1. Ddiniyani Yehova anajhehiye wihina nerena?

 MUDHIDHI onathabwa wahagalasa anamatelana, bu mudhidhi enambaliwa mwaana. Naarive ababi emudhivelaga mwaniwa ali nnyenya, aliwa enofuna wi mwaniwaya unnuwege. Mwebaribarene aliwa yere othuwathuwa vanlubale ahere mwaniwaya ahunnuwaga. Ni makalelo mamodhave, Yehova anohagalala neragana thalo dhobajha wi nunnuwelevo epaddi yomuzimuni, mbwenye oliye kanafuna wihina nidhowegeve nikalaga ninga ahima epaddi yomuzimuni. (1 Kor. 3:1) Ohiya, eyo oliye ananiloba wihina nikale ‘ninga apogo.’ — 1 Kor. 14:20.

2. Makoho baani nnafunihu wawakula muwari mwa ohudhera wula?

² Okala mukiristawu owithwelavo epaddi yomuzimuni enatapulela ddi? Ddiniyani nnahowelihu werana wihina nikale makiristawu owithwelavo epaddi yomuzimuni? Yoojha yomuzimuni enanikavihera aavi wunnuwelavo epaddi yomuzimuni? Mwahaya bwaddi nnohowela ohithabwaga wiroromela? Ohudhera wula nnere woona dhowakula dha makoho ala.

OKALA MUKIRISTAWU OWITHWELAVO EPADDI YOMUZIMUNI ENATAPULELA DDI?

3. Okala mukiristawu owithwelavo epaddi yomuzimuni enatapulela ddi?

³ Mbibiliyani, madhu owi “apogo” podi otapulela “owithwa,” “oologomana,” ni “owakwanela.” a (1 Kor. 2:6, nota.) Ndala ninga mwaana anunnuwiye ofiyedha okala pogo, nihiyoya nnohowela odhowagave nunnuwelagavo epaddi yomuzimuni. Ni makalelo yala, nnere wanda okala athu owithwelavo epaddi yomuzimuni. Naarive nigaali makiristawu owithwelavo, nnohowela odhowagave nunnuwelagavo. (1 Tim. 4:15) Aatene iyo naarive nigaali azombwe, podi okala makiristawu  owithwelavo epaddi yomuzimuni. Ki ddiniyani enoniha wihina mukiristawu ohithwelavo epaddi yomuzimuni?

4. Mukiristawu owithwelavo epaddi yomuzimuni anakala aavi?

⁴ Mukiristawu owithwelavo epaddi yomuzimuni, duule anerana dhithu dhaatedhene Yehova analobiye, ahisakulaga dhithu baani anafuniye wiwelela. Ebaribari wi mwaha okala muthu ohilogomana, oliye anerege oviriganiha malabo mamodha. Mbwenye naarive dhigaali ndo, oliye anowoniha wihina anowerana efunelo ya Yehova wodhela makalelo aye owubuwela ni owerana dhithudha kadda labo. Ohiya eyo oliye anowara emuthu exa ni anowilibihera wubuwelaga ninga Yehova. (Efe. 4:22-24) Oliye ohumala oxagiha mubuwelo waye mowiwanana ni malamulo ni malagano a Yehova wihina andege werana dhothoma dhapama, bumwahaya oliye kanahowela lista nnawoga dhithu dhaatedhene oliye anahoweliye werana obe oherana. Teto oliye erana yothoma, anowilibihedha vanlubale wihina aakwanihedhe ele athomiliye. — 1 Kor. 9:26, 27.

5. Dhithu baani dhaampadduwele mukiristawu ohithwelavo epaddi yomuzimuni? (Efeziyu 4:14, 15)

⁵ Mbwenye mukiristawu oohithwelavo epaddi yomuzimuni podi olekethiwa bure-bure ni ‘oxaga wa athu’ vamodha ni ‘enonelo yowoota.’ Ohiya eyo, anorumedha muselu dhowoota dhinavuwihiwa munotisiyani vamodha ni muselu enavuwiha mapostata. b (Omwileri Efeziyu 4:14, 15.) Teto oliye anowakalela ajhe athu amodha, doorabwe, kanarusa otakaleliwa, ohiya eyo afwanyiwa yoweha kanarusa omotha. — 1 Kor. 3:3.

