebwa. — Efé. 5:1.

6. Wandana wa Jonata ni Davidi waali avi?

⁶ Bibliya onowawoga athu owinjhiva ohulogomana yandanne. Yotajhiha modha sa Davidi ni Jonata. Bibliya onosoriha egi: ‘Jonata ni Davidi yahandana vanlubale, vano Jonata omudhivelaga Davidi ni makalelo iidhiveliye’ (1 Sam. 18:1) Yehova ahimuthoma Davidi wi amuhabe mwene Sawuli. Sawuli obajha omukalela nrima Davidi,  bumwahaya afuna ampe. Mbwenye mwana Sawuli, Jonata kaali epaddi ya babe. Jonata ni Davidi opangana wi wandana wewa wikale wamukalakala ni wihina ekaviheranege mmodha ni mukwaye. —1 Sam. 20:42.

7. Yerihe wi Jonata ni Davidi ehandane ddi?

⁷ Mwebaribarene Jonata ni Davidi kiyafwanelele wandana. Mwaha wa ddi? Motajhiha, Jonata anna yaka 30 ompitha. Naari dhigari ndo Jonata kubuwele egi: “Davidi ohuthabwa oyeva kanonne dhithu dhowinjhiva ninga miyo. Kannavahana.” Naari dhigarive ndo, Jonata kamoona Davidi ninga mwana.

8. Moonelo wawo mwahaya bwaddi Jonata adhe akalegena wandana wapama ni Davidi?

⁸ Ahakale muthu mmodha Jonata erege omukalela nrima Davidi. Mwaha okala mwana a Sawuli, Jonata ere odidela owoga wihina anahabe omwene dimiyo. (1 Sam. 20:31) Mbwenye Jonata aali owiyeviha ni omuroromela Yehova. Bumwahaya, adhe akaviherege yothoma ya Yehova wihina Davidi akale mwene .Teto omudhivela vanlubale Davidi. Naarive babe atakaleliwaga vanlubale. — 1 Sam. 20:32-34.

9. Jonata amoona Davidi ninga mwiddani aye? Kawogamo.

⁹ Jonata omudhivela vanlubale Davidi. Bumwahaya kamoona ninga mwiddani aye. Jonata ahinona olabihedha pamadhene nthere teto aali munyakoddo oliba murima. Oliye vamodha ni ababe, Sawuli, yanoniwe ninga ‘othamaga ompitha pangwe, akopolo ompitha poddogoma.’ (2 Sam. 1:22, 23) Ahakale muthu mmodha Jonata erege withukula mwaha wa dhithu eriliyena. Mbwenye oliye kaali muthu owithukula newene anrima. Teto, oliye otikina vanlubale oliba murima wa Davidi ni omuroromela waye Yehova. Wandana wula obanjhe nuumala Davidi ompa Goliya. Ki peeno? Nnonihe avi wi nnowadhivela addibilihu ni makalelo yala?

10. Wilibihera wadhivela athu ni murima watene enatapulela ddi?

¹⁰ Bibliya onihina: ‘Mudhivelanege vanlubale mmodha ni mukwaye, ni murima watene.’ (1 Ped. 1:22) Yehova yotajhiha yapama. Oliye anonidhivela vanlubale, nakala ororomeleya vamentoni vaye kayivo ethu enanimwalanihe nuliye. (Rom. 8:38, 39) Madhu a egeregu owi “vanlubale” podi otapulelaga oddambula ethu ofiyedha muthu vinandeliye. Malabo mamodha, nnere ohowela wilibihera wihina nidhivelanege mmodha ni mukwaye. Amodha yeragana dhithu dhinantakalela, enohoweleya odidela ‘ovilelana mmodha ni mukwaye nuudhivela, nilibiheraga okanna wiwanana wimodhave winadha wa muzimu wotxena, ni murenddele onadha mwaha wiwanana.’ (Efé. 4:1-3) Nafunaga wihina mmulogoni mwikale murenddele, kanisugwege dhoviriganiha dha addibilihu. Nilibihere wawona ninga Yehova munawoneliyemo. — 1 Sam. 16:7; Sal. 130:3.

11. Mwahaya bwaddi malabo mamodha eganirusa wadhivela addibilihu ni murima watene?

¹¹ Kinakweya malabo amatene wadhivela addibilihu ni murima wamutene. Thabwa-thabwa noonaga enoviriganiha. Onakala ninga siyela yapadduwela makiristawu obajha. Motajhiha, Evodiya ni Sintiki ‘yolaba ni murumiwi Pawulo epaddi ni epaddi elaleyaga muthenga dhapama.’ Mbwenye dhikala dhithu dhaathukulela okangana. Bumwahaya, Pawulo adhe aakongomedhege  wihina ‘ekanne mubuwelo mmodhave mwa nabwiya.’ — Fil. 4:2, 3.

