1. Mwahaya bwaddi nigahowela omutamalela Yehova mwaha onivaha Bibiliya?

 NNOMUTAMALELA vanlubale Yehova wodhela onivaha Bibiliya! Mwaha wa madhu aye, nnowanda ovilelana makathamiho enanifwanya peeno. Teto, mwaha wa Bibiliya Yehova ononivaha ejhehedho yosogolo. Yathimaya sowihina Yehova onomulabihedha Bibiliya wihina anihudhihe dhikalelo dhohiyana-iyana wodhela emuthu yaye. Opendda dhikalelo ndha dhapama dha Yehova, dhinodahinya murima wehu ni dhinonithukulela ofunaga onfiyedha oliye. — Sal. 25:14.

2. Yehova alabihedhe ddi wihina akavihere athu omunona?

² Yehova onofuna wihina athu emunone. Kale Yehova olabihedha dhoroha, dhowoona ni Angero wihina akavihere athu omunona. (Núm. 12:6; At. 10:3, 4) Mbwenye yere okala yorusa ohudhera dhoroha, dhowoona ni muthenga, dhahere dhihilebiwa mBibiliyani. Bumwahaya, Yehova adhe aalabihedhege alobwana ale ‘oleba va livuruni’ ndhe afuniye wihina iyo nnone. (Jer. 30:2) Nnohowela okanna ebaribari wi makalelo Yehova asakuliye othapanya ni iyo bapama, ‘mwaha dila ya Mulugu eebaribari sologomana.’ — Sal. 18:30.

3. Ethu baani Yehova eriliye wihina Bibiliya akalewo ofiyedha peeno? (Isaías 40:8)

³ Omwileri Isaías 40:8. Thotho dha mBibiliyani dhinowakavihera alobwana vamodha ni ahiyana muwari mwa yaka dhowinjhivadhene. Ndo dhinandeya aavi? Bibiliya abanjhe olebiwa kale. Teto dhipano yalabihedhiwa kadhalegela, bumwahaya kopiya dhilebiwe mudhidhi yole kadhiwo peeno. Mbwenye Yehova weenya wihina dhilebiwe kopiya, teto alobwana ale yaleba kopiya ndhe kiyaali ologomana, mbwenye aliwa yokala pasope yalebaga kopiyadha. Namahudhera dhaala  ohuleba wodhela dholebela dha ebarayiku egi: “Kawo yolebela yakale elebiwe pama mohiyana ni Bibiliya.” Ebaribari wihina Bibiliya alebiwe kale ni dhipano dhahalegela teto kopiya dhalebiwe ni athu ohulogomana. Mbwenye, kananganyedhe ethu emodha, madhu nnawilerihu peeno, mubuwelo wa mwinnyene Yehova.

4. Ohudhera wula nnasunze ddi?

⁴ Yehova ntxela na nvaho dhatedhene dhapama. (Tia. 1:17) Bibiliya nvaho wathima Yehova anivahiliye! Enowandeya omunona muthu wodhela ele ananivahiye. Iyo podi owoga emodhave ni Bibiliya, mwaha nvaho ola ononihudhiha wodhela Yehova, teto mwaha wa Bibiliya nnowanda woona makalelo Yehova aninonniye. Ohudhera wula nnere woona dhikalelo tharu, Bibiliya ananihudhihiye wodhela Yehova, thotho dhaye, opama ni odhivela. Vano nnere obajha noonaga makalelo Bibiliya anonihiye thotho dha Yehova.

5. Nimakalelo baani Bibiliya anonihiye thotho anna Mulugu?

⁵ Yehova ohunona wihina nnohowela dholaga dhaye dha thotho. Teto, nvaho anivahiliye ali Bibiliya dhihidhaalamo thotho dhaye. Bibiliya ohukanna kopolo yosaddula dhigumi dha athu! Nuulebiwa livuru noobajha na mBibiliyani, Moyizeji owoga ni amwaana Izarayeli egi: ‘Mowindala kamwawonege ninga madhu ohukanna mabasa, mbwenye enatapulela egumi yenyu.’ (Deut. 32:47) Aniwa ndhe dhinawoga Bibiliya podi okanna murenddele mwigumini mwaaye (Sal. 1:2, 3) Teto, naarive Bibiliya agalebiwe kale, ohukanna kopolo yowomihedha dhigumi dha athu. Motajhiha, musayitini jw.org, epaddi série de artigo A Bíblia Muda a Vida das Pessoas,’ we podi ofwanya dhopadduwa dhokwaranya 50 dha athu, yerilena masadduwo mwigumini mwewa, mwaha obajha weddela ndhe yahudheriwa mBibiliyani. — 1 Tes. 2:13.

