1. Athu owinjhiva peeno enodhiveliwa wera ddi?

 OHANDA woona wi peeno athu owinjhiva enadhiveliwa withithimiha? Motajhiha, mwinternetini athu owinjhiva enowerana dhatedhene enandiwa wihina yivuwihe, teto athu enone dhithu eneriwana. Mbwenye athu vang’ono baahi, binanvaha nthithimiho Mulugu. Ohudhera wula, nnere woona ddiniyani enatapulela onvaha nthithimiho Yehova ni ethu enaanithulele omuthithimiha. Teto nnere woona makalelo onvaha Yehova nthithimiho anafwaneleliye. Ohiya eyo, nnere woona makalelo Yehova anafuniye otxeniha ndina naye mohilegela.

DDINIYANI ENATAPULELA ONVAHA NTHITHIMIHO YEHOVA?

 2. Yehova eerile ddi wihina onihe nthithimiho naye omwangoni Sinayi? (Fotu yavakapani.)

² Nthithimiho enatapulela ddi? MBibiliyani madhu owi ‘nthithimiho,’ enatapulela ethu enamweriha muthu okala ootikiniha. Yehova numala wawobola amwaana Izarayeli muudharini Wijipitu, oliye werana ethu yakavihere amwaana Izarayeli woona nthithimiho naye. Ddiniyani Yehova eriliyena wihina onihe nthithimiho naye? Yopadduwaya enihina: Mbwabwadda ni mbwabwadda wa amwaana Izarayeli yahitugumana omwangoni Sinayi wihina envuruwane Mulugu. Vano murabo wooriba okuneela mwango waatene wa Sinayi. Morurumusa mburo yimenliwa wambela oddiginyeya mwaha wa oddiginyeya weelabo. Teto enakala ninga oddiginyeya wule, wahitaganyihedheya ni vulkawu. Ohiya eyo, aliwa wambela woona ojerima, oruma wa dari ni onyagula winlubale wa buzina. (Êxo. 19:16-18; 24:17; Sal. 68:8) Mohanganyedha amwaana Izarayeli yahitikina vanlubale nuwoona dhithu dhatedhene ndhe dhoniha nthithimiho na Yehova.

 3. Ddiniyani enatapulela onvaha nthithimiho Yehova?

 ³ Nerege athu podi onvaha nthithimiho Yehova? Hee! Makalelo onvaha nthithimiho Yehova fuudhela owoga ni athu amodha wodhela kopolo dhinlubale ni dhikalelo dhapama anna Yehova. Teto iyo podi onvaha nthithimiho natenene Yehova, natamaleliwaga mwaha wa dhithu dhatedhene nnerihuna nnikavihero naye. (Isa. 26:12) Mwene Davidi yotajhiha yapama yamuthu anvahile nthithimiho Yehova. Mudhidhi mwene Davidi alobelaga vamentoni vamwana Izarayeli Oliye owoga ni Yehova eegihina: ‘Nyu Yehova muli munlubale, akopolo, anthithimiho, oweela ni oofwanelela orihiwa, mwaha dhithu dhatedhene dhili elabo yavati ni odhulu senyu.’ Mwene Davidi nuumala olobela, ‘vano mulogo waatene wambela ovunwiha Yehova.’ — 1 Cró. 29:11, 20.

 4. Yesu agaali velaboni yavati, onihile aavi wi omuthithimiha Yehova?

⁴ Yesu agaali velaboni yavati, ahaavaha nthithimiho Ababe wodhela owoga wihina Yehova dili ntxela na kopolo dhamukavihera wawerana matikiniho. (Mar. 5:18-20) Yesu ahahakavihera athu amodha woona wihina Yehova Mulugu ootikiniha wodhela wawoga opama Ababe ni makalelo aweddihiye amodha. Nlabo dhaala Yesu ahudhihaga musinagoga, muhiyana dhaala avoloweliwe ni demoniyu muwari mwa Yaka 18, aali wewule anvuruwanaga. Demoniyu ole ahiragaliha mutana wa muhiyana ole, mwaha wa yeyo oliye kaanda wiinuwa. Yaali yowuukuliha yampadduwela muhiyana ole. Teto Yesu owanda woonelamo goyi yafwanya muhiyana ole. Mwamakalelo apama, Yesu omwaddela eegi: “Muhiyanawe, oreddaawo ohumala.” Vano Yesu omutapulela maladaaye, nuwindo mutana wa muhiyana ole woogowa ni “wambela omuthithimiha Mulugu.” Muhiyana ole ahimutamalela vanlubale Yehova mwaha ovulumuwa! (Luk. 13:10-13) Mwebaribarene muhiyana ole ahikanna dhithu dhamuthukulela omuthithimiha Yehova. Teto nihiyoya nihikanna.

