Gibaliwe yaka ya 1955, makolo aaga yanna ahima araru, teto miyo gaali amung’onoya. Miyo gileliwe waddamela luwani enakala sere-sere ya niya epaddi yomayelo nduwa ya elabo yo Finlandiya, peeno enoniwe ninga luwani yo Vantaa.

Amama ebaddiziwe miyo gihinathi obaliwa. Mbwenye apapa kiyadhiveliwe amama nuukala Namoona a Yehova, teto kiyafuna wi amama enihudhihe Bibiliya newene onithukulela omutugumanoni. Bumwahaya amama yanihudhiha Bibiliya apapa yavenyavo.

Okuma ehimaaga miyo gahithoma omwiwelela Yehova mudhidhi wamutene. Motajhiha, nganna yaka 7 profesora aaga ahitakaleliwa ni miyo mwaha kagafuna ojha verilättyjä (eli yoojha enathabwa ojhiwa oFinlandiya, mbwenye yasasanyiwaga nnowekiwamo nikame). Vano porofesora aaga ohiddela mulomo waga wihina gaatame, teto ni nlada nimodha oliye othukula yoojha ele wihina agiwaddihedhe ojha. Mbwenye miyo ovada nlada nne mwaali yoojha ele wihina emothe.

Nganna yaka 12, apapa okwa. Vano aliwa nuukwa gowanda woona mutugumano. Addibila ammulogoni yogidhivela vanlubale, mwaha wa odhivela yagonihiwa, wahigithukulela wunnuwelavo epaddi yomuzimuni. Miyo obajha omwileri Bibiliya malabo aamateene ni opwasedha wahudhera malivuru ehu. Elemelelo ela gannimina yohudhera, yahigikavihera othoma obaddiziwa. Gibaddiziwe nganna yaka 14 nlabo na 8 a Agosto yaka ya 1969.

 Numariha ohudhera miyo obajha olaba ninga piyonero a mudhidhi wamutene, Nuuvira sumana vang’ono gilabaga ninga piyonero, miyo otamela murudda wahoweleya anamalaleya, oPiyelavesi, elabo yo Finlandiya.

Murudda yo Pielavesi, miyo omunona mwaadhaga oofuneya, Sirkka. Ethu egithukulele omudhivela oliye dhaali dhikalelo dhaye dhapama, mwaha oliye aali muhiyana owiyeviha, amanddile ni owithwelavo epaddi yomuzimuni. Teto kaafuna wooniwa ninga muthu athima ni oohagalala ni dhithu dhing’ono dhomwiilini. Iyo aabilene noofuna wawenjhedhedha mabasa ehu namparelihu Yehova, nahithabwile othuwathuwela wakela mutholo munikuruni mwa Yehova. Iyo nitelanne nlabo na 23 a Março yaka ya 1974. Numala otelana, ohiya odhowa wajhavo matelo ehu, iyo othoma odhowa murudda wo Karttula, wathabwa ohoweleya anamalaleya oOmwene.

Okuma mudhidhi ntelannihu, Yehova ahoniha wihina eere onisamalela epaddi yomwilini nahere niipweha Omwene waye mburo wobajha mwigumini mwehu. (Mat. 6:33) Motajhiha, omambelelowene mudhidhi nigaali oKarttula, iyo kananna karo, needdesa olenddo wehu ni jhinga. Mbwenye wafiya mudhidhi wooriidha murudda yole, winoodhala jelu. Vano wihina naande olaleya murudda munlubale wa mulogo yole, noohowela okanna karo, mbwenye kananna korowa wihina nigulena.

Mohujhehedha ddibilaga apogoya odha onaredhela, vano oliye onivaha karo yaye. Teto oliye ahimala walebiha madukumentu aatene a karo ele. Ethu nahowelihu werana yaali omugulelamo gazolina baahi. Vano nahikanna karo nahowelihu vanlubale.

Yehova ononiha wihina erege onisamalela ni ethu-sithu nahoweligihu. Ethu nahowelihu werana yaali baahi opweha Omwene wa Mulugu mburo wobajha mwigumini mwehu.

