OHUDHERA 42
JHIBO 103 Anamaholela nvaho wa Yehova
Wonihe wi onowatamalela “alobwana [eli ninga] nvaho”
“Oliye adhowaga odhulu. . . , waruma alobwana ayo wihina ekale nvaho.” — EFE. 4:8.
DHITHU NNAAHUDHERIHU
Nnere woona makalelo adhaari ookavihera, anamaholela mulogo ni anameeddela mulogo enanikaviheriwa ni makalelo owatamalela mwaha wa dhithu enanereliwa.
1. Mukono baani Yesu anivahiliye?
VELABONI yavati, kanakalegewo muthu oovaha ompitha Yesu. Mudhidhi agaali velaboni yavati, Yesu ahawerana matikiniho owinjhiva wihina aakavihere ale yahowela okaviheriwa. (Luk. 9:12-17) Oliye ohunivaha mukono wathima vanlubale opitha dhatedhene, eli ovelela egumaye ninga yowobola. (Juwa. 15:13) Nuvenyihiwa muukwani Yesu kahiyile okala muthu oovaha. Oliye ahiwoga wi adhowa odhulu, eere omuloba Yehova wihina anivahe muzimu wotxena wihina onihudhihe ni onilibihe, teto oliye aherana eyo nuufiya odhulu. (Juwa. 14:16, 17; 16:13) Teto wodhela mutugumano, Yesu anonixagiha wihina nande wahudhiha athu, wapela elabo yaatene wihina ekale anamahara aye. — Mat. 28:18-20.
2. “Alobwana [eli ninga] nvaho” enasorihiwa va yolebela ya Efeziyu 4:7, 8 enagiwana aani?
2 Ohukalawo nvaho mmodha Yesu anivahiliye. Murumiwi Pawulo ohuwoga wi Yesu nudhowa odhulu, oliye “waruma alobwana wihina ekale nvaho.” (Omwileri Efeziyu 4:7, 8.) Murumiwi Pawulo owoga wihina Yesu ohunivaha alobwana ala ninga nvaho wihina ekaviherege mulogo mwamakalelo oohiyanahiyana. (Efe. 1:22, 23; 4:11-13) Peeno “alobwana [ala eli ninga] nvaho” enagiwana adhaari ookavihera, anamaholela mulogo ni anameeddela mulogo. a Ebaribari wi alobwana ala bohulogomana ni enoviriganiha malabo mamodha. (Tiya. 3:2) Mbwenye Nabwiya ehu Yesu Kiristu anowalabihedha alobwana ala. Mwebaribarene aliwa nvaho oliye ananivahiye.
3. Ddiniyani kadda muthu wa iyo nnahowelihu werana wihina naakavihere “alobwana [eli ninga] nvaho?”
3 Yesu ohathoma “alobwana [ala eli ninga] nvaho” wihina esamalele ni elibihe mulogo. (Efe. 4:12) Mbwenye kadda muthu wa iyo podi werana epaddaaye wihina aakavihere addibila ala wihina yande wakwanihedha mutholo enniwana. Wihina nande wonelamo pama, kubuwela yoladdaniha ela: Amodha wa iyo podi wera nihapara mabasa oomaga Nyumba Yomwene, vano amodha enowakavihera mabasaya mwamakalelo mamodha, ninga opiya, wathukula addibila enamaga ni othukula dhipano dhinahoweleya wihina emagiwena Nyumbaya. Nimakalelo mamodhave, iyo aatene podi wakavihera adhaari okavihera, anamaholela mulogo ni anameeddela mulogo wodhela dhowoga dhehu ni dhowera dhehu. Kabeni noone dhithu enerana alobwana ala ni makalelo owatamalela aliwa vamodha ni Yesu anivahile “alobwana [ala eli ninga] nvaho.”
ADHAARI OOKAVIHERA ENOWAPARA MABASA “OWAKAVIHERA AMODHA”
4. Mudhidhi wa arumiwi, adhaari ookavihera yaapara mabasa baani?
4 Mudhidhi wa arumiwi, addibila amodha yothomiwa ninga adhaari ookavihera. (1 Tim. 3:8) Enakala ninga madhu owi “wakavihera amodha” enafwanyeya va 1 Korintiyu 12:28, murumiwi Pawulo awagana adhaari ookavihera. Eyo enowoniha wihina adhaari ookavihera yowapara mabasa athima wi yakavihere anamaholela mulogo opwasedha walibiha addibila wihina edhowegeve yaparaga mabasa oolaleya. Motajhiha, podi wera adhaari ookavihera yothomiwa wihina elebe kopiya dha Bibiliya obe ogula dhithu dhahoweleya wihina dhilebiwena kopiya.
