1924 — Yaka 100 mundduli
“OMAMBELELO wa yaka, mudhidhi wapama wihina kadda mudhaari Nabwiya a wenjhedhedhe mabasa anampareliye Yehova,” siyeyo Boletim, a a mweri wa Janeiro a 1924 aawogiliye. Muwari mwa yaka yele, anamahudhera a Bibiliya oparihedha mabasa yolaga ele mwamakalelo menli: Wodhela osayela dhipano dholaleyana muthenga Dhomwene ni wapara mabasa ala nuuliba murima.
EPANO YOLALEYANA MUTHENGA DHOMWENE — RADIYU
Dhahivira yaka dhowinjhiva addibila yahanna Beteli emagaga perediyu yithaniwa WBBR, yaali kanale ya radiyu yafwanyeya elabo ya Staten Island, luwani yoNova Yorki. Numala wegeredha mburoya, aliwa omagavo perediyu enlubale wihina ekalegemo addibila yalabegemo. Teto aliwa omaga perediyu emodhaya dhakalegemo dhipano yalabegiwana. Nuwindo, addibila wegeredha dhipano yahoweliwa wihina “yambele olaba.” Mbwenye yahifwanyiwa makathamiho ohiyana-iyana.
Ethu yobajha yeriliwana yaali omwistalari antena anvuwihege radiyuya. Eyo kiyali ethu yokweya, mwaha antenaya ahilapa mameturu owakwana 91, teto yohowela postu biili dhanna malapelo owakwana meturu 61. Dila yobajha naaxinxihu dhithudha kadhaneddele pama, mbwenye addibila yahimuroromela Yehova, mwaha wayeyo, nahanda omwistalari antena ole. Ddibila dhaala aalabile porojetu ela, ahiwoga egi: “Dila yobajha naxinxihu dhahere dhineddela pama, iyo nere owoga nuuwithukula wi dihiyo andile omwistalari antena ole.” Mbwenye addibila yanvahe nthithimiho naatenene Yehova. Naarive dhigaali ndo, yahikalawo makathamiho mamodha nahowelihu wagonjhiha.
Nimwistalarigi antena a radiyu WBBR
Mudhidhi yole, radiyu era wambelawene olabihedhiwa. Bumwahaya kadhaliwo dhipano dhapama wihina nigule. Vano addibila wanda ogula epano dhaala yonvuwihana radiyu yanna kopolo dhowakwana 500 wati, naarive egaali yakale, yaali yapamene. Teto ohiya addibila omugula mikorofoni muxa, aliwa yalabihedha telefoni yaali yokweya olabana mudhidhi yole. Vano mweri wa Fevereiro labo dhaala mahiyu, addibila othoma oxixa oligari dhipano dhaatedhene ndhe. Woona wihina yohowela openda dhithudha wodhela owoga muselu bu muselu, addibila othoma oxixa wiiba jhibo Dhomwene. Ddibila Ernest Lowe, kanadduwalege ethu yapadduwili mudhidhi yibaga. Aliwa wakela xamada ya juwiji Rutherford, b avuruwana jhibo ndhe dhiibiwa muradiyoni oliye agaali oBrooklyn, walapenle makilometuru 25.
Vano ddibila Rutherford owoga mwamakalelo owaredha eegi: “Mmaalewo, munoonyagula munakala ninga aapaka ennunla!” Addibila ale yiiba okala manyazove, nuwindo othoma onfuga radiyuya. Naarive dhigaali ndo, aliwa wonelamo wihina yaali owiwegeredhene wihina yambele ovuwiha muselu wobajha muradiyuni mune.
Labo na 24 a Fevereiro yaka ya 1924, yambelagawene ovuwiha muselu wobajha, ddibila Rutherford owoga muradiyuni wihina radiyu ole ithaniwege “ovuwiha Omwene wa Mesiya.” Oliye owoga wihina radiyu ole aasasanyiwe wihina “aakavihere athu aatene, naaleya enna gereja ni enarumedha dhithu dhimodha wihina yonelemo mudhidhi nnakalihu mowiwanana ni ele enawoga Bibiliya.”
