OHUDHERA 4
JHIBO 18 Ginotamalela mukutho weenyu
Yowobola enanihudhiha ddi?
‘Mowindo, wihoneya odhivela wa Mulugu anniyena ni iyo.’ — 1 JUWA. 4:9.
DHITHU NNAAHUDHERIHU
Nnere woona makalelo yowobola enanihudhihiwa wodhela dhikalelo dha Yehova ni dha Yesu.
1. Mwahaya bwaddi sathima iyo odhowa omuthuponi wowubuwela okwa wa Yesu?
WE ohukanna ebaribari wihina yowobola nvaho wathima anivahile Yehova! (2 Kor. 9:15) Mwaha wa mukutho Yesu apelekiliye, ononikavihera okanna wandana wooliba ni Yehova. Ohiya eyo, yowobola ehifugula musiwo wihina nikanne ofuru wowakela egumi yamukalakala. Teto nihikanna dhithu dhowinjhiva dhinanithukulela omutamalela Yehova wodhela odhivela anitonyihedhiye mwaha ompeleka mwanaye anamudhiveliye wi anoobole! (Rom. 5:8) Vano wihina nididele wooniha otamalela wehu ninnihuna wodhela ele Yehova eriliyena, Yesu oloba wihina yaka dhatedhene Nubuwelege Okwa Waye. — Luk. 22:19, 20.
2. Ohudhera wula noone ddi?
2 Yaka ela ya 2025, muthupo wowubuwela okwa wa Yesu, onaakale Sabadu labo na 12 a Abril. Mwebaribarene aatene iyo nnerege wiwegeredha wihina nikalevo nlabo nna navayekiwa. Teto nnere opurelamo pamadhene muthupo ola, naapenddaga a dhithu Yehova ni mwanaye Yesu enanereliwa. Ohudhera wula, nnere woona ddiniyani yowobola enanihudhihiwa wodhela Yehova ni Yesu. Vano ohudhera winaharela, nnere wonelamo mwahaya bwaddi yowobola mukono wathima, ki nnonihe aavi wi nnotamalela.
YOWOBOLA ENANIHUDHIHA DDI WODHELA YEHOVA?
3. Dhandeyile aavi mukutho wa muthu mmodha baahi wawobola mbwabwadda ni mbwabwadda waathu? (Osugwe fotu.)
3 Yowobola enonihudhiha dhithu dhowinjhiva wodhela wogowa wa Yehova. (Deut. 32:4) Nimakalelo baani? Kabiha wubuwela: Mwaha wohiwelela wa Adawu, iyo nihivala yothega enanithukulela okwa. (Rom. 5:12) Vano wihina noboliwe, Yehova omuruma mwanaye wihina adhe anikwele. Mbwenye dhinandeya aavi mukutho wa muthu mmodha baahi wawobole mbwabwadda ni mbwabwadda waathu? Murumiwi Pawulo anowoga yowakulaya eegi: “Mwaha wa yothega ya muthu mmodha baahi [Adawu], athu aatene ehithega, mwamakalelo mamodhave, mwaha wiwelela wa muthu mmodha [Yesu], athu owinjhiva enowooniwa okala owogowa.” (Rom. 5:19; 1 Tim. 2:6) Ni madhu mamodha, iyo nili adhaari a yothega mwaha wohiwelela wa muthu mmodha baahi, mbwenye ehandeya ovulusiwa mwaha wowiwelela wa muthu mmodha baahi.
Mwaha wa yothega ya muthu mmodha baahi [Adawu], athu aatene ehithega, mwamakalelo mamodhave, mwaha wiwelela wa muthu mmodha [Yesu], athu owinjhiva enowooniwa okala owogowa. (Osugwe ddima 3)
4. Mwahaya bwaddi Yehova keenyile wihina odhuulu wowiwelela wa Adawu okalewo ni mukalakala?
4 Yesu ohowela okwa wihina anivuluse? Mwahaya bwaddi Yehova keenyile wihina odhuulu wowiwelela wa Adawu okalewo ni mukalakala? Iyo podi wubuwelaga wi ahere Yehova eenya odhulu wa Adawu okalawo ni mukalakala, ala yakale makalelo apama oomariha muladduya. Mbwenye eyo kiyonihe wogowa wologomana wa Yehova. Mwaha Yehova dowogowa. Ahere ahiya ndo, yakalege ninga Adawu ni Eva kiyerilena yothega enlubale.
