OHUDHERA 5
JHIBO 108 Odhivela wa Yehova ohunamala
Mareeliho ninnihuna mwaha wa odhivela wa Yehova
‘Yesu Kiristu adhiile mwilaboni wihina awobole athu otheega.’—1 TIM. 1:15.
DHITHU NNAAHUDHERIHU
Nnere woona mareeliho ninnihuna mwaha wa yowobola ni makalelo oomutamalela Yehova mwaha mukono ola.
1. Nnande aavi omuhagalasa Yehova?
KABIHA wubuwela oganvahile mukono wathima muthu onamudhiveliwe, naarive mukonoya ogaali woriya, we onowonelamo wi muthuya anohowela vanlubale mukono oyo. Mbwenye muthuya anokoya mukono oyo mukaxani, nuwindo oliye odduwala. Wahakale we, were ddi? Mohanganyedha were wukuuwa vanlubale. Mbwenye muthuya alabihedha pama mukono onvahiliwe ni ooniha wi anotamalela, we onere ohagalala vanlubale. Yotajhiha ela eniwanana aavi ni yowobola? Yehova ohunivaha mwanaye ninga mukono, mohanganyedha oliye onohagalala vanlubale nonihaga wi nnothabwa otamalela mukono ola wathima anivahiliye ni odhivela anonihiliye mwaha wonobola! — Juwa. 3:16; Rom. 5:7, 8.
2. Ohudhera wula, onanikavihera wera ddi?
2 Mbwenye mudhidhi waviraga, nahikala pasope iyo podi odduwala mukono wathima Yehova anivahiliye, eli yowobola. Ni madhu mamodha, podi okalaga ninga nithukule mukono wathima anivahile Yehova nuwindo iyo okoya mukaxani. Iyo podi ohagalala mwaha onona wihina nihikoya mukaxani, mbwenye kannubuwela mukonoya. Wihina eyo yahipadduwe, mudhidhi waviraga nnohowela wooniha wi nnomutamalela Yehova ni Yesu, mwaha ele enereliwa. Ohudhera wula winere onikavihera wooniha otamalela wehu ni nnere wawoona mareeliho ninnihuna ovanene ni nnawakelihu osogolo mwaha wa yowobola. Teto nnere woona makalelo owoniha wi nnomutamalela Yehova, thabwathabwa naddamelaga sumana yowubuwela okwa wa Yesu.
MAREELIHU NINNIHUNA PEENO
3. Mareeliho baani ninnihuna malabo yaala a peeno mwaha wa yowobola?
3 Malabo yaala a peeno, nihikanna mareeliho ohiyana-iyana mwaha wa mukutho wayowobola alivile Yesu Kiristu. Motajhiha, mwaha wa yowobola Yehova anolevelela dhothega dhehu. Teto Yehova kanawaddihedhiwa wihina anilevelele. Mbwenye anonilevelela mwaha oliye onofuna werana eyo. Salmista dhaala ahitamalela vanlubale mwaha oleveleliwa ni Yehova ofiyedha owoga eegi: ‘Mwaha wi nyu Yehova, muli apama ni owaguva olevelela.’ — Sal. 86:5; 103:3, 10-13.
4. Yehova ampelekile mwanaye wihina awobole aani? (Lukaji 5:32; 1 Timotiyu 1:15)
4 Athu amodha podi wubuwelaga wi kinafwanelela oleveleliwa ni Yehova. Mbwenye ebaribariya sowihina aatene iyo, kavo anafwanelela oleveleliwa ni Yehova. Murumiwi Pawulo ahinona wi “kafwanelela withaniwa murumiwi.” Naarive dhigaali ndo oliye owoga eegi: “Miyo gili murumiwi.” (1 Kor. 15:9, 10) Nathwaruwa mwaha wa dhothega dhehu, Yehova anonilevelela. Mwahaya waddi? Yehova kananilevelela mwaha wi nnofwanelela, mbwenye mwaha anonidhivela vanlubale. Bumwahaya wakala owukuwene wubuwelaga wi kunafwanelela oleveleliwa, kudduwale wi Yehova alinve yowobola wihina awobolena athu ohilogomana enatheega mbwenye enathoma othwaruwa, ohiya athu oologomana ehinatheega. — Mmwileri Lukaji 5:32; 1 Timotiyu 1:15.
