OHUDHERA 40
JHIBO 30 Mulugu aaga, mukwaga ni babi
Yehova ‘anowavulumusa ale enna murima woohoseya’
‘Oliye anowavulumusa ale enna murima woohoseya ni anowapotha makwadda ewa.’ — SAL. 147:3.
DHITHU NNAAHUDHERIHU
Yehova anowathuwathuwela vanlubale ale enna murima woohoseya. Ohudhera wula, nnere woona makalelo Yehova ananitodoliye ni makalelo nnafunihu watodola athu amodha.
1. Yehova anakala aavi awonaga adhaari aye efwanyiwaga makathamiho?
YEHOVA anowawona makathamiho aatene enaafwanya adhaari aye velaboni yavati. Oliye onowanda onoona nakala oohagalalene obe owukuwene. (Sal. 37:18) Teto awonaga adhaari aye emulabelaga naarive efwanyiwaga makathamiho, oliye anohagalala vanlubale! Ohiya eyo, Yehova anofuna vanlubale onikavihera ni onitodola naafwanyiwaga makathamiho.
2. Yehova anawerela ddi ale enna murima woohoseya, ki ddiniyani nnahowelihu werana negi nipurelemo nikavihero na Yehova?
2 Salmo 147:3 anihina: Yehova ‘anowapotha makwadda’ aathu enna murima woohoseya. Yolebela ela, enamooniha Yehova ninga muthu oodhivela anapotha nikwadda na muthu anna murima woohoseya. Mbwenye ddiniyani nnahowelihu werana negi nipurelemo nikavihero na Yehova? Kasugwa yoladdaniha ela: Mediku anonne pama wasamalela aredda, podi werana dhatedhene andiye wihina amukavihere muthu aporeye wihina nikwadda naye nivole. Mbwenye muthuya anna nikwadda egi avulumuwe mowaguva anohowela wiwelela dhoholela dhatedhene anafuniye ovahiwa ni medikuya. Ohudhera wula, nnere woona dhithu Yehova anawogiye wihina aakavihere ale enna murima woohoseya obe ale eli owukuwene. Teto nnere woona makalelo ooparihedha mabasa dholaga nnakelihu ni Babihu oodhivela.
YEHOVA ANONUBUSEDHA WI IYO NILI ATHIMA VAMENTONI VAYE
3. Mwahaya bwaddi athu amodha egubuwelaga wi kinna thima?
3 Iyo nnakala mwilaboni, muhili odhivela. Teto yowukulihaya athu amodha enowonihiwa goyi ofiyedha wubuwelaga wi kinna thima. Murogola dhaala anithaniwa Elena a anowoga egi: “Miyo gunnuwile murala ohunna odhivela. Apapa yaali oowali, teto malabo owinjhiva yowoga wihina iyo naali ataduwa.” Ndala ninga Elena, podi wera ohonihiwa goyi ofiyedha wiwoonaga ninga kunna thima. Akala ethu ninga yela ehupadduwela, podi okala yorusa orumedha wi ohukalawo muthu anuudhivela ni anuvaha thima.
4. Yolebela ya Salmo 34:18 enanivaha ebaribari baani?
4 Naarive akala athu amodha ehuweddiha mwamakalelo abure, okanne ebaribari wi Yehova anoothabwa wudhivela ni anowuvaha thima. Oliye ‘onowawaddamela ale enna murima woohoseya.’ (Omwileri Salmo 34:18.) Akala we oli ‘ookwerebeyene,’ kuddiwale wi Yehova ohunona dhikalelo dhapama onniwena, bumwahaya adhe usakulege wihina omulabelege. (Juwa. 6:44) Yehova anofuna vanlubale wukavihera mwaha wi we ohuthabwa okanna thima vamentoni vaye.
5. Nnahudhera ddi ni makalelo Yesu aweddihiye athu yahapwathiwa?
5 Iyo podi ohudhera makalelo anubuwela Yehova wodhela ohudhera yotajhiha ya mwanaye Yesu Kiristu. Mudhidhi agaali velaboni yavati, Yesu owapwatha athu yeeddihiwa mwamakalelo abure ni yooniwa ninga athu yahanna thima. (Mat. 9:9-12) Motajhiha, muhiyana dhaala anna oredda wowopiha nuhidda yowara ya Yesu wihina avulumuwe, Yesu omutodola ni omuthethela mwaha oliye woniha nroromelo naye. (Mar. 5:25-34) Iyo nihinona wi Yesu ootajhiha pamadhene dhikalelo dha Ababe. (Juwa. 14:9) Bumwahaya okanne ebaribari wi Yehova anowuvaha thima ni anowoona dhikalelo dhawo dhapama vamodha ni nroromelo nuudhivela onniwena.
