OHUDHERA 3
JHIBO 35 ‘Osogolihe dhithu dhofuneya’
Weregena dhothoma dhinamuhagalasa Yehova
‘Omoova Yehova fumambelelo wa thotho, ni omunona Oweela enonelo.’ — PRO. 9:10.
DHITHU NNAAHUDHERIHU
Nnere woona makalelo olabihedha enonelo, wonelamo ni opendda wihina nerena dhothoma dhapama.
1. Dhothoma baani iyo aatene nnerihuna kadda labo?
MALABO aamateene nnowerana dhothoma dhihiyana-iyana. Dhothoma dhimodha sokweya wakwanihedha. Motajhiha, kadda labo nnothoma dhithu nnahowelihu ojha ni mudhidhi nnafunihu ogona. Mbwenye dhothoma dhimodha dhinorusa wakwanihedha. Teto podi onitotela makathamiho, ohanda ohagalala ni ovolowela wandana ninnihuna ni amudhihu vamodha ni webedha wehu. Bumwahaya nnafuna nerena dhothoma dhinaanikavihere ni dhinaakavihere amudhihu. Yathimaya nnafuna wihina dhothoma dhehu dhimuhagalase Yehova. — Rom. 12:1, 2.
2. Ddiniyani onahoweliwe wihina werena yothoma yapama?
2 We podi werana dhothoma dhapama wodhela, (1) osayela onona pama dhithu dhatedhene dhinavolowelavo, (2) onona dhithu anubuwela Yehova wodhela museluya ni (3) opendda pama yothoma onafuniwe werana. Ohudhera wula, nnere owoga wodhela pontu ndha tharu nnahowelihu werana wihina enikavihere oxagiha makalelo ehu opendda nahowelaga werana dhothoma. — Pro. 2:11.
OSAYELE ONONA PAMA DHITHU DHATEDHENE DHINAVOLOWELAVO
3. Mwahaya bwaddi sapama onona dhithu dhatedhene dhinavolowelavo wahinathi werana yothoma? Owoge yoladdaniha.
3 Ethu yobajha onahoweliwe werana wihina werena yothoma yapama, fuunona pamadhene dhithu dhinavolowelavo. Mwahaya bwaddi sapama werana eyo? Kabiha omubuwela muthu anamuloba nikavihero mediku mwaha wa oredda wowopiha anniyena. Nerege mediku anere onvaha murubwe ahirajhihile omukoha mureddaya newene woona ethuya enanvereya? Naari! Bumwahaya ndala ninga mediku apama, we onere wanda werana dhothoma dhapama warajhiha onona dhithu dhatedhene dhinavolowelavo wodhela museluya. Mbwenye onande aavi werana eyo?
4. Onere ddi wihina wande onona dhithu dhatedhene dhinavolowelavo wihina werena yothoma yapama? (Provérbios 18:13) (Osugwe fotu.)
4 We podi wanda onona dhithu dhatedhene dhinavolowelavo wodhela wawerana makoho. Motajhiha, kubuwela ogithaneliwe vafestani. Onere oyawo obe naari? Akala kumunonne muthuya anegeredha festaya obe dhithu dhinapadduwewo, we podi okohedha weegi: “Festaya enakale waani ni enereye alini? Ki ithaneliwewo baani? Athu angasi enakalevo? Athuya eneregevo ddi? Dhinere okalavo dhong’wa dholezeliha?” Dhowakula dha makoho ala, dhinere wukavihera werana yothoma yapama. — Mmwileri Provérbios 18:13.
Waweregena makoho wihina onone dhithu dhatedhene dhinavolowelavo (Osugwe ddima 4) a
5. Ddiniyani onahoweliwe werana wamala wonelamo pama dhithu dhatedhene dhinavolowelavo?
5 Wamala wonelamo pama dhithu dhatedhene dhinavolowelavo, we podi werana yothoma onahoweliwe. Motajhiha, ki wanona wihina athu amodha enakale vafestaniva kinaariha malagano a mBibiliyani? Obe ahikalavo muthu anaasugwerege athuya wihina yahithabwe olezela? Onoonamo aavi festa eyo, yere weedda pama? (1 Ped. 4:3) Teto we podi wubuwela akala festa eyo enere wujhobiha omutugumanoni obe mmalaleyelo. Wamala wonelamo dhithu dhatedhene, onere wanda werana yothoma yapama. Mbwenye ehikalawo ethu emodha onahoweliwe werana. Kala we ohunona pamadhene ethu onubuweliwe wodhela museluya, ki Yehova anubuwela aavi wodhela museluya? — Pro. 2:6.
OSAYELE MUBUWELO WA YEHOVA WODHELA MUSELUYA
6. Mowiwanana ni Tiyagu 1:5, mwahaya bwaddi nigahowela oloba nikavihero na Yehova?
6 Olobele wa Yehova omulobaga wihina ukavihere wonelamo makalelo anubuweliye wodhela museluya. Yehova anopaganya onivaha thotho wihina nande onona akala yothoma yehu enere omuhagalasa obe naari. Yehova anowavaha thotho ndha ‘aatene mwamahala, ahimwimanne muthu.’ — Mmwileri Tiyagu 1:5.
