OHUDHERA 24
JHIBO 24 Mudhe omwangoni wa Yehova
Odidele okala muleddo a Yehova ni mukalakala!
‘Babani Yehova, baani onaakale muleddo muddammwani mweenyu?’ — SAL. 15:1.
DHITHU NNAAHUDHERIHU
Nnere woona dhithu nnahowelihu werana wihina ndidele okanna wandana ni Yehova ni makalelo owaweddiha addibila.
1. Yolebela ya Salmo 15 enawoga wodhela ddi?
OHUDHERA ovirile, nihoona wi muthu apeleka egumaye wa Yehova, enakala ninga anavolowa muddammwani mwaaye obe neere anobaja okanna wandana nuliye. Mbwenye nnande aavi odhowagave nikalaga aleddo muddammwani mwa Yehova? Yolebela ya Salmo kapitulu 15 enowoga wodhela muselu ola. (Omwileri Salmo 15:1-5.) Kapitulu ela ya Salmo enowoga dhithu nnahowelihu weragana wihina nididele okanna wandana wooliba ni Yehova.
2. Podi wera Davidi ubuwela wodhela ddi nuwoga wodhela ddammwa a Yehova?
2 Salmo kapitulu 15 anabajha ni madhu ala: ‘Babani Yehova, baani onaakale muleddo muddammwani mweenyu? Onaakale mwanamurala vamwangoni veenyu wotxena baani?’ (Sal. 15:1) Davidi nuwoga wodhela ‘ddammwa’ a Yehova podi wera oliye ubuwela wodhela tabernakulu ya Yehova yakala luwani yo Jibeyawu mudhidhi yoole. Teto Davidi ahiwoga wodhela ‘mwango wotxena’ wa Mulugu, podi wera ubuwela wodhela mwango Siyawu wakala oJeruzale. Mwango ola wakala makilometuru owinjhiva epaddi yomayelo nduwa, luwani yo Jibeyawu. Davidi ahimmaga ddammwa wihina nipwehiwemo nikasa na nipangano ofiyedha mudhidhi yamagiwe tempulu wihina nikasa nna nikalegemo ni mukalakala. — 2 Sam. 6:17.
3. Mwahaya bwaadi sathima wonelamo ethu anawoga Salmo 15? (Osugwe fotu.)
3 Ebaribari wihina amwana Ezarayeli owinjhiva kiyanna oneti wolaba mutabernakulu, newene ovolowa mburo wakala nikasa na nipangano. Mbwenye amwaana Ezarayeli aatene oororomeleya yahikanna oneti wokala aleddo muddammwani mwa Yehova, obe nere, okanna wandana ni Yehova. Teto siyeyo iyo aatene nnafunihu. Va Salmo 15, Davidi ohuwoga dhikalelo nnahowelihu okanna negi nididele okanna wandana ni Yehova.
Amwaana Ezarayeli yakalawo mudhidhi wa Davidi, yowonelamo ethu yatapulela okala muddammwani mwa Yehova (Osugwe ddima 3)
WEREGENA OPAMA NI WEDDEGE NUUROROMELEYA
4. Ohiya baahi obaddiziwa ni owoga wi nili Anamoona a Yehova, nnohowela wilibihedha werana ddi? (Isaías 48:1)
4 Va Salmo 15:2 vinawoga wihina ole anna wandana ni Mulugu, ‘Dule onedda oororomeleyene [ni] aneerana dhego dhapama.’ Madhu owi ‘wedda’ ni ‘werana’ enooniha wi nnohowela odidela okala oororomeleya ni werana dhithu dhapama. Mbwenye nerege enowandeya ‘wedda nuuroromeleya?’ Hee, enowandeya. Ebaribari wi iyo kanlogomanne, mbwenye vamentoni va Yehova iyo ‘nnowedda nuuroromeleya’ nilibihedhaga wihina nimwiwelele. Niipeleka wa Yehova ni nabaddiziwa, nnobajha wedda ni Mulugu. Mbwenye kudduwale wi mudhidhi wa amwaana Ezarayeli muthu kaakanna wandana ni Yehova mwaha okala mwaana Ezarayeli baahi, mbwenye yohoweleya werana ethu-sithu. Amodha yawoga wi yomwebedha Yehova, mbweneye kayamulabela ni ‘murima wewa waatene vamodha ni ebaribari.’ (Omwileri Isaías 48:1.) Amwaana Ezarayeli yafuna okala aleddo muddammwani mwa Yehova, yohowela wahudhera malamulo a Yehova ni waparihedha mabasa. Ni makalelo mamodhave wihina nirumedhiwe ninga aleddo muddammwani mwa Yehova, nnohowela wilibihedha werana dhithu dhimodha, ohiya baahi obaddiziwa ni owoga wi nili Anamoona a Yehova. Nnohowela odhowagave neragana ‘dhego dhapama.’ Eyo enatapulela ddi?