Nikursarigi eskola ya mapiyonero yaka ya 1978, ddibila Raimo Kuokkanen, a onikongomedha operenxeri petisawu ya Eskola ya Jileyadi, Vano iyo obajha ohudhera ewogelo ya Engeleji, wihina nirumedhiwe okursari Eskola ela. Mbwenye yaka ya 1980, nihinathi operenxeri petisawu ndha, iyo withaniwa wihina nalabege oBeteli yo Finlandiya. Mudhidhi yole aBetelita kayarumedhiwa operenxeri petisawu wihina yakursari Eskola ya Jileyadi. Mbwenye efunelo yehu yaali olaba mburo Yehova  afuniyewo, ohiya mburo nafunihu. Bumwahaya iyo orumedha odhowa oBeteli. Naarive dhigaali ndo, iyo odidelave ohudhera Engeleji, nubuwelaga akala nlabo nimodha nere withaneliwa okursari Eskola ya Jileyadi.

Nuuvira yaka vang’ono, Nikuru Nolamulela wenya wihina ni aBetelitaya podi okursari Eskola yo Jileyadi. Mohilegela iyo operenxeri petisawu wihina nikursari Eskola ela. Eyo kiyatapulela wi mabasa ooBeteli kiyanihagalasa, mbwenye efunelo yehu yaali okavihera mburo wathabwa ohoweleya anamalaleya, nahere nirumedhiwa. Vano iyo withaniwa wihina nikursari Eskola yo Jileyadi turma 79 mweri wa Setembro yaka ya 1985. Nuwindo iyo othomiwa wihina nakavihere oKolombiya.

Nuufiya elabo yoKolombiya, iyo othomiwa wihina nalabege oBeteli. Miyo gahilibihedha wihina gaalemelele mabasa oobeteli, mbwenye nuuvira yaka miyo oloba wihina githomeliwe mabasa mamodhaya. Ela yaali dila yobajha ni yogomihedha gerilimina ethu ninga yeela mwigumini mwaaga. Iyo othomiwa ninga amisiyonariyu luwani yoNeyiva, murudda woHuyila.

Miyo ginodhiveliwa wapara mabasa oolaleya. Ngali muddiye gilabaga ninga piyonero elabo yo Finlandiya, gabajha olaleya mambeseene ni gahogolowela vaade mahiyu. Vano miyo nutelana ni Sirkka, navireliwa nlabo nantero nlaleyaga. Nadhowaga olaleya murudda dholapela, iyo nagonesa mukaroni mwehu. Ni makalelo yaala, nopurelamo pama olenddo wehu ni nlabo noharela nowambela olaleya mambeseene.

Olaba ninga amisiyonariyu murudda dholapela ni vaade ohunikavihera ohogolowela okanna ohagalala nannihuna omambelelowene. Mulogo wehu wunnuwa vanlubale, teto iyo wonelamo wihina addibila oKolombiya yonidhivela, yotamalela ni yoniriha.

Luwani dhaali waddamela oNeyiva, kawaali muthu aali Namoona a Yehova. Miyo goofuna vanlubale olaleya murudda ndhe, mbwenye mwaha wa anyakoddo yakalesa murudda dhendhe, mburo ole waali wowopiha, thabwathabwa muthuya akala munyawedda. Bumwahaya miyo goolobelesa wa Yehova gimulobaga wihina muthu mmodha a murudda yole akale Namoona a Yehova. Gubuwelesa wi yere okala apama, ahere muthuya ahudhere ebaribari ni iyo oNeyiva nakalihuwo, teto amala obaddiziwa unnuwelevo epaddi yomuzimuni ni ahogolowele elabwaaye wihina alaleye. Miyo kaganonne wi Yehova anna wubuwela werana ethu yapama opitha ele gubuwelimi.

Nuuvira mwana mudhidhi miyo obajha omuhudhiha muzombwe dhaala ithaniwa Fernando González. Oliye akala o Aljesiraji, luwani modha wa ndhe wahaali Anamoona a Yehova. Fernando oweedda makilometuru 50 wihina alabe oNeyiva. Oliye owegeredha pama kadda ohudhera ni voharela obajha woona mutugumano. Okuma sumana ambeliye ohudhera, Fernando owahudhiha athu a luwani yaye dhithu ahudheriye mBibiliyani.

