OHUDHERA 17
Yehova onowudhivela!
‘Yehova onodhivela nlogo naaye.’ — SAL. 149:4.
JHIBO 108 O Amor Leal de Jeová
DHITHU NNAHUDHERIHU *
Babihu oodhulu “onomudhivela” kadda muthu wa iyo (Osugwe ddima 1)
1. Ethu baani Yehova ananoniyena?
YEHOVA MULUGU ‘onodhivela nlogo naaye.’ (Sal. 149:4) Wawiwa madhu ala enonihagalasa! Yehova ohunona dhikalelo dhehu, onowoona kopolo ninnihuna ni ononikavihera wihina nandane nuliye. Nakalave oororomeleya Yehova enakale mukwihu amalabo amatene! — João 6:44.
2. Mwahaya bwaddi athu amodha egarusa orumedha wi Yehova onowadhivela?
2 Amodhaya podi owoga yegi: ‘Miyo ginona wi Yehova onadhivela nlogo naaye ninga nikuru, mbwenye ginakanne addi ebaribari wihina ohukanna odhivela ni miyo?’ Mwahaya bwaddi athu amodha egaanganyedha? Oksaana *, unnuwile ni goyi, onowoga egi: “Miyo nubaddiziwa, gahihagalala vanlubale nuwindo miyo oroma olaba ninga piyonera. Mbwenye nuuvira yaka 15, miyo obajha wubuwela dhego dhabure dhaagipadduwele ngaali mwaana. Vano miyo wubuwela, podi wera Yehova ohuginyanyala newene kanna odhivela ni miyo.” Piyonera mmodha ithaniwa Yuwa, onile goyi agaali mwaana onowoga egi: “Miyo gabaddiziwe wihina gimuhagalase Yehova, mbwenye mmurimani mwaga gubuwela wi Yehova kanadha akanna odhivela ni miyo.”
3. Muwari mwa yohudhera ela nnaasuze ddi?
3 Ninga yereyile ni arogola ala abili, we podi omudhivelaga Yehova mbwenye wanganyedhaga akala oliye onowudhivela. Yohudhera ela, enere wawakula makoho menddi: Yahinuwanganyedhiha wi Yehova onowudhivela ddi? Enaanikavihere ddi ogonjhiha mubuwelo ola wabure? Nnere wawakula makoho ala.
WANGANYEDHA ODHIVELA WA YEHOVA ETHU YOWOPIHA
4. Ekalele ddi ethu yowopiha wanganyedha odhivela wa Mulugu?
4 Odhivela funanivaha kopolo wowerana ethu-sithu. Okanna ebaribari wihina Yehova ononidhivela ni ononikavihera, winere onithukulela omulabela egumihu yatene naari nifwanyiwaga makathamiho. Mohiyana ni mubuwelo yola, podi okanna ebaribari narumedhaga wi Mulugu kananipwatha, wubuwela ndo ‘onere oyelela kopolo.’ (Pro. 24:10) Nakwerebeya, teto nroromelo nehu navuguwa mwaha wowanganyedha odhivela wa Mulugu, nnakale ejhelo ya Saddana. — Efé. 6:16.
5. Yereye ddi ni addibila amodha yanganyedha odhivela wa Yehova?
5 Wanganyedha wihivugula nroromelo naaddibilihu. Motajhiha, namaholela mulogo dhala anithaniwa James ohuwoga egi: “Miyo gakavihera oBeteli ni mulogo dhaala wawoga ewogelo yamada, miyo obajha wanganyedha akala Yehova ohagalala ni mabasa gamparelimi. Gahifiyedha wikoha gegi: ‘Yehova anowavuruwana malobelo aaga?’” Eva, murogola dhaala anaapara mabasa amudhidhi wamutene, anosoriha: “Miyo ginowonelamo wi wanganyedha odhivela wa Yehova ethu yowopiha, mwaha kadda labo podi wuthukulela okwerebeya. Eyo podi wuthukulela ovugula efunelo onniwena ni dhego dhomuzimuni vamodha nuuhagalala onakanniwena waaparaga mabasa a Yehova.” Piyonero anithaniwa Michael ni ali namaholela mulogo anowoga egi: “Akala onowanganyedha wihina Mulugu onowuthuwa-thuwela vang’ono vang’ono onowambela omusukuma Yehova.”