5. Mabasa baani athima enaapara adhaari ookavihera peeno?
5 Kawubuwele mabasa athima enaapara adhaari ookavihera a mulogo wawo. (1 Ped. 4:10) Podi wera aliwa ehithomiwa osamalela korowa, murudda mulogo wawo onahoweleya oolaleya obe wagawela addibila malivuru ammulogoni. Amodha podi wera ethomiwe wihina yaparege mabasa a awudiyu ni vidiyu, amodha ninga anamatonyihedha, amodha podi wera enasamalela mabasa owomihedha Nyumba Yomwene. Mabasa aatene ala bathima, teto enokavihera wi addibilihu epurelemo mutugumano ni mabasa oolaleya weedda mwamakalelo owegeredheya. (1 Kor. 14:40) Ohiya eyo, adhaari ookavihera amodha enokanna epaddi mmutugumanoni dha vaari va sumana ni enovahiwa mwaha dha vathaddo. Teto malabo mamodha adhaari ookavihera podi othomiwa omukavihera ddibila aneddiha mutugumano dha mmalaleyelo ni malabo mamodha aliwa podi othomiwa ni namaholela mulogo wihina yerena vamodha vizita ya pastoreyo.
6. Mwahaya bwaddi nnohowela wavaha thima mabasa enaapara adhaari ookavihera?
6 Kasugwa dhithu athu amodhaya enawogiwa wodhela mabasa enaapara adhaari ookavihera. Murogola dhaala anithaniwa Beberli, b anakala elabo yo Boliviya, anawoga egi: “Miyo ginowanda opurelamo mutugumano mwaha wa adhaari ookavihera. Mwaha wa mabasa enapariwa, miyo ginowanda wiiba, ovaha dhowakula dhaaga mmutugumanoni, ovuruwana mwaha dhavathaddo ni ohudhera ni vidiyu vamodha ni fotu dhinonihiwa mmutugumanoni. Teto aliwa enokavihera wihina Nyumba Yomwene ekale yobareleyene ni enowakavihera addibila enoona mutugumano wodhela vidiyu konferensiya. Teto mutugumano wamala aliwa enoxela Munyumbani Yomwene ni enosamalela korowa dha mmulogoni ni enonivaha malivuru nnahowelihu. Miyo ginowatamalela vanlubale wodhela dhithu dhatedhene enanereliwa!” Murogola dhaala anithaniwa Leslie, mamune aali namaholela mulogo anakala elabo yoKolombiya anawoga egi: “mamunaga anowaroromela vanlubale adhaari ookavihera, yahere ehikala aliwa enamukavihera oliye akalege oopinyaminyeyene. Bumwahaya miyo ginowatamalela vanlubale mwaha aliwa omukavihera vanlubale mamunaga.” Podi wera ni weya onawoona ni makalelo yaala adhaari ookavihera a mmulogoni mwawo. — 1 Tim. 3:13.
7. Nnonihe aavi wi nnowatamalela mabasa enaapa adhaari ookavihera? (Osugwe fotu.)
7 Mbwenye kinakwana baahi owoga wi nnowatamalela adhaari ookavihera mwaha wa mabasa enaapariwa. Ohiya eyo, Bibiliya anonikongomedha egi: “Okale muthu ootamalela.” (Kol. 3:15) Ddibila dhaala anakala elabo yoFinlandiya anithaniwa Kristofi, ali namaholela mulogo, anowoga makalelo anonihiye wi anowatamalela adhaari ookavihera, oliye anowoga egi: “Miyo ginowalebela karta obe ginowawinviyarela mensaje ni yolebela giwogaga ethu egidhivenle ni egilibihile ni makalelo ginavahimi thima mabasa enapariwa.” Ddibila Paskowal ni mwadhiye Jayel, enakala elabo yoNova Kaledoniya, ehikanna elemelelo yowalobelela adhaari ookavihera. Ddibila Paskowal anowoga egi: “Malabo yala, nnolobela ni nnotamalela mwaha okanna adhaari ookavihera mmulogoni mwehu.” Mwebaribarene Yehova anowawakula malobelo ninga yaala, teto mulogo waatene onoorelihiwa. — 2 Kor. 1:11.
