OHUDHERA 2
JHIBO 132 We ori nningo naaga
Alobwana ootela, mwarihege amwaarinyu
‘Mulobwana we, . . . Omuthithimihege.” — 1 PED. 3:7.
DHITHU NNAAHUDHERIHU
Nnere woona makalelo alobwana etenle enafuniwa wooniha wi enowariha amwaariwa ni ndhe enawogiwa ni eneriwana.
1. Mwahaya bwaddi Yehova adhe awitege matelo?
YEHOVA ‘Mulugu oohagalala,’ teto anafuna wi nihiyoya nihagalalege. (1 Tim. 1:11) Bumwahaya Yehova ohunivaha nvaho dhohiyana-iyana dhinanikavihera okanna egumi yohagalala. (Tiya. 1:17) Nvaho mmodha ananivahiye bi matelo. Mulobwana ni muhiyana yatelana, enopaganyana odhivelana ni orihana mmodha ni mukwaye. Anamatelana enalibiha odhivela enniwana mmodha ni mukwaye, enokanna ohagalala webaribari mwigumi mwewa. — Pro. 5:18.
2. Matelo owinjhiva peeno eli aavi?
2 Yowukulihaya sowihina anamatelana owinjhiva ehiddiwala mpaganyo yeriliwana labo na matelo ewa. Bumwahaya anamatelana owinjhiva peeno kinahagalala. Muselu dhaala ovuwihiwe nnikuru naakudda egumi, nnawoga wihina alobwana owinjhiva etenle enowawoniha goyi amwaariwa wodhela waavada, waruwana ni werana dhithu dhinapiha mbani. Alobwana amodha enariha baahi amwaariwa yakala vaari va athu, mbwenye yakalavo abiili kinaariha. Ohiya eyo, matelo owinjhiva enokanna makathamiho akala mulobwanaya anoomoona pornografiya.
3. Mwahaya bwaddi alobwana amodha egaweddiha amwaariwa mwamakalelo abure?
3 Mwahaya bwaddi alobwana amodha egaweddiha amwaariwa mwamakalelo abure? Yowakulaya sowihina amodha enowaweddiha amwaariwa mwamakalelo abure mwaha makalelo eleliwiwa. Aliwa podi wubuwelaga wi dhithu dhatedhene eneriwana kahi dhabure. Amodhaya enahara mweddelo wa murudda wewa. Motajhiha, dhilabo dhimodha athu enowoga wi mulobwana eebaribari, anohowela olabihedha kopolo dhaye wihina amoonihe mwariye wi duliye anathonga vaade. Teto alobwana amodha kinanda osugwera mubuwelo ni owali wewa. Ohiya eyo, alobwana amodhaya enokanna monelo wabure wodhela ahiyana ni ogonihana, mwaha enothabwa omoona pornografiya. Teto yothabwaya sowihina, muselu dhimodha dhivuwihiwe mudhidhi wa koronaviru, dhinawoga wihina alobwana amodha yahibajha waweddiha amwaariwa mwamakalelo abure. Naarive dhipadduwaga dhithu dhohiyana-iyana ninga ndha dhisorihiwe vala, alobwana etenle enohowela odidela waariha amwaariwa.
4. Mukiristawu atenle anohowela okala pasope ninddi, ki mwahaya bwaddi?
4 Mukiristawu atenle anohowela okala pasope wihina ahikanne mubuwelo wabure wodhela ahiyana. a Mwaha wa ddi? Mwaha malabo owinjhiva iyo nnerana ndhe nnubuwelihu. Teto murumiwi Pawulo ahakongomedha makiristawu oothikitheliwa wihina “ehiye wuubiwa ni elabo ela.” (Rom. 12:1, 2) Murumiwi Pawulo nuwalebela karta makiristawu oRoma, mudhidhi yoole wahikala mulogo. Naarive dhigaali ndo, madhu a murumiwi Pawulo enowoniha wihina addibila amodha yanna ovoloweliwa ni dhilemelelo ni makalelo owubuwela a elabo. Bumwahaya murumiwi Pawulo adhe aalagege wihina esaddule makalelo ewa owubuwela ni dhikalelo dhewa. Teto peeno, yolaga ela enowapwatha makiristawu aatene etenle. Mbwenye yowukulihaya sowihina, makiristawu amodha etenle enna ovoloweliwa ni mubuwelo wa elabo ela. Vano eyo, enowathukulela alobwana etenle waweddiha amwaariwa mwamakalelo abure. b Ki Yehova anafuna wi alobwana etenle yaweeddihege aavi amwaariwa? Yowakulaya enafwanyeya va yolebela oli musolo wa ohudhera wula.