DDINIYANI ENAANITHULELE OMUTHITHIMIHA YEHOVA?

 5. Dhithu baani dhinanithukulela omuriha Yehova?

⁵ Iyo nnomuthithimiha Yehova mwaha nnomuriha. Nihikanna dhithu dhohiyana-iyana dhinanithukulela omuriha Yehova. Oliye da kopolo dhatedhene, teto kopolo dhaye kadhinamala. (Sal. 96:4-7) Ohiya eyo, iyo podi woona thotho dha Yehova wodhela osugwa dhithu apaddusiliye. Duliyene anipaddusile, teto duliyene ananivaha dhithu dhatedhene nnahowelihu wihina nikalegewo. (Ovuhu. 4:11) Yehova dororomeleya. (Ovuhu. 15:4) Dhatedhene oliye aneriyena dhinomweddela pama, teto apaganya werana ethu-sithu, oliye anowakwanihedha. (Jos. 23:14) Kahiyo ebewene, namavuhulela Jeremiya awogiliye wodhela Yehova eegi: “Vaari va malogo aatene athotho ni omweniwa, kaavo analigana ni nyu!” (Jer. 10:6, 7) Mohanganyedha nihikanna dhithu dhowinjhiva dhinanithukulela omuriha baabihu odhulu. Mbwenye Yehova kahi Mulugu anafwanela baahi orihiwa, mbwenye nnofwanelela omooniha wi nnomudhivela.

 6. Mwahaya bwaddi nigamudhivela Yehova?

⁶ Nnomuthithimiha Yehova mwaha nnomudhivela vanlubale. Kubuwela dhikalelo dha Yehova dhinanithukulela omudhivela vanlubale. Oliye dathagaraga ni doovilela. (Sal. 103:13; Isa. 49:15) Oliye anowonelamo dhithu dhinanipadduwela, bumwahaya anowoona goyi yehu. (Zac. 2:8) Teto Yehova anonikavihera omunona ni okanna wandana nuliye. (Sal. 25:14; Dho 17:27) Oliye dowiyeviha teto ‘anoworoma wihina asugwe elabo yodhulu ni yavati ni anowavenyiha athu owiyeviha vanthubini.’ (Sal. 113:6, 7) Onona dhithu ndha kadhinuthukulela omuthithimiha Mulugu? — Sal. 86:12.

 7. Oneti baani ninnihuna?

⁷ Iyo nnomuthithimiha Yehova mwaha nnafuna wi athu amodha emunone. Athu owinjhiva kinonne ebaribari wodhela Yehova. Mwaya  bwaddi? Mwaha Saddana onofuga mubuwelo waathu wodhela wahudhiha dhowoota wodhela Yehova vamodha ni adhaari aye. (2 Kor. 4:4) Saddana onowathukulela athu wubuwela wihina Mulugu namvedegu ni kananipwatha teto makathamiho owinjhiva enanifwanya ananitatamulela duliye. Mbwenye iyo nihinona ebaribari wodhela Yehova! Teto nihikanna oneti wowoga dhithu dhinakavihera athu amodha wonelamo wi Yehova Mulugu apama. (Isa. 43:10) Salmo 96 anowoga vanlubale wodhela muselu wonvaha Yehova nthithimiho. Nnere Wawona maversu mangasi mangasi a Salmo ola ni nnere ohudhera makalelo onvaha nthithimiho Yehova.

NNADE AAVI OVAHA YEHOVA NITHITHIMIHO ANAFWANELELIYE?

 8. Makalelo apama omuthithimiha Yehova baavi? (Salmo 96:1-3)

⁸ Mmwileri Salmo 96:1-3. Iyo podi onvaha Yehova nthithimiho mwaha dhithu nnawogihu wodhela oliye. Maversu ala enowoga wi nnohowela ‘omwibela Yehova,’ ‘othithimiha ndina naaye’ ni “olaleya kadda labo muthenga dhaye dhapama dhinavulusa,’ vamodha ni ‘ovuwiha nthithimiho naye [vaari] va malogo maatene.’ Ala makalelo apama nnahowelihu woniha wi nnomuthithimiha Baabihu odhulu. Kale adhaari a Yehova kiyoova wahudhiha athu amodha wodhela dhithu dhatedhene dhapama Yehova awereliye ni obarela ndina naye. (Dan. 3:16-18; Dho 4:29) Ki iyo nnande addi werana eyo?

9-10. Ohudhere ddi ni yopadduwa ya Anjelina? (Osugwe fotu.)

