1. Parayizu oomuzimuni ddi, ki nithome wera ddi?

 PEENO velaboni yavati ohukalawo parayizu muli athu enerena dhithu dhapama. Mparayizuni muna muhukalamo matxikwi ni matxikwi aathu enajhavo murenddele weebaribari, teto athu enafwanyeya mparayizuni muna ehithoma ohukumamo. Ohiya eyo, aliwa enofuna wihina athu owinjhiva evolowe mparayizuni muna. Parayizu baani nnamuwogihu vala? Parayizu oomuzimuni! a

2. Ddiniyani enanitikiniha wodhela parayizu ola oomuzimuni?

² Sotikiniha vanlubale onona wi Yehova ohumwegeredha parayizu oomuzimuni enakalamo adhaari aye ni murenddele vamodha ni wiwanana, naarive nikalaga mwilaboni muna yabure ni yowopiha enathongiwa ni Saddana ni muhili odhivela. (1 Juwa. 5:19; Ovuhu. 12:12) Mulugu ehu oodhivela anowoona dhithu dhabure dhinapadduwa mwilaboni muna, mbwenye oliye anonibarela wihina nidhowegeve nimulabelaga nuuhagalala. Bibiliya anomuliganiha parayizu oomuzimuni ninga ‘nikungu nothawelawo’ ni ‘mundda onaheliwa manjhe pamadhene.’ (Isa. 4:6; 58:11) Mwaha oreelihiwa ni Yehova, athu enakala mparayizuni oomuzimuni enohagalala ni eli oobareleyene. — Isa. 54:14; 2 Tim. 3:1.

3. Madhu a Izayiya aalebiliye va Isaías kapitulu 65, yakwanenle vobajhavene yaka baani?

³ Yehova ahinvethela namavuhulela Izayiya wihina alebe wodhela makalelo yakale egumi ya athu yaakalege mparayizuni oomuzimuni. Iyo podi wafwanya madhu ala Izayiya aalebeliye va kapitulu 65, madhu ala a Izayiya yakwanenle vobajhavene yaka ya 537 M.W.O. Mudhidhi yole, majudewu yaali muudharini oBabiloniya, yahoboliwa wihina ehogolowele elabo yewa. Yehova ahireeliha nlogo naye ni ahakavihera ovenyihedha luwani yoJeruzale  vamodha ni tempulu, waali mburo womwebedhamo Yehova. — Isa. 51:11; Zac. 8:3.

4. Wakwanela wanabili ya yovuhulela ya Izayiya obanjhe yaka baani, ki ni makalelo baani?

⁴ Wakwanela wanabili wa yovuhulela ya Izayiya, obanjhe yaka ya 1919 M.W. adhaari a Yehova a malabo yala nuwoboliwa mBabiloniya Munlubale. Ni makalelo yala parayizu oomuzimuni obajha omwadheya elabo yatene yavati. Anamalaleya oOmwene ooviheya, obajha wiita mulogo dhowinjhiva ni obajha wooniha dhikalelo dheekiristawu. Athu yaali abure ni oowali vano ‘yahiwara emuthu exa, epaddusiwe ni efunelo ya Mulugu.’ (Efe. 4:24) Ebaribari wihina mareeliho owinjhiva Izayiya awogiliye enaakwanele pamadhene osogolo mwilaboni exa. Mbwenye naarive dhigaali ndo, peeno nihambela wajhavo mareeliho ala. Vano kabeni noone makalelo parayizu ola oomuzimuni ananipathiye ni mwahaya bwaddi kannahowela okumamo mparayizuni muna.

