1. Ddiniyani enanikavihera odidela omwebedha Yehova naarive nifwanyiwaga makathamiho owinjhiva?

 BIBILIYA anawoga wihina nnakalawo ‘mudhidhi wabure worusa ovilela.’ (2 Tim. 3:1) Ohiya makathamiho enanifwanya iyo aatene mwaha okala mwilaboni muna yabure, adhaari a Yehova enofwanyiwa makathamiho mamodha ninga oharahariwa. Mbwenye ddiniyani enanikavihera odidela omwebedha Yehova naarive nifwanyiwaga makathamiho owinjhiva? Ethu modha enanikavihera, fuunona wi ‘Yehova Mulugu ookalawo!’ — Jer. 10:10; 2 Tim. 1:12.

2. Nimakalelo baani wubuwela wodhela Yehova winanikaviheriwa?

² Yehova muthu, teto oliye anonikavihera nafwanyiwaga makathamiho bi makathamiho. (2 Cró. 16:9; Sal. 23:4) Nubuwela makalelo Yehova ananthuwathuweliye ni ananikaviheriye, nnokanna kopolo yowagonjhiha makathamiho bi makathamiho enanifwanya. Kabeni noone makalelo Yehova aamukaviheriye Davidi ni adhaari amodha akale.

3. Madhu awogile mwene Davidi enatapulela ddi?

³ Davidi ahimunona pamadhene Yehova ni oomuroromela. Mudhidhi aharahariwaga ni amwiddani aye ninga mwene Sawuli, Davidi ahilobela wa Yehova amulobaga nikavihero. (Sal. 18:6) Vano Yehova numala wakula nlobelo naaye teto nuumukavihera, Davidi owoga egi: ‘Yehova Mulugu ookalawo!’ (Sal. 18:46) Madhu ala a Davidi enatapulela ddi? Livuru dhaala na referensiya nnawoga wi mudhidhi yoole, Davidi awoga wi oomuroromela Yehova ninga Mulugu mmodha baahi eebaribari ni anaakavihera adhaari aye. Mwaha wa yopadduwa ya mwigumini mwaaye, Davidi ahinona wi Yehova oowoona dhithu dhatedhene dhampadduwela ni eere omukavihera. Siyeyo yamukavihere Davidi odhowagave amulabelaga ni anvuwihaga Yehova. — Sal. 18:28, 29, 49.

4. Okanna ebaribari wi Yehova Mulugu ookalawo, enukavihera ni makalelo baani?

 ⁴ Okanna ebaribari wi Yehova Mulugu ookalawo, sithu enaanikavihere omulabela nuuviheya. Teto eyo enere onivaha kopolo yowanda ogonjhiha yoweha si yoweha ni odidela neragana ele nnandihu wi nimulabele Yehova, ni enere onikavihera okanna wandana wapama ni Yehova.

MULUGU OOKALAWO ANERE WULIBIHA

5. Ddiniyani enaanikavihere wagonjhiha makathamiho bi makathamiho? (Filipenses 4:13)

⁵ Wubuwela wi Yehova Mulugu ookalawo podi onikavihera wanda ogonjhiha makathamiho bi makathamiho naarive ekale manlubale obe mang’ono. Ebaribariya sowihina kawo makathamiho enamurusa Yehova, mwaha oliye Mulugu akopolo dhatedhene, teto podi onivaha kopolo nnahowelihu wi nande ogonjhiha makathamiho enanifwanya. (Omwileri Filipensi 4:13.) Bumwahaya iyo nihikanna ebaribari yaatene yowihina nnere wanda wagonjhiha makathamiho aatene enanifwanya. Noonaga makalelo Yehova ananikaviheriye ni dhithu dhing’ono, nnokanna ebaribari wi oliye anere onikavihera naafwanyiwaga makathamiho manlubale.

6. Dhithu baani biili dhaapadduwile mwigumini mwa Davidi, dhamukavihere olibiha nroromelo naye ni Yehova, mudhidhi agaali muzombwe?

⁶ Kasugwa dhopadduwa biili dha mwigumini mwa Davidi dhamukavihere olibiha nroromelo naye ni Yehova. Mudhidhi agaali muzombwe ahipa nikurukumwa ni poddogoma yafuna watakuna mambila aababe. Mbwenye Davidi kubuwela wi andile werana dhithu ndhe mwaha wa kopolo dhaye. Ohiya eyo, oliye ahinona wi di Yehova anvaha kopolo nuuliba murima wihina ande werana dhithu ndhe. (1 Sam. 17:34-37) Davidi kanaddiwalege dhithu ndhe dhaapadduwile mwigumini mwaaye. Oliye ubuwelaga dhithu ndhe dhampadduwele, nroromelo naye ni Yehova nowenjhedhedheya ni ahinona wi Mulugu eerege omukavihera osogolo.