5. Wedda nuroromeleya’ ni ‘werana opama’ enatapulela ddi?
5 Vamentoni va Yehova, ‘wedda nuuroromeleya’ ni ‘werana dhego dhapama,’ kinatapulela baahi odhowa omutugumanoni. (1 Sam. 15:22) Iyo nnohowela wilibihedha vanlubale wi nimwiwelelege Yehova dhipaddi dhatedhene dha mwigumini mwehu, naarive nakala yekihu. (Pro. 3:6; Ecl. 12:13, 14) Sathima odhowagave nilibihedhaga omwiwelela Yehova ni dhithudha dhinakala ninga dhing’no. Neragana ndo, nnowooniha wi nnomudhivela Yehova, teto oliye anerege onidhivela vanlubale. — Juwa. 14:23; 1 Juwa. 5:3.
6. Mowiwanana ni Eberewu 6:10-12, ddiniyani nahinahowelihu oddiwala?
6 Ebaribari wi Yehova anovaha thima dhithu nimwerenlihu kale.’ Mbwenye kanubuwele wi nnere odidela okanna wandana ni Yehova mwaha wa dhithu nimwerenlihu kale. Siyeyo Eberewu 6:10-12 anawogiye. (Omwileri.) Ebaribari wi Yehova kanadduwala dhithu dhatedhene dhapama nerilihuna kale. Mbwenye oliye anafuna wi nidhowegeve nimwebedhaga ni murima wehu waatene ‘ofiyedha omakuthulo.’ Teto iyo nnere wanda odhowagave nandanaga nuliye ni mukalakala, ‘nahiselela.’ — Gál. 6:9.
OWOGEGE EBARIBARI NI MURIMA WAWO WAATENE
7. Owoga ebaribari mmurimani enatapulela ddi?
7 Ole anafuna okala muleddo muddammwani mwa Yehova, anohowela ‘owoga ebaribari mmurimani mwaaye.’ (Sal. 15:2) Owoga ebaribari mmurimani kinatapulela ohoota baahi, mbwenye enovolowelavo dhithu dhimodha. Ohiya okala oororomeleya baahi nawogaga, nnohowela okala oororomeleya mwa dhatedhene. (Ebe. 13:18) Werana eyo sathima, ‘mwaha Yehova onootakaleliwa aliba woota, mbwenye onowandana naale eli owoogowa murima.’— Pro. 3:32.
8. Muthu ‘anawoga ebaribari mmurimani mwaaye,’ ethu baani ahinafwaneleliye werana?
8 Muthu ‘anawoga ebaribari mmurimani mwaaye,’ kaniisinjhihedha okala muthu apama akala vaari va addibila, mbwenye akalavo yeka weragana dhithu dhabure. (Isa. 29:13) Ohiya eyo, muthu anawoga ebaribari, kaanaleketha athu amodha. Muthu ooleketha podi wambela wubuwela wi malabo mamodha wahara malamulo a Yehova kahi ethu yapama. (Tia. 1:5-8) Teto oliye podi obajha ohawiwelela malamulo a Yehova enakala ninga kinna thima, vano oona wihina naarive eragana dhithu dhabure kavo enapadduwa, oliye podi othabwaga werana dhithu dhabure. Naarive oliye ubuwelaga wi anomulabela Mulugu, Yehova kanamurumedha muthu yoola. (Ecl. 8:11) Mbwenye iyo nnafuna nikale oororomeleya mwa dhatedhene.
9. Ethu baani yotikiniha yapadduwile Yesu numoona Nataniyeli nlabo noobajha, ki nnahudhera ddi? (Osugwe fotu.)
9 Iyo podi ohudhera wodhela thima yokala muthu oororomeleya wodhela opendda ele Yesu awogiliye numoona Nataniyeli nlabo noobajha. Naarive ahimunonne Nataniyeli, Yesu ahiwoga egi: “Kamusugweni, Mwizarayelita ebaribari, ahinoota anna ofiya.” (Juwa. 1:47) Ebaribari wi Yesu awoona anamahara aye amodha ninga athu oororomeleya, mbwenye Yesu ahoona wi Nataniyeli aali oothabwa ororomeleya. Teto ndala ninga iyo, Nataniyeli aali ohilogomana, mbwenye oliye kaali muthu oogwalamgwambi. Nataniyeli aali oororomeleya mwadhatedhene, teto Yesu ahitikina ni ekalelo yaye, bumwahaya adhe amuthethelege. Kuwahagalale ahere Yesu aawoga madhu ninga yala ni we?