MAREELIHO ENAWAKELA ALE ENAFWANYEYA MPARAYIZU OOMUZIMUNI

5. Mowiwana ni yovuhulela enafwanyeya va Isaías 65:13, mareeliho baani nnawakelihu mwaha okala mparayizuni oomuzimuni?

⁵ Yoojha yomuzimuni yapama. Yovuhulela ya Izayiya enowoga wodhela makalelo yakale egumi ya athu enafwanyeya mparayizuni oomuzimuni, ni makalelo yakale egumi ya athu ehili mparayizuni oomuzimuni. (Omwileri Isaías 65:13.) Yehova anowavaha dhoojha dhowinjhiva dhomuzimuni adhaari aye. Motajhiha, Yehova anonivaha muzimu waye wotxena, madhu aye ali Bibiliya, malivuru vamodha ni vidiyu wihina nandege ‘ojha, . . . ong’wa, . . . [ni] ohagalala.’ (Omuliganihe ni Ovuhulela 22:17.) Mbwenye athu yahili mparayizuni oomuzimuni ‘enokwa dala. . . , enokwa nthona. . . , [ni] enokanna manyazo.’ Ni madhu mamodha aliwa kinna wandana ni Mulugu. — Amós 8:11.

6. Yolebela ya Joel 2:21-24 enaliganiha yoojha yomuzimuni ninddi?

⁶ Va yovuhulela yaye namavuhulela Joweli ahiwoga wodhela dhoojha dhathabwesa ojhiwa mudhidhi yole, ninga tirigu, vinyu ni makura wihina oonihe wi Yehova anonivaha dhaatedhene nnahowelihu wi nikanne nroromelo nooliba ni anonivaha dhoholela dhinakumela mBibiliyani. (Joel 2:21-24) Yehova anonivaha dhoojha ndha dhomuzimuni wodhela Bibiliya, malivuru enakumihiwa nnikuru nehu, sayiti yehu, mutugumano, musonkano wa nlabo nimodha vamodha ni musonkano wa malabo mararu. Iyo podi wijhiha epaddi yomuzimuni malabo aatene, mwaha wa yeyo epaddi yehu yomuzimuni enakala yolibene.

7. Mowiwanana ni Isaías 65:14 ethu baani enanthukulela ‘othaba mmurimani mwehu?’

⁷ Ohagalala ni othaba. Nlogo na Yehova ‘nnothaba mmurimani mwewa’ mwaha aliwa enomutamalela vanlubale Yehova. (Omwileri Isaías 65:14.) Ebaribari enafwanyeya mBibiliyani ni ejhehedhelo yolibiha ninnihuna wodhela osogolo mwaha wa mukutho wa Yesu Kiristu, dhinonithukulela ‘othaba mmurimani mwehu mwaha wohagalala.’ Owoga ni addibilihu wodhela dhithu ndha, winonivaha ohagalala webaribari! — Sal. 34:8; 133:1-3.

8. Dhikalelo baani biili dhathima enna ale eli mparayizuni oomuzimuni?

⁸ Odhivela ni wiwanana enna adhaari a Yehova, dhithu dhinoniha wihina aliwa eli mparayizuni oomuzimuni. ‘Wiwanana’ wula ninnihuna winonikavihera wubuwelela makalelo enakale egumi mwilaboni exa, mwaha wi mwilaboni exa adhaari a Yehova enere okanna odhivela mmodha ni mukwaye ni wiwanana winlubale opitha peeno. (Kol. 3:14) Murogola dhaala ohuwoga ethu ooniliye nuwanona Anamoona a Yehova, oliye anowoga egi: “Miyo kaginoonege odhivela webaribari egumi yaaga yatene, newene vemudhini vaaga. Dila yobajha goonilimi odhivela webaribari yaali nuwanona Anamoona a  Yehova.” Muthu di muthu anafuna okanna ohagalala webaribari anohowela okala mparayizuni ehu oomuzimuni. Naarive athu a mwilaboni yubuwelaga dhithu dhohiyanahiyana wodhela adhaari a Yehova, aliwa ehikanna ekalelo yapama vamentoni va Yehova ni vamentoni va aatene yaale enamwebedha Yehova. — Isa. 65:15.