ANAMAHOLELA MULOGO ‘ENOWAPARA MABASA NUUVIHEYA’
8. Mwahaya bwaddi murumiwi Pawulo adhe awogege wi anamaholela mulogo ‘yoolaba nuuviheya?’ (1 Tesalonisense 5:12, 13)
8 Mudhidhi wa arumiwi, anamaholela mulogo yoolaba nuuviheya wihina ekavihere mulogo. (Omwileri 1 Tesalonisense 5:12, 13; 1 Tim. 5:17) Aliwa ‘yoweddiha pama’ mulogo obe neere, yoweddiha mutugumano ni yowerana dhothoma dhathima dha mmulogoni. Teto aliwa ‘yowalaga’ addibila naarogola yawaddelaga ethuya yahoweliwa owomihedha, mbwenye yerana eyo nuudhivela wihina ebarele mulogo. (1 Tes. 2:11, 12; 2 Tim. 4:2) Ohiya eyo, aanamaholela mulogo ale yohowela olaba wihina esamalele emudhi yewa ni yohowela olibiha nroromelo newa ni wandana wewa ni Yehova. — 1 Tim. 3:2, 4; Tito 1:6-9.
9. Mutholo baani anamaholela mulogo a malabo yaala enniwana?
9 Anamaholela mulogo a malabo yaala, eneedda oopinyaminyeyene. Aliwa anamalaleya. (2 Tim. 4:5) Anamaholela mulogo enonivaha yotajhiha yapama wodhela wapara mabasa oolaleya nuuviheya. Teto aliwa enowawegeredha mabasa oolaleya wihina epariwege mwamakalelo apama ni enonixagiha wihina nikale anamahudhiha ni anamalaleya apama. Anamaholela mulogo enolaba ninga anamatoriha owogowa ni athagaraga. Ddibila obe murogola erana yothega enlubale, anamaholela mulogo enowilibihedha wihina emukavihere muthuya ohogolowela okanna wandana wapama ni Yehova. Mudhidhi mmodhave aliwa enowilibihedha wihina mulogo okale woweela. (1 Kor. 5:12, 13; Gal. 6:1) Mbwenye mutholo munlubale anamaholela mulogo enniwana, fuukala anamakukula. (1 Ped. 5:1-3) Teto aliwa enowegeredha pamadhene mwaha dhewa dhinakumela mBibiliyani. Ohiya eyo, aliwa enowilibihedha wihina emunone kadda muthu mmulogoni mwewa ni wawaredhela addibila. Anamaholela mulogo amodha enowakavihera mabasa oomaga Nyumba Dhomwene, wegeredha musonkano wa malabo mararu ni wa nlabo nimodha, amodha enalaba Komisawu dhiniwanana ni muselu dhoospitale ni amodha enalaba ninga anamaredhela aredda ospitale ni ehikanna mutholo dhimodha enahoweliwa wakwanihedha. Mwebaribarene anamaholela mulogo enowapara mabasa owinjhiva!
10. Mwahaya bwaddi nnohowela wavaha thima mabasa enaapara anamaholela mulogo?
10 Yehova ahapaganya adhaari aye wihina eere wavaha anamakukula yasamalelege pamadhene, mwaha wa yeyo, aliwa ‘kayovege [ethu] obe kayagurumelege.’ (Jer. 23:4) Murogola dhaala anakala elabo yoFinlandiya anithaniwa Jowana, ohona eyo yakwanelaga mwigumini mwaaye amaye nuukanna oredda wowopiha. Oliye anowoga egi: “Enogirusa vanlubale omwaddela muthu mmodhaya dhithu dhinagipadduwela, mbwenye namaholela mulogo gahamunonnimi pama, ogipwasedha ogivuruwana nuuvilela, olobela vamodha ni miyo ni ogonelihamo makalelo Yehova anagidhiveliye. Kaginubuwela dhithu dhatedhene namaholela mulogo ole aawogiliye, mbwenye ethu gihinadduwalimi sowihina nuuthapanya nuliye, gahikurumuwa vanlubale.” Onowubuwela makalelo anamaholela a mulogo wawo yukaviheriwa?