Filipi ahimudhana Nataniyeli, aali mulobwana oororomeleya vanlubale ni awoga ebaribari wi amunone Yesu. Nerege Yesu eere owoga emodhave ni iyo? (Osugwe ddima 9)
10. Mwahaya bwaddi nnohowela okala pasope wodhela makalelo nnalabihedhihu nlumi nehu? (Tiyago 1:26)
10 Dhithu dhowinjhiva nnahowelihu werana dhinafwanyeya va Salmo 15 dhinawoga wodhela makalelo nnaweddihihu athu amodha. Va Salmo 15:3 vinawoga wi muleddo anaka muddammwani mwa Yehova ‘kanalabihedha nlumi naaye wi oote, kanamwerela obure mwanddamanaye, ni kanaanyemula akwaye.’ Iyo nawaba obe nawinkedha athu amodha, eyo podi wapiha mbani. Vano mwaha wa yeyo, Yehova kanaanirumedhe ninga aleddo muddammwani mwaye. — Omwileri Tiyago 1:26.
11. Waaba ddiniyani, ki muthu anna elemelelo yowaaba mbwenye kanathwaruwa, kanafwanelela ddi?
11 Ebaribari wi Davidi ahiwoga wodhela waaba. Mbwenye waaba ddiniyani? Ni madhu ookweya, enatapulela ovuwiha muselu dhowoota wodhela muthu mmodha yaatakaliye emuthu yaye. Muthu anna elemelelo yowaaba obe yowawinkedha akwaaye, mbwenye kanathwaruwa, kanafwanelela okala Namoona a Yehova.— Jer. 17:10.
12-13. Dhithu baani dhanithukulele wanyemula akwihu? (Osugwe fotu.)
12 Va Salmo 15:3 vinowoga wi ale eli aleddo muddammwani mwa Yehova, kinafwanelela wawerela obure athu amodha, teto kanaanyemula obe kanathukuliha manyazo akwaye. Eyo enatapulela ddi?
13 Podi wera nihifunaga, iyo podi obajha omunyemula mukwihu, wodhela ovuwiha muselu nihinonnihu pama. Motajhiha, iyo podi obajha ovuwiha muselu dhowoota wodhela (1) murogola ahiyile okala piyonera, (2) anamatelana ehiyile olaba oBeteli obe (3) ddibila ahiyile okala mudhaari ookavihera obe namaholela mulogo. Kiyakale yapama iyo obajha owoga wi addibila ala yere werana ethu yabure, bumwahaya edhe eyelelege mutholo dhewa. Mwebaribarene podi wera dhihikalawo dhithu dhowinjhiva nihinonnihu, dhaathukulele aliwa ohiya mutholo dhewa. Bumwahaya muthu ali muleddo muddammwani mwa Yehova ‘kanamwerela obure mwanddamanaye, ni kanaanyemula akwaye.’
Podi wera nihifunaga, iyo podi obajha omunyemula mukwihu, wodhela ovuwiha muselu nihinonnihu pama ofiyedha omuukula (Osugwe ddima 12-13)
WATHITHIMIHEGE ALE ENAMOOVA YEHOVA
14. Nnande aavi omunona muthu ‘ootakala murima?’
14 Va Salmo 15:4 vinawoga wi muthu anna wandana ni Yehova ‘onowakodda ale enna murima wootakala.’ Nnande aavi omunona muthu ootakala murima? Mwaha okala athu ohulogomana iyo kaninna oneti wowoga wi muthu ola dootakala murima obe naari. Mwaha wa ddi? Mwaha wohulogomana, iyo podi omudhivelaga muthu anna dhikalelo dhinanidhivela, mbwenye nahafunege athu amodha mwaha wokanna dhikalelo dhinantakalela. Ebaribariya sowihina athu nnahowelihu wasukuma, baale Yehova anawoniye ninga ‘ootakala murima.’ (1 Kor. 5:11) Athu yala baale enerana dhithu dhabure ni kinathwaruwa, ale ehinariha dhithu nnarumedhihu ni enaxixa ononga wandana wehu ni Yehova. — Pro. 13:20.
15. Makalelo ohiyanahiyana nnahowelihu ‘wathithimiha ale enamoova Yehova baavi?’
15 Yolebela emodhave ya Salmo 15:4 enowoga wi nnohowela ‘wathithimiha ale enamova Yehova.’ Wihina nande werana eyo, nnohowela osayela makalelo owaweddiha nuupama ni waariha ale yandanne ni Yehova. (Rom. 12:10) Makalelo mamodha owathithimiha ale enna wandana ni Yehova, enasorihiwa va yolebela emodhave ya Salmo 15:4. Muthu ali muleddo muddammwani mwa Yehova, ‘kanahiya werana ele alibeliye, naarive aganonne wi enere omutotela makathamiho.’ Nahakwanihedhaga ndhe nipaganyilihu, eyo podi wawukula athu amodha. (Mat. 5:37) Motajhiha, Yehova anajheha wi anamatelana yakwanihedhe mpaganyo yeriliwana nlabo na matelo ewa. Teto Yehova anohagalala vanlunbale awoonaga ababi yilibihedhaga wihina yakwanihedhe mpaganyo enawereliwa aniwa. Mwaha womudhivela Yehova ni athu amodha, iyo nnere wilibihedha wihina nerena ele nnandihu, wi nakwanihedhege mpaganyo dhehu.