7. Onande aavi onona mubuwelo wa Yehova wodhela muselu onubuweliwe? Owoge nladdaniho.
7 Wamala olobela wa Yehova omulobaga dhoholela, opwasedhe wonelamo makalelo anafuniye wawakula malobelo awo. Kubuwela nladdaniho nna: “Wahere oholowa weddaga olenddo, were ddi? Mohanganyedha were omuloba nikavihero muthu anakala murudda yole. Mbwenye nerege were omaruwa ni weeddege olenddo wawo, muthuya ahinathi wuwaddela ethu onahoweliwe werana? Naari kuwerena eyo! Were onvuruwana pamadhene muthuya ni ohariha dhithudha uwaddeliye. Nimakalelo mamodhave, wamala omuloba nikavihero Yehova, osayele woona yowakulaya. We podi werana eyo wodhela osayela mBibiliyani malamulo ni malagano eniwanana ni muselu wawo. Motajhiha, wathomaga akala onere oyawo obe naari ofestani, yere okala yapama wubuwela wodhela wandana wa bure ni opweha mburo wobajha Omwene wa Mulugu ohiya dhofuna dhehu. — Mat. 6:33; Rom. 13:13; 1 Kor. 15:33.
8. Wahowelaga nikavihero wihina osayele muselu bu muselu onere ddi? (Osugwe fotu.)
8 Podi wera onere ohowela nikavihero wihina ofwanye yowakula wa muselu onasayeliwe. We podi omuloba nikavihero nno, ddibila owithwelavo epaddi yomuzimuni. Mbwenye enere okala yapama orajhiha osayela weeka. We podi ofwanya muselu dhohiyana-iyana mu dhipano dhehu dhohudhihana, ninga Makalelo oolabihedha malagano a mBibiliyani mwigumini mwehu ni Epano Yosayelana ya Anamoona a Yehova. Teto kuddiwale wihina onasayela muselu onuukavihere werana yothoma yapama enamuhagalasa Yehova.
Osayele wonelamo mubuwelo wa Yehova wodhela museluya (Osugwe ddima 8) b
9. Nnande aavi okanna ebaribari wi dhothoma dhehu dhinere omuhagalasa Yehova? (Efeziyu 5:17)
9 Nnande aavi okanna ebaribari wi dhothoma dhehu dhinere omuhagalasa Yehova? Ethu yobajha enaanikavihere okanna ebaribari, fumunona pamadhene Yehova. Bibiliya anihina: ‘Omoova Yehova fumambelelo wa thotho.’ (Pro. 9:10) Obe nere iyo podi okanna thotho dhebaribari wodhela onona dhikalelo dha Yehova ni efunelo yaye wodhela dhithu dhinamudhivela ni aniddiye. Bumwahaya wikohe: “Gubuwelaga dhithu dhatedhene ginonnimi wodhela Yehova, gerege oliye anere ohagalala ni yothoma ginafunimi werana?” — Mmwileri Efeziyu 5:17.
10. Mwahaya bwaddi dhithu dhomuzimuni dhinohoowela okala dhathima mwigumini mwehu?
10 Malabo mamodha neegi nimuhagalase Yehova nnohowela werana yothoma enawukole akwihu ni amudhihu. Motajhiha, abaabi amodha enowawaddihedha aniwa oteliwa ni alobwana enna korowa, naarive ahili muthu owithwelavo epaddi yomuzimuni. Ebaribari wi abaabi enowathuwathuwela aniwa ni enofuna wi ekanne egumi yapama. Mbwenye mulobwana oyo, anere omukavihera mwanawo wunnuwelavo epaddi yomuzimuni ni okanna wandana wooliba ni Yehova? Ki Yehova anubuwela aavi wodhela muselu oyo? Yowakulaya enafwanyeya va Matewuji 6:33. Va yolebela ela makiristawu aatene enokongomedhiwa odidela “waaja Omwene wa Mulugu.” Ebaribari wi nnoriha monelo wa makolo ehu ni athu amodha eli athima vamentoni vehu, mbwenye yathimaya nnahowelihu othuwathuwela fumuhagalasa Yehova.
OPENDDE PAMA YOTHOMA ONAFUNIWE WERANA
11. Ekalelo baani enasorihiwa va Filipense 1:9, 10 enaanikavihere werana yothoma yapama?
11 Wafwanya nlagano mBibiliyani nniwanana ni muselu onasayeliwe, onohowela opendda pama yothoma onafuniwe werana. (Mmwileri Filipense 1:9, 10.) Ekalelo ela yowonelamo obe opendda, enere wukavihera wubuwela dhithu dhinafuna opadduwa wahinathi werana yothomaya. Malabo mamodha yothomaya podi okala yokweya obe yorusa. Dhothoma dhimodha dhinorusa, bumwahaya opendda winere wukavihera werana yothoma naarive erusaga.