6. Wunnuwelavo epaddi yomuzimuni podi oladdanihiwa ni ddi? (Osugwe fotu.)

⁶ Ninga esorihiwe mundduli, Bibiliya analiganiha wunnuwelavo epaddi yomuzimuni ni wunnuwa wa muthu. Dhihikalawo dhithu dhowinjhiva mwaana ahinonniye, bumwahaya oliye anohowela obareliwa ni osamaleliwa ni muthu ali pogo. Motajhiha, mayi podi omuloba mwanaye mung’ono wihina amuhiddele nlada yafunaga omulupa rampa, vano mudhidhi mwaana ole unnuwaga mayi ole podi omweenya mwanaye omulupa rampa yeka, mbwenye oliye anere omubusedha mwanaye wihina anaadduwale osugwa mmambalo ahinathi omulupa rampa. Vano mwaanaya akala pogo, anerege wanda omulupa rampa yeka nuubareleya ahihowelaga wubusedhiwa ethu-sithu. Ndala ninga ahima ang’ono enahoweliwa nikavihero na apogo wihina ekale oobareleya, makiristawu oohithwelavo epaddi yomuzimuni enohowela  nikavihero na makiristawu owithwelavo wihina yande orabela dhithu dhaathukulele werana yothega ni wanda werana dhothoma dhapama. Mbwenye makiristawu owithwelavo epaddi yomuzimuni yaafunaga werana yothoma, enoliganiha yothoma yewa akala enowiwanana ni malagano a mBibiliyani wihina ekanne moonelo mmodhave wa Yehova wodhela museluya. Vano vasogolova enowerana dhithudha mowiwanana ni malagano a mBibiliyani.

7. Mukiristawu owithwelavo epaddi yomuzimuni, podi ohowela nikavihero na athu amodha?

⁷ Eyo enatapulela wi mukiristawu owithwelavo epaddi yomuzimuni kanahowela nikavihero naathu amodha? Naari! Ni makiristawuya owithwelavo epaddi yomuzimuni malabo mamodha enoloba nikavihero. Mbwenye mukiristawu oohithwelavo epaddi yomuzimuni enajheha wihina athu amodha emuthomelege ethu anahoweliye werana. Mbwenye mukiristawu owithwelavo epaddi yomuzimu aloba nikavihero na makiristawu mamodha enna thotho, oliye kanajheha wi athu amodha emuthomele ethu anafuniye werana, mwaha oliye ohunona wi Yehova anajheha wi kadda muthu ‘athukule mutholo waye.’ — Gal. 6:5.

8. Nerege makiristawu aatene owithwelavo epaddi yomuzimuni booligana?

⁸ Ndala ninga athu eli apogo enahiyaniwa wodhela makalelo oli mwiili wewa, makiristawu owithwelavo epaddi yomuzimuni ehikanna dhikalelo dhohiyana. Motajhiha, amodha bathotho, amodha ooliba murima, amodha oovaha ni amodha banthebwa. Ohiya eyo, makiristawu abiili owithwelavo epaddi yomuzimuni podi werana dhothoma dhohiyana, mbwenye dhiniwanana ni Bibiliya, naarive museluya ogaali mmodhave. Eyo enopadduwa malabo owinjhiva akala museluya onavolowelavo ohara mubuwelo wehu oxagihiwe ni Bibiliya. Mwaha wonelamo wi kadda mukiristawu ohukanna ofuru wosakula ele anafuniye, makiristawu owithwelavo epaddi yomuzimuni enorabela watoriha amodha. Ohiya eyo, aliwa enowilibihera okala owiwanana. — Rom. 14:10; 1 Kor. 1:10.

DDINIYANI NNAHOWELIHU WERANA WIHINA NIKALE MAKIRISTAWU OWITHWELAVO EPADDI YOMUZIMUNI?