5. Nnohowela wubuwela wi nnofwanelela oleveleliwa ni Yehova? Owogemo.
5 Kanubuwele wi nnofwanelela oleveleliwa ni Yehova, mwaha womulabela muwari mwa yaka dhowinjhivadhene. Ebaribari wi Yehova anovaha thima ni kanadduwala dhithu dhatedhene nimwerelihu. (Ebe. 6:10) Mbwenye Yehova anivahile mwanaye ninga mukono, ohiya ninga yoliva anapagariye dhithu nnamwerelihu. Kiyakale yapama wubuwela wi nnofwanelela oleveleliwa obe weddihiwa mwamakalelo apama. Wubuwela ndo, si emodhave wubuwela wihina Yesu kahowela onikwela. — Omuliganihe ni Galata 2:21.
6. Mwahaya bwaddi murumiwi Pawulo adhe ilibihedhege omulabela Yehova?
6 Murumiwi Pawulo ahinona wihina kafwanelela orumedhiwa ni Yehova. Akala oliye ahinona eyo, mwahaya bwaddi adhe ilibihedhege omulabela Yehova? Yowakulaya sowihina, oliye afuna oonihe wi omutamalela Yehova mwaha opama waatene wohinfwanelela Yehova amonihiliye. (Efe. 3:7) Ndala ninga murumiwi Pawulo, iyo nnodidela omulabela Yehova nuviheya, ohiya mwaha osayela oleveleliwa, mbwenye wihina noonihe wi nnotamalela dhithu dhatedhene Yehova ananereliye.
7. Mareeliho mamodha ninnihuna ovanene mwaha wa yowobola baavi? (Romanu 5:1; Tiyagu 2:23)
7 Mareeliho mamodha ninnihuna ovanene mwaha wa yowobola, bufuru ninnihuna wokanna wandana ni Yehova. a Ninga nonilihu ohudhera wivirile, iyo aatene nnabaliwa nahinna wandana ni Mulugu. Mbwenye mwaha wa nvaho wa yowobola, iyo podi okanna “murenddele wa Mulugu” ni wandana nuliye. — Mmwileri Romanu 5:1; Tiyagu 2:23.
8. Mwahaya bwaddi nigahowela omutamalela Yehova mwaha wa nvaho wa nlobelo?
8 Kubuwela ethu ninnihuna, enanikavihera wandana ni Yehova, eli nvaho wa nlobelo. Yehova kanavuruwana baahi malobelo nnawerihuna nakala omutugumanoni, mbwenye anowavuruwana naaleya nnawerihuna nakala yeekihu. Malobelo podi onikavihera okurumusa murima wehu ni onivaha murenddele. Nalobelaga kannathabwa othuwathuwa, mbwenye malobelo enonikavihera werana dhithu dhimodha. Malobelo enonikavihera olibiha wandana wehu ni Yehova. (Sal. 65:2; Tiya. 4:8; 1 Juwa. 5:14) Yesu agaali velaboni yavati, oliye oolobela malabo aamateene mwaha ahinona wi Yehova onvuruwana. Ohiya eyo, Yesu ahinona wi malobelo yomukavihera olibiha wandana waye ni Yehova. (Luk. 5:16) Nnotamalela vanlubale mwaha onona wihina iyo podi wandana ni Yehova ni owoga nuliye wodhela olobela. Dhatedhene ndha dhinandeya mwaha wa yowobola alivile Yesu!
MAREELIHO NNAWAKELIHU OSOGOLO MWAHA WA YOWOBOLA
9. Mareeliho baani nnawakelihu osogolo mwaha wa yowobola?
9 Mareeliho baani nnawakelihu osogolo mwaha wa yowobola? Nnere wakela egumi yohimala. Athu owinjhiva enubuwela wihina eyo kinaapadduwe mwaha nambele okwa okuma kale. Mbwenye Yehova nuupaddusa elabo, efunelo yaye yaali wihina athu yahikwege. Adawu ahere ahithega, kavo muthu ubuwelege wihina muselu ola wokalawo ni mukalakala kahi webaribari. Peeno nubuwelaga wodhela muselu ola wokalawo ni mukalakala, nnotikina vanlubale. Mbwenye, nnohowela wubuwela wihina yowobola alivile Yehova, kiyaali yokweya. Sotikiniha! Mwaha Yehova ohumpeleka mwanaye wihina anikwele. — Rom. 8:32.