5. Mowiwanana ni 1 Peduru 3:7, mulobwana amweddihege mwariye ni makalelo baani?
5 Mmwileri 1 Peduru 3:7. Yehova anowaruma alobwana etenle wihina yarihege amwaariwa. Oriha enovolowelavo makalelo nnamweddihihu muthu nnanvahihu thima. Mulobwana anamuriha mwariye, anomweddiha nuudhivela ni opama. Muwari mwa ohudhera wula, nnere woona makalelo mulobwana atenle anahoweliye wooniha wi anomuriha mwariye. Mbwenye nihinathi, nnere woona ekalelo enooniha wihina mulobwana atenle kanamuriha ni kanamudhivela mwariye.
KUWERENA ETHU-SITHU ENAMPIHA MBANI MWARIYO
6. Mulobwana anamoniha goyi mwariye, Yehova anamoona aavi? (Kolosense 3:19)
6 Mulobwana kanahowela omooniha goyi mwariye. Yehova anowawidda athu oowali. (Sal. 11:5) Teto Bibiliya anowatoriha alobwana enaweddiha amwaariwa mwamakalelo abure. (Mal. 2:16; mmwileri Kolosense 3:19.) Mowiwanana ni 1 Peduru 3:7 eli yolebela vikumihiwe ohudhera wula, mulobwana ahinamweddiha pama mwariye, kanakanna wandana wapama ni Yehova, teto Yehova podi ohavuruwanaga malobelo aye.
7. Mowiwanana ni Efeziyu 4:31, 32, makalelo baani owoga mulobwana atenle anahoweliye orabela? (Osugwe “Wonelamo.”)
7 Mulobwana kanahowela omobela owali newene omuwogela madhu abure mwariye. Alobwana amodha enowawobela owali amwaariwa ni enowawogela madhu overeyiha murima. Mbwenye Yehova anowawidda alobwana “oonyanyuwa, oowali, ooruwana ni enawoga madhu oovereyiha murima.” c (Mmwileri Efeziyu 4:31, 32.) Yehova onowiwa dhithu dhatedhene nnawogihu. Bumwahaya oliye onothuwathuwa ni makalelo mulobwana anawogiye ni mwariye, naarive egaalivo abiili. Mulobwana anawoga nuuwali ni mwariye, anowanonga matelo aye ni wandana anniyena ni Yehova.— Tiya. 1:26.
8. Monelo wa Yehova wodhela pornografiya buuvi? Ki mwahaya bwaddi?
8 Mulobwana kanahowela omoona pornografiya. Monelo wa Yehova wodhela pornografiya buuvi? Oliye anowidda pornografiya. Mulobwana anoona fotu dhabure ni dhonyakavala, onononga wandana waye ni Yehova ni kanamuriha mwariye. d Yehova anajheha wi mulobwana akale oororomeleya ni mwariye. Mwaha wi mulobwana oororomeleya kanubuwela newene kanerana ethu yonyakavala. Teto Yesu ohuwoga wihina mulobwana anadidela omusugwa muhiyana ofiyedha omukalela “munigwa mmurimani,” ohumukumiha mba. e — Mat. 5:28, 29.
