Vano nganna yaka 13 yowukulihaya, odhivela gannimina ni Yehova obajha oridha. Miyo wonaga wihina akwaga oskola yahikanna ofuru wowerana dhithu yafuniwa, mbwenye miyo naari. Gonelamo wihina dhawoga makolwaga ni malamulo a mBibliyani yera ogiyeleliha dhithu dhapama, ni wihina mabasa gamparelimi Yehova kayakweya. Goorumedha wihina Yehova ohukalawo, mbwenye wandana waaga nuliye wahiridha.

Miyo kagilibihera mmabasani olaleya, godhowesawo, mbwenye gadhowela wi ginaaridhe epaddi yomuzimuni. Gadhowaga mmalalelo kagiwegeredha, bumwahaya kayakweya olaleya newene ohogolowelawo wihina gawaredhele. Bumwahaya, kagakanna anamahudhera, eyo yogitotela owangonya yohuya mmalaleyelo. Gowikoha gegi, ‘Dhinandeya avi ndala, sumana dhatedhene, mweri dhatedhene odhowa mmalaleyelo?’

Vano ngakwanihe yaka 17, goofuna okanna ofuru wowerana dhithu dhagidhivela. Vano miyo omaga dhithudhaga, otamela wAwustraliya. Eyo yahawuukula vanlubale makolwaga. Yahathuwa-thuwiha,  mbwenye yubuwela wihina ginere odidela omulabela Yehova.

Nufiya wAwustraliya, epaddaaga yomuzimuni werega othabwaga oridha. Goomala sumana yantero gahidhowile omutugumanoni. Gowedda ni azombwe yaligana ni miyo, malabo mamodha yakala omutugumanoni, mbwenye mamodha yakala omang’welo, malabo mamodha yakala odiskotekani. Gasugwa mundduli ginowoona wi, moddo mmodha waali mwibaribarini, mmodhaya waali mwilaboni, yathabwa ogukuuliha sowihina kagahagalala newene mwibaribarini newene mwilaboni.

Nuuvira yaka bili, miyo omunona murogola dhaala, aagikavihere wubuwelela egumaga. Miyo gakala nyumba modhave naarogola dhaala atanu, vano iyo omwithana nameeddela mulogo vamodha nimwariye, Tamara, wihina ekale vaadevihu sumana modha. Mudhidhi mamune egeredhaga dhithu dha mmulogoni, Tamara akalesa ni iyo naaredhaga. Eyo yaali ethu yanihagalasa. Tamara aali muthu apama teto oothapanyeyana. Omunona muthu owithwelavo omuzimuni ninga yole mudhidhi mmodhave agaali muthu amasika yoogitikiniha.

Tamara aali muthu oviheya vanlubale. Odhivela waye ebaribari ni mabasa olaleya wowathukulela amodha okala ninga oliye. Mwaha womulabela Yehova nimurima watene oliye ohagalala, mbwenye miyo gakala owukuwene mwaha woridha epaddi yomuzimuni. Ekalelo yaye yapama ni ohagalala waye, wahigidahinya murima. Mweddelo waye wahigikavihera wubuwela ethu yofuneya: Yehova anafuna nimulabelege “nuuhagalala” vamodha “nuuthaba winlubale.” — Sal. 100:2.

Miyo gafuna gikanne ohagalala wimodhave anna Tamara, mbwenye yohoweleya wihina gisaddule egumaga. Wahivira mudhidhene, podi dhigarive ndo miyo obajha osaddula egumaga. Obajha wiwegeredha gadhowaga mmalaleyelo, mweri dhimodha goolaba ninga piyonera  ookavihera. Eyo yahigikavihera ohoova ni ororomela wihina ginere wakwaniha. Mwaha wokanna elemelelo yomulabihedha Bibliya mmalaleyelo, gaalaleyaga gohagalala vanlubale. Vasogolova, miyo okala piyonera ookavihera mweri dhatedhene.

Miyo obajha wandana ni addibila ayaka dhatedhene, yilibihera wihina emparele Yehova mabasa ootaleleya. Mweddelo wewa wahigikavihera osogoliha dhithu dhomuzimuni, ni owomihedha epaddaaga yomuzimuni. Vano mabasa oolaleya yogidhivela, vano miyo okala piyonera amudhidhi wamutene. Naarive ogavinre mudhidhi wowinjhivene ela yaali dila yobajha ofwanya ohagalala ninga wewula ni wonelamo wi ginokosa epaddi yammulogoni.

Nuuvira yaka modha, miyo omunona Alex, muthu apama ni amudhivela Yehova ni mabasa olaleya. Aali mudhaari okavihera teto aali piyonero muwari mwa yaka 6. Alex ahikavihera murudda wahoweleya anamalaleya, oMalawe. Wewule ahanona amisiyonariyu yamukavihere vanlubale, yomukongomedha opweha Omwene wa Mulugu mburo wobajha.