6. Onere ddi wubuwelaga wi kunna thima vamentoni va Yehova?
6 Onere ddi wubuwelaga wi kunna thima vamentoni va Yehova? Wilerigi dholebela dhinoniha wi Yehova anowuvaha thima ni osayelege mudhidhi wihina wubuwele dholebela omanliwe wileri. b (Sal. 94:19) Akala we oli oowukuwene mwaha ohanda wakwanihedha yoluba yawo obe akala oli ookwerebeyene mwaha ohanda werana dhithu athu amodha enandiwa werana, kuwiliganihege ni athu amodha, newene kupwasedhege wubuwela dhithu ononniwe wi kunanda werana. Yehova kanajheha wihina werena dhithu ohunandiwe, mbwenye anajheha wi werena ele onandiwe nuudhivela. (Sal. 103:13, 14) Akala onowonihiwaga goyi wodhela wukuthiwa, orarusiwa obe oruwaniwa, kuwivahe nibili mwaha dhithu dhupadduwele. Mwebaribarene we kuwafwanelela wereliwa dhithu ninga dhendha. Mwaha wi vamentoni va Yehova anna nibili duule anerana obure ohiya ole ereliwe obure. (1 Ped. 3:12) Sandra, oonihiwe goyi mudhidhi agaali mwaana anowoga egi: “Miyo ginolobelesa wa Yehova wihina agikavihere wiwoona ndala ninga oliye anagooniye.”
7. Dhithu dhupadduwele mwigumini mwawo dhinaakavihere aavi athu amodha?
7 Kuddiwale wi Yehova podi wulabihedha wihina wakavihere athu amodha. Yehova ohuvaha gari yolaba vamodha nuliye mmabasani oolaleya. (1 Kor. 3:9) Teto dhithu dhupadduwele mwigumini mwawo, podi wukavihera wawonelamo athu amodha enafwanyiwa makathamiho mamodhave. Mwaha wa yeyo, we podi wanda wakavihera vanlubale athu yayo. Elena, asorihiwe mundduli ahikaviheriwa, teto vano anowanda wakavihera athu amodha. Oliye anowoga egi: “Miyo kagiivaha thima, mbwenye wodhela omunona Yehova ginowivaha thima. Teto Yehova anogilabihedha wihina gaakavihere athu amodha.” Vano Elena anohagalala mwaha olaba ninga piyonera a mudhidhi wamutene.
YEHOVA ANAFUNA WI NIKANNE EBARIBARI WIHINA OHUNILEVELELA
8. Va Isaías 1:18 Yehova ananipaganya ddi?
8 Adhaari amodha a Yehova enowukuuwa ni enothuwathuwa mwaha dhothega yeriliwana ehinathi obaddiziwa ni ndhe yeriliwana numala obaddiziwa. Mbwenye sapama ohidduwala wi Yehova ohunivaha yowobola mwaha odhivela anniyena ni iyo, teto oliye anafuna wi iyo nrumedhe nvaho ola wa yowobola. Yehova anopaganya wi iyo ‘natxokotxela muladdu dhehu’ nuliye, c oliye anere onilevelela ni murima waye waatene. (Omwileri Isaías 1:18.) Nnomutamalela vanlubale mwaha Babihu oodhivela Yehova odduwala dhothega dhehu nerilihuna kale. Teto oliye anopaganya ohidduwala dhithu dhatedhene dhapama nerilihuna. — Sal. 103:9, 12; Ebe. 6:10.