9. Wunuwelavo epaddi yomuzimuni enereya yekiwa? Owogemo.

⁹ Mudhidhi waviraga mwaana anuwunnuwa ofiyedha okala pogo, mbwenye kavo anunnuwelavo epaddi yomuzimuni, mwaha okala mwibaribarini mudhidhi wowinjhiva, enohowela wilibihedhaga. Motajhiha, addibila ni arogola oKorintiyu yahirumedha muthenga dhapama, yahibaddiziwa ni yahakela muzimu wotxena, teto yahihudhihiwa vanlubale ni murumiwi Pawulo. (Dho. 18:8-11) Mbwenye nuuvira mudhidhi wowinjhiva egamanle obaddiziwa, owinjhiva wa aliwa yaali yahinathi withwelavo epaddi yomuzimuni. (1 Kor. 3:2) Ethu baani nnahowelihu werana wihina nahithabwe olegela wunnuwelavo epaddi yomuzimuni?

10. Ddiniyani nnahowelihu werana wihina nikale makiristawu owithwelavo epaddi yomuzimuni? (Judasi 20)

¹⁰ Enere orusa okala mukiristawu owithwelavo epaddi yomuzimuni, nahikanna efunelo yowithwelavo epaddi yomuzimuni. Ale ‘yahinna enonelo,’ ni yahinafuna wunnuwelavo, kinadha yanda withwelavo epaddi yomuzimuni. (Pro. 1:22) Iyo kannafuna okala ninga ale eli apogo, mbwenye enaahowela makolo ewa wathomela dhithu dhaatedhene enafuniwa werana. Ohiya eyo, iyo nihikanna mutholo wowunnuwelavo epaddi yomuzimuni ni olibiha wandana wehu ni Yehova. (Omwileri Judasi 20.) Akala we onna wilibihedha wihina okale mukiristawu owithwelavo, olobele wa Yehova wihina Oliye uvahe ‘efunelo ni kopolo yowerana anafuniye.’ — Fil. 2:13.

11. Dhithu baani Yehova analabihedhiye wihina anikavihere withwelavo epaddi yomuzimuni? (Efeziyu 4:11-13)

¹¹ Yehova kanajheha wihina nithwelevo epaddi yomuzimuni nihikaviheriwe nuliye. Addibila enalaba ninga anamakukula ni anamahudhiha mmulogoni, enoxagihiwa wihina emukavihere kadda ddibila withwelavo epaddi yomuzimuni, ‘wihina efwanye ekalelo yowakwanela ya Kiristu.’ (Omwileri Efeziyu 4:11-13.) Ohiya eyo, Yehova podi olabihedha muzimu waye wotxena wihina anikavihere  okanna ‘mubuwelo wa Kiristu.’ (1 Kor. 2:14-16) Teto Yehova ohunivaha malivuru mannayi a Evanjelyu enoniha makalelo ubuwela Yesu, aawogiye ni eriyena dhithudha mudhidhi agaali mwilaboni yavati aaparaga mabasa aye oolaleya. Natajhiha makalelo Yesu awogiye ni eriyena dhithudha, podi onikavihera okala makiristawu owithwelavo epaddi yomuzimuni.

YOOJHA YOMUZIMUNI ENONIKAVIHERA WUNNUWELAVO EPADDI YOMUZIMUNI

12. ‘Dhohudhiha dhookweya wodhela kiristu’ ddiniyani?

¹² Wihina nikale makiristawu owithwelavo epaddi yomuzimuni, kanihudherege baahi ‘dhohudhiha dhokweya wodhela Kiristu,’ obe nere, dhithu dhobajha nihudherihu wodhela Yesu, ohiya eyo nnohowela ohudhera ebaribari yoviteya enafwanyeya mBibiliyani. Motajhiha, dhithu dhobajha ni dhokweya nihudherihu wodhela Yesu sindha: othwaruwa, nroromelo, obaddiziwa ni ovenyihiwa wanookwa. (Ebe. 6:1, 2) Ndha dhohudhiha dhokweya makiristawu aatene enahoweliwa onona ni orumedha. Bumwahaya murumiwi Peduru adhe awogege wodhela dhohudhiha ndha mudhidhi alaleyaga muthithi waathu nlabo na Pentekoste. (Dho. 2:32-35, 38) Wihina nikale anamahara a Yesu, nnohowela orumedha dhohudhiha ndha. Motajhiha, murumiwi Pawulo ohoniha pamadhene wihina egi muthu akale namahara a Yesu ohowela orumedha muselu wovenyihiwa wanookwa. (1 Kor. 15:12-14) Mbwenye negi nikale makiristawu owithwelavo epaddi yomuzimuni nnohowela odhowagave nihudheraga dhithu dhimodha wodhela Yesu.