6. Mwahaya bwaddi nigawoga wi kawo livuru nnaligana ni Bibiliya?

⁶ Kaniwo livuru nnaligana ni Bibiliya. Mwahaya bwaddi? Mwaha mwinnya a Bibiliya di Yehova, oliye dakopolo dhatedhene, da mukalakala teto ohukanna enonelo wapitha athu aatene. Malivuru owinjhiva bovuwa ni bathima wapitha anamalebaya. Teto, malivuru owinjhiva enohiiwa olabihedhiwa wavira mudhidhi wowinjhivene. Mbwenye dholaga dha mBibiliyani dhinolabihedhiwa mudhidhi wamutene. Obajha kale ofiyedha peeno, dholaga dha mBibiliyani dhinna wakavihera athu. Nilerigi ni naapenddaga livuru nna notaleleya, Yehova onolabihedha muzimu waye wotxena wihina anikavihere woona makalelo nnalabihedhihu dholaga dha mBibiliyani mwigumini mwehu. (Sal. 119:27; Mal. 3:16; Heb. 4:12) Mwebaribarene mwinya a Bibiliya Yehova onofuna wukavihera. Ononamo aavi omwilerigi Bibiliya malabo amatene!

7. Nimakalelo baani Bibiliya atugumaniliye nlogo na Mulugu kale?

⁷ Ehikalawo ethu emodha enatonyihedha wi Bibiliya ohukanna thotho dha Mulugu, okavihera nlogo na Mulugu wi nikale nowiwanana. Amwaana Izarayeli nuuvolowa elabo yothomeliwa, aliwa yahimwalana okalaga dhilabo dhohiyana-iyana, amodha wa aliwa yali anamameza amodha yasamalela anenyama ni amodha yali anamalima. Amwaana Izarayeli yakala elabo emodha podi wera yahihiya wathuwathuwela amwaana Izarayeli amodha yakala kobela emodhaya. Mbwenye Yehova owoga wihina aatene yohowela otugumana mudhidhi wavayekiwa, wihina  yiwe wileriwa ni otapuleliwa wa nlamulo. (Deut. 31:10-13; Nee. 8:2, 8, 18) Kubuwela makalelo yakala amwaana Izarayeli yadhowa oJeruzale ni yonaga muthithi ni muthithi wa adhaari a Yehova yadhela dhilabo dhimodha. Mwaha wa yeyo, Yehova okavihera nlogo naaye okala athu owiwanana. Vasogolova mulogo wekiristawu nuumagiwa, athu owinjhiva yawoga dhiwogelo dhohiyana-iyana, amodha yali athima amodha orela amodha ohawa mbwenye aatene yodhiveliwa dholebela. Eyo yodhana wiwanana wodhela omwebedha Mulugu ebaribari, naleya yakala makiristawu yowanda wawonelamo madhu a Mulugu yatugumana ni makiristawu mamodha ni yowakela nikavihero newa wihina yonelemo dholebela dhimodha. — At. 2:42; 8:30, 31.

8. Nimakalelo baani Bibiliya anakaviheriye nlogo na Yehova okala owiwanana peeno?

⁸ Yehova onomulabihedha Bibiliya wihina ahudhihe nlogo naaye okala owiwanana. Bibiliya onowoga ebaribari wodhela Yehova nnahowelihu onona, iyo nnotugumana sumana dhatedhene munyumbani ya Omwene ni omusonkanoni wa labo nimodha ni wa malabo mararu nnahudhihiwihu alabihedhiwaga Bibiliya. Bumwahaya, Bibiliya ekalelo yathima Yehova analabihedhiye wihina akavihere nlogo naaye ‘omulabela owiwanana.’ — Sof. 3:9.

9. Ekalelo baani enahoweleya wihina naande omoonelamo Bibiliya? (Lucas 10:21)

⁹ Kasugwa ekalelo emodha enoniha wihina Yehova da thotho. Dhipaddi dhowinjhiva dha  Bibiliya, dhilebiwe wihina athu owiyeviha yandege wonelamo. (Omwileri Lucas 10:21.) Teto athu adhilabo dhatedhene podi omwileri Bibiliya. Mbwenye namahudhera dhaala ohuwoga egi: “Bibiliya livuru nnathabwa wileriwa wapitha malivuru maatene, teto nnowileriwa nupwaseya.” Naarive dhigaali ndo, athu owiyeviha binanda wonelamo pamadhene ndhe enileriwa mBibiliyani ni oparihedha mabasa.— 2 Cor. 3:15, 16.