6. Naambela wanganyedha odhivela wa Mulugu, enohoweleya nere ddi?
6 Yapadduwele addibila ala enowoniha wihina mubuwelo wabure podi onikwerebeyiha. Nnere ddi naambela okanna mubuwelo wabure? Niigaremo mubuwelo oyo wahinaninyowele! Nimulobe Yehova wihina aakakanihe ‘othuwathuwa wehu’ ni ‘murenddele wa Mulugu, murenddele oyo onere okurumusa murima dhehu ni yubuwelo wehu.’ (Sal. 139:23, osugwe; Fil. 4:6, 7) Kuddiwale wihina kuli weka. Addibila ni arogola amodha enna owanana mubuwelo mmodhave onniwena. Naadhariya a Yehova akale yowanana mubuwelo yoyo. Kasugwa ethu nnafunihu ohudhera ni murumiwi Pawulo.
ETHU NNAHUDHERIHU NI MURUMIWI PAWULO
7. Makathamiho baani yaafwannye murumiwi Pawulo?
7 Malabo mamodha, mutholo dhinniwena dhinowunyemela, ofiyedhaga wurusa wakwaniha dhatedhene? Onere wonelamo empadduwele murumiwi Pawulo. Oliye kathuwa-thuwela mulogove akabeleliye baahi, mbwenye othuwa-thuwela ‘mulogo dhatedhene.’ (2 Cor. 11:23-28) We ohukanna oredda wahinayila onuyeleliha ohagalala? Pawulo ahikanna ‘mwinga mmwiilini,’ podi wera mwinga ola waali oredda wamoniha goyi. Pawulo oogana ninga agoobowile. (2 Cor. 12:7-10) Ohulogomana wawo winowukwerebeyiha? Akala siyeyo okanne ebaribari wi Pawulo yompadduwela emodhave. Oliye ahifiyedha owoga egi ‘miyo dithambwe othega,’ mwahaya bowi owanana ohulogomana waye. — Rom. 7:21-24.
8. Yamukavihere Pawulo wagonjhiha makathamiho aye ddiniyani?
8 Pawulo ofwanyiwa dhoweha dhamukwerebeyiha, mbwenye kaaselele omulabela Yehova. Yanvaha kopolo ddiniyani? Naarive anonaga wi aali muthu ohulogomana, Pawulo ahikanna nroromelo nohithikeya ni mukutho wa Yesu. Oliye ahikanna nroromelo ni mpaganyo wa Yesu awongeye egihina ‘aatene enaamuroromele, enere okanna egumi yohimala.’ (João 3:16; Rom. 6:23) Mwebaribarene Pawulo ahikanna nroromelo ni mukutho wa Yesu. Oliye kanganyedha wihina Yehova anofuna walevelela naleya ethegile vanlubale, mbwenye enofiyedha othwaruwa. — Sal. 86:5.
9. Madhu a Pawulo eli va Gálatas 2:20 enanihudhiha ddi?
9 Pawulo kanganyedha wihina Mulugu onomudhivela, mwaha ahimuruma mwanaye Yesu wihina amukwele. (Omwileri Gálatas 2:20.) Kasugwa madhu oolibiha awonge Pawulo omagomihedho wa versu ela: ‘Mwaana a Mulugu, ohugidhivela ofiyedha ogikwela.’ Pawulo kuubuwela wi Mulugu anaadhivela athu vang’onove, oliye kuubuwela egi, ‘Ginowoona wihina Yehova anowadhivela addibilaga, mbwenye kanadha agidhivela miyo.’ Pawulo ahawubusedha akudda Roma egihina: ‘Kiristu anikwele iyo naarive nigaali athu oothega.’ (Rom. 5:8) Odhivela wa Yehova kunna manddile!
10. Romanos 8:38, 39 ananihudhiha ddi?
10 Omwileri Romanos 8:38, 39. Pawulo kanganyedha odhivela winlubale wa Mulugu. Oliye ahaleba madhu ala enihina kayivo ethu ‘enawedhe onimwalaniha ni odhivela wa Mulugu.’ Pawulo ahinona wi Yehova ahavilelana amwaana Ezarayeli, teto oliye owubuwela makalelo aweddeliye thagaraga. Iyo podi wagwaddela madhu a Pawulo enafwanyeya va Romanos negihina, ‘Akala Yehova ohumuruma mwanaye wihina agikwele, kavo ethu enaganganyedhiha wihina oliye onogidhivela.’ — Rom. 8:32.
