1-2. Nimakalelo baani Yesu aliye ninga namakavihera? Oladdanihe.

KUBUWELA ogaali naakwawo murudda wowopiha, ohunakaliwa ni wigadhale funga. Mbwenye muhukanna nikavihero namuthu ononnewo pama. Oliye eeddaga anoniha thalo dhaye. Nuuvira mudhidhi, muthu ole ukaviherani kuhumoonaga. Naari dhigarive ndo, kamunathuwa-thuwa. Mwaha wi we vamodha ni akwawo, munowahara manyalwaye.

² Nimakalelo mamodhave, makiristawu aatene, enna weedda murudda ohunakaliwa ni wowopiha — elabo ela yabure. Yohagalasaya sowi, Yehova namakavihera apama — vamodha ni mwanaye, Yesu Kiristu. Iyo podi ohara pamadhene mweddelo wa Yesu. (1 Ped. 2:21) Livuru dhala nnasoriha dhithu dha mBibliyani niwogaga wodhela versikulu ela, nnihina Peduru amuliganiha Yesu nnamakavihera. Ninga muthu anahiya manyalo wihina ehariwege, Yesu ohuhiya mweddelo wihina niharege. Ohudhera wula, nnere wonelamo pama ethu baani enatapulela ohara mweddelo wa Yesu. Nnere wawakula makoho mararu: Ddiniyani? Mwahaya bwaddi? Nimakalelo baani?

3. Ohara thalo dha muthu enatapulela ddi?

³ Ohara mweddelo wa muthu enatapulela ddi? Malabo mamodha Bibliya anolabihedha madhu owi “weedda” ni “manyalo” wihina aladdanihe makalelo muthu aneddihiye egumaye. (Gén. 6:9; Pro. 4:26) Mweddelo wa muthu podi oliganihiwa ni manyalo anahiya muthu eeddaga. Bumwahaya nigawoga negi ohara thalo dha muthu emodhave ni ohara mweddelwaye, obe omutajhiha.

4. Ohara thalo dha Yesu enatapulela ddi?

⁴ Ki ohara thalo dha Yesu, enatapulela ddi? Enatapulela,  ohara mweddelo waye. Yolebela okumihiwe ohudhera wula, murumiwi Peduru awogile egi Yesu yotajhiha ya ovilela naarive oonaga goyi; mbwenye ehikalawo makalelo mamodha omutajhiha Yesu. (1 Ped. 2:18-25) Mwebaribarene egumi yatene ya Yesu — dhithu dhatedhene awogiliye ni eriliyena — makalelo apama anihiyedhiye wihina nimutajhihege.

5. Athu ohilogomana podi owedha otajhiha mweddelo wologomana wa Yesu? Kawogamo.

⁵ Woona wi iyo kanili athu ologomana, nnere wanda ohara mweddelo wa Yesu? Hee. Wubuwele wihina Peduru anonikongomedha egi ‘niharege mweddelo wa Yesu,’ mbwenye kannande omutajhiha ni makalelo oologomana, podive dhigaali ndo iyo podi wilibihera werana dhatedhene nnandihu. Neragana ndala nnere owedha ohara yolaga yamurumiwi Juwawu awogile egi: ‘Onaselele weedda ninga oliye eeddiliye.’ — 1 João 2:6.

6-7. Mwahaya bwaddi nigera ohara mweddelo wa Yesu makalelo owandana ni Yehova?

⁶ Ohara thalo dha Yesu dhinonandaniha ni Yehova. Mwahaya bwaddi nigawoga ndo? Vobajha, Yesu ohunihiyedha mweddelo wapama wa egumi enamuhagalasa Mulugu. (João 8:29) Bumwahaya, nahara thalo dha Yesu nnere omuhagalasa Yehova. Teto iyo podi okanna ebaribari wihina Babihu oodhulu anere wawaddamela aatene yale enilibihedha wihina yandane nuliye. — Tia. 4:8.

⁷ Yanabili, Yesu omutajhiha pamadhene Babe. Bumwahaya Yesu adhe awogege egihina: ‘Onagona miyo, onawoona Ababa.’ (João 14:9) Iyo podi otajhiha mweddelo wa Yesu wodhela waweddiha akwihu mwamakalelo apama. Motajhiha, oliye ahimweddela thagaraga muliba maranya, omukalela nthebwa mwihiyana ali muredda ni oowaweddela  thagaraga athu yayelela amudhiwa muukwani. Namutajhihaga Yesu, nnamutajhiha mwinnyene Yehova. (Mar. 1:40, 41; 5:25-34; João 11:33-35) Natajhihaga dhikalelo dha Yehova, wandana wehu nuliye winerege othabwa.

