Mwahaya bwaddi Yesu ahinakwe adhe awogege madhu a Davidi enafwanyeya va Salmos 22:1?

Muwari mwa madhu owinjhiva awogile Yesu akwaga enoofwanyeyavo ala eli va Mateus 27:46 enihina: ‘Mulugwaga, Mulugwaga, mugihiyele ddi meeka?’ Nuwawoga madhu yala, Yesu wawakwaneliha madhu awogile Davidi enafwanyeya va Salmos 22:1. (Mar. 15:34) Nerege Yesu asorihaga madhu ala mudhidhi yole ere osinyuwa obe kanna nroromelo? Naari! Yesu ahinona mwahaya bwaddi adhe akwege, ohiya eyo oliye ahimala wipeleka. (Mat. 16:21; 20:28) Vadhuluva Yesu ahinona wi wafiya mudhidhi wihina akwe, Yehova ‘kambarele dhego dhatedhene’ dhampadduwele. (Jó 1:10) Nimakalelo yala, Yesu ere woniha wi aali muthu ororomeleya vamentoni va Yehova naarive aganonne wihina ere okwa mwamakalelo abure. — Mar. 14:35, 36.

Kito mwahaya bwaddi Yesu adhe asorihege madhu ala eli va Salmos? Naarive nahinna ebaribari, kabeni noone dhithu dhinanthukulele wonelamo muselu ola. *

Podi wera Yesu afuna eere Yehova mudhidhi yole kamwakihedhe makalelo afuniye okwa. Yesu ofwanelela opeleka mukutho ahikaviheriwe ni Yehova. Oliye aali muthu oomaningoni afwanelela okwa ninga muthu wihina ‘akwele athu atene.’ — Heb. 2:9.

wera Yesu awogaga madhu ala enafwanyeya va Salmos, afuna awubusedhe kapitulu yatene ya Salmos. Yesu agaali elabo yavati majudewu yahikanna elemelelo yowakoya mmuruni  madhu amusalmuni. Vano yiiwa versu modha ya Salmo yowubuwela kapitulu yatene enasorihiwa. Akala siyeyo Yesu ubuweliye iyo podi wera Yesu afuna awubusedhe anamaharaye wihina kapitulu yatene ya Salmos yahikanna dhovuhulela dhawoga wodhela okwa waye. (Sal. 22:7, 8, 15, 16, 18, 24) Ohiya eyo versu dhogomihera dha Salmos dhinomuthithimiha Yehova ni dhinomutonyihedha, ninga mwene a elabo yatene. — Sal. 22:27-31.

Podi wera afuna ere oliye kanna muladdu. Ahinathi okwa Yesu ahifiyedha otorihiwa naarive ahithegile ni winkedhiwa wihina onomuruwana Mulugu. (Mat. 26:65, 66) Otorihiwa waye weriwena ni maruluya, vaali mahiyu teto kayahariwe malamulo a mudhidhi yole. (Mat. 26:59; Mar. 14:56-59) Yesu asorihaga madhu ala egi: ‘Mulugwaga, Mulugwaga, mugihiyele ddi meeka?’, podi wera oliye afuna ere kafwanelela okwa mwamakalelo yaale.

Podi wera afuna awubusedhe athu amodha wihina goyi onile Davidi kiyatapulela wihina Yehova ere omunyanyala. Nikoho na Davidi kanatapulela wihina kaanna nroromelo. Nasugwa pama nnowona wihina Davidi agerilena nikoho nna ahisoriha egi ginamuroromela Yehova ninga nvulusi aaga teto Yehova omurelihagave. (Sal. 22:23, 24, 27) Ni makalelo mamodhave, naarive Yesu agaali ‘Mwana a Davidi,’ onihiwe goyi vantxikwani eyo kinatapulela wi Yehova ere omunyanyala. — Mat. 21:9.

Yesu afuna asorihe goyi ooneye mwaha wohubareliwa ni Yehova. Yehova kaafuna wihina mwanaye oone goyi newene akwe. Mbwenye eyo yenyeyile nuwereya yothega mu Jardi Ohedeni. Yesu kerilena ethu yabure, mbwenye ohenya woona goyi ofiyedha okwa wihina aakulele muladdu atatamule Saddana mu Edeni, ni wihina alive mukutho wahoweleya wihina athu ehogolowele wandana yayeleliwa. (Mar. 8:31; 1 Ped. 2:21-24) Yenyeye yahere mudhidhi yole Yesu ahibareliwa ni Yehova.

Podi wera Yesu afuna aakavihere anamahara aye woonelamo mwahaya Yehova adhe amwenyege mwanaye okwa ni makalelo yale. * Yesu ahinona wihina athu amodha yere oyelela nroromelo mwaha Yesu opiwa ninga mpanga. (1 Cor. 1:23) Mbwenye anamahara aye yahere yubuwelaga ethu yamuthukulele okwa, yere wonelamo yotapulelaya. (Gál. 3:13, 14) Ndo, anamahara a Yesu yere omoona ninga Namavulusa ohiya omoona ninga mpanga.

Naarive nahinonne mwahaya bwaddi Yesu adhe asorihege madhu ala, kannanganyedha wihina oliye owonelamo wi okwa vantxikwani na goyi ere werana efunelo ya Yehova. Agamanle wasoriha madhu ala a Salmos, Yesu wera: ‘Dhihakwanela!’ (João 19:30; Luc. 22:37) Naarive mudhidhi yole ahibareliwe ni Yehova, Yesu ahakwaneliha ethu yamuthukulele odha elabo ela yavati. Ohiya eyo oliye podi wakwaneliha dhithu dhatedhene dhilebiwe wodhela oliye ‘Mmalamuloni a Moses, Anamavuhulela ni musalmoni.’ — Luc. 24:44.