⁹ Kasugwa ethu empadduwele murogola dhaala anithaniwa Anjelina, a anakala elabo wo Wistadu Unidu. Oliye ali ooliba murima wodhela obarela ndina na Yehova omabasani waye. Murogola Anjelina nuuroma olaba, oliye withaneliwa mmutugumanoni dhaala ni anamalaba amodha, yahowela owoga dhithu dhamwigumini mwewa wodhela makalelo eleliwiwa. Murogola Anjelina owoga makalelo aaliye ohagalala mwaha wokala namoona a Yehova. Murogola Anjelina ahinathi owoga, namalaba dhaala owoga wihina aaleliwe ninga namoona a Yehova. Mbwenye oliye obajha owoga obure wodhela anamoona a Yehova ni dhithu dhinarumedhiwa. Murogola Anjelina anowoga eegi: “Miyo obajha woova ni wambela ogurumela. Vano miyo wubuwela: ‘Ginere omuhiya muthu omuwoga obure Yehova? Naari, ginere wawaddela ebaribari wodhela Yehova.”

¹⁰ Mulobwana ole nuumala owoga, murogola Anjelina olobela mowaguva. Nuwindo oliye omusugwa ni owoga mwamakalelo apama eegi:  “Makalelo gileliwimi enoligana ni awo, ni miyoya gileliwe ninga namoona a Yehova, ofiyedha peeno gili namoona a Yehova.” Mudhidhi yoole dhithudha kuhukala pama, naarive dhigaali ndo Anjelina okala opwaseyene. Oliye wambela wawoniha fotu akwaye omabasani, agaali ohagalalene vamodha ni addibila ammulogoni ni wakihedha ele anarumeedhiye ni nriho. (1 Ped. 3:15) Yokumelelavoya yaali eevi? Murogola Anjelina nuumala owoga mulobwana ole osaddula mubuwelo waye. Mulobwana ole owoga wi nivano owubuwela mudhidhi ababe emuthukulelaga omutugumanoni ni agaali muzombwe. Murogola Anjelina anowoga eegi: “Oneti munlubale obarela ndina na Yehova mwaha oliye anofwanelela.” Naarive amodhaya ehirihaga ndina na Yehova iyo nihikanna ofuru ovuwiha ni omuthithimiha oliye.

11. Adhaari a Yehova enaparihedha aavi mabasa yolebela ya Salmo 96:8?

¹¹ Mmwileri Salmo 96:8. Nimuthithimihe Yehova ni dhithu dhathima ninnihuna. Obajha kale nlogo na Yehova nnomuthithimiha mwamakalelo yaala. (Pro. 3:9) Motajhiha, amwaana Izarayeli yovaha dhithu dhathima dhanniwana wihina emagiwe tempulu ni ewomihedhegena. (2 Reis 12:4, 5; 1 Cro. 29:3-9) Anamahara amodhaya yomukavihera Yesu ni arumiwi aye ni “dhoreela dhewa” wihina aliwa ekanne dhithu yahoweliwa. (Luk. 8:1-3) Teto makiristawu amodhaya ansaka noobajha yovaha dhithu dhathima yanniwana wihina yakavihere addibila ni arogola ammulogoni. (Dho. 11:27-29) Peeno, iyo podi omuthithimiha Yehova wodhela opeleka dhovelela dhehu.

12. Nimakalelo baani dhovelela dhehu dhinamuthithimihiwa Yehova? (Osugwe fotu.)

¹² Kasugwa yopadduwa enoniha makalelo dhovelela dhehu dhinamuthithimihiwa Yehova. Relatoriyu dhaala a 2020 onowoga wihina elabo yoZimbabwe wahivira mudhidhi wowinjhiva wihirubwaga muzongwe. Podi weera athu owinjhiva yere okwa mwaha kiyanna yoojha vamodha ni murogola dhaala anithaniwa Priska. Naarive dhigaali ndo, Priska oolaleya Txithathu ni Xixano, naarive ogaali mudhidhi woolima. Amwanddamanaaye obajha omuwoga obure mwaha oliye odhowa mmalaleyelo ohiya odhowa olimaga. Aliwa yawoga yeegi: “We onere okwa dala.” Mbwenye Priska ahikanna ebaribari wihina Yehova eere omusamalela. Bumwahaya oliye owawakula eegi: “Yehova kananyanyala adhaari aye.” Vano nuuvira mudhidhi vang’ono murogola Priska wakela dhoojha ni dhithu dhimodha ahoweliye, mwaha wa dhovelela dhehu. Amwanddamani a murogola Priska otikina vanlubale ni owoga yeegi, “Mulugu kanusukumege, teto nihiyoya nnofuna ohudhera wodhela  oliye.” Nuwindo amwanddamanaaye owakwana 7 obajha woona mutugumano.