7. Davidi apwaasendhe wubuwela ddi, ki eyo yamukavihere aavi omugonjhiha Goliya?

⁷ Nuuvira mudhidhi, Davidi ahidhowa mburo amwaana Ezarayeli yawaniwawo koddo ni mafilistewu. Vano oliye wonelamo wi anyakoddo aamwaana Ezarayeli yoomoova vanlubale mfilistewu akopolo ni oothabwa olapa ithaniwa Goliya, nuwoga egi: ‘Peeno miyo ginafuna giwane ni anyakoddo aamwaana Ezarayeli.’ (1 Sam. 17:10, 11) Anyakoddo aamwaana Ezarayeli yoomoova mwaha wi yapwasendhe osugwa malapelo wa Goliya ni dhithu oliye awogiye. (1 Sam. 17:24, 25) Mbwenye Davidi apwaasendhe wubuwela ethu emodha. Davidi ahinona wi Goliya kaanyemula baahi anyakoddo aamwaana Ezarayeli, mbwenye amunyemula Mulugu ookalawo. (1 Sam. 17:26). Teto Davidi amuroromela Yehova baahi. Oliye ahinona wi Mulugu mmodhave aamukavihere mudhidhi agaali namakukula, eere omukavihera mudhidhi yole. Davidi kanganyedha wi Yehova eere omukavihera, bumwahaya oliye ahanda omugonjhiha Goliya! — 1 Sam. 17:45-51.

8. Ddiniyani enaanikavihere olibiha nroromelo nehu ni Yehova, wi anerege onikavihera nafwanyiwaga makathamiho? (Osugwe fotu.)

⁸ Nihiyoya podi wanda wagonjhiha makathamiho bi makathamiho enanifwanya, nubuwela wi Mulugu ookalawo anerege onikavihera. (Sal. 118:6) Iyo nubuwela dhithu Yehova anereliye kale, nnolibiha nroromelo nehu ni Yehova, wi anerege onikavihera. Bumwahaya sapama wileri dhopadduwa dha mBibiliyani, dhinawoga wodhela makalelo Yehova aakaviheriye adhaari aye kale. (Isa. 37:17, 33-37) Ohiya eyo, we podi wileri dhopadduwa dha mwigumini dha addibila ni arogola, dhinafwanyeya mu sayiti yehu jw.org. Dhopadduwa ndha dhinowooniha wi Yehova anowaakavihera adhaari  aye malabo yaala a peeno. Teto we podi wubuwela mudhidhi Yehova ukaviheriye kale. Malabo mamodha, ethu Yehova uwereliye kale podi ohikala enlubale ninga opa nikurukumwa obe poddogoma, mbwenye ebaribariya sowihina Yehova ali ni we mudhidhi wamutene! Yehova duwithanile wi okale mukwaye. (Juwa. 6:44) Teto we onowanda okala oororomeleya wa Yehova mwaha nikavihero naye. Ononamo aavi olobela wa Yehova omulobaga wihina ukavihere wubuwela mudhidhi awakunliye malobelo awo, ukaviheriye mudhidhi wofwanelela obe mudhidhi worusa oliye aliye epaddawo? Wubuwela wodhela dhithu dhendha, winere wukavihera omuroromela Yehova ni murima wawo wamutene.

9. Nafwanyiwaga makathamiho ethu baani yathima nnahowelihu wubuwela? (Provérbios 27:11)

⁹ Omoona Yehova ninga Mulugu ookalawo enere onikavihera woonaga dhoweha mwamakalelo apama. Ni makalelo baani? Nafwanyiwaga yoweha, nnohowela wubuwela ethu eli yathima vanlubale. Saddana anawoga wi naafwanyiwaga makathamiho, nnere ohiya omulabela Yehova, bumwahaya ethu nnerihuna nafwanyiwa makathamiho enompatha pamadhene Yehova. (Jó 1:10, 11; Omwileri Provérbios 27:11.) Iyo nadidela okala oororomeleya wa Yehova naarive nifwanyiwaga makathamiho, nnowoniha wi nnomudhivela ni nnowooniha wi Saddana muliba woota. Makathamiho baani onawaniwena mudhidhi yoola? Oharahariwa ni anamathonga, ohikanna korowa, widdiwa wakala mmabasani oolaleya obe makathamiho mamodha? Akala onofwanyiwa makathamiho bi makathamiho esorihiwe vala, kudduwale wi makathamiho ayo enuufwanya enowuvaha ofuru womuhagalasa Yehova. Teto kudduwale, Yehova kanuhiye ofwanyiwa makathamiho ohunandiwe wavilelana. (1 Kor. 10:13) Oliye anerege wuvaha kopolo wihina wande ovilelana.