5. Mwahaya bwaddi kannahowela wanganyedha akala Yehova anere wakwanihedha mpaganyo dhaye?
5 Ki ahere Yehova ahinobola, mbwenye athoma ohilabihedha wogowa waye ni eenya wi ahima ohilogomana a Adawu ekalegewo ni mukalakala? Ahere Yehova eenya eyo opadduwa, mudhidhi waviraga athuya yerege wanganyedha wogowa wa Yehova wodhela muselu dhimodha. Motajhiha, athu amodha podi wera yerege wubuwela yeegi: “Nerege Yehova anere wakwanihedha mpaganyo dhaye dhatedhene?” Mbwenye iyo kannahowela wanganyedha akala Yehova anere wakwanihedha mpaganyo dhaye. Mwaha oliye ohoniha wogowa waye wodhela ompeleka mwanaye ninga mukutho wi anobole. Teto eyo enowoniha wi Yehova anere wakwanihedha dhatedhene apaganyiliye.
6. Nimakalelo baani yowobola enonihiwa wi Yehova anonidhivela? (1 Juwawu 4:9, 10)
6 Yowobola kinoniha baahi wogowa wa Yehova, mbwenye enonikavihera wonelamo wi Yehova anonidhivela vanlubale. (Juwa. 3:16; mmwileri 1 Juwawu 4:9, 10.) Yowobola enonihudhiha wi Yehova anafuna wi nikalegewo ni mukalakala ni wihina nikose epaddi ya emudhi yaye. Kubuwela, Adawu nuuthega, oliye ohiya okosa epaddi ya emudhi ya Yehova. Bumwahaya aatene iyo nibaliwe nahikosaga epaddi ya emudhi ya Yehova. Mbwenye mwaha wa yowobola, athu aatene enathoma omuroromela ni omwiwelela Yehova, nlabo nimodha enere okosa epaddi ya emudhi ya Yehova. Mbwenye peeno, Yehova anolevelela dhothega dhehu ni anowenya wi nikanne wandana nuliye vamodha ni addibilihu. Teto kannahowela wanganyedha wi Yehova anonidhivela vanlubale! — Rom. 5:10, 11.
7. Mwahaya bwaddi goyi onile Yesu enonikavihera wonelamo pama odhivela Yehova anniyena ni iyo?
7 Iyo podi wonelamo pama odhivela wa Yehova anniyena ni iyo, napendda makalelo oliye ooniliye goyi wihina alive yowobola. Saddana ahiwoga wi kaavo mudhaari a Yehova ande okala ororomeleya ahere afwanyiwa makathamiho. Wihina Yehova oonihe wi ndhe awoga Saddana dhaali dhowoota, oliye wenya wi mwanaye akwe, Mbwenye aabihe wonihiwa goyi ahinathi okwa. (Jó 2:1-5; 1 Ped. 2:21) Yehova ahawona athu evadaga ni emunyemulaga mwanaye. Ohiya eyo, ahimoona Yesu akomeliwaga vantxikwani na goyi ni ahoona goyi yaatene yanfwanye Yesu mudhidhi agaali vantxikwani vale ofiyedha okwa waye. (Mat. 27:28-31, 39) Yehova ahikanna owedha womariha goyi yaatene mudhidhi mmodhave. Motajhiha athu nuwoga wihina “Mulugu yoyo uuvuluse-to ovanene akala onowurumedha,” Yehova ahafune eere werana ethu-sithu mudhidhi yoole. (Mat. 27:42, 43) Mbwenye Yehova ahere amariha muladduya, yowobola kiyaliviwe, teto iyo kanakanne ejhehedhelo. Bumwahaya Yehova adhe enyege mwanaye woona goyi ofiyedha okwa.
