1. Yesu aawogile ddi wodhela omakuthulo, ki awaddele ddi anamahara aye?

 MUDHIDHI Yesu ahinathi okwa anamaharaye omukoha yegi . . . ‘Yintelelo ni omakuthulo wa dhithu dhatedhene siivi?’ (Mat. 24:3) Podi wera anamahara ale yakoha wihina enone Jeruzale ni Tempulu yaagujhuliwe alini. Awakulaga, Yesu kawonge baahi mudhidhi Jeruzale aagujhuliwiye, mbwenye, ohuwoga wodhela malabo okuthula ala nnakalihu. Yesu ahiwoga wodhela omakuthulo egi: ‘Wodhela nlabo nno ni mudhidhiya kavo anonne, newene angero odhulu, newene miyo, mbwenye ababa baahi.’ Yesu nuwawoga madhu yala, oliye wakongomedha wihina ‘yisugwerege ni yahigonelevo.’ — Mar. 13:32-37.

2. Mwahaya bwaddi makiristawu obajha yahoweliwa wiisugwera?

² Nsaka na makiristawu obajha, maJudewu yohowela okala mento! Mwaha eyo yovolowela egumi yewa. Yesu wawaddela ethu yahoweliwa opwasedha, wihina enone wi Jeruzale eere ogujhuliwa. Oliye owoga egi: ‘Mowindo, mwamoona Jeruzale agarijhiwe naanyakoddo, munone wi mohilegela onere ogujhuliwa.’ Makiristawu yoona ndhe dhipadduwaga yohowela ohara yolaga ya Yesu wodhela ‘othawela omwangoni.’ (Luc. 21:20, 21) Ole iwelele ni erilena ele awogile Yesu ahivuluwa akudda Roma numugujhula Jeruzale.

3. Ohudhera wula nnasunze ddi?

³ Mohilegela elabo ela yabure enere omala, mbwenye nlabo nno nihinafiye iyo nnohowela wiikoma ni ohugonelavo. Ohudhera wula nnere woona makalelo nnahowelihu okala pasope, noonaga dhithu dhinapadduwa mwilaboni,  makalelo owiisugwera ni makalelo nnalabihedhihu pama mudhidhi ola mung’onove ohanlewo.

4. Mwahaya bwaddi nigahowela opwasedha dhithu dhinapadduwa mwilaboni ni makalelo dhinakwanelihiwa dhovuhulela dha mBibiliyani?

⁴ Nimakalelo apama, nipwasedhe woona dhopadduwa dha mwilaboni dhinakwanelihiwa dhovuhulela dha mBibiliyani. Motajhiha, Yesu ohuwoga dhithu dhaapadduwe, wihina anikavihere wonelamo mudhidhi baani elabo ela enathongiwa ni Saddana yafiyiwa omakuthulo. (Mat. 24:3-14) Murumiwi Peduru, ohunikongomedha osugwa dhovuhulela ni makalelo dhinaakwaneliwa, wihina nilibihe nroromelo nehu. (2 Ped. 1:19-21) Livuru nogomihedha na mBibiliyani, nnabajha ni madhu ala: ‘Yovuhulela ya Yesu Kiristu, avahiwiye ni Mulugu, wihina awonihe adharaaye dhithu dhinaapadduwe mohilegela.’ (Apo. 1:1) Bumwahaya, sapama osugwa dhithu dhinapadduwa mwilaboni ni woona makalelo dhinakwanelihiwa dhovuhulela dha mBibiliyani. Teto, eyo podi onthukulela ofunaga othapanya ni athu amodha wodhela dhovuhulela ndha.

5. Ethu baani nnahowelihu werana, ki ethu baani nahinahowelihu werana? (Osugwe fotu.)

⁵ Nathapanyaga naathu amodha, wodhela dhovuhulela dha mBibiliyani, nnohowela okala pasope wihina nahiwoge dhithu nahinonilihu pama. Mwahaya bwaddi? Mwaha nawoga dhithu nahinonilihu pama, nnere ototela ohiwanana mmulogoni. Motajhiha, iyo podi wiiwa wihina anamathonga ehitugumana wi edhena murenddele nuubareleya. Ohiya wababelaga akala eyo yovuhulela ya 1 Tessalonicenses 5:3, nnohowela okala mento ni muselu dhinavuwihiwa musayitini mwehu. Dhothapanya dhehu dhakumelelaga mmalivuruni enavuwihiwa ni mudhaari a Yehova, nnere okavihera mulogo “okala owiwanana.” — 1 Cor. 1:10; 4:6.

