OHUDHERA 23
JHIBO 28 Baani anandane ni Yehova?
Yehova anoniithana wi nikale aleddo muddammwani mwaaye
‘Ddammwa aaga anaakale naaliwa, teto miyo ginakale Mulugu ewa’ — EZE. 37:27.
DHITHU NNAAHUDHERIHU
Nnere woona makalelo owenjhedhedha otamalela wehu mwaha Yehova oniithanela muddammwani mwaaye ni makalelo Yehova ananisamaaleliye vaade vaye.
1-2. Nnonne aavi wi mwebaribarene Yehova anofuna wi nandane ni nuliye?
AHERE muthu ukoha egi: Yehova baanawo? Waamwakule aavi? Podi wera were omwakula wegi: “Yehova di Mulugwaga, mukwaaga ni Baabi aaga.” Ebaribari wi ehikalawo makalelo owinjhiva oomwithana Yehova, mbwenye onowabihaga omubuwela Yehova ninga namakela aleddo?
2 Awogaga wodhela wandana Yehova anniyena ni adhaari aye, mwene Davidi ahimuliganiha Yehova ninga namakela aleddo, vano adhaari aye ninga aleddo. Davidi ahimukoha Yehova egi: ‘Babani Yehova, baani onaakale muleddo muddammwani mweenyu? Onaakale mwanamurala vamwangoni veenyu wotxena baani?’ (Sal. 15:1) Wodhela versu ndha, nnowanda woona wi iyo podi okala aleddo muddammwani mwa Yehova, obe nere, iyo podi wandana ni Yehova. Kunonelamo wi oneti winlubale withaniwa ni Yehova wihina nandane nuliye?
YEHOVA ANOFUNA WI NIKALE ALEDDO AYE
3. Muleddo oobajha a Yehova aali aani, ki wandana wewa waali aavi?
3 Yehova aali yeka mudhidhi ahinathi obajha opaddusa dhithu dhaatedhene. Vano vasogolova oliye othoma ompaddusa mwanaye oobajha, numpaddusa, yakala ninga Yehova amwithana mwanaye wi akale muleddo muddammwani mwaaye. Teto Yehova ahihagalala vanlubale mwaha ompaddusa Yesu. Bibiliya anawoga wi kadda labo Yehova ‘oohagalala vanlubale’ mwaha okala vamodha ni Yesu. Teto Yesu ‘oohagalala vamentoni va [Yehova] mudhidhi wamutene.’ — Pro. 8:30.
4. Numala ompaddusa Yesu, aleddo amodha a Yehova yaali aani?
4 Numala ompaddusa Yesu, Yehova wapaddusa angero, eli aleddo muddammwani mwaaye. Angero ala, enowithaniwa ‘ahima a Mulugu,’ teto Bibiliya anowoga wi angero ala enohagalala vanlubale mwaha okalaga ni Yehova. (Jó 38:7; Dan. 7:10) Muwari mwa yaka dhowinjhivadhene aleddo a Yehova yaali ale yakala nuliye odhulu. Mbwenye Yehova othoma omunnuwiha ddammwa aye wihina athu enakala velaboni yavati ekale aleddo aye. Athu a velaboni yavati Yehova awakenliye ninga aleddo aye aali Inoki, Nowe, Abarawu, Jo ni amodha. Bibiliya anawoga wi aliwa yahandana ni Yehova mwaha yomwiwelela ni yeedda ‘ni Mulugu eebaribari.’ — Gén. 5:24; 6:9; Jó 29:4; Isa. 41:8.
5. Nnahudhera ddi ni yovuhulela ya Ezequiel 37:26, 27?
5 Muwari mwa yakadhene Yehova anowawithana akwaye wi ekale aleddo muddammwani mwaaye. (Omwileri Ezequiel 37:26, 27.) Motajhiha, va yovuhulela ya Ezekiyeli nnohudhera wihina Yehova anafuna wi adhaari aye ekanne wandana wooliba nuliye. Teto oliye anopaganya werana ‘nipangano na murenddele naliwa.’ Yovuhulela ela enowoga wodhela mudhidhi makiristawu oothikitheliwa vamodha ni ale enna ejhehedhelo yokala velaboni yavati, enafuniwa okala owiwanana muddammwani mwaaye, emulabelaga oliye mowiwanana ninga “nikuuru nimodha.” (Juwa. 10:16) Teto yovuhulela ela enna wakwanela malabo yala!