8. Nnonne aavi wi kiyaali yokweya Yehova omoona mwanaye onaga goyi? Owogemo. (Osugwe fotu.)
8 Kanubuwele wi mwaha Yehova okala Akopolo Dhatedhene, kadhinanpiha mbani awonaga makathamiho aathu! Oliye anipaddusile ni ekalelo yowukuwa, yohagalala ni yowunla. Vano woona wihina Bibiliya anihina nipaddusiwe moligana nuliye, eyo enatapulela wi nuliyeya onowukuwa. Teto Bibiliya anihina Yehova “onowukuwa.” (Sal. 78:40, 41) Kubuwela yopadduwa ya Abarawu ni Izaki, Yehova omuloba Abarawu wihina ampeleke mwanaye Izaki ninga mukutho. (Gén. 22:9-12; Ebe. 11:17-19) Kubuwela makalelo Abarawu aaliye owukuwene mudhidhi iwegeredhaga wihina ampe mwanaye mwamakalelo owaguva wihina ahithabwe woona goyi. Eyo enonikavihera woona makalelo Yehova aaliye owuukuweene mudhidhi amoonaga mwanaye Yesu oonihiwaga goyi ni akwaga vang’ono vang’ono! — Osugwe vidiyu mu jw.org enna musolo Otajhihe nroromelo neewa — Abarawu, epaddi 2.
Yehova aali owukuweene mudhidhi amoonaga mwanaye Yesu oonihiwaga goyi (Osugwe ddima 8)
9. Va yolebela ya Romanu 8:32, 38, 39 nahudhera ddi wodhela odhivela Yehova anniyena ni iyo?
9 Yowobola enonihudhiha wihina kaavo anna odhivela ompitha Yehova. Kaavo mukwihu avamurimani ni mmudhihu nnathabwihu omudhivela, aana odhivela ni iyo ompitha Yehova. (Mmwileri Romano 8:32, 38, 39.) Okanne ebaribari wi odhivela Yehova anniyena ni iyo, onokwaranya makalelo nnadhivelihu. We onofuna okalawo ni mukalakala? Yehova anofuna vanlubale wi okalewo nimukalakala. We onofuna wi dhothega dhawo dhileveleliwe? Yehova anofuna vanlubale wi dhothega dhawo dhileveleliwe. Ethu emodha Yehova analobiye, sowihina wonihege wi onotamalela yowobola, okanne nroromelo ni omwiwelelege. Mwebaribarene yowobola nvaho wathima ononiha wi Yehova ononidhivela. Teto mwilaboni exa, nnere ohudhera dhithu dhowinjhiva wodhela odhivela wa Yehova anniyena ni iyo. — Ecl. 3:11.
YOWOBOLA ENANIHUDHIHA DDI WODHELA YESU?
10. a) Ddiniyani yamuthuwathuwiha Yesu? b) Yesu onihile aavi wi Saddana muliba woota? (Osugwe kwaduru enna musolo: “Ororomeleya wa Yesu ohoniha wi Saddana muliba woota.”)
10 Yesu anothuwathuwela otxeniha emuthu ya Ababe, Yehova. (Juwa. 14:31) Ahinathi okwa, Yesu ahiinkedhiwa naathu wi oliye kaamuriha Yehova ni aali mpanga. Vano ubuwelaga dhithu dhabure yawoga athu, oliye owukuuwa vanlubale. Mwaha athu yubuwelege wi Yesu akwile mwaha ohumuriha Yehova. Bumwahaya Yesu adhe alobelege eegi: “Babani, kamwerena. Dhenyeya susihani kopo ela vamentoni vaaga.” (Mat. 26:39) Naarive dhigaali ndo, Yesu ahididela okala ororomeleya ofiyedha okwa waye. Mwaha wa yeyo, ahanda wooniha wi ndhe awogile Saddana wodhela Yehova dhaali dhowoota.