13. Ddiniyani nnahowelihu werana wihina nande opurelamo pamadhene yoojha yomuzimuni ninga anawogela Eberewu 5:14? (Osugwe fotu.)

¹³ Moohiyana ni dhohudhiha dhokweya, yoojha yovaadda kinavolowelavo baahi malamulo a Yehova, mbwenye enovolowelavo malagano enanikavihera wonelamo makalelo Yehova anubuweliye. Wihina nande opurelamo pamadhene yoojha yomuzimuni, nnohowela ohudhera, opendda ni oparihedha mabasa dhithu nnahudherihu mBibiliyani. Neragana dhithu ndha, nnohudhera werana dhothoma dhinamuhagalasa Yehova. c — Omwileri Eberewu 5:14.

14. Murumiwi Pawulo aakavihenre aavi makiristawu ooKorintiyu wunnuwelavo epaddi yomuzimuni?

¹⁴ Makiristawu ohithwelavo epaddi yomuzimuni, malabo mamodha enowarusa wubuwela mowiwanana ni malagano a mBibiliyani ni waaparihedha mabasa yafunaga werana yothoma.  Amodha enubuwela wihina mwaha ohikalawo nlamulo mBibiliyani nnawoga wodhela museluya, aliwa podi werana ethu-sithu enafuniwa. Teto amodha, enowapandda malamulo yahinahoweleya. Motajhiha, enakala ninga makiristawu ooKorintiyu, yahiloba wihina murumiwi Pawulo apandde nlamulo wodhela oojha dhoojha dhaakutheliwe dhikwamuthu. Mbwenye ohiya wawaddela ethu aliwa yahoweliwa werana, murumiwi Pawulo wawaddela muselu onavolowelavo olabihedha mubuwelo wehu ni wawonelihamo wihina kadda muthu ohukanna ‘ofuru wosakula.’ Murumiwi Pawulo opendda ni addibila ooKorintiyu aalabihedhaga malagano a mBibiliyani. Ndo, kadda muthu eere werana yothoma mowiwanana ni mubuwelo waye wapama ahakwakwathuse athu amodha. (1 Kor. 8:4, 7-9) Mwaha wavaha yolaga ela, murumiwi Pawulo anna waakavihera makiristawu ooKorintiyu wunnuwelavo epaddi yomuzimuni. Mwaha werana eyo, aliwa yere wanda olabihedha mubuwelo wewa, ohiya ojhehaga wihina muthu awaddele ethu yowerana obe wasayela malamulo yahiliwo.

15. Murumiwi Pawulo aakavihenre aavi makiristawu yaali mEberewu withwelavo epaddi yomuzimuni?

¹⁵ Nnohudhera ethu emodha yathima ni ele murumiwi Pawulo aalebenliye makiristawu yaali mEberewu. Amodha wa aliwa yaali yahinathi withwelavo epaddi yomuzimuni ‘yahihogolowela dhithu dhinakala ninga mukaka ni yahihiya dhithu dhinavaha enonelo.’ (Ebe. 5:12). Aliwa kiyahudhera ni kiyarumedha dhithu dhixa Yehova aahudhihiye. (Pro. 4:18) Motajhiha, Yesu nuvelela egumi yaye ninga mukutho Nlamulo na Moyizeji kananna mabasa. Mbwenye makiristawu amodha yaali majudewu yahididela ohara Nlamulo na Moyizeji naarive dhigavinre yaka 30 Yesu agavelenle egumi yaye ninga mukutho. (Rom. 10:4; Titu 1:10) Mwebaribarene yaka ndhe 30 waali mudhidhi wowinjhiva wihina makiristawu ale yaali majudewu yonelemo wihina kiyahoweleya ohara Nlamulo na Moyizeji! Muthu di muthu iileri karta nna murumiwi Pawulo aalebenliye mEbereu, ere wonelamo wihina dhithu dhalebiwe mukartani mune yaali yoojha yovaadda obe yomuzimuni. Karta nna, nahakavihera mEberewu wonelamo makalelo maxa oomwebedha Yehova, yaali apama vanlubale ni yahavaha oliba murima wihina edhowegeve elaleyaga, naarive eharahariwaga ni majudewu. — Ebe. 10:19-23.