MULUGU OOKALAWO ANERE WUREELIHA

10. Ddiniyani Yehova anapaganyiye wavaha ale eli oororomeleya?

¹⁰ Yehova anowareeliha ale enamuroromela  ni murima wewa waatene. (Ebe. 11:6) Yehova anonivaha murenddele ni osogolo anere onivaha egumi yohimala. Iyo nnomuroromela Yehova ni murima wehu waatene, mwaha nihikanna ebaribari wi Yehova anere onireeliha, teto oliye ohukanna efunelo ni kopolo yowerana eyo. Ebaribari ela ninnihuna yowi Yehova anere onreeliha, enonikavihera vanlubale odhowagave nimulabelaga Oliye, ndala ninga adhaari a Yehova akale yeriliwana. Teto siyeyo erilena Timotiyu. — Ebe. 6:10-12.

11. Ddiniyani yamuthukulela Timotiyu wilibihedha vanlubale wi aakavihere addibila? (1 Timóteo 4:10)

¹¹ Omwileri 1 Timotiyu 4:10. Timotiyu oomuroromela Mulugu ookalawo. Bumwahaya oliye ahiilibihedha wihina amulabele Yehova ni aakavihere addibila. Ni makalelo baani oliye eriliyena eyo? Murumiwi Pawulo ahimukongomedha wihina oliye akale namahudhiha apama mmulogoni ni mmabasani oolaleya. Teto Pawulo ahimwaddela Timotiyu wi akale yotajhiha yapama wa addibila yaali azombwe ni owunnuwelavo. Ohiya eyo, Timotiyu ahakela mutholo dhorusa, dhavolowelavo walaga addibila yahoweleyaga, mbwenye nuudhivela. (1 Tim. 4:11-16; 2 Tim. 4:1-5) Podi wera malabo mamodha, addibila amodha kayavahege thima newene kayatamalelege mabasa maatene Timotiyu aapariye. Mbwenye oliye ahinona wi Yehova owawoona mabasa aatene aapariye ni eere omureeliha. — Rom. 2:6, 7.

12. Ddiniyani enaakavihera anamaholela mulogo werana ele enandiwa wi ekavihere mulogo? (Osugwe fotu.)

¹² Peeno anamaholela mulogo podi okanna ebaribari wi Yehova anowoona ni anovaha thima dhatedhene eneriwana. Ohiya baahi, wakukula mambila a Yehova, wahudhiha ni olaleya, anamaholela mulogo owinjhiva enowakavihera mabasa oomaga Nyumba Dhomwene ni mabasa ookavihera yapadduwa ngovi. Anamaholela mulogo amodha enalaba ninga anamaredhela aredda a ospitale ni amodha enowakavihera mabasa a komisawu yospitale. Anamaholela mulogo enaakavihera mabasa ala, ehinona wi mabasa enaapariwa kahiyo  aathu, mbwenye ba Yehova. Bumwahaya, aliwa enowilibihedha werana ele enandiwa, teto ehikanna ebaribari wi Yehova anere wareeliha mwaha wa mabasa aatene enapariwa. — Kol. 3:23, 24.

13. Yehova anakala aavi aanoonaga nilibihedhaga wi nimulabele?

¹³ Ebaribari wi kinenyeya iyo aatene olaba ninga anamaholela mulogo, mbwenye aatene iyo podi onvaha Yehova ethu-sithu. Mulugu ehu anohagalala vanlubale, nilibihedhaga wihina nimulabele. Oliye anowoona dhovelela dhehu nnavahihu wi epariwena mabasa waapela elabo yaatene, naarive dhigaali dhing’ono. Teto Yehova anohagalala aanoonaga nilibihedhaga wi nigonjhihe woova nnakannihu nafunaga ovenyiha moono wi nivahe yowakula yehu mmutugumanoni ni anoothabwa ohagalala aanoonaga nimulevelelaga ddibila anitheegele. Naarive woonaga wi kunanda omwerela Yehova dhithu dhowinjhiva, okanne ebaribari wi oliye anovaha thima ele onandiwe werana. Yehova anowuudhivela vanlubale, bumwahaya anere wureeliha. — Luk. 21:1-4.