8. Kasorihamo makalelo ohara mweddelo wa Yesu onanikaviheriwa “ohupopurusiwa” ni elabwela.

⁸ Ohara mweddelo wa Yesu winonikavihera ohupupurusiwa ni elabwela yabure. Emahiyu yogomihera ya Yesu agaali elabo yavati, oliye ahifiyedha owoga egihina: ‘Miyo gigonjhiha elabo.’ (João 16:33) Yesu kanahiyege wihina elabo mubuwelo, ni athu a elabwela empupuruse. Kaavo ethu yafiyedhile omudduwaliha Yesu wapara mabasa aadheliye veelabo yavati — ninga otxeniha ndina na Babe. Ki iyo? Elabwela enonivaha dhithu dhowinjhiva wihina yapupuruse mabasihu ninanparelihu Yehova. Bumwahaya, ninga Yesu, sofuneya waweka mabasa a Yehova mburo wobajha. Nerana ndo, nnere owoga negi: ‘Gihigonjhiha elabo.’ — 1 João 5:5.

9. Negi neddegeve dila enathukulela egumi yohimala neere ddi?

⁹ Ohara mweddelo wa Yesu ononithukulela ofwanya egumi Yohimala. Muzombwe ole oreela amukohile Yesu ethu ahoweliye werana wihina aakele egumi yohimala, Yesu ahimwakula egi: ‘Odhe okale namahara aaga.’ (Mat. 19:16-21) Yesu athapanyaga ni maJudewu yakodda wi oliye di kiristu, ahawakula egi: ‘Mambila aaga enogihara. Miyo ginowavaha egumi.’ (João 10:24-29) Teto athapanyaga ni Nikodemu, muJudewu eerela epaddi yaSinedriyu, Yesu ahiwoga egi aatene ale enagiroromela enere wakela ‘egumi yohimala.’ (João 3:16) Nnoniha avi wihina nnomuroromela Yesu? Mwaha wowerana dhithu anihudhihiye ni otajhiha mweddelo waye. Nerana ndo, nnerege weeddave dila enathukulela egumi yohimala. — Mat. 7:14.

10. Enahoweleya nere ddi wihina ‘nimunone’ Yesu? (João 17:3)

¹⁰ Wihina niharegeve mweddelo wa Yesu enofwanelela werana ethu, omunona. (Omwileri João 17:3.) ‘Omunona’ Yesu kawinamala. Enofwanelela ninone dhithu dhimodha wodhela oliye — dhikalelo dhaye, makalelwaye owubuwela ni mweddelo ahariye. Naarive nigaali athu akale mwibaribarini, nnofwanelela wilibihera ‘omunona’ Yehova ni Yesu.

11. Malivuru ala mannayi Evanjelyu enna muthenga baani?

¹¹ Yehova anonivaha ethu enanikavihera omunona pama mwanaye, malivuru a Evanjelyu. Malivuru ala enonaddela dhithu awogile ni erilena Yesu. Teto enonooniha moonelo waye, nikavihero na malivuru ala mannayi iyo podi omutajhiha Yesu. (Heb. 12:3) Malivuru ala a Evanjelyu munoofwanyeya mweddelo anihiyedhe Yesu. Bumwahaya, nafunaga omunona pamadhene Yesu, nnofwanelela wahudhera  malivuru ala. Nimakalelo yala, nnere wanda ohara pamadhene mweddelwaye.

12. Yegi malivuru ala a Evanjelyu enikavihere nere ddi?

¹² Negi nihudhere dhithu dhowinjhiva ni malivuru ala a Evanjelyu kanikalege wawilerive baahi, mbwenye enohoweleya wapwasedha wavuruwana pamadhene ni wapendda. (Omusugwe Josué 1:8 nota.) Nnafuna none dhithu bili dhinanikavihere wapendda malivuru ala a Evanjelyu nimakalelo oparihedha mabasa ndhe nnilerihu.