13. Nnande aavi omuthithimiha Yehova wodhela mweddelo wehu? (Sal. 96:9)

¹³ Mmwileri Salmo 96:9. Iyo podi omuthithimiha Yehova wodhela mweddelo wehu. Anamakutha yaafunaga wapara mabasa mutempulu, yohowela okala oweela vamodha ni wisuwa manyalo. (Êxo. 40:30-32) Nihiyoya nnohowela okala oweela, ohiya baahi epaddi yomwilini ni yomuzimuni, mbwenye nnohowela okala oweela wodhela mweddelo wehu ni widda ethu-sithu Yehova aniddiye. (Sal. 24:3, 4; 1 Ped. 1:15, 16) Teto nnohowela werana dhatedhene nnandihu wihina “Nirule emuthu yakale” enavolowelavo dhithu dhonyakavala ni dhabure dhinamutakalela Yehova, nindo “niware emuthu exa” enavolowelavo ohudhera wubuwela ni werana dhithudha mwamakalelo enoniha wi namutajhiha Yehova ni dhikalelo dhaye dhapama. (Kol. 3:9, 10) Nnikavihero na Yehova, muthu abure ni anerana dhithu dhonyakavala podi osaddula makalelo aye ni wanda owara emuthu exa.

14. Ohudhere ddi ni yopadduwa ya Jack? (Osugwe fotu.)

¹⁴ Kasugwa ethu yapadduwe ni Jack, oliye ali muthu abure ni owopiha, athu amodha yamwithana “demoniyu.” Mwaha wa dhithu dhowinjhiva dhowopiha eriliyena, Jack othongiwa ni asupayi wi otorihiwa waye, waakale opiwa. Mudhidhi ajhehaga othongiwa waye oliye obajha omuhudhera Bibiliya ni ddibila alaleyesa mukambura mune. Naarive agerilena dhithu dhabure Jack ahisaddula egumaye ni obaddiziwa ninga Namoona a Yehova. Mwaha wosaddula egumaye, nufiya labo naye nopiwa asupayi ompaganya Jack yunlaga. Munddimuwa dhaala asupayi owoga eegi: “Jack dathabwile woopiha mukambura muna, vano oliye dapamaya.” Jack nuupiwa sumana yoharela, addibila yerana mutugumano sumana dhatedhene mukambura mune, aliwa omunona munyakambura dhaala oonile mutugumano dila yobajha. Mwahaya bwaddi oliye adhe oonege mutugumano ole? Mwaha oliye ahitikina vanlubale mwaha omoona mukwaye Jack agasaddunle egumi yaye teto oliye oofuna onona ethu baani ahoweliye werana wihina amulabele Yehova. Yopadduwa ela enowoniha wi iyo podi omuthithimiha Baabihu oodhulu wodhela mweddelo wehu! — 1 Ped. 2:12.

YEHOVA ANAATHITHIMIHE AAVI NDINA NAYE MOOHILEGELA?

15. Mohilegela Yehova anathithimihe aavi ndina naye? (Salmo 96:10-13)

¹⁵ Mmwileri Salmo 96:10-13. Versu dhookuthula dha Salmo 96, dhinamuwoga Yehova ninga Namatoriha ni Mwene owoogowa. Yehova anaathithimihe  aavi ndina naye mohilegela? Oliye anere werana eyo wodhela odhana woogowa. Teto ovaneneve Yehova aneere omugujhula Babiloniya munddimuwa mwaha wowerana dhithu dhabure ni ohudhiha dhowoota wodhela Yehova. (Ovuhu. 17:5, 16; 19:1, 2) Vano Babiloniya agujhuliwa, podi weera amodha eneere osakula okala vamodha ni iyo wi emwebedhege Yehova. Teto Armajedo afiya, Yehova anere ogujhula onamathonga wa Saddana ni aleya enatakaliha ndina naye. Mbwenye Yehova aneere wavulusa aateene enamudhivela, enamwiwelela ni enamuthithimiha. (Mar. 8:38; 2 Tes. 1:6-10) Teto omakuthulo wa yaka txikwi wa onamathonga wa Yesu wamala, Yehova anere otxeniha ndina naye ni mukalakala, wehiwa wogomihedha wavira. (Ovuhu. 20:7-10) Yehova amala otxeniha ndina naye, ‘elabo enere odhaala enonelo ya nthithimiho na Yehova ndala ninga manjhe a muniya.’ — Hab. 2:14.

16. Niikome wera ddi? (Osugwe fotu.)

¹⁶ Ola onaakale mudhidhi wohagalasa, okala velaboni yavati ni wawona athu aatene envahaga nthithimiho Yehova anafwaneleliye. Mbwenye njhehaga mudhidhi oyo ofiya, wiikome onvaha nthithimiho anafwanelela Yehova mudhidhi wamutene weregena ethu-sithu onandiwe. Wihina nahidduwale omuthithimiha Yehova, Mudhaari Oororomeleya ohusakula yolebela ela ya Salmo 96:8 enihina ‘mmuthithimihe Yehova mwaha wa ndina naye’ wi ekale yolebela ya yaka ya 2025.