1-2. a) Makoho baani iyo aatene malabo mamodha nnakannihuna? b) Ohudhera wula nnoone ddi?

 IYO aatene malabo mamodha nnowikoha a akala nihikanna thima vamentoni va Yehova obe akala dhothoma nerilihuna kale dhaali dhapama obe naari. Motajhiha, kamubuwele muzombwe ali namalaleya ohibaddiziwa, mbwenye ananganyedha akala mwebaribarene Yehova anomuthuwathuwela. Mwaha wa oliye wanganyedha, eyo podi omuthukulela ohifuna obaddiziwa. Obe kamubuwele ddibila owunnuwelavo aathomme agaali muzombwene opweha efunelo ya Yehova mwigumini mwaaye, ohiya wapara mabasa yanvahege korowa dhowinjhiva. Mbwenye vano, anaapara mabasa enanvaha korowa vang’ono wihina akabelelana emudhaye. Mwaha wa yeyo, oliye podi wubuwelaga akala yothoma eriliyena agaali muzombwe yaali yapama. Teto kamubuwele murogola ali mwanakalaba ahinna kopolo ninga anniyena agaali muzombwe, oliye podi wukuuwa mwaha ohanda werana dhithu andiye werana mudhidhi agaali namwali. Niweya, enowupadduwelaga ethu ninga yeela? Onowanganyedha akala Yehova anowuthuwathuwela? Onowanganyedha akala ohuherana yothoma yapama mwaha ohiya dhithu dhowinjhiva wihina omulabela Yehova baahi? Obe onowanganyedha akala Yehova anofuna wulabihadhave?

² Nakanna elemelelo yowanganyedha dhithu ninga dhendha, nroromelo nehu podi oridhiha ofiyedha onthukulela ohiya omulabela Yehova. Ohudhera wula, nnere wonelamo makalelo malagano amBibiliyani enanikaviheriwa, nambela wanganyedha negi: (1) Mwebaribarene Yehova anogithuwathuwela, (2) yothoma gerilimina ngaali muzombwe yaali yapama ni (3) Yehova anofuna ogilabihadhave?

 ENAANIKAVIHERE DDI NAMBELA WANGANYEDHA?

3. Ddiniyani enaanikavihere nambela wanganyedha?

³ Ethu enaanikavihere naambela wanganyedha, fusayela mBibiliyani dhowakula dha dhithu nnanganyedhihu. Neerana eyo, nnere okala ooliba epaddi yomuzimuni, nnere olibiha wandana ninnihuna ni Yehova ni nnere okala “oowimmelene txithi munroromeloni.” — 1 Kor. 16:13.

4. ‘Orajhiha opendda kadda ethu’ enatapulela ddi? (1 Tesalonisense 5:21)

⁴ Omwileri 1 Tesalonisense 5:21. We ohonelamo wihina Bibiliya anonikongomedha wi ‘nirajhihege opendda kadda ethu?’ Eyo enatapulela ddi? Enatapulela wi nnohowela okanna ebaribari wi dhithu dhatedhene dhinafwanyeya mBibiliyani sebaribari. Iyo podi okanna ebaribari ela wodhela oliganiha dhithu nnarumedhihu ni ndhe dhinawoga Bibiliya. Motajhiha, kasugwa yopadduwa ya muzombwe ole anubuwela wi Yehova kanamuthuwathuwela. Nerege oliye podi orumedha mubuwelo ola wowi Yehova kanamuthuwathuwela? Naari, oliye anohowela ‘orajhiha opendda kadda ethu,’ teto oliye podi werana eyo, wodhela omuhudhera Bibiliya wihina anone mubuwelo wa Yehova wodhela museluya.

5. Nnande aavi “onvuruwana” Yehova nanganyedhaga?

⁵ Namwilerigi Bibiliya enakala ninga nnanvuruwana Yehova. Mbwenye wihina nonelemo makalelo anubuwela Yehova wodhela muselu nnanganyedhihu, nnohowela wilibihedha. Ethu yobajha nnahowelihu werana, fuwileri epaddi ya Bibiliya eniwanana ni muselu nnanganyedhihu. Iyo podi olabihedha dhipano dhowinjhiva dhohudherana dhinadhela munikuruni mwa Yehova wihina dhinikavihere ofwanya dhowakula dha makoho ninnihuna. (Pro. 2:3-6) Teto iyo podi olobela wa Yehova nimulobaga wihina anikavihere wonelamo dhithu nnasayelihu ni wonelamo makalelo oliye anubuweliye wodhela museluya. Nuwindo naasayele malagano a mBibiliyani ni dhopadduwa dhiniwanana ni muselu nnahowelihu. Ohiya eyo, sapama ohudhera dhopadduwa dhinafwanyeya mBibiliyani dha adhaari a Yehova yubuwela ni yanganyedha ndala ninga iyo.