YEHOVA ANONISAMALELA NAARIVE NIKALAGA MBURO BU MBURO
6. Mudhidhi baani muthu anambeliye okala muleddo muddammwani mwa Yehova, ki ddammwa ola anafwanyeya waani?
6 Mudhidhi wa kale, muddammwani waali mburo muthu akaliyemo wihina ithuwemo ni akala oobareleyene wa ethu-sithu yapadduwa ode, ninga muzongwe obe nduwa. Vano muleddo akala muddammwani, akala oopwaseyene ni koova ethu. Iyo niipeleka wa Yehova nnakala aleddo muddammwani mwaaye. (Sal. 61:4) Muddammwani muna, iyo nihikanna dhoojha dhomuzimuni nnahowelihu wihina nidhowegeve nilibihaga wandana ninnihuna ni Yehova, teto nihikanna akwihu eli aleddo muddammwani mwa Yehova. Naarive nikalaga mburo bu mburo, iyo aatene podi okala aleddo muddammwani mwa Yehova. Podi wera onowabihaga odhowa elabo emodha wihina woone musonkano wavayeka, teto wahanonawo addibila amodha enahagalala mwaha okala muddammwani mwa Yehova. Ddammwa a Yehova anafwanyeya mburo dhaatedhene wili adhaari aye. — Ovuhu. 21:3.
7. Mwahaya bwaddi nigawogaga wihina adhaari a Yehova ekwile kale nivanove aleddo muddammwani mwa Yehova? (Osugwe fotu.)
7 Mbwenye ki owoga wodhela adhaari a Yehova ekwile? Naaliwaya aleddo muddammwani mwa Yehova? Hee! Mwahaya bwaddi nigawoga ndo? Mwaha vamentoni va Yehova, athu yaala nivanove ehikalawo. Yesu ahiwoga wodhela muselu ola egi: “Mbwenye anookwa eneere ovenyihiwa muukwani mwaha Moyizeji ohuwoga agaali vanikupuni numwithana Yehova egi, ‘Mulugu Abaraawu, Mulugu a Izaki, Mulugu a Jako.’ Oliye kahiyo Mulugu aanokwa mbwenye aathu ookalawo, mwaha vamentoni vaye athu aatene ekwile ehikalawo.” — Lukaji 20:37, 38.
Adhaari oororomeleya a Yehova ekwile kale, nivanove aleddo muddammwani mwaaye (Osugwe ddima 7)
MAREELIHO NI MUTHOLO NINNIHUNA MWAHA OKALA MUDDAMMWANI MWA YEHOVA
8. Mareeliho baani aleddo a Yehova enniwana?
8 Ndala ninga ddammwa anamagiwa ni muthu onakaliwa mburo wowithuwa ni wobareleya, ddammwa a Yehova anowabarela aleddo aye epaddi yomuzimuni ni anonivaha ejhehedhelo yosogolo. Teto nadidela okala muddammwani mwa Yehova, Saddana kanadha anitatamulela makathamiho bi makathamiho nihinandihu wawanana. (Sal. 31:23; 1 Juwa. 3:8) Ohiya eyo, mwilaboni exa, ohiya baahi Yehova onibarela epaddi yomuzimuni, oliye anerege onibarela wihina nnaakwe. — Ovuhu. 21:4.