13. Onoonihe aavi wi onovaha thima malivuru ala a Evanjelyu?

¹³ Vobajha, ovahe thima malivuru ala a Evanjelyu. Olabihere mubuwelo wawo. Wawilerigi osugwege, wiwege ni okalege ninga onowoona dhithudha dhinapadduwa. Wegi wande wera dhithu ndha sapama osanyiha wihina wonelemo. Nikuru na Yehova nnonivaha dhipano dhohudherana. Teto osayele wonelamo museluya, obe, woona dhithu dhipadduwe mundduli obe osogolo wa muselu yole onahudheriwe. Osayele wanona athuya ni mburo dhinawogiwa mBibliyani. Woone ele onileriwe nimakalelo mamodha anamaleba elembiwa. Malabo mamodha anamaleba a Evanjelyu yoleba ethu mbwenye namaleba mmodha ahalembiye.

14-15. Nnande addi olabihedha mwigumini mwehu dhithu nnilerihu mmalivuru a Evanjelyu?

¹⁴ Yanabili, oparihedhe mabasa mwigumini mwawo ele onileriwe mmalivuruni a Evanjelyu. (João 13:17) Wamala, wapwasedha ohudhera epaddi ya Evanjelyu, okalege nuwikoha wegi: ‘Ehikalawo ethu egihudhihe livuru nna na Evanjelyu ginafwanelelimi oparihedha mabasa mwigumini mwaga? Ginaalabihedhe aavi wihina gimukavihere muthu mmodha?’ Osayele omubuwela muthu omunonniwe. Vano, woona wihina mudhidhi ola bofwanelela, omwaaddele muthuya ele ohudheriwe mwamakalelo apama ni oodhivela.

¹⁵ Vano nnafuna noone makalelo menddi ohara dholaga ndha bili. Nnafuna nihudhere  wodhela yopadduwa ya maamukwele Yesu amoniliye mutempulu.

16. Kawogamo yopadduwa elebiwe va Marcos 12:41.

¹⁶ Ovahe thima yopadduwa ela. (Omwileri Marcos 12:41.) Karajhiha wubuwela. Nili mweri wa nisa labo na 11 yaka ya 33 M.W. — Enahala malabo vang’ono wihina akwe. Labo nna nantero avireliwe ahudhihaga mutempulu. Oliye oharahariwa vanlubale ni anamasogolela gereja. Amodha yowanganyedha wadhela kopolo dha Yesu. Vano omukohaga dhithu dhorusa wihina emwehe. (Mar. 11:27-33; 12:13-34) Nuwindo Yesu odhowa epaddi emodha ya Tempulu. Vakiratiliye owoona kofiri mwavokedhiwa korowa. Podi wera oliye aakiratile epaddi ya Tempulu enithaniwa nthaddo nahiyana. Oliye okirati obajha wasugwa athu evokedhaga korowadhiwa mukofirini. Oliye wawona aliba oorela owinjhiva yaali venvo evokedhaga korowadhiwa. Podi wera oliye ahaddamelavo ni owiwa oruma wa korowa ndhe dhimorelaga mukofirini.

17. Ethu baani enawogiwa va Marcos 12:42 wodhela maamukwele ole?

¹⁷ Omwileri Marcos 12:42. Voharela, wereya ethu yamuthukule murima Yesu. Omoona ‘maamukwele dhala ohawa,’ egumaye yaali mahosove. (Luc. 21:2) Podi wera kiyaali ethu yokweya ofwanya korowa wihina agule yojha yakadda labo. Naari dhigarive ndo, mowipiteya oliye wavokedhamo mukofirini anandalabwe abili, anandalabwe ala yahithabwa oyeva, bumwahaya avokedhaga mukofirini mune kayiweya. Yesu ahinona ethu avokenriye mukofirini — yaali anandalabwe abili enithaniwa lépton, korowa dhahanna muthengo wapamene mudhidhi yole. Muthengo wa korowa ele wahithabwa oyeva newene kiyaakwana ogulana mwanapera modha, balame dhathabwile okweya mudhidhi yole, dhamukweyela muliba ohawa ogula.