6. Mutugumano dhinanikavihera aavi nanganyedhaga?

⁶ Makalelo mamodha Yehova anawogiye ni iyo fuudhela mutugumano. Noonaga mutugumano dhatedhene, nnokanna ofuru wowiwa mwaha dhavathaddo obe yowakula ya ddibila obe murogola enawoga wodhela muselu yole nnanganyedhihu. (Pro. 27:17) Vano kabeni noone ethu enaanikavihere ofwanya yowakula ya muselu nnanganyedhihu.

WANGANYEDHAGA AKALA YEHOVA ANOGITHUWATHUWELA

7. Nikoho baani athu amodha eniikohesiwa?

⁷ Onowikohaga akala Yehova onowuthuwathuwela? Wubuwelaga wi kunna thima, we podi woonaga wi kinandeya wandana ni mpaddusi. Enakala ninga mwene Davidi aali ndala. Oliye ahitikina vanlubale, nuwonelamo wi Yehova anowathuwathuwela athu ohilogomana. Bumwahaya adhe omukohege Yehova egi: ‘Nabwiya Yehova, muthu baani wihina mmusugwege? ki mwaana muthu ookwene baani wihina mmubuwelege?’ (Sal. 144:3) Yehova mwebaribarene anowuthuwathuwela? Onaafwanye wuuvi yowakula ya nikoho nna?

8. Mowiwanana ni 1 Samuel 16:6, 7, 10-12, Yehova anapwasedha osugwa ddi?

⁸ Bibiliya anowoga wi Yehova anowathuwathuwela athu enakala ninga kinna thima. Motajhiha, Yehova ahimuruma Samuweli wihina adhowe vaade va Jese wi amuthikithele mwaana mmodha aakale mwene aamwaana Ezarayeli. Vano Jese wawithana anaaye aatene 7, mbwenye kamwithanne Davidi aali ethogohi. b Naarive dhigaali ndo, Davidi daasakuliwe wihina  akale mwene aamwaana Ezarayeli. (Omwileri 1 Samuel 16:6, 7, 10-12.) Yehova ahimunona pamadhene Davidi ni ahinona ekalelo yaye. Ohiya eyo, Yehova ahinona wi Davidi oomudhivela.

9. Ddiniyani enuuvaha ebaribari wi Yehova onowuthuwathuwela? (Osugwe fotu.)

⁹ Kabiha wubuwela dhithu Yehova anuwereliye, dhinoniha wi oliye anowuthuwathuwela. Motajhiha, Yehova anowuvaha dholaga wodhela muselu bu muselu onahoweliwe onoona. (Sal. 32:8) Eyo enowoniha wihina Yehova ohunona pamadhene ni ohunona ele onahoweliwe. (Sal. 139:1) Waparihedhaga mabasa dholaga dha Yehova ni woonaga makalelo dholaga ndha dhinukaviheriwa, kunanganyedhege wihina Yehova anowuthuwathuwela. (1 Cró. 28:9; Dho. 17:26, 27) Yehova anowoona dhithu dhatedhene oneriwena wihina omulabele ni omwiwelele. Ohiya eyo, Yehova ohunona dhikalelo dhawo dhapama ni anofuna wandana ni we. (Jer. 17:10) Teto oliye anere ohagalala vanlubale we orumedhe wandana ni oliye. — 1 Juwa. 4:19.

YOTHOMA GERILIMINA NGAALI MUZOMBWE YAALI YAPAMA?