9. Akala we oli ookwerebeyene mwaha dhithu dhabure weriliwena kale, ddiniyani onahoweliwe werana?
9 Akala we oli ookwerebeyene mwaha dhithu dhabure weriliwena kale, wilibihedhe wubuwelaga dhithu dhapama oneriwena ovanene ni onafuniwe werana osogolo. Kasugwa yotajhiha ya murumiwi Pawulo. Oliye ahaharahara makiristawu mwamakalelo abure teto vasogolova oliye ahisinyuwa vanlubale mwaha waharahara makiristawu. Mbwenye oliye ahinona wi Yehova ahimulevelela. (1 Tim. 1:12-15) Nerege murumiwi Pawulo ahididela wubuwelela dhothega eriliyena kale? Naari, oliye kubuwela dhithu dhatedhene eriliyena kale wihina akale mufarizewu orihiwa. (Fil. 3: 4-8, 13-15) Ohiya eyo, murumiwi Pawulo ahididela wapara mabasa oolaleya ni wubuwela dhithu afuniye werana osogolo. Ndala ninga murumiwi Pawulo, kannande owomihedha dhithu dhabure nerilihuna kale. (Fil. 3:4-8, 13-15) Mbwenye iyo podi omuthithimiha Yehova ni dhithu nnerihuna peeno ni odidela osugwa osogolo wula njhehaga wakela mpaganyo dhoriya dha Yehova.
10. Akala onowivaha nibili mwaha dhothega weriliwena kale, teto akala dhothegadha dhihawukula athu amodha, enukavihere ddi?
10 Podi wera onowivaha nibili mwaha dhothega weriliwena kale dhihawukula athu amodha. Akala siyeyo enupadduwela, enukavihera ddi? Werena ele onandiwe wihina owomihedhe dhithudha, owogege ni weregena dhithu dhinoniha wi ohuthwaruwa. (2 Kor. 7:11) Ohiya eyo, olobele wa Yehova omulobaga wihina aakavihere ale enoona goyi mwaha wa dhoviriganiha dhawo. Okanne ebaribari wi Yehova anere wukavihera we vamodha ni ale enoona goyi mwaha dhoviriganiha dhawo okanna murenddele ni wanda ovilela.
11. Nnahudhera ddi ni yopadduwa ya namavuhulela Jonasi? (Osugwe fotu yavakapani)
11 Ohudhere ni dhoviriganiha dhawo dhakale ni ohiye wihina Yehova uulabihedhe mwamakalelo anafuniye. Kasugwa ethu yampadduwele namavuhulela Jonasi. Yehova numuloba wihina adhowe luwani yoNinive, oliye othoma othawela luwani emodha. Mbwenye Yehova numusumulula, Jonasi ohudhera ethu yathima ni yoviriganiha yaye. (Jon. 1:1-4, 15-17; 2:7-10) Naarive dhigaali ndo, Yehova kahile omulabihedha Jonasi. Yehova omuthoma dila yanabili wihina adhowe oNinive, oliye wiwelela ahubuwele dila biili. Mwebaribarene podi wera Jonasi ahukuuwa mwaha ohiwelela dila yobajha, mbwenye oliye keenyile wihina yoviriganiha yaye emuthukulele ohirumedha mutholo ole ni othomiwa dila yanabili. — Jon. 3:1-3.
Namavuhulela Jonasi numala ovuluwa mudhidhi yole worusa agaali mbani mwa oba, Yehova omuthoma dila yanabili wihina alaleye oNinive (Osugwe ddima 11)
YEHOVA ANOONILIBIHA ALABIHEDHAGA MUZIMU WAYE WOOTXENA
12. Akala we onna ofwanyiwa makathamiho enuthukulela okala owukuwene ddiniyani onahoweliwe werana wihina okanne murenddele wa Mulugu? (Filipense 4:6, 7)
12 Yehova anolabihedha muzimu waye wotxena wihina anitodole nafwanyiwa makathamiho obe namuyelela muthu nnamudhivelihu muukwani. Kasugwa yopadduwa ya Ron ni Karol. Mowukuliha mwaniwa wiipa. Aliwa enowoga yegi: “Iyo nnofwanyiwaga makathamiho mwigumini mwehu, mbwenye makathamiho ale yahithabwa onipiha mbani wapitha makathamiho bi makathamiho yanifwanya. Malabo mamodha ni mahiyu kananda ogona ni noolobelesa wa Yehova, iyo nahanda okanna murenddele onasorihiwa va Filipensi 4:6, 7.” (Omwileri.) Akala we onna ofwanyiwa makathamiho enuthukulela okala owukuwene, olobele wa Yehova omwaddelaga dhithu dhatedhene dhinupadduwela. We podi olobela mudhidhi bu mudhidhi ni dila dhowinjhivadhene wahowelaga. (Sal. 86:3; 88:1) Teto we podi oloba muzimu wotxena dila dhatedhene onalobeliwe. Ororomele wi Yehova kanadha aapwaza malobelo awo. — Luk. 11:9-13.