Nuuvira mweeri mitanu nammodha amuhudheraga Bibiliya, Fernando abaddiziwe mweri wa Janeiro yaka ya 1990 ninga Namoona a Yehova. Nuwindo oliye okala piyonero a mudhidhi wamutene. Vano woona wihina luwani yo Aljesiraji wahikala Namoona a Yehova, Addibila ooFiliyale wathomelawo apiyonero a vayeka. Vano mweri wa Fevereiro yaka ya 1992, witiwawo mulogo luwani yele.

 Mbwenye Fernando kaalaleya murudda waye baahi. Nuumala otela, oliye ni mwadhiye otamela luwani ya São Vicente del Caguán, luwani emodhaya wahaali Anamoona a Yehova. Nuufiya wewule aliwa yahikavihera wiita mulogo. Yaka ya 2002, Fernando othomiwa ninga nameeddela mulogo. Ofiyedha peeno oliye ni mwadhiye Olga enna wapara mabasa ala.

Yopadduwa ela ehigihudhiha wihina sathima galobelaga owoga ethuya ginalobimi, nafunaga wakwanihedha mutholo wehu. Yehova anowanda werana dhithu nahinandihu werana. Teto kanidduwale wi mabasa ala oohadda baaye, kahi ehu. — Mat. 9:38.

Yaka ya 1990 miyo othomiwa ninga nameeddela mulogo. Mburo woobajha nathomeliwihu yaali luwani yo Bogotaa. Eyo yahinithuwathuwiha, mwaha kanaalemenle okala luwani enlubale waali athu owinjhiva. Teto miyo ni mwadhaaga nili athu nahinna ohudhera wa vadhulu, bumwahaya kannone werana dhithu dhowinjhiva. Mbwenye iyo nihoona makalelo yolebela ya Filipensi 2:13 yakwanelaga mwigumini mwehu, yolebela ela enihina: ‘Mulugu anerana ndhe dhinamudhivela, oliye ohuvolowa mwigumini mweenyu ni ohuuvahani efunelo ni kopolo yowerana anafuniye.’

Nuuvira mudhidhi iyo othomeliwa sirkwitu emodha luwani yo Medellín. Athu a luwani yele yahithabwa olemela woona obure, teto newene kayapwatha. Motajhiha, nlabo dhaala geddihaga ohudhera wa Bibiliya, miyo obajha wiwa oode athu yobelanaga, miyo gaali neena wihina gikinanti vati, mbwenye namahudhera aaga odidela wileri ddima ele nuupwaseya ekalaga ninga kaavo ethu yapadduwa. Numala wileri ddima ele oliye oloba wihina akumele oode, ohunavire mudhidhi wowinjhiva oliye ohogolowa ni anaaye abiili ang’ono ni owoga ni miyo agaali oopwaseyene egi: “Ginaloba nikurumuwelo, mbwenye gaagele wathukula anaaga.”

Iyo nahifwanyiwa makathamiho mamodha oorusa. Nlabo dhaala nlaleyaga nyumba ni nyumba, mwadhaaga odha athamagaga vaalimi agurumelaga ni oovaga, oliye owoga wi mulobwana dhaala afuna amoobele, miyo oothuwathuwa vanlubale ni obajha woova. Mbwenye vasogolova iyo wonelamo wi mulobwana ole kaafuna omobela mwadhaaga, mbwenye afuna amoobele mulobwana dhaala avira ni aamwaddamenle mwadhaaga, Sirkka.

Makalelo addibila ale yaliwa ooliba murima wonivaha kopolo wihina nande ogonjhiha makathamiho ninga yala ni mamodha oothabwa orusa. Teto iyo wonelamo wihina akala Yehova anna wakavihera addibila ala, anere onikavihera nihiyoya. Ohiya eyo, iyo noohara dhoholela naakelihu ni anamaholela mulogo a murudda yole, nookala pasope wihina niibarele, teto nahihiya dhithu dhaatedhene mmadani mwa Yehova.

Ebaribari wihina dhithu dhimodha kadhaathabwile woopiha ninga nubuwelihu. Motajhiha, nlabo nimodha ngaali vaade va mwanamurala dhaala, yakala ninga gawiwa ahiyana abiili ekanganaga, miyo kagafuna wawoona athu ekanganaga, mbwenye mwanamurala ole ogiwaddihedha wihina nikumele ode wi noone ethu yapadduwa. Vano nuukumela ode, iyo wonelamo wihina kayaali athu yakangana, mbwenye dhaali balame biili dhinithaniwa Papagaio dhaatajhiha amwanddamani a murudda yole.