Moono wemara: Ddibila Rutherford agaali wistudiyuni a radiyu a WBBR
Moono wojha: Dhipano dhalabihedhiwe wihina asasanyiwena radiyu
Radiyu ole ookavihera vanlubale, mwaha ahilabihedhiwa muwari mwa yaka 33 wihina yavuwihegena aporogarama ohiyana-iyana a nikuru na Yehova.
OVUWIHA MUSELU DHOWOOTA DHA GEREJA
Mweri wa Julho yaka ya 1924, anamahudhera Bibiliya otugumana elabo yoKolombo Ohiyo wihina yerena musonkano. Vamusonkanoni vale, yahidha addibila a elabo yaatene wihina evuruwane musonkano ole ni dhiwogelo dhohiyana-iyana, ninga: Arabe, Engeleji, Efranseji, Ehalemawu, Egeregu, Ehungaru, Ehitaliyano, Elituwano, Epoloneji, Erusu, Eskandinaviya ni Ekaraniyano. Dhipaddi dhimodha dha Porogarama ole dhavuwihiye muradiyuni. Ohiya eyo, addibila oloba empereza dhaala yithaniwa Ohio State yaalebesa majornale wi yakavihere waaleba artigu a kadda labo a musonkano ole.
Yaka ya 1924 omusonkanoni oKolumbo, Ohio
Txinayi 24 a Julho, addibila ookwaranya 5 000 yaadhiile woona musonkano, odhowa oolaleya murudda yole waali musonkano ole. Aliwa yahanda wagawa malivuru yaali neena nuwakwana 30 000, teto yahifugula mbwabwadda ni mbwabwadda wa ohudhera wa Bibiliya. Namasugwera dhaala ahiwoga wihina nne naali “nlabo noohagalasa na musonkano ole.”
Ethu emodhaya yathima, yaali ele ddibila Rutherford awogiliye Xixano nlabo na 25 a Julho. Ddibila Rutherford owoga mwaha waye wavathaddo nuuliba murima. Oliye wileri dukumento yawoga wodhela dhigereja dhowoota. Dukumentoya yawoga wihina “anamaholela gereja, mapolitiku ni memperezariyu, yowerana dhithu dhaathukulela athu ohufuna ohudhera ebaribari wodhela Omwene, Mulugu anafuniye olabihedha wihina areelihena athu.” Teto dukumento ele, owoga wihina “alobwana ale kayerana dhithu dhapama mwaha yakavihera nikuru na malogo yawoga wihina ‘makalelo ewa oothonga yakaviheriwa ni Mulugu.’” Anamahudhera Bibiliya yohowela oliba murima wihina evuwihe muthenga ola wotoriha.
Namasugwera dhaala ahiwoga wodhela musonkano ole eegi: “Nikuru nne ning’ono na Nabwiya naatugumane vamusonkanoni vale oKolombo, kadda muthu ahogolowelege elabwaaye, nroromelo naye nigaali nolibanene . . . , yaali owiwegeredhene wihina yande ogonjhiha ethu-sithu amwiddani ewa yafuniwa wawerela.” Ddibila Leo Claus, oonile mutugumano ole, ahiwoga eegi: “Iyo nadhowile nigaali oolibeene wihina naande olaleya muthenga ole wotoriha murudda wehu.”