9. Mwahaya bwaddi Yehova agamwidda mulobwana anamuwaddiheda mwariye werana dhithu ahinafuniye mudhidhi wogonihana?
9 Mulobwana kanahowela omuwaddihedha mwariye werana ethu-sithu ahinafuniye mudhidhi yagonihanaga. Alobwana amodha enowawaddihedha amwaariwa werana dhithu dhonyakavala mudhidhi yagonihanaga. Obe enowerana dhithu dhinathukulela amwaariwa ohivaha thima ni dhinaporosa mubuwelo wewa. Yehova anajheha wi alobwana yadhivelege amwaariwa ni erihege mubuwelo wewa. (Efe. 5:28, 29) Ki akala mukiristawu kanamweddiha pama mwariye mwaha womoona pornografiya, anaande aavi osaddula mubuwelo waye?
MULOBWANA ATENLE ANANDE AAVI OMURIHA MWARIYE?
10. Ddiniyani enamukavihere mulobwana atenle omuriha mwariye?
10 Ddiniyani enaamukavihere mulobwana atenle omuriha mwariye? Makalelo apama omuriha mwariye fuudhela wilibihedha omutajhiha Yesu. Ebaribari wi Yesu kanatelege. Mbwenye makalelo oliye aweddihiye anamahara aye, yotajhiha yapama wi alobwana etenle eharege. (Efe. 5:25) Motajhiha, kabeni noone makalelo alobwana etenle enafuniwa omutajhiha Yesu wodhela makalelo awogiye ni aweddihiye anamahara aye.
11. Yesu aweddiha aavi anamahara aye?
11 Yesu owaweddiha anamahara aye ni nriho vamodha nuupama. Oliye kaali abure newene kiwona ninga namathonga. Naarive agaali Nabwiya ni namahudhiha, oliye kaalabihedha owedha waye wihina awonihe goyi anamahara aye wi emoovege. Ohiya eyo, Yesu owapara mabasa ni owakavihera anamahara aye. (Juwa. 13:12-17) Labo dhaala, oliye ahiwoga ni anamahara aye eegi: “Muhudhere ni miyo, mwaha wi gili oopwaseya teto murima waga bowiyeviha, mwindo murima dhenyu dhinere otodoleya.” (Mat. 11:28-30) Ninga enawogela yolebela ela, Yesu aali muthu oopwaseya. Muthu oopwaseya kahiyo oolodhowa, ohiya eyo oliye ohukanna kopolo ni anowanda wisugwera. Naarive agaali ootakaleliwene, oliye anakala oopwaseyene ni onowanda wisugwera aaligiwaga.
12. Yesu awoga ni makalelo baani ni athu amodha?
12 Yesu owalabihedha madhu aye wihina alibihe ni atodole athu amodha. Teto kawoobela owali anamahara aye. (Luk. 8:47, 48) Malabo mamodha amwiddani aye yoxixa owoga dhithu dhopiha mbani wihina Yesu atakaleliwe, mbwenye ‘yamuruwanaga, kawaakula nuruwana.’ (1 Ped. 2:21-23) Dila dhimodha Yesu othoma omaala, ohiya wawakula mwamakalelo oowali. (Mat. 27:12-14) Ela yotajhiha yapama wihina alobwana etenle ele makiristawu eharege!
13. Mowiwanana ni Matewuji 19:4-6, ddiniyani mulobwana anahoweliye werana wi “akale ni mwariye?” (Osugwe fotu.)
13 Yesu ohuwoga wihina alobwana etenle edidele okala ororomeleya wa amwaariwa. Oliye ahaalabihedha madhu aababe wihina aakongomedhe alobwana odidela “okala ni mwariwa.” (Mmwileri Matewuji 19:4-6.) Madhu owi okala ni mwariwa ni egerego, enatapulela “obanda obe omagelela.” Eyo enatapulela wi odhivela onna mulobwana ni mwariye onohowela okala woliba ninga yere obandana mmodha ni mukwaye. Mwaha wihina aliwa yathoma omwalana, eyo podi watotela makathamiho aabilene. Mulobwana anna wandana wapama ni mwariye, onosukuma dhithu dhatedhene dhonyakavala dhiniwanana ni pornografiya. Teto oonaga ethu-sithu eli yonyakavala, ahubuwele dila biili oliye ‘onowarabeliha mento aye wa dhithu dhihinna mabasa.’ (Sal. 119:37) Teto ninga Jo, oliye anowerana nipangano ni mento aye ni anothoma ohimusugwa ni munigwa muhiyana ahili mwariye. — Jó 31:1.