6. Nnahudhera ddi ni yolebela ela ya 2 Pedro 3:11-13?

⁶ Omwileri 2 Pedro 3:11-13. Murumiwi Peduru ononikongomedha okanna monelo wapama, nahudheraga dhovuhulela dha mBibiliyani. Oliye ononikongomedha ‘wubuwelaga pamadhene nlabo na Yehova.’ Mwahaya bwaddi? Mwaha kahiwihina nnafuna ninone ‘labo ni mudhidhi’ Yehova anamudhiyena Armajedo, mbwenye nnafuna nlabihedhe mudhidhi onahala wihina nikale athu a ‘dhikalelo dhapama ni enerana dhatedhene wihina emwebedhe Mulugu.’ (Mat. 24:36; Luc. 12:40) Nimadhu mamodha, nnafuna nerena dhatedhene ni makalelo apama, nikannaga ebaribari wihina dhatedhene nnerihuna mmabasani a Yehova, nnerana mwaha nnomudhivela. Akala nnofuna werana ndho, nnohowela wiisugwera.

7. Nnonihe addi wihina nnowisugwera? (Lucas 21:34)

⁷ Yesu ahiwoga ni anamahara aye wihina kisugwerege baahi dhopadduwa dha mwilaboni, mbwenye yohowela wiisugwera. Dhithu dhilebiwe va Lucas 21:34. Enowoniha eyo (Omweileri.) Kasugwa Yesu awogiliye: ‘Mudidele wiisugwera.’ Muthu aniisugwera onokala pasope ni ethu-sithu yamuthukulele ononga wandana waye ni Yehova, ni onowerana ethu-sithu wihina alapelane ni  dhithu dhendha. Nimakalelo yala onokanna odhivela wa Mulugu. — Pro. 22:3; Judas 20, 21.

8. Yolaga baani Pawulo avahiliye makiristawu?

⁸ Murumiwi Pawulo ahawaddela makiristawu wihina edidele wisugwera. Motajhiha, oliye ahawaddela makiristawu a mulogo a eEfeso egi: ‘Mukale mento wihina muheedde ninga ataduwa, mbwenye ninga athu athotho.’ (Efé. 5:15, 16) Saddana anna oxixave ogujhula wandana wehu ninnihuna ni Yehova. Bumwahaya, Bibiliya aganikongomedha ‘wonelamo efunelo ya Yehova,’mwaha nerana ndo, nnere wanda wibarela wodhela dhoweha dha Saddana.— Efé. 5:17.

9. Nnande addi wonelamo efunelo ya Yehova?

⁹ Bibiliya kanawoga kadda ethu yathukulele ononga wandana wehu ni Yehova. Malabo mamodha nnohowela werana dhothoma wodhela ndhe Bibiliya ahinawogiiye mwamakalelo okweya. Wihina nerena dhothoma dhapama, nnohowela wonelamo ‘efunelo ya Yehova.’ Nnere wanda werana eyo, naamuhudheraga Bibiliya malabo amatene ni navedaga mudhidhi wihina nipendde nde nihudherihu. Naarive Bibiliya ahiwogaga wodhela muselu dhatedhene iyo podi werana dhothoma dhapama. Enaanikavihere werana dhothoma dhapama fuwilibihedha, wonelamo efunelo ya Mulugu ni ‘wubuwelaga ninga Yesu.’ (1 Cor. 2:14-16) Malabo mamodha, enokweya woona yoweha, mbwenye Malabo mamodha enorusa woona.

10. Dhoweha baani nnahowelihu osukuma?

¹⁰ Dhoweha dhimodha nnahowelihu othawa sindha: Ogayelana ni muthu ahile muhiyanihu obe mamunihu, olezela, oojha bure, owoga dhithu dhinapiha mbani, woona pornografiya, woona filime dhowopiha, listana nnodhowave. (Sal. 101:3) Mwiddanihu Saddana anna oveda makalelo onimwalaniha ni Yehova. (1 Ped. 5:8) Nahisugweraga Saddana podi odhala thanga mmurimani mwehu. Ninga nrima, ohiroromeleya, ofunaga dhithu dhaakwihu, wawidda athu amodha, okala owali ni okoya ntxiga. (Gál. 5:19-21) Podi weera omabajhowene, okanna mubuwelo ndha podi okalaga ninga masika. Mbwenye, naherana ethu-sithu wihina nisukume mubuwelo ndha, ninga muthanko wa mwinga winalata dhatedhene dhaddamele, dhikalelo ndha podi onitotela makathamiho mwigumini mwehu. — Tia. 1:14, 15.