9. Mowiwanana ni Isaías 65:16, 17 ddiniyani enaapadduwe ni makathamiho aatene enanifwanya peeno?

⁹ Opwaseya ni ohithuwathuwa. Yolebela ya Isaías 65:14 enihina ale ehinafuna ovolowa mparayizuni oomuzimuni ‘enowooba kutho mwaha osegedheya weewa.’ Mbwenye ki owoga wodhela goyi ni makathamiho aatene enaafwanya adhaari a Mulugu? Osogolo goyi yaatene ela, ‘eneere odduwaliwa ni eneere okala wolapela ni mento [a Mulugu].’ (Omwileri Isaías 65:16, 17.) Yehova anere wamariha makathamiho aatene enanifwanya, teto nnere oddiwala dhithu dhaatedhene dhabure dhinipadduwenle.

10. Mwahaya bwaddi ogoona wi oneti winlubale okala epaddi ya nikuru na Yehova? (Osugwe fotu.)

¹⁰ Peeno naarive nihinathi ovolowa mwilaboni exa, nnowanda waddiwala makathamiho enanifwanya mwilaboni muna yabure, ni kannathabwa othuwathuwa nakala mmutugumanoni. Iyo nnokavihera wihina opwaaseya ninnihuna mparayizuni ehu oomuzimuni odhowegeve wodhela woniha dhikalelo dhinakosa epaddi ya yowima ya muzimu wotxena, ninga: Odhivela, ohagalala, murenddele, opama, ni opwaaseya. (Gal. 5:22, 23) Oneti winlubale okala epaddi ya nikuru na Yehova! Athu yaale enaadidele okala mparayizuni oomuzimuni, enere woona wakwanela wa mpaganyo dhaatedhene dha Mulugu dhowavaha ‘elabo yodhulu ni elabo yavati exa.’

11. Mowiwanana ni Isaías 65:18, 19, onakala aavi mwaha onona wi Yehova ohumwegeredha parayizu oomuzimuni?

¹¹ Otamalela ni ohagalala. Izayiya ahidhowave awogaga wodhela dhithu dhinanthukulela okala ‘ohagalala ni othaba’ mparayizuni oomuzimuni. Parayizu ola oomuzimuni di Yehova amwegeredhile. (Omwileri Isaías 65:18, 19.) Bumwahaya nnowonelamo mwahaya bwaddi Yehova aganiruma wihina naakavihere athu okumamo mugereja dhowoota, dhihinahudhiha ebaribari wodhela Mulugu ni nakavihere aliwa ovolowa mparayizuni oomuzimuni! Nnohagalala vanlubale mwaha wa mareeliho nnawakelihu mwaha okala mwiibaribarini, teto eyo enonthukulela owawaddela athu amodha dhithu nnahudherihu. — Jer. 31:12.

12. Onakala aavi wilerigi yovuhulela enafwanyeya va Isaías 65:20-24, ki mwahaya bwaddi?

¹² Mwaha okala mparayizuni oomuzimuni iyo nnotamalela ni nnohagalala mwaha wa ejhehedhelo yosogolo ninnihuna. Kubuwela vang’ono dhithu nnafunihu woona ni werana mwilaboni exa! Bibiliya anopaganya egi: ‘Kawindha  wikala mwaana anakalewo malabo vang’ono, newene mwanakalaba ahinajhevo malabo aye.’ Iyo ‘nnerege omaga nyumba dhehu wi nikalegemo [ni] nnerege odhalela mvidera dhewu wi nijhege dhowimmadha.’ ‘Kannaparege mabasa ebewene’ mwaha wihina nnere ‘oreelihiwa ni Yehova.’ Teto, Yehova anopaganya onivaha egumi yapama, enakale yohagalasa ni yobareleya. ‘Ehinambele withana,’ Yehova anere onona ethu kadda muthu anahoweliye ni anere ‘wakwaneliha efunelo ya dhithu dhaatedhene dhinakalamo.’ — Isa. 65:20-24; Sal. 145:16.