10. Nubuwela dhothoma nerilihuna nigaali azombwe, nikoho baani nnakumelela?

¹⁰ Malabo mamodha iyo podi wanganyedhaga akala yothoma nerilihuna nigaali azombwe yaali yapama. Motajhiha, ddibila obe murogola podi wera ohahiya mabasa obe malondda yanvaha korowa dhowinjhiva wihina awenjhedhedhe mabasa anampareliye Yehova. Teto asugwa mundduli, podi wera anowikoha akala yothoma eriliyena yowahiya mabasa obe malondda wihina awenjhedhedhe mabasa anampareliye Yehova yaali yothoma yapama. Mwaha athu amodha yeerilena yothoma yohiyana ni yaye, podi wera vano ehikanna korowa dhowinjhiva ni ehikanna egumi yapama. Muthu yola, podi wambela wanganyedha akala yothoma eriliyena yaali  yapama obe eere waabiha olaba wihina peeno akanne korowa dhowinjhiva.

11. Dhithu baani dhamukwerebeyiha Salmista amulenbe Salmo 73?

¹¹ Akala ni weya onowanganyedha ndala, kawubuwele madhu enafwanyeya va Salmo 73. Salmista ola ahawoona athu yanna egumi yapama, yahathuwathuwela ethu ni yaali oreela, mbwenye kayamulabela Yehova. (Sal. 73:3-5, 12) Yakala ninga athu yaala, dhewa dhanna waweddela pama mwigumini mwewa. Eyo yahimuthukulela oliye wubuwela wihina wilibihedha waye wi amulabele Yehova waali ebewene. Mubuwelo ola womukwerebeyiha ni ‘womutotela makathamiho ‘malabo aamateene’ mwigumini mwaaye. (Sal. 73:13, 14) Ddiniyani oliye eriliyena wihina agonjhihe mubuwelo ola wowanganyedha?

12. Mowiwanana ni Salmo 73:16-18, ddiniyani Salmista ole eeriliyena wihina agonjhihe okwerebeya wule?

¹² Omwileri Salmo 73:16-18. Salmista ole odhowa otempulu, nufiya wule, nupwaseya oliye wubuwela pama. Vano wonelamo wihina naarive athu ale aganna egumi yapama, aliwa kayanna ejhehedhelo yosogolo. Nuwubuwela ndo, oliye okanna murenddele. Teto ahonelamo wihina ompweha Yehova mburo wobajha, yaali yothoma yapama eriliyena. Mwaha wa yeyo, oliye othoma odidela omulabela Yehova. — Sal. 73:23-28.

13. Wambela wanganyedha akala yothoma weriliwena kale yaali yapama, enukavihere ddi okanna murenddele? (Osugwe fotu.)

¹³ Wamuhiya wihina Bibiliya ukavihere mwigumini mwawo, niweeya podi okanna murenddele. Ni makalelo baani? Okanne elemelelo yowubuwela dhithu dhapama onniwena ni mareeliho Yehova anuvahiiye. Ohiya eyo, ale yahinamulabela Yehova, enaroromela dhithu elabo ela enavahiwa, mwaha wi kinna ejhehedhelo wa dhithu nnafunihu wakela osogolo. Mbwenye Yehova anowukavihera ovanene ni anopaganya wureeliha osogolo mwamakalelo wahinandiwe wubuwela.  (Sal. 145:16) Teto kubuwela, we kunonne makalelo yafuna okala egumi yawo peeno, wahere werana yothoma yohiyana ni ele weriliwena ogaali muzombwe. Mbwenye ebaribariya siila, ole anerana yothoma mwaha wa odhivela onniyena ni Yehova vamodha ni aathu, anere okanna dhithu dhinamuthukulela okala muthu ohagalala.

WUBUWELAGA WI YEHOVA KANAFUNA WULABIHEDHA

14. Makoho baani addibila amodha enniwana, ki mwahaya bwaddi?

¹⁴ Mwaha wowuluvala, oragala obe mwaha wa oredda, adhaari amodha a Yehova podi wera kinanda werana dhithu yandiwa werana kale. Teto amodha enofiyedha wanganyedha akala Yehova onowavaha thima mabasa enapariwa. Mwaha wa yeyo, aliwa podi wikohaga akala “Yehova onofuna walabihedha!”