11. Yesu onihile aavi wihina ahikanna odhivela ni athu? (Juwawu 13:1)
11 Yowobola enowoniha wi Yesu anowathuwathuwela vanlubale athu, thabwathabwa anamahara aye. (Pro. 8:31; mmwileri Juwawu 13:1.) Motajhiha, Yesu ahinona wi afiya velaboni yavati eere ofwanyiwa makathamiho ni eere opiwa. Mbwenye Yesu kakwanihedhe dhithu dhatedhene ndhe dhorusa mwaha othomeliwa baahi ni Yehova, mbwenye yaali mwaha wodhivela anniyena ni athu yamuthukulela olaleya, wahudhiha ni wakavihera. Teto nlabo nogomihedha, Yesu ahipatha mudhidhi wihina asuwe manyalo a anamahara aye, walibiha ni wavaha dhoholela yahoweliwa. (Juwa. 13:12-15) Naarive agaali vantxikwani na goyi, Yesu ahinvaha ejhehedhelo mpanga ole aali epaddi yaye ni omuloba Juwawu wihina asamalelege amaye. (Luka 23:42, 43; Juwa 19:26, 27) Eyo enowoniha wi Yesu owadhivela vanlubale athu, ohiya baahi mwaha ovelela egumaye, mbwenye mwaha wa dhithu eriliyena agaali velaboni yavati.
12. Yesu anna onikavihera ni vanove, nimakalelo baani?
12 Ebaribari wi Yesu “akwile dila modha baahi,” mbwenye ni vanove anna onikavihera. (Rom. 6:10) Nimakalelo baani? Oliye anoodidela olaba wihina anivahe dhithu dhapama, peeno dhinenyeya baahi nnikavihero na yowobola. Yesu ali oopinyaminyeyene alabaga ninga Mwene ehu, Namakutha Munlubale ni Musolo wa mulogo. (1 Kor. 15:25; Efe. 5:23; Ebe. 2:17) Teto oliye ohukanna mutholo wowathugumana addibila oothikitheliwa ni muthithi waathu. Mutholo ola onere omala mahoso manlubale ehinathi wambela. b (Mat. 25:32; Mar. 13:27) Ohiya eyo, oliye anna omulabihedha mudhaari oororomeleya ni athotho wihina anivahe dhoojha dhomuzimuni nnahowelihu wi nididele omulabela Yehova nuuroromeleya malabo ala ookuthula. (Mat. 24:45) Vano ambela othonga elabo yavati muwari mwa yaka txikwi, oliye anere odidela onikavihera. Mwaha Yehova ohumpeleka mwanaye Yesu mwaha wa iyo!
ODIDELA OHUDHERA DHITHU DHIXA
13. Enuukavihere ddi odidela ohudhera wodhela odhivela wa Yehova ni Yesu?
13 Enowandeya odidela ohudhera wodhela odhivela wa Yehova ni Yesu enniwana ni iyo, niilibihedha opendda dhithu dhatedhene eneriwana ofiyedha peeno. Yaka ela ya 2025, we podi wileri nupwaseya livuru nimodha obe malivuru mateene a envajelyu muthupo wowubuwela okwa wa Yesu wahinathi ofiya obe wavira. Mbwenye kuwilerigi kapitulu dhatedhene mudhidhi mmodhave. Ohiya eyo, kuwaguvihege, mbwenye wilerigi vang’ono vang’ono wihina ofwanye dhithu dhinukavihere wenjhedhedha odhivela onniwena ni Yehova vamodha ni Yesu. Teto kuddiwale wawaddela athu amodha dhithu onahudheriwe.
14. Mowiwanana ni Salmo 119:97, osanyiha onanikavihere aavi odhowagave nihudheraga wodhela yowobola ni dhohudhiha dhimodha? (Osugwe fotu.)