13. Yolebela ya Isaías 65:25 enawoga ni makalelo baani wodhela masadduwo enawerana athu yahudhera ebaribari?

¹³ Murenddele ni obareleya. Nnikavihero na muzimu wotxena wa Yehova, athu owinjhiva yaali oowali, owoopiha ni ohiroromeleya, ehawerana masadduwo ootikiniha mwigumini mwewa. (Omwileri Isaías 65:25.) Mwaha wilibihedha wewa, aliwa ehanda ohiya emuthu yewa ya kale. (Rom. 12:2; Efe. 4:22-24) Ebaribari wihina mwaha ohilogomana, nnoviriganiha malabo mamodha. Mbwenye Yehova anna wawiwananiha ‘athu aatene’ enamudhivela ni enadhivelana mmodha ni mukwaye. Yokumelelavoya, sowihina nnokanna murenddele ni wiwanana. (Titu 2:11) Murenddele ni wiwanana ninnihuna, matikiniho enadhela wa Yehova baahi!

14. Yopadduwa ya ddibila dhaala enooniha aavi wi madhu enafwanyeya va Isaías 65:25 beebaribari?

¹⁴ Enowandeya muthu osaddula emuthu yaye? Kasugwa yopadduwa ya muzombwe dhaala aavolowile dila dhowinjhivadhene mukambura aganna yaka 20 baahi, teto aali oowali ni anna egumi yonyakavala. Oliye afugeliwesa mukambura mwaha wiiya karo, osakasa nyumba dhannya ni dhithu dhimodha dhowopiha eeriyena. Teto oliye oodhiveliwa owaniha mudhidhi waatene. Mbwenye nuubajha ohudhera ebaribari ya mBibiliyani ni woona mutugumano dha Anamoona a Yehova, oliye ahikanna ebaribari wi ohunfwanya parayizu oomuzimuni ni wonelamo wi egumi ehikanna osogolo. Numala obaddiziwa, oliye oopendda dila dhowinjhivadhene makalelo yolebela ya Isaías 65:25 yiwananiwa pamadhene ni egumaye. Oliye ahihiya okala muthu oowali ni owopiha ninga poddogoma, vano okala muthu oopwaseya ninga mwana nimbila.

15. Mwahaya bwaddi nnofuna wakavihera athu owinjhiva wihina ekale vamodha ni iyo mparayizuni oomuzimuni, ki nnande aavi werana eyo?

¹⁵ Isaías 65:13 anabajha ni madhu ala: ‘Namathonga Munddimuwa, Nabwiya Yehova awogile egihina.’ Teto versu 25 anakuthula ni madhu ala: ‘Onawoga di Yehova.’ Teto iyo nihinona wi mpaganyo dhaatedhene dha Yehova dhinowakwanela. (Isa. 55:10, 11) Peeno parayizu oomuzimuni ohukalawo ninga Yehova aapaganyiliye. Yehova ohutugumana emudhi yowiwanana ehinaligana nnikuru nimodha velaboni yavati. Mwaha okala epaddi ya emudhi ela yowiwanana, nihikanna murenddele ni obareleya. (Sal. 72:7) Bumwahaya nnofuna wakavihera athu owinjhiva wihina ekale ni iyo mu emudhi ela yowiwanana, yapele elabo yaatene yavati. Iyo podi wakavihera athu owinjhiva wodhela walaleya wihina ekale anamahara a Yesu. — Mat. 28:19, 20.

NNANDE AAVI WAKAVIHERA ATHU AMODHA OVOLOWA MPARAYIZUNI OOMUZIMUNI?