9. Ddiniyani nnahowelihu werana negi nididele okala aleddo muddammwani Yehova?
9 Ebaribari wi oneti munlubale okala muleddo muddammwani mwa Yehova ni okanna wandana wooliba nuliye ohunadha omala. Woona wihina nili aleddo muddammwani mwaaye, ddiniyani nnahowelihu werana negi nididele okala aleddo aye? Kubuwela, wahere withaniwa wihina waredhe vaade va muthu di muthu, mwebaribarene weere ofuna onona mweddelo wa mwanamuralaya. Motajhiha, mwanamuralaya podi wuloba wihina orule sapatho ohunathi ovolowa mba, mwebaribarene we were wiwelela ele anulobiye. Ni makalelo mamodhave, iyo nnafuna nnone ethu baani Yehova anafuniye wihina ale eli muddammwani mwaaye yeregena. Odhivela ninnihuna ni Yehova, onere onthukulela werana dhatedhene nnandihu ‘wihina nihagalase murima waye.’ (Kol. 1:10) Ebaribari wi Yehova di mukwihu, mbwenye nnohowela ohidduwala wi oliye di Baabi ni Mulugu ehu. Bumwahaya nnohowela omuriha vanlubale. (Sal. 25:14) Mwaha wa yeyo, nnafuna nimutikinege vanlubale ni ohidduwala wi oliye di Baabi, mukwihu ni Mulugu ehu. Wubuwela ndo, onere onikavihera oherana ethu yaamukule Yehova. Mwebaribarene, iyo nnafuna ‘needdege nuwiyeviha’ ni Mulugu ehu. — Miq. 6:8.
YEHOVA AHEDDIHA NLOGO NAAMWAANA EZARAYELI AHONIHILE NSAKULO
10-11. Makalelo Yehova aweddihiliye amwaana Ezarayeli egaali mwiddeddereni, enoniha aavi wi vamentoni vaye athu aatene bathima?
10 Yehova anowaweddiha aleddo aye ahonihile nsakulo. (Rom. 2:11) Iyo podi wonelamo makalelo Yehova aliye Mulugu ahinna nsakulo wodhela ohudhera makalelo oliye aweddihiliye amwaana Ezarayeli mwiddeddereni.
11 Numala wawobola amwaana Ezarayeli mudhaarini Wijipitu, Yehova wathoma anamakutha wihina elabege mutabernakulu. Teto oliye ahathoma malevita amodha wihina yasamalelege mabasa, mburo ole wotaleleya. Ki vano, nerege ale yalaba mutabernakulu obe yakala waddamela otabernakulu, bathabwa osamaleliwa ni Yehova? Naari! Yehova kanna nsakulo, teto vamentoni vaye athu aatene bathima.
12. Makalelo Yehova aweddihiliye amwaana Ezarayeli egaali mwiddeddereni, yooniha aavi wi vamentoni vaye athu aatene bathima? (Êxodo 40:38) (Osugwe fotu.)
12 Kadda mwaana Ezarayeli, ahikanna oneti wowandana ni Yehova, naarive akalaga waddamela ni tabernakulu obe wolapela. Motajhiha, Yehova aheriha wi amwaana Ezarayeli aatene yonege murabo waweddiha ni mutana ni mootho waweddiha ni mahiyu, wakala vadhulu va tabernakulu. (Omwileri Êxodo 40:38.) Vano murabo ole wabajha weedda, naleya yakala wolapela yowanda woona. Ni makalelo yaala, athu aatene yowiwegeredha ni yoothukula dhoobo dhewa wihina ehogolowele olenddo wewa. (Núm. 9:15-23) Ohiya eyo, aatene yowanda wiwa orumihiwa wa palaza biili dha parata, dhaakavihera athu aatene onona wi enohowela omaruwa. (Núm. 10:2) Ela enowooniha wihina mwaha muthu waddamela tabernakulu kiyatapulela wi eere okanna wandana wooliba ni Yehova wapitha ale yakala wolapela. Teto nlogo naatene naamwaana Ezarayeli, nahikanna oneti wookala aleddo a Yehova, waakela dhoholela dhaye, vamodha ni obareliwa nuliye. Ni makalelo mamodhave, naarive nikalaga mburo bu mburo, iyo aatene nnowanda woona wi Yehova anonidhivela, anonisamalela ni anonibarela.