Mulobwana anafuna wi mwariye amuroromelege, kanamusugwa pornografiya (Osugwe ddima 13) g
14. Ddiniyani mulobwana anamweddiha mwariye mwamakalelo abure anahoweliye werana wihina ahogolowele okanna wandana wapama ni Yehova vamodha ni mwariye?
14 Mulobwana anamoniha goyi mwariye, onohowela werana ethu-sithu mowaguva wihina awomihedhe wandana anniyena ni Yehova vamodha ni mwariye. Ddiniyani oliye anahoweliye werana? Yobajha, oliye anohowela wonelamo wi oyo muladdu munlubale. Teto kaavo ethu anawogiye ni aneriyena eli yoviteya vamentoni va Yehova. (Sal. 44:21; Ecl. 12:14; Ebe. 4:13) Yanabili, oliye onohowela ohiya emanya yomweddiha mwariye mwamakalelo abure. (Pro. 28:13) Yanatharu, oliye onohowela omuloba mwariye ni Yehova wihina emulevelele ni werana dhithu dhinatonyihedha wi ohuthwaruwa mwebaribarene. (Dho. 3:19) Teto oliye onohowela olobela wa Yehova amulobaga wihina anvahe efunelo yosaddula ekalelo yaye ni kopolo wihina andege osugwera mubuwelo waye, dhowera ni dhowoga dhaye. (Sal. 51:10-12; 2 Kor. 10:5; Fil. 2:13) Yanenayi, oliye onohowela weragana dhithudha mowiwanana ni malobelo aye ni ohudhera widda dhithu dhatedhene dhabure ni wawoga madhu opiha mbani. (Sal. 97:10) Yanetanu, oliye onohowela osayela mowaguva nikavihero na anamaholela mulogo. (Tiya. 5:14-16) Yanetanu-nammodha, oliye onohowela ompandda porogarama anaamukavihere ohuhogolowela omwerela dhithu dhabure mwariye. Akala mulobwana ohukanna elemelelo yoomoona pornografiya, anohowela ohara thalo ndha tanu nammodha. Vano oliye ilibihedha ohara, Yehova anere oreeliha wilibihedha waye ni anere omukavihera osaddula ekalelo yaye. (Sal. 37:5) Mbwenye kahiyo baahi ohiyave werana dhithu ndha dhabure obe dhonyakavala dhinamutakalela mwariye. Mulobwana atenle anohowela ohudhera omuriha mwariye. Anaande aavi werana eyo?
MAKALELO OOMURIHA MWARIYO
15. Mulobwana atenle anahowela werana ddi wihina amoonihe mwariye wi anomudhivela vanlubale?
15 Omonihege mwariyo wihina onomudhivela. Alobwana amodha etenle ni enna matelo ohagalala, kadda labo aliwa enowerana ethu-sithu wihina yawonihe amwaariwa wi enowadhivela. (1 Juwa. 3:18) Mulobwana atenle podi woniha odhivela anniyena ni mwariye wodhela werana dhithu dhingo’no. Ninga motajhiha, ohiddela nlada naye, omwabarasari, omwinviyarela mensaje owogaga wi “gihikanna munukwela ninga guwoone” obe podi omukoha weegi: “Peeno dhawo dhinuweddela aavi?” Teto malabo mamodha we podi omulebela karta wawogaga madhu ooriya enoniha makalelo onamudhiveliwe mwariyo. Mulobwana atenle eragana dhithu ndha onowoniha wi onomuriha mwariye ni onowalibiha matelo aye.