13. Akala we onoona wi kunna kopolo yowerana ethu-sithu mwaha wa makathamiho enuufwanya, ddiniyani enuvahe kopolo wihina odidele omulabela Yehova? (Efeziyu 3:16)
13 We onoona wi kunna kopolo yowerana ethu-sithu mwaha wa makathamiho enuufwanya? Akala onofwanyiwa makathamiho ninga yaala, muzimu wotxena podi wuvaha kopolo wihina odidele omulabela Yehova nuroromeleya. (Omwileri Efeziyu 3:16.) Kasugwa yopadduwa ya murogola dhaala anithaniwa Flora. Oliye ni mamune yalaba ninga amisiyonariyu, nuwindo mamune okuma mba. Vano mwaha wa yeyo, aliwa omwalana. Oliye anowoga egi: “Miyo gahukuwa vanlubale mwaha wa ele aagereliye. Mwaha wa yeyo, kaganda wubuwela dhithu dhimodha. Miyo golobela wa Yehova gimulobaga muzimu wotxena wihina gande ovilela. Yehova ahigivaha dhatedhene gahowelimi wihina gande wavilelana makathamiho ale, yakala ninga oorusa wagonjhiha.” Murogola Flora ahonelamo wihina Yehova ahimukavihera odhowagave amuroromelaga, teto oliye ahikanna ebaribari wihina Yehova eere odidela omukavihera naarive afwanyiwaga makathamiho bi makathamiho. Oliye anowogave egi: “Madhu enafwanyeya va Salmo 119:32 enowoniha pamadhene makalelo Yehova agikaviheriye. Yolebela ela enihina, ‘Ginere waguvela wawiwelela malamulo enyu, mwaha nyu munofugula murima waaga wi guwiweleleni.’”
14. Dhithu baani onahoweliwe werana wihina wakele muzimu wotxena?
14 Wamala olobela wa Yehova omulobaga wihina uvahe muzimu wotxena, ethu baani onafuniwe werana eniwanana ni ndhe olobiliwe? Wilibihedhe werana dhithu dhinukavihere wakela muzimu wotxena. Motajhiha, odidele olaleya ni woona mutugumano. Omwilerigi Bibiliya malabo aamateene wihina wandege woona dhithudha ninga Yehova anoniye. (Fil. 4:8, 9) Wamwilerigi Bibiliya, opwasedhege wanona adhaari a Yehova akale yaafwanyiwe makathamiho ni osayela woona makalelo Yehova aakaviheriye wihina yande ovilela. Sandara asorihiwe mundduli afwanyiwe makathamiho oorusa mwigumini mwaaye, anowoga egi: “Yopadduwa ya Juze ehidahinya murima waaga. Oliye ahifwanyiwa makathamiho ohiyanahiyana mwigumini mwaaye ni aheeddihiwa mwamakalelo abure. Mbwenye oliye keenyile wihina makathamiho yanfwanya eridhihe wandana waye ni Yehova.”— Gén. 39:21-23.
YEHOVA ANOWALABIHEDHA ADDIBILIHU WIHINA ANILIBIHE
15. Nafwanyiwaga makathamiho, baani anaanikavihere, ki enaanikavihere ni makalelo baani? (Osugwe fotu.)
15 Nafwanyiwaga makathamiho addibilihu podi okala “ntxela nolibiha vanlubale.” (Kol. 4:11) Yehova anowalabihedha addibilihu ni arogola wihina anonihe odhivela waye. Addibila ala enonlibiha mwaha enonipwasedha onivuruwana ni enowilibihedha wonelamo dhithu dhinanipadduwela. Malabo mamodha, naarive ehiwogile ethu, mbwenye mwaha okala epaddi yehu nnokala oolibeene. Aliwa podi ononiha yolebela yolibiha obe olobela vamodha ni iyo. d (Rom. 15:4) Malabo mamodha, aliwa podi onikavihera wubuwela makalelo Yehova anooniye dhithu dhinanipadduwela. Ndo iyo podi okala oopwaseyene ni wanda ovilela. Teto nakala owukuwene addibila podi onikavihera ni ethu-sithu ninga onivaha yoojha wihina nikanne kopolo.