Yehova kanantoriha mwaha dhothega nerilihuna kale, mbwenye mwaha wa ndhe nnerihuna ovanene ni nnafunihu werana osogolo (Osugwe ddima 11) *
11. Naarive Pawulo agerilena dhothega dhinafwanyeya va 1 Timóteo 1:12-15, yanvaha ebaribari ddi wi Yehova omudhivela?
11 Omwileri 1 Timóteo 1:12-15. Podi wera Pawulo owubuwela dhithu dhabure eriliyena kale. Ofiyedha owoga wi aali namathega “munlubale”. Ahinakale mukiristawu, owaharahara makiristawu murudda dhatedhene, amodha owavokedha mukambura, amodha orumedha wihina epiwe. (At. 26:10, 11) Ononamo aavi murumiwi Pawulo anfwanya mwaana mmutugumanoni aali mwanakwadhuni mwaha oliye wapa makolwaye? Mohanganyedha owukuwa vanlubale. Pawulo owukuwa mwaha wa dhego eriliyena, mbwenye kaanda osaddula dhithu eriliyena. Oliye orumedha wihina Yesu ahimukwela. Pawulo ohuleba egi: ‘Nimahala ohufwanelela a Mulugu, gili murumiwi.’ (1 Cor. 15:3, 10) Ethu baani nnahudherihu? Orumedhe wi Yesu ohukwela, ni wodhela oliye enowedheya okanna wandana wapama ni Yehova. (At. 3:19) Podi wera wubuwelaga dhithu weriliwena kale mubuwelo onowunyemela, naari ogahudhere ebaribari. Mbwenye wubuwelege wihina Yehova kanantoriha mwaha dhothega nerilihuna kale, mbwenye mwaha wa ndhe nnerihuna ovanene ni nnafunihu werana osogolo. — Isa. 1:18.
12. Naambela wubuwela wi kaninna thima obe kannafwanelela odhiveliwa, livuru na 1 João 3:19, 20 nnaanikavihere aavi?
12 Wubuwelaga wihina Yesu ohukwa wihina akunele dhothega dhawo, podi wera onowoga wegi, ‘Miyo kaginafwanelela mukutho ninga yola wathima.’ Mwahaya bwaddi ogubuwela ndo? Mwaha wihina murima wehu podi onleketha ofiyedha onubuwelihaga wi kanili yego obe kannafwanelela odhiveliwa. (Omwileri 1 João 3:19, 20.) Naambela wubuwela ndo, kaniddiwaale wihina ‘Mulugu dimunlubale opitha murima wehu.’ Odhivela ni olevelela wa Babihu oodhulu, onookwaranya mubuwelo dhehu dhabure. Nnofwanelela orumedha wi Yehova ononidhivela. Akala siyeyo, nikanne elemelelo yowawileri madhu a Mulugu malabwene, olobela ni orumedha nikavihero naaddibilihu. Mwahaya bwaddi dhithu ndha dhikala dhofuneya?
OMUHUDHERA BIBLIYA, NLOBELO NNIKAVIHERO NAADDIBILA NNANIKAVIHERA AAVI?
13. Omuhudhera Bibliya winanikavihera aavi? (Osugwe kwaduru “ Athu ekaviheriwe ni madhu a Mulugu.”)
13 Okanne elemelelo yomuhudhera Bibliya malabo amatene, ndo onerege othabwa onona dhikalelo dhapama dha Yehova. Onere wonelamo makalelo Mulugu anudhiveliye. Kadda labo wapenddaga epaddi wileriliwe mBibliyani, podi wukavihera, ‘wogolela dhithu’ dhili mmubuweloni ni mmurimani mwawo. (2 Tim. 3:16) Namaholela mulogo dhaala anithaniwa Kevin, anna mubuwelo woohivaha thima ohuwoga egi: “Wileri livuru na Salmos 103 ni opendda, winogikavihera opweha mubuwelo waaga vamburoni, ni wonelamo ethu Yehova anagubuweliyena.” Eva asorihiwe mundduli, ohuwoga egi: “Omagomihedho wa kadda labo ginowaja mudhidhi wihina gipendde dhithu dhinamuhagalasa Yehova, eyo enoogivaha murenddele ni enowenjhedhedha nroromelo naaga.”