16. Mwahaya bwaddi mulobwana atenle anohowela omutamalela mwariye?
16 Omwaddelege mwariyo wi oliye dathima. Mulobwana anamuriha mwariye onowoga dhithu dhinamuhagalasa mwariye. Motajhiha, oliye kanadduwala omutamalela mwariye mwaha wa dhithu dhatedhene aneriyena wi amukavihere. (Kol. 3:15) Mulobwana amutamalelaga mwariye ni amwaddelaga dhithu dhinamuthukulela omudhivela vanlubale, mwariye anakala oobareleyene ni onowoona wi mamunaga anogidhivela ni anogiriha. — Pro. 31:28.
17. Mulobwana atenle anonihe aavi wi anomuriha mwariye?
17 Omweddihege mwariyo nuupama vamodha ninriho. Mulobwana anamudhivela mwariye, anamoona ninga nvaho onadhela wa Yehova. (Pro. 18:22; 31:10) Bumwahaya kanahiya omweddiha nuupama vamodha ni nriho ni mudhidhiya wogonihana. Mwaha womuriha mwariye, oliye kanaamuwaddihedhe mwariye werana ethu oliye ahinafuniye, anooniye ninga yonyakavala ni enamunyemeliha mubuwelo waye. f Ohiya eyo, mulobwana anamuriha mwariye anere wilibihedha okanna mubuwelo wapama vamentoni va Yehova. — Dho. 24:16.
18. Alobwana etenle ethome wera ddi? (Osugwe kwaduru enna musolo “ Dhithu nayi dhinukavihere omweddiha mwariyo ni nriho.”)
18 Alobwana otela, Yehova onohagalala mwilibihedhaga wariha amwaarinyu wodhela dhowoga dhenyu ni dhowera dhenyu. Bumwahaya othome ohiselela omuriha mwariyo wodhela oherana ethu-sithu yampihe mbani obe omuukula. Ohiya eyo, omweddihege nuupama, ninriho ni omonihege wi onomudhivela vanlubale. Werana eyo, mwariyo anere wonelamo wi onomudhivela ni onomuthuwathuwela. Bumwahaya, odidele omuriha mwariyo wihina obarele wandana onniwena ni Yehova. — Sal. 25:14.
Jhibo 131 “Emagile Yehova”
a Omusugwe artigu anawoga “Makalelo onaweddihiwe ahiyana enomuhagalasa Yehova?” enafwanyeya Namasugwera a Janeiro 2024.
b Akala onna woonihiwa goyi ni mamuno, we podi ofwanya nikavihero mu artigu onna musolo “Ajuda para as vítimas de violência doméstica” anafwanyeya epaddi enadha “Muselu dhimodha” eli musayiti jw.org ni mu JW Library®.
c WONELAMO: “Madhu opiha mbani” enagiwana omuwogela muthu madhu abure ni efunelo yompiha mbani obe omuukula. Teto podi ovolowelavo omukoha dhithu dhohufwanelela obe owoga dhithu oliye aneriyena dhihinudhivela. Bumwahaya dhithu dhatedhene mulobwana anawogiye dhinamuthukulela mwariye wiwona ninga kanna thima obe dhinampiha mbani podi wooniwa ninga madhu oovereyiha murima.
d Omusugwe artigu mu jw.org ni mu JW Library anna musolo “A pornografia pode destruir seu casamento.”
e Muhiyana mamune anamoona pornografiya podi okavihereya ni artigu ola anna musolo “Onere ddi akala mamuno obe mwadhiyo onomoona pornografiya?” mu Namasugwera Agosto a 2023.
f Bibiliya kanawoga makalelo ogonihana mulobwana ni mwariye eli onyakavala obe oweela. Wodhela muselu ola kadda namatelana enohowela werana yothoma yewa, mbwenye enohowela werana yothoma enoniha wi enamoriha Yehova ni yahinayemeliha mubuwelo wewa. Wa anamatelana aatene, kayakale yapama owoga muselu wewa ni athu amodha wodhela makalelo enagonihaniwa.
g OTAPULELIWA WA FOTU: Ddibila dhaala agaali omabasani waye akongomedhiwaga naakwaye wi oone revista nnawoga wodhela muselu dha pornografiya.
