Wihina nande omuhagalasa Yehova nnohowela okanna nroromelo. Mbwenye Bibiliya anihina kahiyo athu aatene enna nroromelo. (2 Tes. 3:2) Murumiwi Pawulo nuwawoga madhu ala, oliye awagana ‘athu abure ni ootakala murima,’ obe neere, athu yamuharahara. Mbwenye ethu oliye awogiliye wodhela nroromelo enowapatha athu amodha. Motajhiha, athu amodha kinafuna orumedha wi Mulugu dipaddusile dhithu dhatedhene. (Rom. 1:20) Amodha enarumedha wi ehikalawo ethu obe muthu othabwa okanna kopolo wapitha aliwa. Mbwenye orumedha mubuwelo ninga yoola, kinakwana wihina nimuhagalase Yehova, mwaha nno kahiyo nroromelo neebaribari.

Iyo nnohowela okanna ebaribari wi Yehova ohukalawo ni anowareeliha ale enamuroromela ni murima wewa waatene. (Ebe. 11:6) Nroromelo ekalelo emodha ya yowima ya muzimu wotxena. Bumwahaya negi nande okanna muzimu wotxena, nnohowela omuloba Yehova. (Luk. 11:9, 10, 13) Makalelo mamodha ookanna muzimu wotxena, fuudhela omwileri Bibiliya. Teto sathima opendda ni oparihedha mabasa dhithu nnahudherihu. Nerena ndo, muzimu wotxena wa Yehova, onere onikavihera okanna nroromelo nooliba nnamuhagalase Yehova.