14 Akala we obaddiziwa yakadhene mundduli, podi wera onubuwela wi kaawo ethu exa onahoweliwe ohudhera wodhela wogowa wa Yehova, odhivela waye ni yowobola. Mbwenye ebaribariya sowihina dhihikalawo dhithu dhixa nnahowelihu ohudhera wodhela muselu ndha. Ki onere ddi wihina ohudhere dhithu ndha dhixa? Wilibihedhe wawileri malivuru ehu, vano wawonelamo pama museluya, Osanyiheve. Wamala ohudhera, openddege dhithu omanliwe ohudhera wodhela Yehova, Yesu ni odhivela enniwana ni we. — Mmwileri Salmo 119:97 ni nota.
Naarive nigaali mwibaribarini yaka dhowinjhivadhene, nnohowela wenjhedhedha otamalela wehu wodhela yowobola (Osugwe ddima 14)
15. Mwahaya bwaddi sapama odidela odhowagave nihudheraga dhithu dhixa dha mBibiliyani?
15 Ki wamwileri Bibiliya obe wasanyiha muselu bu muselu, vano wahifwanya ethu exa obe yudhivele? Kukwerebeye. Mwaha we oli ninga muthu anasayela woru. Muthu asayelaga oru, anolaba mudhidhi ni malabo wowinjhivene wihina afwanye ethu nibwe eng’ono ya oru. Naarive dhigaali ndo, aliwa kinaselela osayela oru, mwaha naarive egafwanye nibwe eng’ono ya oru, aliwa enovaha thima. Ni makalelo mamodhave, ebaribari nnafwanyihu mBibiliyani, sathima opitha oru! (Sal 119:127; Pro. 8:10) Bumwahaya kuselele, odidele osayela nuuvilela dhithu dhixa. — Sal. 1:2.
16. Nnande aavi omutajhiha Yehova vamodha ni Yesu?
16 Wahudheraga osayele makalelo oparihedha mabasa mwigumini mwawo dhithu ohudheriwe. Motajhiha, we podi otajhiha wogowa wa Yehova wodhela ohumweddiha muthu di muthu ninsakulo. Ohiya eyo, we podi otajhiha odhivela wa Yesu awonihiliye aBabe ni athu amodha. Makalelo apama otajhiha odhivela wa Yesu, fuudhela werana ele Yehova anafuniye ni wakavihera athu amodha, naarive erusaga werana eyo. Makalelo mamodha, fuudhela walaleya athu amodha wihina ekanne ofuru wohudhera dhithu dhotikiniha Yehova anawereliye athu ni eroromele yowobola.
17. Ohudhera winaharela nnone ddi?
17 Nahudheraga wodhela yowobola, nnerege othabwa omudhivela Yehova ni Yesu. Yokumelelavoya, sowihina Yehova vamodha ni Yesu enerege othabwa onidhivela. (Juwa. 14:21; Tiya. 4:8) Bumwahaya, nnafuna nlabihedhe pama dhipano ananivaha Yehova wihina nididele ohudhera wodhela yowobola. Ohudhera winaharela, nnere wawoona mareeliho nnafunihu wawakela mwaha wa nvaho wa yowobola. Teto nnere woona makalelo ootamalela odhivela ananoniha Yehova.
JHIBO 107 Yehova yotajhiha yapama ya odhivela
a WONELAMO: “Opendda” enatapulela opwasedha ohudhera muselu bu muselu ni wubuwela dhithu dhimodha wihina wonelemo pama museluya.
b Va Efeziyu 1:10, murumiwi Pawulo ohuwoga wodhela otugumana “dhithu dhaatedhene dhodhulu,” teto va Matewuji 24:31 ni Markuji 13:27, Yesu anowogave wodhela watugumana “oosakuliwa.” Nerege murumiwi Pawulo ni Yesu, yawoga wodhela dhithu dhimodhave? Yowakulaya sowihina, naari! Mwaha murumiwi Pawulo anawoga wodhela mudhidhi Yehova anasakuliye ale enathongege ni Yesu wodhela wathikithela ni muzimu wotxena. Mbwenye Yesu awoga wodhela addibila othikitheliwa eli velaboni yavati enafuna otugumaniwa wi edhowe odhulu mudhidhi wa mahoso munlubale.