12. Nnenjhedhedhe avi makalelo owadhivela addibila ni murima watene?

¹² Nnenjhedhedhe avi makalelo owadhivela addibila ni murima watene? Nnohowela wanona pamadhene. Nanona pama addibilihu, enerege okweya walevelela ni wadhivela. Yaka ni dhilemelelo kadhinibarelege wandana. Wubuwele wihina Jonata, anna yaka 30 ompitha Davidi. Naari dhigari ndo, aliwa yahikanna wandana woliba. Were wandana ni muthu a mmulogoni mwawo owunnuwelavo obe mwana? Werana ndo, onere woniha wi ‘onowadhivela addibila a elabo yatene.’ — 1 Ped. 2:17.

13. Mwahaya bwaddi kadhinandeya wandana ni addibila atene a mmulogoni?

¹³ Wadhivela addibilihu ni murima watene, enatapulela wi nnerege wandana pamadhene ni athu atene mmulogoni? Naari, kahi ebaribari owoga wihina nnere wandana ni addibila atene. Kahi yabure othabwa wandana ni amodha mwaha wa dhithu dhinandhivela. Motajhiha, Yesu owawithana arumiwi aye ninga “akwaye” mbwenye athabwa omudhivela Juwawu. (João 13:23; 15:15; 20:2) Naari dhigari ndo, Yesu kamoona Juwawu okala apama wapitha amodhaya. Motajhiha, Juwawu vamodha ni ddibile Tiyago omuloba Yesu wihina amuhele mmodha moono woojha mmodha moono weemara Mumweneni mwa Mulugu, Yesu wawakula egi: ‘Anathoma wihina muthu akirati moono waaga woojha ni moono waaga weemara kahiyo miyo.’ (Mar. 10:35-40) Ninga Yesu, kanawonege akwihu othabwa okala athima wapitha addibila amodha. (Tia. 2:3, 4) Neragana yeyo, ninna ogawa mulogo, eyo ethu ehinafuneya vaari va makiristawu. — Judas 17-19.

14. Ninga munawogela Filipenses 2:3, enaanikavihere okala athu ohithukula ddi?

¹⁴ Naadhivelaga amodha ni murima watene nnobarela mulogo wihina muhikale athu  owithukula. Wubuwele wi Jonata kithukula amoona Davidi, newene kawoga egi anakale mwene dimiyo. Iyo podi omutajhiha Jonata. Wamoona ddibila eragana dhithu ohunandiwe werana, kumonege ninga mwiddani awo, ‘mbwenye, nuwiyeviha, wawoonege amodha okala anlubale wupitha we.’ (Omwileri Filipenses 2:3.) Wubuwele wihina athu atene enokavihera mulogo. Nakanna monelo wapama nikala owiyeviha, nnere wanda woona dhithu dhapama enna addibila, teto nnere weenya wihina aliwa enihudhihe. — 1 Cor. 12:21-25.

15. Ohudhere ddi ni yopadduwa ya Taniya vamodha ni emudhi yaye?

¹⁵ Malabo mamodha nnofwanyiwa makathamiho nahajhehelihu. Mudhidhi yoyo Yehova podi walabihedha addibilihu wihina enlibihe ni enikavihere. Woone ethu empadduwele Taniya vamodha ni anaaye araru. Yaka ya 2019, aliwa odhowa woona Musonkano Internasiyonale elabo yo Estadu Unidu wanna musolo “Odhivela kunamala.” Taniya anowoga ethu yapadduwe nuumala porogarama a Sabadu: “Nahogolowela vaade ni karo, vano karo emodha odhowa epaddi naarihu ovada karo yehu. Kaavo muthu apeyile, mbwenye iyo okumamo mukaronimwa wimela vaari va dila, nigaali ootakaleliwene. Vano, nameeddiha karo mmodha wimesa karo yaye obajha onithana. Aali ddibilihu adha omusonkanoni. Addibila owinjhiva yahimmela, vamodha ni addibila atanu a Osuwesiya. Arogola dhaala odha ogabarasari vamodha ni mwanaga — eyo yahinihagalasa! Miyo owoga ni addibila wihina dhere  oneeddela pama, mbwenye aliwa kayanihiyile. Aliwa onijhehagave ofiyedha asupayi ofiya. Onikavihera ni dhithu dhatedhene nahowelihu. Mudhidhi ole worusa nahona odhivela wa Yehova. Makathamiho ale yahenjhedhedha odhivela nannihuna ni addibila, mbwenye yinlubaleya yahenjhedhedha odhivela nannihuna ni Yehova vamodha ni omutamalela.” Onowubuwela labo wahoweliwe okaviheriwa vano ddibila anowukavihera?

16. Ethu enanithukulela wadhivela amodha ni murima watene ddi?

¹⁶ Woone dhithu dhapama dhinereya naadhivelaga athu amodha ni murima watene. Addibila yahowelaga nnowalibiha. Nnowenjhedhedha wiwanana wa nlogo na Mulugu. Nnowoniha wi nili anamahara a Yesu, eyo enowathukulela athu owinjhiva ohudhera ebaribari. Yinlubaleya nnonvuwiha Yehova, ‘Babi anthebwa ni Mulugu a olibiha watewene.’ (2 Cor. 1:3) Bumwahaya, wilibihere wadhivela addibila ni murima watene!