11. Yoweha baani yowoopiha nnahowelihu othawa, ki mwahaya bwaddi?

¹¹ Motajhiha, kasugwa yoweha yowopiha nahinandihu woona. Kubuwela olabaga ni muthu ahili namoona a Yehova, we onafuna wihina oliye awonege anamoona a Yehova mwamakalelo apama. Bumwahaya, onomoniha odhivela ni opama. Malabo mamodha onomujha alimosu ni oliye, teto we onowerana eyo malabo amatene. Mbwenye, muselu munathapanyedhinyu malabo mamodha, samanyazo. Omabajhowene we onotakaleliwa ni kunadhiveliwa. Mbwenye, nuuvira mudhidhi we olemelela ofiyedha ohitakaleliwaga. Vano labo dhaala, mukwawo ole omabasani uwithana wihina mwag’we vamodha, vano we orumedha. Mwaha wa yeyo, we podi obajha wubuwela ninga oliye. Teto, mohilegela, onerege werana dhithu dhimodhave ninga oliye.  Ebaribari wihina nnafuna nawonihe opama athu aatene. Mbwenye, kanidduwale wihina weedda ni athu abure winononga dhikalelo dhapama. (1 Cor. 15:33) Ninga Yesu awogiliye nadidela wiisugwera, kannakanne wandana ni ale enaapwadha malagano a Yehova. (2 Cor. 6:15) Nerana ndo, nnere woona yoweha ni nnere othawa.

12. Ethu baani yahowela werana anamahara a Yesu wula ejheehaga omakuthulo wa elabo.

¹² Yesu kaafuna wihina anamahara aye yakune mada wula ejheehaga omakuthulo wa elabo. Mbwenye oliye ahavaha mabasa wihina yapare. Mabasaya yali olaleya muthenga wOmwene ‘oJeruzale, oJudeya watewene ni oSamariya ofiyedha wigomele elabo.’ (At. 1:6-8) Ala yaali mabasa athima anamahara a Yesu yawakeliwa! Mwaha, wodhela wapara mabasa ala nuuviheya, aliwa yahanda olabihedha pama mudhidhi wewa.

13. Mwahaya bwaddi nigahowela olabihedha pama mudhidhi wehu? (Colossenses 4:5)

¹³ Omwileri Colossenses 4:5. Wihina nande wiisugwera nnohowela onona makalelo olabihedha pama mudhidhi wehu. Mwaha ‘mudhidhi rurumusa’ ni kunampaganya muthu. (Ecl. 9:11) Bumwahaya, mudhidhi  bu mudhidhi iyo podi oyelela egumi yehu.

14-15. Nnande aavi olabihedha pama mudhidhi wehu? (Hebreus 6:11, 12) (Osugwe fotu.)

¹⁴ Iyo podi olabihedha pama mudhidhi wehu, neragana efunelo ya Yehova ni nalibihaga wandana wehu ninnihuna ni oliye. (João 14:21) Nnohowela okala ‘ooliba ni oohithikeya, naviheyelaga mabasa nnaparelihu nabwiya.’ (1 Cor. 15:58) Nerana ndo, naarive omakuthulo wifiye — obe nikwe— kanidha nisinyuwa mwaha osakula omulabela Yehova. — Mat. 24:13; Rom. 14:8.

¹⁵ Peeno Yesu anna waholela anamahara aye enaapara mabasa olaleya wapela elabo yaatene. Yesu ahapaganya anamahara aye wihina eere okala ni aliwa ofiyedha omakuthulo, teto oliye anna wakwanihedha mpaganyo yola. Peeno Yesu anna waholela mabasa enapariwa wapela elabo yaatene. Wodhela nikuru na Yehova iyo ninna oxagihiwa wihina nande wapara mabasa ala olaleya. (Mat. 28:18-20) Iyo ninna werana ele Yesu anajhehiye wa iyo. Ninna werana dhatedhene nnandihu nlaleyaga ni naahudhihaga athu, nikalaga mento nimujhehaga Yehova odhana omakuthulo wa dhithu dhatedhene. Wodhela oparihedha mabasa yolaga enafwanyeya va Hebreus 6:11, 12, eneere onikavihera ohanganyedha ejhehedho ninnihuna ofiyedha omakuthulo. — Omwileri.

16. Nithome weera ddi?

¹⁶ Yehova ohuthoma labo anafuniye omariha elabo ela ya Saddana. Nlabo nno nafiya Yehova anere werana dhatedhene apaganyiliye werana. Ebaribari wihina iyo podi wubuwelaga wi omakuthulo wa elabo ela winna ogonela, mbwenye nlabo na Yehova ‘kannalegela.’ (Hab. 2:3) Vano, nnohowela wikoma wihina nahigonelevo ‘nimujhehaga Yehova.’ Kanihiye ‘omujheha Yehova nuuvilela, Mulugu ehu anaanivuluse.’ — Miq. 7:7.