11. Nnonihe aavi wi nnowatamalela anamaholela mulogo? (Osugwe fotu.)
11 Yehova anohagalala vanlubale aanoonaga naatamalelaga anamaholela mulogo ‘mwaha wa mabasiwa.’ (1 Tes. 5:12, 13) Murogola dhaala anakala elabo yoFinlandiya anithaniwa Henriyeta, anowoga egi: “Anamaholela mulogo enofuna vanlubale onikavihera mudhidhi bu mudhidhi, mbwenye eyo kinatapulela wihina aliwa enoothabwa okanna mudhidhi ni kopolo dhowinjhiva wapitha athu amodha, newene kinatapulela wi kinafwanyiwa makathamiho. Malabo mamodha miyo ginomwadamela namaholela mulogo ni ginowoga gegi: ‘Gafuna guwaddeleni wi nyu muli namaholela mulogo apama.’” Murogola dhaala anakala elabo yoTurkiya c anithaniwa Sera anowoga egi: “Anamaholela mulogo enohowela olibihiwa wihina edhowegeve yeragana ndhe eneriwana. Iyo podi walibiha wodhela wawithanela vaade vehu wihina nijhe vamodha, walebela karta naatamalelaga obe olaba naaliwa mmabasani oolaleya.” Ohukalawo namaholela mulogo onooniwe wi onohowela omutamalela? Akala siyeyo, ononamo aavi werana ethu-sithu enooniha wi onomutamalela. — 1 Kor. 16:18.
We podi “omulibiha” namaholela mulogo wihina adhowegeve aakwanihedhaga mutholo waye nuuvilela (Osugwe ddima 7, 11, 15)
ANAMEEDDELA MULOGO ENOOLIBIHA MULOGO
12. Mudhidhi wa arumiwi, yalabihedhiwa aani wihina elibihe mulogo? (1 Tesalonisense 2:7, 8)
12 Alobwana amodha eli ninga “nvaho” banameeddela mulogo. Mudhidhi wa arumiwi, anamaholela mulogo oJeruzale yahimuthoma Pawulo, Barnabe ni amodha wihina ekale anameeddela mulogo. (Dho. 11:22) Mwahaya bwaddi aliwa edhe ethomiwege? Enathomiwa wihina elibihege mulogo ndala ninga enerana adhaari ookavihera ni anamaholela mulogo. (Dho. 15:40, 41) Addibila ala enooleva dhithu dhowinjhiva, teto malabo mamodha enopweha egumiwa vangovini wihina yahudhihe ni yalibihe addibila. — Omwileri 1 Tesalonisense 2:7, 8.
13. Mutholo baani enna anameeddela mulogo?
13 Anameeddela mulogo enowerana olenddo mudhidhi waatene. Amodha enowedda olenddo woolapa wihina yaredhele mulogo. Teto sumana dhatedhene anameeddela mulogo enowerana mwaha dhavathaddo dhowinjhiva, enowawaredhela addibila wihina yalibihe, enootugumana naapiyonero, enowerana mutugumano naanamaholela mulogo ni enowerana mutugumano wa mmabasani oolaleya. Ohiya eyo, aliwa enowegeredha mwaha dhavathaddo, enowegeredha musonkano wa nlabo nimodha ni wa malabo mararu. Teto yaka dhatedhene aliwa enokala anamahudhiha a Eskola ya Mapiyonero ni anowegeredha mutugumano wavayeka naapiyonero aatene a mulogo aneeddeliye. Ohiya eyo, malabo mamodha oliye anohowela wakwanihedha mutholo dhimodha dhathima dhinahoowela weriwana mowaguva.
14. Mwahaya bwaddi nigawogaga wi anameeddela mulogo nvaho?
14 Mwahaya bwaddi nigawogaga wi anameeddela mulogo nvaho? Ddibila dhaala anakala elabo yoTurkiya anowoga egi: “Kadda olenddo nameeddela mulogo anadhiye weddela mulogo wehu, miyo ginothabwa okanna efunelo yowakavihera addibila naarogola ammulogoni mwaaga. Miyo gihanona anameeddela mulogo owinjhiva, mbwenye kaavo ginamoonigimi agaali oopinyaminyeyene ofiyedha ohikanna mudhidhi wothapanya ni miyo.” Jowana asorihiwe mundduli ohulaba ni nameeddela mulogo mmabasani oolaleya, mbwenye kayandile omulaleya muthu mwaha kayafwanyamo athu mmavademwa. Joana anogave egi: “Naarive nihandile owoga ni muthu miyo kaginadduwala nlabo nne. Addibilaga abiili yahitamela murudda wolapela ni vaade, teto gahikanna munukwela wowawona. Mbwenye nameeddela mulogo ole ogilibiha ni ogikavihera woonelamo wi olapelana wula bwamudhidhi vang’ono, mwaha mwilaboni yela podi okala yorusa okala vamodha namudhihu obe naakwihu. Mbwenye mwilaboni exa nnerege okala naaliwa mudhidhi waatene.” Dhopadduwa ndha dhinonikavihera wonelamo wi anameeddela mulogo nvaho wapama vanlubale. — Dho. 20:37–21:1.