Tabernakulu yakala vaari va amwaana Ezarayeli yowoniha wi Yehova kanna nsakulo (Osugwe ddima 12)
OFIYEDHA PEENO YEHOVA ANOWONIHA WI KANNA NSAKULO
13. Ofiyedha peeno Yehova anoniha aavi wi kanna nsakulo?
13 Peeno adhaari amodha a Yehova enakala waddamela osede enlubale ya Anamoona a Yehova obe oBeteli. Teto adhaari amodha a Yehova enalaba osede enlubale ya Anamoona a Yehova obe oBeteli. Mwaha wa yeyo, aliwa enokanna oneti wowakavihera mabasa enapariwa mburo dhendha ni okala vamodha ni addibila enaholela mabasa a nikuru na Yehova. Teto amodha enalaba ninga anameddela mulogo obe enowakavihera mabasa mamodha a mudhidhi wamutene. Mbwenye naarive, akala kunakala waddamela oBeteli obe kunakavihera mabasa bi mabasa a mudhidhi wamutene, okanne ebaribari wi Yehova anowadhivela aleddo aye aatene vamodha ni weya. Teto Oliye anere wuvaha dhatedhene onahoweliwe. (1 Ped. 5:7) Adhaari aatene a Yehova enowakela yoojha yomuzimuni, dhoholela ni obareliwa enahoweliwa.
14. Ethu emodha enoniha wi Yehova Mulugu ahinna nsakulo siivi?
14 Ethu emodha enoniha wi Yehova namakela aleddo ahinna nsakulo, sowihina Oliye anoweriha wi Bibiliya atapuleliwe ni dhiwogelo dhowinjhiva. Omambelelowene Bibiliya aalebiwe ni dhiwogelo tharu: Ebarayiko, Aramayiku ni eGerego. Nerege ela enatapulela wi athu enanda omwileri Bibiliya ni dhiwogelo ndha tharu, ehikanna wandana woliba ni Yehova waapitha ale ehinanda owoga dhiwogelo ndha? Naari! — Mat. 11:25.
15. Ddiniyani enoniha wi Yehova kanna nsakulo? (Osugwe fotu.)
15 Wihina nikanne wandana woliba ni Yehova, kinahoweleya okanna ohudhera wavadhulu obe onona owoga pama dhiwogelo dhilabihedhiwe mudhidhi alebiwaga Bibiliya ninga Ebarayiku, Aramayiko ni eGerego. Yehova anofuna wandana ni wavaha enonelo athu aatene, naarive akala athuya bothabwa ohudhera obe naari. Bibiliya ohutapuleliwa ni dhiwogelo dhowinjhiva wihina aakavihere athu wapela elabo yaatene omwiwelela Yehova ni okanna wandana woliba nuliye. — 2 Tim. 3:16, 17.
Mwahaya bwaddi nigawoga wi mwaha Bibiliya otapuleliwa ni dhiwogelo dhowinjhiva, ethu enooniha wi Yehova kanna nsakulo? (Osugwe ddima 15)
KUSELELE OKALA MULEDDO A YEHOVA
16. Mowiwanana ni Dhowera Dhaarumiwi 10:34, 35, nnande aavi odhowagave nikalaga muddammwani mwa Yehova?
16 Oneti winlubale withaniwa ni Yehova wi nikale aleddo muddammwani mwaaye. Yehova namakela aleddo apama ni oodhivela, wapitha athu aatene. Ohiya eyo, vamentoni vaye athu aatene enoligana. Yehova anowawithana athu aatene ahipwathile mburo winakaliwa, makalelo eleliwiwa, akala doothabwa ohudhera obe naari, akala akaafiri obe azugu, nihimo neewa, yaka enniwana obe akala alobwana obe ahiyana. Mbwenye athu Yehova anarumeedhiye wi ekale aleddo muddammwani mwaaye, baale enamwiwelela. — Omwileri Dhowera Dhaarumiwi 10:34, 35.
17. Ohudhera onaharela nnahudhere ddi?
17 Va Salmo 15:1, Davidi ohumukoha Yehova egi: ‘Babani Yehova, baani onaakale muleddo muddammwani mweenyu? Onaakale mwanamurala vamwangoni veenyu wotxena baani?’ Yehova ahinvethela Davidi wihina awakule makoho ala. Ohudhera onaharela nnere woona dhithu nnahowelihu werana wihina nidhowegeve nikalaga aleddo muddammwani mwa Yehova.
JHIBO 32 Osakule epaddi ya Yehova!