Kopiya dha muselu dhatoriha dhigereja dhowoota
Mweri wa Outubro, anamahudhera a Bibiliya obajha ogawa kopiya ddibila Rutherford iileriliye dhawoga wodhela gereja dhowoota. Luwani dhaala eng’ono enithaniwa Kleveland enafwanyeya elabo yOklahoma, ddibila Frank Jhonison wagawa mafolyetu aye muwari mwa mutala 20, ohunathi ofiya mudhidhi wapanganiwa wihina agumane ni addibila amodha. Alobwana dhaala a luwani yeele yaahitakaleliwa vanlubale, mwaha wa muthenga alaleya ddibila Frank, teto aliwa obajha omusayela. Mwaha wa yeyo, kayali yokweya oliye wimela wihina aajhehege addibila amodha ofiya. Vano oliye othoma wipita gereja yaali waddamela mburo wapanganiwavo ogumanela. Vano woona wihina mugereja mune kamwali aathu, oliye ohiya kopiya ngasi-ngasi muwari mwa Bibiliya a pastori, teto kadda mpaddo dha mugereja mune oliye werana emodhave mowaguva. Woona wihina ahihalana mwana mudhidhi, oliye othawela egereja emodha ni werana emodhave ni gereja biili.
Ddibila Frank ohogolowela mburo yathomiliwa ogumana naaddibila amodha athamagaga. Oliye wipita mburo wagulihiwa gasolina, ajhehaga wawoona alobwana ale yamuharahara akala yere okumelela. Vano alobwana ale yamuharahara ovira osogolo wa mburo ole, mbwenye kimoonile. Mohilegela addibila yalaleya waddamela mburo yole, ofiya ni omuthukula ddibila Frank.
Ddibila mmodha anowoga yapadduwe eegi: “Mudhidhi nivenyagawo luwani yeele, iyo ovira gereja ndhe ddibila Frank ahiliye kopiya. Kadda gereja navirihu nowawona athu owinjhiva yilerigi kopiya ndhe. Amodha yere wileri, amodha yamoniha pastori ewa. Naali neena nuhiddiwa, iyo nnomutamalela vanlubale Yehova mwaha onibarela ni onikavihera wathawa amwiddani ale a Omwene.”
ANAMAHUDHERA A BIBILIYA ELALEYAGA NUULIBA MURIMA DHILABO DHIMODHA
Jozefi Krett
Dhilabo dhimodha, addibila amodha yanna olaleya muthenga Dhomwene nuuliba murima. Omadhelo nduwa wa elabo yoFransa, ddibila Jozefi Kreti ahalaleya alobwana dhaala yatiba mabwe yadhela elabo yoPoloniya. Ohiya eyo, addibila wawithana athu a murudda yole wihina edhe evuruwane mwaha ddibila Jozefi afuniye owoga wanna musolo: “Mohilegela anookwa enere ovenyihiwa.” Vano pastori dhaala wawaddela athu a mwigereja mwaya wihina enadhowe ovuruwana mwaha ole. Mbwenye yahipadduwa ethu yootikiniha, athu ookwaranya 5 000 vamodha ni pastori ole, odhowa wi yavuruwane mwaha wa ddibila Jozefi. Vano ddibila Jozefi omuloba pastori ole wihina awoge dhithu aarumedhiye, mbwenye oliye okoodda. Mwaha ole nuumala ddibila Jozefi wavaha mafolyetu athu aatene yadhile woona mutugumano, mwaha aliwa yahikanna dala yowavuruwana madhu a Mulugu. — Amós 8:11.
Claude Brown
Elabo yo Afirika ddibila Claude Brown, wambela olaleya muthenga dhapama epaddi ya Kosta ya ouro, peeno enithaniwa Gana. Mwaha oliye owoga mwaha dhowinjhiva ni wagawela athu owinjhiva malivuru, yaheriha wihina athu owinjhiva a elabo yeele orumedha ebaribari mowaguva. Muthu mmodha avuruwane mwaha wa ddibila Claude, aali mulobwana dhaala ithaniwa Jhoni Blankison. Jhoni mudhidhi yole, akosa kursu yokala mediku, mbwenye oliye wonelamo wihina ahifwanya ebaribari. Oliye anowoga egi: “Nufwanya ebaribari, gahihagalala vanlubale ni gowoga ni athu mudhidhi wamutene mburo gakosimiyo kursu ele yomediku.”