Yaka ya 1997, miyo othomiwa ninga namahudhiha a Escola de Treinamento Ministerial. b Miyo godhiveliwa vanlubale okursari dhiskola dhomuhudhera Bibiliya, mbwenye kaginubuwelege wi nlabo nimodha gere okanna oneti wokala namahudhiha.

Nuuvira mudhidhi miyo olaba ninga superintendente de distrito. Mabasa ala a superintendente de distrito nuuhiya okalawo, miyo wahogolowela mabasa aaga a nameeddela mulogo. Bumwahaya muwari mwa yaka dhokwaranya 30, miyo ginohagalala olaba ninga namahudhiha a eskola ndha ni nameeddela mulogo. Mwaha wa mutholo ndha, gihawaakela mareeliho owinjhiva. Mbwenye kahi wihina dhaatedhene dhogeddela pama, ginere owoga mwahaya.

Miyo gili muthu anna ekalelo yohikanna manyazo, gafunaga owoga ethu-sithu ginowoga gahubuwele dila biili. Teto siyeyo egikavihere wawanana makathamiho owinjhiva oorusa. Mbwenye malabo mamodha, goothabwiha dhithudha. Motajhiha, nlabo dhaala miyo wawaddela addibila wihina sathima woniha odhivela ni okala ookweya naaweddihaga athu amodha. Mbwenye mudhidhi givahaga yolaga ela, miyo gamwiinnya kagandile wooniha dhikalelo ndha. — Rom. 7:21-23.

Malabo mamodha ginokwerebeya mwaha wa dhoviriganiha dhaaga. (Rom. 7:24) Nlabo dhaala gahilobela wa Yehova giwogaga wihina yere okala yapama wahiya mabasa ale oomisiyonariyu ni gihogolowele oFinlandiya. Mbwenye emahiyu ya nlabo nenne, miyo odhowa omutugumanoni, dhithu giwalimi omutugumanoni, dhahigikavihera wonelamo wi ginohowela odidela wapara mabasa aaga oomisiyonariyu ni wilibihedha owanana dhoviriganiha dhaaga. Gubuwelaga nlobelo gerilimina ni makalelo Yehova aakunliye, ginotikina ofiyedha peeno. Ohiya eyo, ginomutamalela vanlubale Yehova mwaha ogivilelana dhoviriganiha dhaaga ni ogikavihera ogonjhiha dhokwerebehiya dhaaga.

Miyo ni mwaadhaga Sirkka, nnomutamalela vanlubale Yehova mwaha onivaha oneti yowapara mabasa a mudhidhi waamutene egumihu yaatene. Teto ginomutamalela vanlubale Yehova mwaha ogivaha muhiyana oororomeleya ni oodhivela muwari mwa yaka dhaatedhene ndha.

Ovaneneve ginere wakwaniha yaka 70, bumwahaya ginere wahiya mabasa ala ookala namahudhiha ni nameeddela mulogo. Mbwenye eyo kinagikwerebehiha. Mwaha waddi? Mwaha miyo ginorumedha wihina ethu yathima, fumulabela Yehova ni wiyeviha, teto omudhivela ni murima wamutene vamodha ni omutamalela. Siyeyo enamuthithimiha Mulugu ehu Yehova. (Miq. 6:8; Mar. 12:32-34) Mwaha neegi nimuthithimihe Yehova kannahowela okanna mutholo wathima.

Gasugwaga mundduli ni guubuwela mutholo dhaatedhene gannimina, miyo gihinona wi kagakenle mutholo ndha mwaha okala athima wapitha amodhaya obe mwaha gihinona werana dhithu athu amodha yahinandiwa. Naari kahi yeyo! Yehova agivanhe mutholo ndha mwaha wa opama waye wohinifwanelela. Teto Oliye ohenya wi gikalena mutholo ndha naarive ngana dhookwerebehiha dhaaga. Miyo gihinona pamadhene wihina dhaatedhene gandilimi werana di Yehova agikavihenre. Bumwahaya ngawogaga wi dhokwerebehiya dhaaga dhinomuthithimiha Mulugu. — 2 Kor. 12:9.