Addibila owithwelavo epaddi yomuzimuni ni eli oororomeleya, podi onilibiha ni onikavihera (Osugwe ddima 15)
16. Ddiniyani nnahowelihu werana wihina addibilihu enikavihere?
16 Wihina addibila enikavihere, aliwa enohowela onona ethu nnahowelihu. Addibilihu enonidhivela vanlubale ni enofuna onikavihera. (Pro. 17:17) Naarive efunaga onikavihera, aliwa podi ohunona makalelo nilihu ni dhithu nnahowelihu. (Pro. 14:10) Akala oli owukuwene mwaha wa makathamiho enuufwanya, omwaaddele mukwawo onamuroromeliwe obe ddibila owithwelavo epaddi yomuzimuni. Wawaddele ethu onahoweliwe wihina yukavihere. We podi othoma othapanya ni namaholela mulogo mmodha obe aabili walemeliwe. Akala oli murogola we podi othoma othapanya ni murogola mmodha withwelavo epaddi yomuzimuni.
17. Nakala owukuwene, ekalelo baani nnahowelihu osukuma wihina nande wakela nikavihero naaddibila, ki nnande osukuma aavi?
17 Kuthabwege okala weka muwari mwa mudhidhi wowinjhiva. Malabo mamodha, mwaha okala owukuwene kannafuna okala vaari va athu. Ebaribari wihina malabo mamodha addibilihu podi ohonelamo dhithu dhinanipadduwela obe podi owoga dhithu dhinanipiha mbani. (Tiya. 3:2) Mbwenye kuwenye wi dhithu ndha dhuthukulele wasukuma addibila, mwaha wi Yehova podi walabihedha aliwa wihina yulibihe. Namaholela mulogo dhaala anithaniwa Gavin anna oredda wa depressão, anowoga egi: “Malabo owinjhiva kaginafuna othapanya ni muthu newene okala vamodha naakwaga.” Naarive dhigaali ndo, Gavin anowilibihedha wihina akale vamodha naaddibila, teto malabo mamodha anahagalala akala vamodha naaddibila. Murogola dhaala anithaniwa Amy anowoga egi: “Mwaha wa dhithu dhigipadduwele mwigumini mwaaga, enogirusa waroromela athu amodha. Mbwenye ginna ohudhera wadhivela ni waroromela addibila ndala ninga Yehova aneriye. Teto gihinona wi eyo enomuhagalasa Yehova ni miyoya ginohagalala.”
MPAGANYO DHA YEHOVA DHINONILIBIHA
18. Yehova anapaganya werana ddi ni makathamiho enanifwanya, ki ddiniyani nnahowelihu werana peeno?
18 Iyo podi osugwa osogolo ni nroromelo nnonaga wi mohulegela Yehova anere wamariha makathamiho aatene enanifwanya. (Ovuhu. 21:3, 4) Mudhidhi oyo wafiya, dhithu dhatedhene dhinanoniha goyi ‘kadhinadha dhubuweliwaga dila biili, newene murima wehu kunadha onuubusedhaga.’ (Isa. 65:17) Ninga noonilihu muwari mwa ohudhera wula, Yehova ‘anowapotha makwadda ehu’ okuma ovanene. Bumwahaya opurelemo pamadhene dhithu dhatedhene Yehova aneriyena wihina ulibihe ni ukavihere. Teto kuwanganyedhege wihina Yehova ‘anowupwatha.’ — 1 Ped. 5:7.
JHIBO 7 Yehova sikopolo dhehu
a Mandina mamodha ehisadduliwa.
b Osugwe kwaduru enna musolo “ We oli athima vamentoni va Yehova.”
c Wihina ‘ntxokotxele muladdu dhehu’ ni Yehova, nnohowela othwaruwa ni olaba nikurumuwelo mwaha yothega nerilihuna ni ohiya werana dhithu dhabure. Akala niherana yothega enlubale, nnohowela osayela nikavihero na anamaholela mulogo. — Tiya. 5:14, 15.
d We podi ofwanya dholebela dhimodha dha mBibiliyani mu livuru ninna musolo Makalelo oolabihedha malagano a mBibiliyani mwigumini mwehu epaddi enna musolo “Othuwathuwa” ni “Otodola.”