15. a) Mowiwanana ni 3 Juwawu 5-8, nnonihe aavi wi nowatamalela anameeddela mulogo? (Osugwe fotu.) b) Mwahaya bwaddi nnohowela watamalela ahiyana aaddibila enna mutholo mmulogoni, ki nnande werana eyo nimakalelo baani? (Osugwe kwaduru enna musolo “ Watamalelege ahiyana aale enna mutholo mmulogoni.”)
15 Murumiwi Juwawu ahimukongomedha Gayu wihina awakelege anameeddela mulogo. Murumiwi Juwawu ahileba egi: “Warume mulenddoni mwewa mwamakalelo apama a Mulugu.” (Omwileri 3 Juwawu 5-8.) Nnande aavi omutajhiha Gayu? Makalelo apama oomutajhiha, fuudhela onvaha yoojha nameeddela mulogo. Makalelo mamodha omutajhiha Gayu, fulaba naaliwa mmabasani oolaleya sumana enadhiwa onaredhela. Leslie, asorihiwe mundduli anowoniha wi anowatamalela anameeddela mulogo mwamakalelo mamodha, oliye anowoga egi: “Miyo ginoolobela wa Yehova gimulobaga wihina aakavihere ni ethu-sithu enahoweliwa. Teto miyo ni mamunaga, nnowalebela makarta naatamalelaga anameeddela mulogo mwaha waredhela mulogo wehu ni nawaddelaga makalelo aliwa enikaviheriwa.” Kudduwale wi anameeddela mulogo enoogoma ndala ninga iyo. Malabo mamodha anameeddela mulogo enofwanyiwa makathamiho ninga oredda, othuwathuwa ni wukuuwa. Yehova podi onilabihedha wihina awakule malobelo anameeddela mulogo wodhela iyo wavaha ethu-sithu obe mwaha wawoga madhu oolibiha! — Pro. 12:25.
NNOWAHOWELA VANLUBALE “ALOBWANA [ELI NINGA] NVAHO”
16. Mowiwanana ni Provérbios 3:27, makoho baani kadda muthu wahiyo nnahowelihu wikoha?
16 Wapela elabo yaatene, enohoweleya “alobwana [eli ninga] nvaho.” Akala we oli ddibila oobaddiziwa ‘ohukanna efunelo yokavihera?’ (Omwileri Provérbios 3:27.) Ohukanna efunelo yowilibihedha wihina okale mudhaari ookavihera? Akala oli mudhaari ookavihera, ohukanna efunelo yokala namaholela mulogo wihina othabwege wakavihera addibila ammulogoni? d Enowandeya wawerana masadduwo mwigumini mwawo wihina okursari Eskola ya Anamalaleya Oomwene? Eskola ela enere wuxagiha ni enere wukavihera wihina othabwege olabihedhiwa ni Yesu. Akala we onubuwela wi kunande wakwanihedha dholuba ndha, olobele wa Yehova. Teto we podi omuloba Yehova muzimu waye wotxena wihina wukavihere wakwanihedha mutholo bu mutholo onakeliwe. — Luk. 11:13; Dho. 20:28.
17. “Alobwana [eli ninga] nvaho” enoniha ddi wodhela Mwene ehu Yesu Kiristu?
17 Addibila enalabihedhiwa ni Yesu, eli ninga “nvaho,” ethu enooniha wi Yesu anna onisamalela malabo yaala ookuthula. (Mat. 28:20) Mwebaribarene iyo nnotamalela vanlubale mwaha okanna Mwene ananithuwathuwela, ananidhivela, ali oovaha, ni ananivaha addibila eli owegeredheyene wihina enisamalele ni ethu-sithu nnahowelihu. Bumwahaya osayelege makalelo owooniha wi onovaha thima wilibihedha wa addibila ala. Teto kuddiwale omutamalela Yehova ananivaha ‘dhego dhatedhene dhapama ni nvaho wapama.’ — Tiya. 1:17.
JHIBO 99 Muthithi wa addibila
a Anamaholela mulogo enakosa epaddi ya Nnikuru Nolamulela, anamakavihera a Nnikuru Nolamulela, addibila enalaba Komisawu ya Filiyale ni enasamalela mabasa mamodha, naaliwaya “nvaho.”
b Mandina mamodha ehisadduliwa
c Kale yithaniwa Turkiya.
d Wihina onone dhithu onahoweliwe werana wi okale mudhaari ookavihera, omusugwe artigu anna musolo, “Addibila — munowilibihedha wihina mukale adhaari okavihera?” ni “Addibila — munowilibihedha wihina mukale anamaholela mulogo?” Mu Namasugwera a Novembro a 2024.