ODHOWEGEVE OMWADDAMELAGA MULUGU OOKALAWO

14. Okanna wandana wooliba ni Yehova onanikavihera aavi okala ororomeleya? (Osugwe fotu.)

¹⁴ Enere okala ethu yokweya okalave oororomeleya wa Yehova, namonaga ninga muthu. Siyeyo yapaddunwe ni Juze. Oliye ahikoodda wawerana mararuwo, mwaha ahinona wi eyo yeere omuukula vanlubale Yehova. (Gén. 39:9) Akala nnafuna nimonege Yehova ninga muthu, nnohowela opatha mudhidhi wi nthapanye nuliye ni omuhudhera Bibiliya. Nerena ndo, wandana wehu ni Yehova, onerege oliba kadda labo. Vano, ndala ninga Juze, nakanna wandana wooliba ni Yehova, kanneregena dhithu yamukule Oliye. — Tiya. 4:8.

15. Nnahudhera ddi ni yopadduwa ya aamwaana Ezarayeli mudhidhi egaali mwiddeddereni? (Eberewu 3:12)

¹⁵ Ale enadduwala wi Yehova muthu, podi warusa okalave oororomeleya wa Yehova. Kasugwa yapadduwe ni amwaana Ezarayeli mudhidhi egaali mwiddeddereni. Aliwa yahinona wi Yehova ohukalawo, mbwenye aliwa wambela  wanganyedha akala Yehova eere wasamalela. Mwaha wa yeyo, aliwa wambela wikoha: ‘Yehova ali ni iyo obe naari?’ (Êxo. 17:2, 7) Yokumelelavoya sowihina amwaana Ezarayeli omurugunuwela Yehova. Iyo kannafuna okala athu oohiwelela, ndala ninga amwaana Ezarayeli yamurugunuwele Yehova. — Omwileri Eberewu 3:12.

16. Dhithu baani dhinapadduwa peeno dhehe nroromelo nehu?

¹⁶ Kahi ethu yokweya wandana ni Yehova malabo yala oorusa nnakalihu. Peeno athu owinjhiva enorumedha wi Mulugu kaawo. Teto enakala ninga ale ehinna wandana ni Mulugu, enokanna egumi yapama. Noonaga dhithu ninga dhendha dhipadduwaga nroromelo nehu podi wehiwa. Ebaribari wi kannadha nirumedha wi Mulugu kaawo, mbwenye iyo podi wambela wanganyedha akala Mulugu anere onikavihera. Namaleba a Salmo 73 ahifiyedha okanna mubuwelo ninga yola. Athu yaamwapenle, kiyawiwelela malamulo a Yehova ni yerana baahi dhithu yafuniwa. Mwaha wa yeyo namaleba Salmo ola, obajha wanganyedha, akala wilibihedha waye wi amulabele Yehova kawali weebewene. — Sal. 73:11-13.

17. Ddiniyani enanikavihere okalave oororomeleya wa Yehova?

¹⁷ Ddiniyani yamukavihere salmista ola osaddula mubuwelo waye? Ethu yamukavihere yaali wubuwela dhithu dhafuna wapadduwela ale yamusukuma Yehova. (Sal. 73:18, 19, 27) Teto oliye ahawubuwela mareeliho enawakela ale enamulabela Yehova. (Sal. 73:24) Ni iyoya, podi wawubuwela mareeliho maatene Yehova anivahiliye. Karajhiha wubuwela makalelo yakale egumi yawo, ahere ohumulabelaga Yehova. Wubuwela dhithu Yehova ananereliye, podi onikavihera okalave oororomeleya wa Yehova nafwanyiwaga makathamiho bi makathamiho. Teto ndala ninga Salmista, iyo nnere owoga negi: ‘Mbwenye wa miyo sapama onfiyedha Mulugu.’ — Sal. 73:28.

18. Mwahaya bwaddi kannahowela woova dhithu dhinapadduwe osogolo?

¹⁸ Iyo podi wanda wagonjhiha makathamiho owinjhiva enanifwanya malabo ala ookuthula, mwaha nili ‘adhaari a Mulugu ookalawo ni eebaribari.’ (1 Tes. 1:9) Yehova Mulugu aliwo, bumwahaya Oliye anofuna vanlubale onikavihera. Yehova kanaasukumege adhaari aye mudhidhi wa kale, teto kanadha anisukuma ni iyoya peeno. Mohulegela, mahoso manlubale enere wambela. Mbwenye kannaakale yekihu, Yehova anaakale ni iyo. (Isa. 41:10) Bumwahaya iyo aatene nnere ‘oliba murima, ni nnere owoga negi: “Yehova dinagikavihera; kaginoove.”’ — Ebe. 13:5, 6.