MUZEWU munlubale oli oJeruzale elabo alebiwewo Bibliya wikalawo nibwe ninlubale nlebiwe muwari mwa yaka 700-600 M.W.O. Nibwe nna nifwanyiwe waddamela mahame yaali o Hebrom elabo yo Wizarayeli. Nibwe nna nlebiwe ayi: “Owulumeliwa akale Hagaf mwana Hagav ni Yahweh Sabaot.” Nibwe nna nniwanana avi ni madhu a mBibliyani? Nnowoniha wi ndina na Mulugu Yehova, nlebiwe YHWH ni ewogelo yEbarayiku mmakartani akale, nahithabwa ononiwa ni noothabwa olabihedhiwa kadda labo mudhidhi alebiwe Bibliya. Mwebaribarene, dholebela dhimodha dhinafwanyeya mukavernani dhatibiwe ni athu amodha yolebamo ndina na Mulugu vamodha ni mandina ewa va sirini.

Dr. Rachel Nabulsi a Universidadi yo Jeyorjiya awogaga wodhela muselu ola ohuleba egi: “Ovirisedha ndina nna na YHWH ethu yofuneya . . . Mwaha wothabwa wovirisedhiwa yowoniha wi yaali ethu yathima wa aJudewu ni amwaana Ezarayeli.” Eyo enowiwanana ni Bibliya, mburo vinadha ndina na Mulugu nalebiwa ni Ebarayiku YHWH, nnofwanyeyamo dila dhowinjhivadhene. Malabo owinjhiva yotapulela ya mandina aathu yowiwanana ni ndina na Mulugu.

Madhu owi “Yahweh Sabaot,” yalebiwe valibweni enatapulela “Yehova anyakoddo.” Eyo enowoniha wi nalabihedhiwa kahi ndinave na Mulugu. Mbwenye yolabihedhiwa madhu owi “Yehova anyakoddo” malabo owinjhivene mudhidhi alebiwe BIbliya. Eyo enowoniha mwahaya bwaddi Bibliya agalabihedha madhu owi “Yehova anyakoddo,” thabwathabwa mulivuruni na Izayiya, Jeremiya ni Zakariya enafwanyeya dila dhowakwana 283 mu dholebela dha Ebarayiku.