10. Ni makalelo baani Bibiliya anonihiye thotho dha Yehova?

¹⁰ Bibiliya ononihudhiha thotho anna Yehova ni makalelo mamodha. Yehova kanamulabihedha Bibiliya baahi wihina anihudhihe ninga nlogo, mbwenye, oliye ononivaha dhoholela ni onoomutodola kadda muthu wa iyo. Namwilerigi Bibiliya, onowanda woonelamo makalelo Yehova ananithuwathuweliye. (Isa. 30:21) Onofwanyiwaga makathamiho, vano we wileri yolebela ya mBibiliyani ofiyedha we owoga wihina yolebela ela egilebele miyo? Mbwenye, Bibiliya alebeliwe wihina adahinye murima dhaathu aatene. Ki vano, dhinandeya aavi Bibiliya okanna dholaga dhorolomeleya, dhiniwanana pamadhene ni ndhe onahoweliwe? Eyo enowandeya mwaha mwinya a Bibiliya muthu athotho wapitha athu aatene. — 2 Tim. 3:16, 17.

11. Yehova oninhe addi wihina Mulugu ohikanna nsakulo mudhidhi alebiwaga Bibiliya?

¹¹ Ekalelo emodha ya Yehova buupama. (Deut. 32:4) Opama winowiwanana ni ekalelo emodha, ohikanna nsakulo, teto Yehova Kanna nsakulo. (At. 10:34, 35; Rom. 2:11) Nnowanda wonelamo ohikanna nsakulo wula wa Mulugu wodhela makalelo Bibiliya alebiwiye. Vobajhavene Bibiliya aalebiwe ni dhiwogelo dhowinjhiva athu yanoniliwa. Motajhiha dhipaddi dhowinjhiva dha Bibiliya dhowakwana 39 dhalebiwe ni ewogelo ya Ebarayiko, yaali ewogelo nlogo na Mulugu yawogiwa mudhidhi yole. Mbwenye mudhidhi wa makiristawu oobajha ewogelo yathabwa owogiwa yaali egerego, bumwahaya, malivuru oogomihedha owakwana 27 yalebiwe ni egerego. Teto Yehova kalabihedhe ewogelo emodha baahi wihina etapuleliwena Bibiliya, peeno wapela elabo yaatene ehikalawo athu owakwana 8 bilyonji, enawoga dhiwogelo dhowinjhiva dho iyana-iyana. Vano ki yandeye aavi athu aatene yaala ohudhera wodhela Yehova?

12. Nimakalelo baani yovuhulela ya Daniel 12:4, enakwaneliwa malabo yaala?

¹² Va yovuhulela ya Daniyeli nihoona wihina Yehova onopaganya wi malabo okuthula ‘enonelo yeebaribari’ enafwanyihu mBibiliyani yere ‘odhaala mwilaboni yaatene,’ obe athu yerege wonelamo. (Omwileri Daniel 12:4.) Makalelo yovuhulela ela enakwaneliwa peeno, fuudhela Bibiliya ni malivuru eniwanana ni Bibiliya. Peeno, Bibiliya livuru nnathabwa otapuleliwa ni nnagawiwa wapela elabo yaatene yavati. A Bibiliya enatapuleliwa ni enagulihiwa ni empereza dhowinjhiva enothabwa okwima. Mbwenye, nlogo na Mulugu enomutapulela Bibiliya epaddi modha obe aatene ni dhiwogelo dhohiyana-iyana, teto muthu di muthu podi okanna ahilivile korowa. Mareelihoya, athu wapela elabo yaatene enna orumedha muthenga dhapama dha mulugu omakuthulo wahinafiye. (Mat. 24:14) Yehova Mulugu ehu apama. Anna wavaha ofuru athu owinjhiva wihina emunone wodhela omwileri ni omuhudhera Bibiliya. Yehova onowerana eyo mwaha ononidhivela vanlubale.

13. Mwahaya bwaddi nigawoga wihina Bibiliya onowoniha wi Mulugu ononidhivela? (João 21:25)

¹³ Bibiliya ononikavihera wonelamo wihina ekalelo yathima ya Yehova — fudhivela. (1 João 4:8) Nnowanda woona eyo wodhela dhithu Yehova alebiliye mBibiliyani ni dhithu ahilebiliyemo. Bibiliya onowoga pamadhene dhithu nnahowelihu werana neegi nikanne wandane wapama ni Yehova, okanna ohagalala peeno ni wakela egumi yohimala. Mwaha odhivela Yehova anniyena ni iyo kanininyemelihe ni dhithu nahihowelihu onona wihina nimulabele. — Omwileri João 21:25.