16. Ddiniyani nnahowelihu werana wihina naakavihere athu amodha okanna efunelo yovolowa mparayizuni oomuzimuni?

¹⁶ Iyo aatene podi werana ethu yathima wihina nakavihere athu amodha okanna efunelo yovolowa mparayizuni oomuzimuni. Iyo podi werana eyo wodhela omutajhiha Yehova, mwaha wi Oliye kanamuwaddihedha muthu ovolowa mparayizuni oomuzimuni. Ohiya eyo, Oliye “anowawithana” athu nuudhivela wihina ekale epaddi ya nikuru naye. (Juwa. 6:44; Jer. 31:3) Bumwahaya muthu ahudhera dhikalelo  dha Yehova vamodha ni emuthu yaye, anofuna wandana nuliye. Mbwenye ni makalelo baani dhikalelo dhehu dhapama ni mweddelo wehu wapama, winaathukuleliwa athu owinjhiva okanna efunelo yovolowa mparayizuni oomuzimuni?

17. Nnande aavi wakavihera athu amodha okanna efunelo yovolowa mparayizuni oomuzimuni?

¹⁷ Makalelo apama owakavihera athu owinjhiva ovolowa mparayizuni oomuzimuni fuudhela waweddiha addibilihu nuupama vamodha nuudhivela. Iyo nnafuna wihina muthu adha woona mutugumano dhehu dila yobajha, akale ninga ale yadhowile woona mutugumano dila yobajha mulogo wo Korintu, aliwa kiyanganyedha wihina ehifwanya ebaribari ofiyedha owoga: ‘Mwebaribarene Mulugu ali vaari veenyu.’ (1 Kor. 14:24, 25; Zac. 8:23) Wihina eyo epadduwe, nnohowela odhowagave niharaga yolaga enawoga yegi: ‘Mukalena murenddele mmodha ni mukwe.’ — 1 Tes. 5:13.

18. Ddiniyani enaathukulele athu amodha ofunaga ovolowa mparayizuni oomuzimuni?

¹⁸ Malabo aamateene, nnohowela wilibihedha wawoonaga addibila ni arogola, ndala ninga Yehova anawoniye. Iyo podi omutajhiha Yehova wodhela opwasedha osugwa dhikalelo dhapama dha addibilihu ohiya dhoviriganiha dhewa, mwaha wihina mohilegela dhoviriganiha enna addibilihu kadhinakalewo. Nakanna muladdu ni addibila nnohowela otxokotxela muladduya mowaguva nuudhivela, teto neddihanege ‘nuupama mmodha nimukwaye, nuupwaseya, nlevelelanaga ni murima waatene.’ (Efe. 4:32) Neddihanaga nuudhivela, athu amodha enere okanna efunelo yovolowa mparayizuni oomuzimuni, mwaha wihina naaliwa enofuna weddihiwa ni makalelo yala. b

 KUKUMEMO MPARAYIZUNI OOMUZIMUNI

19. (a) Mowiwanana ni kwaduru “ Aliwa yahikumamo, mbwenye ehihogolowelamo,” ddiniyani amodha ewogiliwa nuuhogolowela mparayizuni oomuzimuni? (b) Ddiniyani kadda muthu wa iyo anahoweliye othoma werana? (Osugwe fotu.)

¹⁹ Iyo nnotamalela vanlubale mwaha okala mparayizuni oomuzimuni! Malabo yala nnakalihu, parayizu ola ohuthabwa owomela opitha kale, teto ehivolowamo athu owinjhiva mparayizuni muna oomuzimuni. Iyo nnerege omutamalela Yehova ni mukalakala, mwaha omwegeredha parayizu ola oomuzimuni wihina nikalegemo. Akala muthu di muthu anofuna okala oohagalala, oopwaseya ni oobareleyene, anohowela ovolowa mparayizuni muna oomuzimuni ni othoma ohukumamo! Mbwenye nnohowela okala pasope mwaha wi Saddana anowerana dhaatedhene anandiye wihina anilekethe ni anikumihemo mparayizuni muna. (1 Ped. 5:8; Ovuhu. 12:9) Bumwahaya kanenye Saddana onleketha ni onikumihamo mparayizuni oomuzimuni. Kabeni aatene nilibihedhe wihina parayizu ola oomuzimuni akalegeve mburo wowomela, woweela ni wa murenddele.