KUTHABWEGE WIROROMELA

16. Ohiya withwelavo epaddi yomuzimuni baahi, ddiniyani nnahowelihu wilibihedha werana?

¹⁶ Ohiya baahi wilibihedha withwelavo epaddi yomuzimuni, nnohowela odidela okala makiristawu owithwelavo epaddi yomuzimuni. Eyo enatapulela wi nnohowela ohuthabwaga wiroromela. (1 Kor. 10:12) Ohiya eyo, nnohowela ‘odidela wipendda’  wihina nikanne ebaribari akala ninna wunnuwelavo epaddi yomuzimuni. — 2 Kor. 13:5.

17. Karta murumiwi Pawulo aalebenliye addibila ooKoloso, nnooniha aavi thima enna withwelavo epaddi yomuzimuni?

¹⁷ Karta murumiwi Pawulo aalebenliye akudda Kolosense ahiwoga wodhela muselu ola wodhowagave yithwelagavo epaddi yomuzimuni. Addibila ooKoloso yaali makiristawu owithwelavo epaddi yomuzimuni. Naarive dhigali ndo, murumiwi Pawulo ahawaddela wodhela yowopiha elivo yowubuwela ninga athu a mwilaboni. (Kol. 2:6-10) Teto Epafra, aanonne pamadhene addibila ale, owalobelela malabo aamateene wihina ‘ekale owakwanela,’ obe owithwelavo. (Kol. 4:12) Nnahudheravo ddi ni ethu erilena Pawulo vamodha ni Epafra? Murumiwi Pawulo ni Epafra yahinona wihina egi mukiristawu akaleve owithwelavo epaddi yomuzimuni enohoweleya wilibihedha vanlubale ni okaviheriwa ni Mulugu. Aliwa yafuna wihina addibila ooKoloso ekaleve makiristawu owithwelavo epaddi yomuzimuni, naarive efwanyiwaga makathamiho bi makathamiho mwigumi mwewa.

18. Ddiniyani enapadduwe mukiristawu owithwelavo epaddi yomuzimuni ahikala pasope? (Osugwe fotu.)

¹⁸ Murumiwi Pawulo ahawaddela makiristawu yaali mEberewu wihina mukiristawu ahikala pasope podi oyelela orumedhiwa ni Mulugu. Murima wa mukiristawu podi okala wovaadda ofiyedha ohithwaruwa ni ohirumedhiwa ni Yehova. Yapamaya sowihina makiristawu yaali mEberewu kiyafiyendhe werana ethu ninga yela. (Ebe. 6:4-9) Ki makiristawu enadduddumadha obe enatxosiwa, mbwenye wavira mudhidhi enathwaruwa ni enamuhogolowela Yehova? Aliwa bowiyeviha mwaha enothwaruwa yonihaga wi aliwa bohiyana ni ale murumiwi Pawulo aawogiliye wihina yere oyelela orumedhiwa ni Yehova. Ebaribari wihina aliwa yamuhogolowela Yehova enere ohowela okaviheriwa ni ale Yehova analabihedhiye. (Eze. 34:15, 16) Podi wera anamaholela mulogo enere omuthoma ddibila athotho wihina aakavihere athu yala ohogolowela okanna wandana wooliba ni Yehova.

19. Yoluba baani iyo aatene nnahowelihu okanna?

¹⁹ Akala we onna wilibihedha wihina okale mukiristawu owithwelavo epaddi yomuzimuni, we podi wanda wakwanihedha yoluba yawo! Odidele ohudhera ebaribari yoviteya enafwanyeya mBibiliyani ni wilibihedhege wubuwela ndala ninga Yehova. Vano akala we oli mukiristawu owithwelavo epaddi yomuzimuni, odhowegeve weragana ele onandiwe wihina okaleve mukiristawu owithwelavo epaddi yomuzimuni.