14. Nlobelo nnanikavihera nimakalelo baani?
14 Mudidele olobela. (1 Tes. 5:17) Nafunaga wandana pamadhene ni muthu, nnohowela othapanya nuliye malabwene, nimwaddelaga ekalelo yehu. Emodhave enapadduwa ni wandana wehu ni Yehova. Namwaddelaga Yehova dhego nnubuwelihu, makalelo nilihu, dhego dhinanithuwathuwiha, nnowoniha wihina nnomuroromela teto anonidhivela. (Sal. 94:17-19; 1 João 5:14, 15) Yuwa, asorihiwe mundduli, ohuwoga egi: “Galobelaga, kaginamwaddela baahi dhego dhigipadduwele kadda labo, mbwenye ginonfugulela murima waaga Yehova ni ginoomuthakelamo makalelo gilimi. Vang’no vang’ono kaginamona Yehova ninga muliba empereza, mbwenye ninga babi anaadhivela anaaye.” — Osugwe kwaduru “ Ohileri livuru nna?”
15. Yehova ononiha aavi wi onomuthuwathuwela kadda muthu wa iyo?
15 Orumedhe nikavihero naaddibila; Aliwa mukono anivahile Yehova. (Tia. 1:17) Babihu oodhulu onowoniha wi onomuthuwathuwela kadda muthu wa iyo, mwaha onivaha emudhi yomuzimuni yaaddibila ni arogola enoniha odhivela ‘mudhidhi wamutene.’ (Pro. 17:17) Pawulo alebelaga akudda kolosenses, ahasoriha makiristawu yamukavihere. Pawulo wera aliwa ‘bimathuwa enagilibiha.’ (Col. 4:10, 11) Teto ni Yesuya ahihowela nikavihero naakwaye ni nangero. Oliye ahatamalela okunamo.— Luc. 22:28, 43.
16. Addibila enaanikavihere addi wandana ni Yehova?
16 Mukono uvahile Yehova onowutxova? Kamwaddele ddibila owithwa omuzimuni makathamiho enuufwanya, werana eyo kinatapulela wi kunna nroromelo nooliba; mbwenye podi okala ethu enuulibihe. Kasugwa yereye ni James asorihiwe omambelelowene, oliye ohuwoga egi: “Okanna wandana wapama naaddibila owithwa omuzimuni nikavihero napama wa epaddi yaga ni waaliwa. Gakwerebeya mwaha mubuwelo wabure, addibila ala, enogipwasedha ogivuruwana ni kinadduwala owoga wi enogidhivela. Mwaha waaliwa ginowedha woona wi Yehova onogithuwathuwela, ohiya eyo onogidhivela.” Mwebaribarene, wandana naaddibila vamodha naarogola ethu yapama!
ONAHIYE WANDANA ONNIWENA NI YEHOVA
17-18. Anafwanelela ovuruwaniwa baani, ki mwahaya bwaddi?
17 Saddana anagana ninga ohiye werana eli yapama. Oliye anafuna orumedhe wi Yehova kanuudhivela, obe vamentoni vaye we kunna mabasa. Mbwenye ninga nonilihu mundduli, dhatedhene ndo anoninkedha.
18 Yehova onowudhivela vanlubale. Wamwiwelelaga oliye ‘anerege othabwa wudhivela’ malabo amatene ninga Yesu. (João 15:10) Mowindo, kunvuruwane Saddana, newene kupwathe mubuwelo wawo wambela wunyemela. Ohiya eyo, onvuruwane Yehova, anawona mabasa amatene onapariwe. Kuwanganyedhe wihina Yehova ‘ohukanna odhivela ni nlogo naaye,’ eyo enatapulela wi niweya anowuudhivela!
JHIBO 141 O Milagre da Vida
^ paragarafu 5 Addibila ni arogola amodha enowarusa orumedha wihina Yehova onowadhivela. Yohudhera ela, nnere woona mwahaya bwaddi nihanganyedhaga wi Yehova ononidhivela. Vadhuluva, nnere woona ethu baani enaanikavihere akala enonirusa orumedha wi Mulugu ohukanna odhivela ni iyo.
^ paragarafu 2 Mandina mamodha ehisadduliwa.
^ paragarafu 67 FOTU EPADDI: Ahinakale mukiristawu, Pawulo owaharahara ni ahavokedha mukambura makiristawu owinjhiva. Nuwonelamo wi Yesu ahimukwela, Pawulo osaddula mubuwelwaye. Vano oliye walibihaga addibila, vamodha naaleya yaali anakwadhuni mwaha wihina ahapa makolwiwa.