14. Ethu baani emodha nnafwanyihu mBibiliyani enoniha wihina Yehova ononidhivela?

¹⁴ Makalelo alebiwe Bibiliya onowoniha wihina Yehova ononidhivela ni makalelo mamodha. Ni makalelo baani? Bibiliya kanawoga dhithu dhatedhene nnahowelihu wihina neregena mwigumini mwehu, Ohiya eyo Yehova ononikavihera iyo opendda alabihedhaga dhopadduwa dhamwigumini dhaathu amodha, dhovuhulela dhotikiniha ni dholaga dhinanikavihera werana dhothoma dhapama. Ni makalelo yaala oliye ononiriha. Teto Yehova onofuna wihina nimudhivelege ni murimihu waatene.

15. a) Yehova anoniha aavi wi onowathuwathuwela ale enamwileri Bibiliya? b) Va fotuni, dhopadduwa baani mwanamwihima ola, ddibila ni murogola owunnuwelavo enapeddiwa? (Gén. 39:1, 10-12; 2 Reis 5:1-3; Luc. 2:25-38)

¹⁵ Bibiliya onowoniha wihina Yehova ononipwatha. Mwahaya bwaddi nigawogaga ndo? MBibiliyani dhihikalamo dhopadduwa dhaathu yanna dhikalelo dhimodhave ninga dhehu. Iyo podi wipweha vamburoni vewa mwaha  aliwa yali athu yanna dhikalelo ni ‘mubuwelo ninga wehu.’ (Tia. 5:17) Noonaga makalelo Yehova aweddihiliye athu yavireliwe dhithu dhimodhave dhinanifwanya, enokweya wonelamo wihina ‘Yehova Mulugu anthebwa ni athagaraga.’ — Tia. 5:11.

16. Nnahudhera ddi wodhela Yehova nilerigi dhopadduwa dha mBibiliyani dhinawoga wodhela athu yerilena dhithu dhabure? (Isaías 55:7)

¹⁶ Bibiliya onowoniha odhivela oona Yehova ni iyo mwamakalelo mamodha. Bibiliya onopaganya wihina Yehova kanadha anisukuma naarive nigerilena ethu yabure. Amwaana Ezarayeli yahimuthegela Yehova dila dhowinjhivadhene, mbwenye naarive dhigarive ndo, aliwa yathwaruwa ni murimiwa wamuteene Yehova owalevelela. (Omwileri Isaías 55:7.) Makiristawu oobajha kiyanganyedha wihina Yehova owadhivela vanlubale. Yehova ahinvethela murumiwi Pawulo wakongomedha addibila amodha ‘omulevelela ni omulibiha’ ddibila erilena yothega mbwenye athwaruwile ni murimaye waatene. (2 Cor. 2:6, 7; 1 Cor. 5:1-5) Sotikiniha onona wihina Yehova kasukumme nlogo naaye naarive yeragana dhithu dhabure. Ohiya eyo ni makalelo odhivela oliye wasumulula ni wakavihera ohogolowela okanna wandana ni oliye. Yehova onopaganya emodhave wa ale yerilena yothega ni ethwaruwa. — Tia. 4:8-10.

17. Mwahaya bwaddi Bibiliya okala nvaho wa vayekiwa?

¹⁷ Yehova ohunivaha ethu ya thima. Mwahaya bwaddi Bibiliya okala nvaho wa vayekiwa? Mwaha, ninga Bibiliya anawogeliye, Yehova Mulugu da pama, athotho ni odhivela. Bibiliya yowoniha ya Mulugu wihina oliye onofuna wi nimunone. Teto Yehova onofuna wi nandane ni oliye.

18. Nnande addi woniha wihina nnovaha thima ‘nvaho ola woweela’ anivahile Mulugu?

¹⁸ Iyo kannafuna ohiya ovaha thima ‘nvaho ola wa vayekiwa,’ eli madhu a Mulugu. (Tia. 1:17) Bumwahaya, nnohowela odhowagave nivahaga thima nvaho ola. Nnere wanda werana eyo, namwilerigi malabo aamatene ni napenddaga nde nnilerihu mBibiliyani. Ni makalelo yaala kananganyedhe wihina Yehova ali mwinya a Bibiliya aneere oreeliha wilibihera wehu ni nnere wanda ‘ofwanya enonelo ya Mulugu.’ — Pro. 2:5.