12-13. Wasayelaga mabasa, opendda winuukavihere aavi werana yothoma yapama?
12 Kabiha wubuwela yoladdaniha ela. We onna wasayela mabasa wihina wande wasamalela amudhawo. Vano we wafwanya mabasa menli. Teto mabasa ayo kinalupa malagano a mBibiliyani. Onere ddi? We onere wubuwela dhithu dhinavolowela kadda mabasa. Ninga motajhiha, mabasa baani onaparegiwe, olenddo oneddigiwe okuma omabasani odhowa vadevawo, aporogarama onapanddigiwe akala onerege wanda wawakwanihedha ni dhithu dhimodha onaafunegiwe werana. Podi wera onere wasakula mabasa onaadhiveliwe obe onasakula ale ononiwe wihina enovaha korowa dhowinjhiva. Mbwenye dhihikalawo dhithu dhimodha onahoweliwe wubuwela wahinathi werana yothoma si yothoma.
13 Motajhiha, mabasaya enere wuthukulela ohanda woona mutugumano? Obe onerege wanda okala ni emudhaawo mudhidhi wowinjhiva ni wasamalela epaddi yomuzimuni? Yowakula yamakoho ala, enere wukavihera osogoliha “dhithu dhili dhathima” obe webedha wawo ni dhofuna dha amudhaawo, ohiya othuwathuwela okanna korowa dhowinjhiva. Wubuwela ni makalelo yaala, onere wanda werana yothoma enaamuhagalase Yehova, teto oliye anere wureeliha.
14. Opendda ni odhivela winanikavihere aavi ohakwakwathusa athu amodha?
14 Opendda winere onithukulela wawubuwela athu amodha nafunaga werana yothoma. Teto enere onikavihera oherana yothoma enaakwakwathuse akwihu.” (Fil. 1:10) Sathima olabihedha ekalelo ela yopendda, thabwa-thabwa nasakulaga dhowara ni makalelo owiwegeredha. Motajhiha, iyo podi okanna ekalelo yehu yowara ni yowiwegeredha. Ki akala ekalelo yawo yowara ni yowiwegeredha enowutakalela addibila ni athu amodha, onere ddi? Opendda onere onikavihera oriha mubuwelo wewa. Teto odhivela onere onithukulela “osayela opama waathu amodha” ni okala amanddile. (1 Kor. 10:23, 24, 32; 1 Tim. 2:9, 10) Ndala nnere wanda werana yothoma enoniha wihina nnowadhivela ni nnowariiha athu amodha.
15. Wahinathi werana yothoma wabihe wubuwela ddi?
15 Akala we onafuna werena yothoma yathima, wabihe wubuwela dhatedhene dhinavolowelavo wihina wande werana yothomaya. Yesu ohunihudhiha “ohelela konta.” (Luk. 14:28) Bumwahaya wahinathi werana yothoma si yothoma, wubuwele mudhidhi, kopolo ni dhithu onafuniwe ononga wihina wande wakwanihedha yothoma yawo. Malabo mamodha onere ohowela othapanya ni emudhi yawo wihina yande wukavihera wakwanihedha yothoma yawo. Mwahaya bwaddi sapama oloba nikavihero na emudhaawo? Mwaha we podi ohowelaga wawerana masadduwo obe aliwa podi okanna monelo mmodha onuukavihere. Teto waloba nikavihero na emudhi yawo, opwasedhe ovuruwana monelo wewa. Werana ndo, enere okala yokweya werana yothoma yapama. — Pro. 15:22.
WERENA YOTHOMA YAPAMA
16. Pontu baani dhinukavihere werana yothoma yapama? (Osugwe kwaduru enna musolo, “ Onande aavi werana dhothoma dhapama.”)
16 Akala ohuparihedha mabasa pontu dhisorihiwe mundduli, oli owiwegedhene wihina werena yothoma yapama. Ohubuwela pama dhithu dhatedhene dhinavolowelavo ni malagano a mBibiliyani enukavihere werana yothoma yapama enaamuhagalase Yehova? Akala oni hee, vano podi omuloba Yehova wi ukavihere werena yothoma yapama enuhagalase.
17. Wihina nerena yothoma yathima segeredoya siivi?
17 Akala malabo a mundduli waherana dhothoma dhowinjhiva dhuweddele pama, kuddiwale wihina segeredoya fumuroromela Yehova, ohiya wiroromela. Mwaha Yehova dinanivaha enonelo yeebaribari, dinanikavera wonelamo ni opendda pama. (Pro. 2:1-5) Wamuroromela Yehova, oliye anere wukavihera werana dhothoma dhinamuhagalasa. — Sal. 23:2, 3.
JHIBO 28 Baani anandane ni Yehova?