Yaka ya 2003, iyo otelana, vano iyo odhowagave nimulabelaga Yehova mudhidhi wamutene. Nahihudhera dhithu dhathima, vano Yehova onreeliha nimakalelo ohiyana-iyana.

Vano yaka ya 2009, iyo withaniwa wihina nakavihere ninga amisiyonariyu elabo yo Timor-Leste, luwani eng’ono yakala waddamela oIndoneziya. Mudhidhi mmodhave iyo otikina, ohagala teto othuwa-thuwa. Nuuvira mweri mitanu, iyo ofiya oDili, kapitale yo Timor-Leste.

Wihina nikavihere elabo yele, yohoweleya osaddula makalelo ehu. Dhithudha dhohiyana: mweddelo, ewogelo, yojha nimakaleloya a egumi. Bumwahaya nohowela osaddula egumihu. Nadhowa mmalaleyelo, nowalaleya athu ohawa, yahathabwile  ohudhera naaleya yonihiwa goyi. Owinjhiva yahikanna mabamba ni yohoseya mwaha wa koddo ni obure yoniwa. *

Olaleya wohagalasa! Motajhiha, labo nimodha miyo onfwanya namwali dhaala ayaka 13 ithaniwa Mariya. * Egumaye yoweddiha thagaraga. Oliye aali mwanakwadhuni, oliye kanonne ababe. Ninga azombwe owinjhiva yanna yaka dhimodhave, egumaye Mariya kiyanna osogolowa. Ginowubuwela wi labo dhaala, oliye ahikumiha mitori agaddelaga dhampadduwele, mbwenye woona wihina kagaanonne pama ewogelo yaye kagonelamo ethu awogiye. Miyo olobela wa Yehova wihina agikavihere omuhagalasa. Vano miyo obajha omwilerela dholebela dhamuhagalase. Yaka dhoharela miyo woona wihina ebaribari yahisaddula mubuwelwaye, ekalelo yaye ni egumi yaye. Oliye obaddiziwa, vano ohukanna anamahudhera aye. Peeno, Mariya ohukanna emudhi yamunroromeloni ni ohufwanya mburo waye.

Yehova onna oreeliha murudda wo Timor-Leste. Anamalaleya owinjhiva a elabo yele ehudhere ebaribari yaka kumi dhogomihera. Naari dhigarive ndo amodha apiyonero, adhaari okavihera ni anamaholela mulogo. Amodha enakavihera mabasa otapulela kambilinya dholapela, ekaviheraga wihina wikale dhoojha dhomuzimuni dhewogelo dha elabo yele. Gahihagalala mwaha wavuruwana yibaga, ni wawona ehagalalaga ni yunnuwelagavo omuzimuni.

Mutholo naakelihu oTimor-Leste wahihiyana ni mutholo nakenlihu wAwustraliya, mbwenye kaginonege egumi yohagalasa yooligana ni yela. Malabo mamodha, nopinyaminyiwa mmunibasini teto mwaha worama mburo, notaganyihedhiwa ni oba vamodha nimuddaanga dhamukwani dhadhowa ogulihiwa ofera. Labo nimodha, neraga ohudhiha, nyumbaya yothabwa oviha, mbamwa kamwazilimiwe, teto vahikala anaku. Naarive nimakathamiho ala, gowoga gegi: ‘Ela ethu yohagalasa!’

Gubuwelaga mundduli, ginomutamalela Mulugu mwaha makolwaga werana dhatedhene wihina egihudhihe wodhela Yehova ni egikavihere mudhidhi worusa wa ezombwe yaga. Enawogiwa va Provérbios 22:6 ehigereyela. Miyo vamodha ni Alex nnowahagalasa makolwaga. Aliwa ehihagalala mwaha woona makalelo nnalabihedhiwihu ni Yehova. Okuma yaka ya 2016, nnakavihera ninga anameeddela mulogo, elabo yo murudda wo Awustralasiya.

Wahinona wihina kagadhiveliwa mabasa olaleya? Vano mabasa olaleya enogidhivela! Miyo wonelamo wihina naarive nifwanyiwaga makathamiho obe dhehu dhineddelaga pama nnakanne ohagalala webaribari namulabela Yehova nimurima watene. Mohanganyedha yaka ndha 18 dhivirile gimulabelaga Yehova vamodha ni Alex, dhinogihagalasa vanlubale. Vano ginowonelamo wi Davidi awoga ebaribari adhe alebege madhu ala egi: ‘Atene enuwonani ninga nikungu nothawelawo enere ohagalala; Othaba wewa kunadha omala. Ale enadhivela ndina nenyu enere ohagalala.’ — Sal. 5:11.