16. Makalelo mamodha owathithimiha ale enamoova Yehova baavi?
16 Makalelo mamodha owathithimiha ale enna wandana ni Yehova, fuudhela okala athu oovaha ni anamakela aleddo. (Rom. 12:13) Ojha mudhidhi naaddibilihu nakala mmutugumanoni ni mmalaleyelo, winere onikavihera olibiha wandana ninnihuna ni Yehova vamodha naaddibilihu. Ohiya eyo, mwaha okala anamakela aleddo, nnomutajhiha Yehova.
KUDHIVELIWEGE KOROWA
17. Mwahaya bwaddi Davidi adhe awogege wodhela muselu wa korowa va Salmo ola mung’ono?
17 Va Salmo 15:5 vinowoga wihina muthu ali muleddo muddammwana mwa Yehova ‘kanafiyariha korowa ni juru, ni kaneenya onyigaliwa ni muthu di muthu.’ Mwahaya bwaddi Davidi adhe awogege wodhela muselu wa korowa va Salmo ola mung’ono? Mwaha wi naathabwaga othuwathuwela korowa, iyo podi wambela ovaha thima korowa, wapitha athu amodha vamodha ni Yehovaya. (1 Tim. 6:10) Kale, athu amodha yowaboliha korowa addibiliwa yaali oohawa, ejhehaga ohogoloseliwa ni juru yahandiwa ohogolosa. Ohiya eyo anamatoriha amodha yorumedha onyigaliwa ni korowa wihina yavahe nibili ale yahanna muladdu. Mbwenye Yehova oothabwa otakaleliwa oonaga dhithu dhendha dhipadduwaga. — Eze. 22:12.
18. Makoho baani nnahowelihu wikoha wi nande onona moonelo wehu wodhela korowa? (Eberewu 13:5)
18 Sapama kadda muthu wa iyo wikoha: “Ginoona aavi korowa? Ginojha mudhidhi wowinjhiva gubuwelaga wodhela korowa ni dhithu gafunimi ogula gahakanne korowa dhowinjhiva? Gaboliha korowa yannya ginolegela ohogolosa, gubuwelaga wi mwinnya kanahowela? Ginowivaha thima vanlubale mwaha okanna korowa, wapitha athu amodha? Enogirusa wakavihera athu amodha ni dhithu ginnimina? Gerege mwaha muthu okanna korowa, miyo ginowubuwela wi oliye anothabwa ovaha thima dhoreela? Miyo ginathabwa wandana naathu oreela ni kaginaavaha thima ele eli ohawa?” Aatene iyo nihikanna oneti wokala aleddo muddammwani mwa Yehova. Mbwenye akala nnofuna odhowagave nikalaga aleddo muddammwani mwa Yehova, nnohowela okala pasope wihina nahithabwege odhivelawa korowa. Naathabwaga omudhivela Yehova opitha korowa, Yehova kanadha aninyanyala! — Omwileri Eberewu 13:5.
YEHOVA ANOWADHIVELA AKWAAYE
19. Ethu enamuthukulela Yehova oniloba dhithu dhowinjhiva ddi?
19 Salmo 15 anookuthula ni madhu ala: ‘Oneerana dhithu ndo, kadha oona goyi.’ (Sal. 15:5) Vala, Davidi anowoniha ethu enamuthukulela Yehova oniloba dhithu dhowinjhiva. Yehova anafuna wi iyo nihagalalege. Bumwahaya, neragana ele Mulugu ananilobiye, nnokanna egumi yapama, teto oliye anonibarela. — Isa. 48:17.
20. Ddiniyani ale eli aleddo muddammwani mwa Yehova enajhehiwa osogolo?
20 Ale eli aleddo muddammwani mwa Yehova, ehikanna ejhehedhelo yosogolo wapama. Makiristawu oothikitheliwa enaadidele okala oororomeleya, enere withaniwa wihina yakalege wule “wahiramile mburo,” obe nere, odhulu. (Juwa. 14:2) Vano ale enna ejhehedhelo yokala velaboni yavati, enna ojheha nuuthaba wakwanela wa mpaganyo onafwanyeya va Ovuhulela 21:3. Mohanganyedha oneti winlubale withaniwa ni Yehova wihina nikale aleddo muddammwani mwaaye ni mukalakala!
JHIBO 39 Okanna ndina napama vamentoni va Mulugu