10. Addibila oothikitheliwa ni Mambila mamodha enajheha ddi?
10 Egumi yamukalakala, mareeliho nnawakelihu osogolo. Mbwenye iyo podi wambela wubuwelaga makalelo enakale egumi mparayizu obajha ovanene. Teto Yehova anafuna wihina nubuwelege nigaali mparayizu. Addibila oothikitheliwa enojheha nuuthaba wakela egumi yohagalasa odhulu, teto enere okanna ofuru wothonga vamodha ni Yesu Kiristu. (Ovuhu. 20:6) Mambila mamodha, enojheha nuuthaba, wakela egumi yohimala mparayizu mwilaboni yeela yavati. Mudhidhi yoyo kawindha wikala widdela, goyi newene obulela. (Ovuhu. 21:3, 4) We oli mmodha wa athu yaala enna ejhehedhelo yowakela egumi yohimala velaboni yavati? Ejhehedhelo ela, kahiyo mukono onanitodola baahi, mbwenye ela efunelo ya Yehova okuma mudhidhi apaddusiliye elabo yavati. Mohanganyedha, nnerege ohagalala okanna egumi yapama velaboni yavati.
11-12. Mareeliho baani nnawunlelihu wawoona yakwanelaga? (Osugwe fotu.)
11 Kubuwela makalelo enakale egumi yawo mparayizu velaboni yeela yavati! We kunovege okala muredda newene okwa. (Isa. 25:8; 33:24) Yehova anere wuvaha dhithu dhatedhene dhapama onahoweliwe. Dhithu baani onunleliwe ohudhera wafiya elabo exa? Onoofuna ohudhera wodhela anenyama? Onofuna ohudhera orumiha dhipano dhohiyana-iyana dhowibana jhibo? Onofuna ohudhera opintari? Mwilaboni exa, enere ohoweleya aliba omaga nyumba ni anamalima. Teto enere ohoweleya anamapiya ni aliba osasanya dhipano ni aliba omusamalela jardi. (Isa. 35:1; 65:21) Osogolo nakanna egumi yohimala, onere okanna mudhidhi wihina ohudhere mabasa bi mabasa onawunleliwe.
12 Kubuwela ohagalala onakanniwena mwaha wawakela anookwa! (Dho. 24:15) Kubuwela makalelo enakaliwa yapama woona dhithu dhowinjhiva apaddusile Yehova ni ohudhera ni dhopaddusa. (Sal. 104:24; Isa. 11:9) Teto yathimaya, nnerege omulabela Yehova nahinna ethu-sithu yowivahana nibili! Nerege nnohowela wawakakaniha mareeliho ala aamateene enadha osogolo ni ‘ohagalala wa mudhidhi vang’ono wa yothega?’ (Ebe. 11:25) Naari! Egumi yohagalasa nnafunihu wakela osogolo, kinaligana newene kinaddamela ni ethu-sithu nnakannihuna mwilaboni muna. Kudduwale ela: Parayizu kannakalegeve mpaganyo najhehedhihu omwaakela osogolo, mbwenye nere ofiya nlabo nnakalegihu mparayizu malabo maatene. Eyo enere wenyeya mwaha Yehova anonidhivela ni ofiyedha onipelekela mwanaye anamudhiveliye!
Wawubuwelaga mareeliho onafuniwe wawakela mwilaboni exa, ddiniyani enuhagalasa? (Osugwe ddima 11-12)
WOONIHE WI ONOMUTAMALELA YEHOVA MWAHA ODHIVELA ANNIYENA NI IYO
13. Nnande addi wooniha wi nnomutamalela Yehova mwaha wa odhivela anniyena ni iyo? (2 Korintiyu 6:1)
13 Nnande addi wooniha wi nnomutamalela Yehova mwaha wa odhivela anniyena ni iyo? Nnere wooniha wi nnomutamalela Yehova nnapweha mabasa aye mburo wobajha mwigumini mwehu. (Mat. 6:33) Mwaha Yesu “aakwele athu aateene, wihina ale enakalawo ehikalegewo ni efunelo yewa, mbwenye ya ole aakwele ni avenyihiwe muukwani.” (2 Kor. 5:15) Yehova Mulugu apama ni oolevelela. Neragana dhatedhene nnandihu wihina nimulabele, nnomoniha Yehova wi nnowonelamo dhithu dhatedhene eeriliyena wihina anoobole, teto nnowoniha wi nnomutamalela vanlubale. — Mmwileri 2 Korintiyu 6:1.