18. Moligana ni Marcos 12:43, 44, Yesu awogile ddi wodhela yovaha yamaamukwele?

¹⁸ Omwileri Marcos 12:43, 44. Yesu ahitikina vanlubale ni maamukwele ole. Bumwahaya adhe awithanege arumiwi aye wihina atonyihedhe erilena maamukwele egi: ‘Maamukwele ola divokedhile korowa yowinjhiva mukofirini wakwaranya athu atene.’ Vano Yesu owoga egi: ‘Atene [thabwathabwa aliba ooreela] evokedhilemo ndhe dhahanliwana, mbwenye maamukwele nuhawa waye ovokedhilemo dhithu dhatedhene dhanniyena wihina akalewo.’ Maamukwele ola oororomeleya nuwavokedhamo mukofirini ya mutempulu anandalabwe ale ahanliyena, era opweha egumi yaye mmadani mwa Yehova. — Sal. 26:3.

19. Ethu baani yunlubale nnahudherihu ni madhu a Yesu wodhela maamukwele ohawa?

¹⁹ Olabihedhe mwigumi mwawo yopadduwa ela. Wikohe: ‘Ginahudhera ddiniyani ni madhu a Yesu wodhela maamukwele ohawa?’ Kagirati wubuwele wodhela maamukwele ole. Mohanganyedha ofuna wenjhedhedha muthengo anvanhiye Yehova. Naari dhigarive ndo maamukwele ole erilena dhithu andiliye. Anvanhe Yehova dhithu anniyena. Teto Yesu ahinona wihina vamentoni va Yehova nvaho ole waali wathima. Vala nnofwanyavo ethu yunlubale nnafunihu ohudhera. Yehova onohagalala nanvahaga ele nnandihu — mabasa nnamparelihu ni kopolo dhehu dhatedhene vamodha ni murima wehu watene. (Mat. 22:37; Col. 3:23) Yehova onohagalala vanlubale neraga dhatedhene nnandihu wihina nimulabele. Yehova onodhiveliwa oonaga mudhidhi nnanongihu nadhowaga mmalalelo, omutugumanoni ni ethu-sithu eniwanana ni webedha waye.

20. Onalabihedhe aavi mwigumi mwawo ethu ohudheriwe wodhela maamukwele? Owoge yotajhiha.

 ²⁰ Onalabihedhe aavi yopadduwa yamamukwele ole mwigumini mwawo? Karajhiha wawubuwela addibila wanonniwe. Podi wera ehikalawo addibila amodha enakwerebeya mwaha ohanda omparela mabasa Yehova ninga mwafuneliwa. Motajhiha, akala ohumunona murogola owunnuwelavo onna makathamiho mwigumini mwaaye ni kanna kopolo dhowerana dhatedhene afuniye mmabasani oolaleya, okanne ebaribari wihina malabo mamodha oliye oniwoona ninga muthu ahinna thima. Podi wera onomubuwela ddibila anna oredda ohunamala. Woona wi oliye kananda odhowa omutugumanoni dhatedhene oNyumbani Yoomwene, eyo enomuthukulela okwerebeya. Woona ndo onere ddi? Wawaddele ‘dhithu dholibiha.’ (Efé. 4:29) Kaathakelemo dhithu dholibiha dhinanihudhiha yopadduwa ya maamukwele ole ohawa. Werana ndo onere wakavihera okanna ebaribari wihina Yehova anohagalala vanlubale neragana ethu-sithu nnandihu naarive nahakwanelihaga ninga mwafunelihu. (Pro. 15:23; 1 Tes. 5:11) Watamalelaga addibila mwaha wilibihera wewa, onowoniha wihina onohara pamadhene mweddelo wa Yesu.

21. Ethu baani othomiliwe werana?

²¹ Nnohagalala mwaha wa malivuru a Evanjelyu onaddelaga dhithu dhowinjhiva dhamwigumini mwa Yesu. Aliwa enonikavihera otajhiha pamadhene mweddelwaye. Ononamo aavi ohudhera wawo wavayeka obe ohudhera wa emudhi mwahapwasedhe pamadhene malivuru ala a Evanjelyu? Teto kudduwale wihina wegi opurelemo ethu-sithu mmalivuruni muna a Evanjelyu, enohoweleya ovaha egumi dhopadduwadha ni oparihedha mabasa mwigumi mwawo. Mbwenye omutajhiha baahi Yesu kinaakwana, enohoweleya ovuruwana ethu anawogiye. Yohudhera enadhawo nnafuna noone ethu nnahudherihu ni madhu oogomihera a Yesu agaali elabo yavati.