15. Ebaribari baani anna Salmista amulenbe Salmo 73?

¹⁵ Namaleba Salmo 71, iwoona ninga muthu ahinna thima. Oliye ahilobela wa Yehova egi: ‘Kamugihiye mwaha ohukanna kopolo.’ (Sal. 71:9, 18) Teto Salmista ola ahikanna ebaribari wihina ahere adidela omulabela Yehova, naarive ahinna kopolo, Yehova eere omuholela ni eerege omukavihera. Ohiya eyo, oliye ahihudhera wihina Yehova anohagalala awonaga adhaari aye emulabelaga ni murima wewa waamutene, naarive yahandaga werana ele yandiwa werana kale. — Sal. 37:23-25.

16. Ddiniyani addibila owunnuwelavo enandiwa omwerela Yehova ni athu amodha? (Salmo 92:12-15)

¹⁶ Addibila owunnuwelavo, mwiwoonege ndala ninga Yehova anuwoniyeni. Naarive mwahandaga werana dhithu dhowinjhiva, Yehova podi wukaviherani odhowagave mukalaga oolibeene epaddi yomuzimuni. (Omwileri Salmo 92:12-15.) Bumwahaya kamuthabwege wubuwela dhithu mwahinandinyu werana, ohiya eyo, mweregena ndhe munandinyu. Motajhiha, nyu podi wakavihera amodha wodhela yotajhiha yenyu yapama ni wodhela wooniha wi munowathuwathuwela  ale yuwapeleni. Nyu podi owoga ni athu amodha wodhela makalelo Yehova ukaviheriyeni okuma ezombwinyu ofiyedha peeno, obe nyu podi owoga wodhela ejhehedhelo munninyuna wodhela mpaganyo dha Yehova dhosogolo. Ohiya eyo, kamuddiwale wihina malobelo enyu podi wakavihera athu amodha. (1 Ped. 3:12) Ebaribariya sowihina, naarive nifwanyiwaga makathamiho bi makathamiho, aatene iyo podi werana ethu-sithu enamuhagalasa Yehova ni athu amodha.

17. Mwahaya bwaddi nigahowela osukuma elemelelo yowiliganiha ni athu amodha?

¹⁷ Akala we oli owukuwene mwaha ohanda omparela Yehova mabasa owinjhiva, okanne ebaribari wi Yehova anovaha thima dhithu dhatedhene onandiwe werena. Podi wera ohukanna elemelelo yoliganiha dhithu oneeriwena ni dhithu enerana athu amodha. Akala siyeyo wilibihedhe wihina osukume elemelelo ela yowiliganiha naathu amodha. Mwaha wa ddi? Mwaha Yehova kanaliganiha ndhe nnerihuna ni dhithu enerana athu amodha. (Gal. 6:4) Motajhiha, Mariya ahimukuthulela Yesu makura ookwima. (Juwa. 12:3-5) Mbwenye maamukwele oohawa, aapwehe korowa biili dhahanna muthengo munlubale. (Luk. 21:1-4) Yesu kaaliganihe ahiyana ala wodhela dhithu yeriliwana. Ohiya eyo, Yesu aawonile ahiyana ala abiili ninga athu anroromelo. Ni makalelo mamodhave, Yehova anovaha thima dhithu oneriwena mwaha wa nroromelo ni odhivela onniwena nuliye, naarive ethuya oneriwena ekalaga ninga kinna thima.

18. Ddiniyani enanikavihera okanna yowakula ya ethu-sithu nnanganyedhihu? (Osugwe kwaduru enna musolo “ Bibiliya podi wukavihera okanna yowakula ya ethu-sithu onanganyedhiwe.”)

¹⁸ Iyo aatene malabo mamodha nnowanganyedha. Mbwenye ninga nonilihu muwari mwa ohudhera wula, Madhu a Mulugu podi onikavihera okanna yowakula ya ethu-sithu nnanganyedhihu. Bumwahaya nnohowela werana ele nnandihu wihina nande okanna yowakula ya ethu nnanganyedhihu. Mwebaribarene Yehova anonipwatha ni anonithuwathuwela. Oliye anovaha thima dhithu dhatedhene oneriwena wihina opwehe Omwene waye mburo wobajha mwigumi mwawo. Teto oliye anofuna vanlubale wureeliha mwaha wa dhithu oneriwena. Bumwahaya okanne ebaribari wihina Yehova anowadhivela ni anowasamalela adhaari aye aatene eli oororomeleya.