14. Nnonihe aavi wi nnororomela dhoholela nnakelihu munikuruni mwa Yehova?
14 Makalelo anabiili owooniha wi nnomutamalela Yehova mwaha onidhivela, fuudhela ororomela ni oparihedha mabasa dhoholela nnakelihu munikuruni mwaaye. Nnande aavi werana eyo? Motajhiha, neragana yothoma si yothoma ninga omwera fakuldadi obe wasayela mabasa bi mabasa, nnohowela wubuwela ethu Yehova anafuniye wihina nerena. (1 Kor. 10:31; 2 Kor. 5:7) Nerana yothoma eniwanana ni efunelo ya Yehova, enopadduwa ethu yootikiniha: Nroromelo nehu, ejhehedhelo ninnihuna wodhela osogolo ni wandana ninnihuna ni Yehova winoliba vanlubale. — Rom. 5:3-5; Tiya. 2:21, 22.
15. Nnoonihe aavi wi nnomutamalela Yehova mudhidhi wowubuwela okwa wa Yesu?
15 Makalelo anatharu owooniha wi nnomutamalela Yehova mwaha onidhivela, fuudhela olabihedha mudhidhi wowubuwela okwa wa Yesu wihina nimoonihe Yehova wi nnothabwa ovaha thima yowobola. Ohiya odhowa vamuthuponi wowubuwela okwa wa Yesu, nnohowela wawithana athu amodha wi nikale vamodha. (1 Tim. 2:4) Wawonelihemo dhithu dhinapadduwe nlabo nno nowubuwela okwa wa Yesu, athu onawithaniwe. Wafuna we podi wawoniha vidiyu enna musolo Yesu akwele ddi? obe Wubuwela okwa wa Yesu dhinafwanyeya mu jw.org. Anamaholela mulogo enohowela ompandda porogarama wihina yawithane ale edduddumadhe mmulogoni. Kubuwela ohagalala onakala odhulu ni elabo yavati, mwaha nimbila nimodha narimenle, ohogolowela mmulogoni! (Luk. 15:4-7) Bumwahaya nlabo nuwubuwela okwa wa Yesu, ohiya walojhelave addibilihu baahi, nalojhele thabwathabwa ale eli axa obe emanle mudhidhi wowinjhivene ehoonaga mutugumano. Nnafuna wihina aliwa yiwoonege ninga eli vadeviwa! — Rom. 12:13.
16. Mwahaya bwaddi sapama wubuwela makalelo owawenjhedhedha mabasa awo oolaleya, mudhidhi wowubuwela okwa wa Yesu?
16 We onofuna wawenjhedhedha mabasa awo oolaleya mudhidhi wowubuwela okwa wa Yesu? Werana eyo, makalelo owooniha wihina onomutamalela Yehova ni Yesu wodhela dhithu yuwereliwa. Naamulabelaga Yehova nuviheya, nnowona nikavihero ananivahiye, teto yokumelelavoya sowihina nroromelo nehu nooliba. (1 Kor. 3:9) Ohiya eyo, kudduwale omuhariha porogarama omwileri Bibiliya anafwanyeya mu Yolebela Ya Kadda Labo obe mu mwaana livuru namutugumano na vaari va sumana. Wafuna we podi olabihedha dhopadduwadha va ohudhera wawo wa vayeka.
17. Ddiniyani enamuhagalasa Yehova? (Osugwe kwaduru enna musolo “ Onande aavi wooniha wi nnomutamalela Yehova mwaha wa odhivela anniyena ni iyo?.”)
17 Mwaha wa makathamiho enuufwanya, podi wera kunande wawenjhedhedha mabasa onampareliwe Yehova. Mbwenye kudduwale, Yehova kanaliganiha nde onandiwe werana ni enerana addibila amodha, mwaha Yehova anasugwa ndhe dhili mmurimani mwawo. Yehova anohagalala uwoonaga omutamalelaga mwaha wa mukono wathima anivahiliye, eli yowobola. — 1 Sam. 16:7; Mar. 12:41-44.
18. Mwahaya bwaddi nigahowela omutamalela Yehova ni Yesu?
18 Mwaha wa yowobola, peeno nooleveleliwa dhothega dhehu, nnokanna wandana ni Yehova ni nihikanna ejhehedhelo yowakela egumi yohimala. Bumwahaya kadda labo nnafuna nimutamalele Yehova mwaha odhivela waye, omuthukulele onivaha mareeliho ala aamateene. (1 Juwa. 4:19) Ohiya eyo, nnafuna noonihe wi nnomutamalela Yesu anidhivele ofiyedha onikwela! — Juwa. 15:13.
JHIBO 154 Odhivela kunamala