Jhoni Blankson
Jhoni ohudhera wihina Bibiliya kanahudhiha wi Mulugu elimo athu araru. Vano nlabo dhaala oliye odhowa egereja ya Anglikana wihina amukohe padiri wodhela muselu ole. Nuumukoha, padiri ole omuthamagiha egi: “Ogivenyelevo, we kuli mukiristawu, oli Saddana!”
Agafile vade vaye, Jhoni omulebela karta padiri ole amulobaga wihina ethapanyedhe muselu ole vamodha. Padiri ole omwaddela wi egumane okambilinya wa purusori akosiyewo kursu. Nufiya okambilinya, purusori ole omukoha akala duliye aalembe karta nne, amulebelaga padiri.
Jhoni, omwaakula egi: “Hee di miyo nabwiya.”
Purusori ole omuwaddihedha Jhoni wihina aleba karta, alobaga wi padiri ole amulevelele. Vano Jhoni orumedha oleba eegi:
“Nabwiya, purusoraga agilobile wihina miyo gilebe karta nna wihina mugilevelele. Teto gihithoma werana eyo, mbwenye mwarumedha wihina dhithu munahudhihinyu sowoota.”
Agaali ootikineene, purusori ole omukoha Jhoni egi: “We ohukanna ebaribari wi dhithu onafuniwe oleba sidhendho?”
Jhoni omwaakula egi: Hee Nabwiya. Kaginafuna oleba ethu emodhaya.”
Purusori ole owoga egi: “We onere wigariwa eskola ela. Ononamo wi onere odidele ohudhera eskola yeela, wamuwogela madhu ninga yala padiri anakaviheriwa ni anamathonga?”
Vano Jhoni omukoha purusori ole egi: Purusori nyu mwasunzihaga, vano nahonelagamo museluya, kannukohani?”
“Purusori ole omwakula egi: Hee munogikoha.”
“Siyeyo epadduwile ni miyo vamodha ni padiri. Oliye eere onihudhiha Bibiliya, vano miyo omukoha. Akala oliye kandile wakula nikoho nne, mwahaya bwaddi ngahowela omuloba wihina agilevelele?”
Jhoni kathamagihiwe oskola wule, teto kalebile karta nne.
ANAMAHUDHERA A BIBILIYA YAALI ETHAKWITHAKWIVE WIHINA EDHOWEGEVE YAPARAGA MABASA
Namasugwera dhaala ahawoga mabasa aatene yapariwe yaka yeele eegi: “Iyo podi wawoga madhu mamodhave awoge mwene Davidi egi: ‘Nyu munere ogivaha kopolo wihina giwanihe koddo.’ (Sal. 18:39) Ela yaali yaka yohagalasa mwaha nahona nlada na Nabwiya nnikaviheraga. . . Teto nlogo na Yehova nivelenle . . . nahihagalala mwaha ovaha onamoona webaribari.”
Omagomihedho wa yaka yeele, addibila ompandda porogarama wihina asasanyiwe radiyu mmodha wi alaleyiwegena muthenga Dhomwene. Vano aliwa omaga nyumba emodhaya ya radiyu elabo yo Xikago. Radiyu ole ovahiwa ndina na MADHU, mwaha eerege okavihera walaleya Madhu a Mulugu. Teto radiyu ola asasanyiwe ni dhipano dhapama, ohiyana ni radiyu oobajha. Ohiya eyo ahikanna kopolo dhowakwana 5 000 wati. Ndala muselu Dhomwene dhavuwihiwa dhoofiya wolapela ni dhoofiya oKanada.
Yaka ya 1925, Yehova wakavihera anamahudhera a Bibiliya woneleyamo yolebela ya Ovuhulela kapitulu 12. Wa amodha ele yakala ninga nibwe nookwakwathusa, mbwenye yahihagalala vanlubale mwaha wonelamo dhithu dhipadduwile odhulu ni makalelo yolebela ele yapathiwa nlogo na Mulugu nili velaboni yavati.
